Ounyuni mupe paudaneko laKalunga
OMBIBELI, Eendjovo daKalunga da shangwa, otai tu pe eteelelo eshi tai ti: “Paudaneko laye fye hatu teelele eulu lipe nedu lipe omo tamu ka kala ouyuki.”—2 Petrus 3:13.
“Eulu lipe” oshike? Ombibeli otai kwatakanifa eulu nepangelo. (Oilonga 7:49) “Eulu lipe” olo epangelo lipe olo tali ka pangela edu alishe. Olipe molwaashi otali ka pingena po onghalelo yopaife yomapangelo; oli li yo onghatu ipe mokuwanifa po elalakano laKalunga. Olo Ouhamba oo Jesus e tu honga tu ilikane kombinga yao. (Mateus 6:10) Molwaashi Kalunga oye Odjo yalo noha kala meulu, ohali ifanwa ‘ouhamba womeulu.’—Mateus 7:21.
‘Edu lipe’ oshike? Kali fi opulaneta ipe, molwaashi Ombibeli otai popi sha yela tai ti kutya edu otali ka kalwa fiyo alushe. ‘Edu lipe’ olo oulipamwe mupe wovanhu. Otali ka kala lipe molwaashi ovakolokoshi otava ka kala va kufwa ko. (Omayeletumbulo 2:21, 22) Opo nee aveshe ovo ve na omwenyo otava ka fimaneka Omushiti nokudulika kuye notava ka kala metwokumwe noiteelelwa yaye. (Epsalme 22:28) Ovanhu vomoiwana aishe otava shivwa ve lihonge oiteelelwa oyo nokutwifa onghalamwenyo yavo metwokumwe nayo paife. Mbela osho to ningi ngaho?
Mounyuni mupe waKalunga, keshe umwe ota ka fimaneka epangelo laYe. Mbela ohole yoye yokuhola Kalunga otai ku linyengifa u dulike kuye? (1 Johannes 5:3) Mbela osho oshi liwetikile meumbo leni? koilonga ile kofikola? monghedi oyo to longifa onghalamwenyo yoye?
Mounyuni oo mupe, oulipamwe wovanhu otau ka kala wa hangana mokulongela Kalunga kashili. Mbela oho longele Omushiti weulu nedu? Mbela elongelokalunga loye otali ku hanganifa shili novalongelikalunga vakweni vomoiwana aishe, vomomihoko adishe nosho yo vomomalaka aeshe?—Epsalme 86:9, 10; Jesaja 2:2-4; Sefanja 3:9.
[Oshimhungu shi li pepandja 17]
Kalunga oo a udaneka oinima oyo
Oye Omushiti weulu lo venevene nowopulaneta yEdu. Oye oo Jesus Kristus e mu holola e li ‘aeke Kalunga kashili.’—Johannes 17:3.
Ovanhu vahapu ohava fimaneke oikalunga oyo va tota vo vene. Omamiliyona ohaa ilikana oihongwafano i he na omwenyo. Vamwe ohava fimaneke omahangano opanhu, oufilosofi u na sha nokulalakanena omaliko ile omahalo avo vene. Nokuli naavo tava ti kutya ohava longifa Ombibeli ihava fimaneke edina laao tai popi e li “Kalunga kashili.”—Deuteronomion 4:35, NW.
Shi na sha naye mwene, Omushiti ota ti: “Aame [Jehova, NW] olo edina lange.” (Jesaja 42:5, 8) Edina olo ola holoka mOmbibeli oikando 7 000 lwaapo momalaka ayo opehovelo. Jesus Kristus okwa honga ovashikuli vaye va ilikane tava ti: “Tate yetu ou u li meulu! Edina loye nali yapulwe.”—Mateus 6:9.
Kalunga kashili omunhu a tya ngahelipi? Ote lihokolola ye mwene e li “omunefilonghenda, Kalunga omunanghenda, omunanheni, nomunene mouwanghenda nomoudiinini” nosho yo oo iha efa okuhandukila ovo tava nyono owina oipango yaye. (Exodus 34:6, 7) Ondjokonona i na sha nokuungaunga kwaye novanhu otai koleke oushili weendjovo odo.
Edina nosho yo omunhu oo e lilwe po kedina olo oku na okuyapulwa ile okutalika ko muyapuki. E li Omushiti nOmunamapangelo aeshe, otu na okudulika kuye nokwa wana okulongelwa kufye. Mbela oho mu ningile aishe oyo pauhandimwe?
[Oshimhungu/Efano li li pepandja 18]
Omalunduluko elipi “eulu lipe nedu lipe” tali ka eta?
Edu otali ka lundulukila mOparadisa Lukas 23:43
Oulipamwe womounyuni aushe omo Johannes 13:35;
ovanhu vomoiwana aishe, Ehololo 7:9, 10
vomihoko adishe nosho yo
vomomalaka aeshe tava ka hangana mohole
Ombili yomounyuni aushe, Epsalme 37:10, 11;
eameno lashili kwaaveshe Mika 4:3, 4
Oilonga tai mbilipaleke, Jesaja 25:6; 65:17, 21-23
oikulya ya wana
Omikifi, oluhodi nefyo Jesaja 25:8;
otai ka kufwa po Ehololo 21:1, 4
Ounyuni wa hangana Ehololo 15:3, 4
mokulongela Kalunga kashili
[Oshimhungu/Omafano e li pepandja 19]
Mbela oto ka mona mo ouwa?
Kalunga iha fufya!—Titus 1:2.
Jehova okwa ti: “Ondjovo yange . . . itai alukile kuame oshimha, ndelenee otai longo osho sha wapalela nge, ndee tai wanifa eshi nde i tumina.”—Jesaja 55:11.
Jehova ota shiti nale “eulu lipe nedu lipe.” Epangelo lomeulu ola dikwa po nale. Ekanghameno li na sha “nedu lipe” ola tulwa po nale.
Konima yokupopya shi na sha noinima imwe ikumwifi oyo “eulu lipe nedu lipe” tali ka etela ovanhu, Ehololo otali tofa mo Kalunga mwene, Omunamapangelo aeshe, ta ti: “Tala, aishe ohandi i shitukifa i ninge ipe.” Nokwa ti yo kutya: “Shanga, osheshi eendjovo edi odo doshili di shii kulineekelwa.”—Ehololo 21:1, 5.
Epulo la fimanenena ololo kutya: Mbela fyeni ohatu ningi omalunduluko oo a pumbiwa opo tu kale twa valulwa twa wana okukala oshitukulwa ‘shedu lipe’ tali pangelwa ‘keulu lipe’?