Onghundana yOuhamba Onomola 37

Etumwalaka kounyuni aushe

Omalongelokalunga oipupulu oku li pokuxulifwa po!

▪ Ongahelipi to dulu okudidilika mo omalongelokalunga oipupulu?

▪ Otaa ka xulifwa po ngahelipi?

▪ Mbela oto ka xupa ngoo eshi omalongelokalunga oipupulu taa ka xulifwa po?

Ongahelipi to dulu okudidilika mo omalongelokalunga oipupulu?

Mbela oho kala wa kenyanana kekaulo lonyanga olo la etifwa komalongelokalunga? Mbela oho kala wa handuka ngeenge ovo tave liti kutya otava longele Kalunga tava kufa ombinga moita, moukulo nosho yo moulingilingi? Omolwashike omalongelokalunga taa monika a fa taa etifa omaupyakadi mahapu?

Omaupyakadi a tya ngaho otaa etifwa komalongelokalunga oipupulu, ndele hakelongelokalunga lashili. Omulongelikalunga umwe a fimana nokwa shiivika apeshe, Jesus Kristus, okwa popya kutya omalongelokalunga oipupulu ohaa ningifa ovanhu va longe oilonga ii, ngaashi ashike ‘omuti mwii hau imi oiimati ii.’ (Mateus 7:15-17) Omalongelokalunga oipupulu ohaa imike oiimati ii ilipi?

Oiimati ii oyo tai didilikifa omalongelokalunga oipupulu

◼ OMALONGELOKALUNGA OIPUPULU OHAA KUFA OMBINGA MOITA NOHAE LIDOPO MOINIMA YOPAPOLOTIKA: Oshifokundaneki Asiaweek osha ti: “MuAsia alishe nosho yo moilongo ikwao i lili, ovawiliki ovo va hala eenghonopangelo dinene ohava longifa nekonda omaliudo ovanhu opalongelokalunga opo va wanife po omahalo avo opaumwene.” Nomolwaasho oshifokundaneki osho osha londwela tashi ti: “Ounyuni ou li pokupwiduka.” Omuwiliki umwe welongelokalunga a shiivika nawa mOilongo yaHangana yaAmerika okwa ti: “Oikulo aishe oi na okudipawa po opo paha kale vali omadipao.” Mbela okwa li a diladila shi ningwe ngahelipi? Okwa weda ko a ti: “Oikulo aishe nai dipawe po medina lOmwene.” Mepingafano naasho, Ombibeli otai ti: “Ngenge pe na ou ta ti: Ame ondi hole Kalunga, ndee ta tondo omumwaxe, ye omunaipupulu.” (1 Johannes 4:20) Jesus okwa ti nokuli: “Holeni ovatondi veni.” (Mateus 5:44) Ou shii omalongelokalunga angapi oo oilyo yao hai kufa ombinga moita?

◼ OHAA HONGO OVANHU OMAHONGO OIPUPULU: Omalongelokalunga mahapu ohaa hongo kutya ovanhu ove na omwenyo ile omhepo oyo i li oshinima ihashi monika ndele ohashi xupu po ngeenge olutu lomunhu la fi. Omolwehongo la tya ngaho, omalongelokalunga mahapu ohaa lile oilyo yao moku i futifa oimaliwa i na sha nokwiilikanena eemwenyo dovanhu ovo va fya. Ndele Ombibeli itai tu kumwe naasho. Mepingafano naasho, Ombibeli otai ti: “Omwenyo tau nyono u nokufya.” (Hesekiel 18:4) ‘Ovanamwenyo ove shi shii nokutya ove nokufya. Ndelenee oonakufya inava shiiva nande sha.’ (Omuudifi 9:5) Jesus okwa honga kutya oonakufya otava ka nyumuka. Ndele ngeno ovanhu ova li ve na shili omwenyo ihau fi, ngeno enyumuko inali pumbiwa. (Johannes 11:11-25) Mbela elongelokalunga omo u li ohali hongo ovanhu kutya omwenyo ihau fi?

◼ OHAE LIPWILILIKILE OLUHAELO: Moilongo imwe, omalongelokalunga amwe ohaa nangeke po omashenge ovalumenhu novakainhu e li ovawiliki meengeleka dao, nohaa kondjifa omapangelo a pitike eehombo dovanhu voukashike kookanhu wa faafana. Nokuli nomalongelokalunga oo ihaa popile oluhaelo ohae lipwililikile ovawiliki veengeleka dao ovo hava hepeke ounona pamilele. Ndele mbela Ombibeli otai ti shike shi na sha noluhaelo? Otai popi sha yela kutya: “Inamu puka, ovahaeli novakaleli voikalunga novanyoni vohombo nomashenge novahaeli vomashenge . . . itava fyuulula ouhamba waKalunga.” (1 Ovakorinto 6:9, 10) Mbela ou shii omalongelokalunga oo hae lipwililikile oluhaelo?

Hauxuuninwa, oshike tashi ka ningilwa omalongelokalunga oo haa imike oiimati ii? Jesus okwa londwela a ti: “Okeshe tuu omuti ihau ima oiimati iwa, otau kewa po ndee tau ekelwa momundilo.” (Mateus 7:19) Osho osha hala okutya omalongelokalunga oipupulu otaa ka hanaunwa po filufilu! Ndele onaini nongahelipi tashi ka ningwa? Enyamukulo kepulo olo otali hangwa memoniko lopaxunganeko li li membo lEhololo, etukulwa 17 no 18.

Omalongelokalunga oipupulu otaa ka xulifwa po ngahelipi?

Diladila kwaashi: Ombwada i li omutumba koshilyani shitilifi. Oshilyani oshi na omitwe heyali neembinga omulongo. (Ehololo 17:1-4) Mbela ombwada oyo otai faneke shike? Ombibeli otai tu kwafele tu mone kutya ombwada oyo otai faneke ouhamba womalongelokalunga oipupulu womounyuni aushe, molwaashi otai hokololwa kutya ohai nwefa mo ‘eehamba adishe dokedu,’ oya djala oikutu itilyana youhamba, ohai twimine omatwimino, nosho yo kutya oi na oupuna muhapu. Kakele kaasho, ohai ‘hongaula oiwana aishe’ noupule wayo. (Ehololo 17:18; 18:12, 13, 23) Kungaha, osha yela kutya ombwada oyo itai faneke ashike elongelokalunga limwe alike, ndele otai faneke omalongelokalunga aeshe oo haa imike oiimati ii.

Oshilyani osho shi liwe omutumba kombwada otashi faneke omapangelo omounyuni opapolotika.a (Ehololo 17:10-13) Omalongelokalunga oipupulu okwa londa koshilyani osho, meityo olo kutya, ohaa nwefa mo omatokolo omapangelo noku a lombwela osho e na okuninga.

Ndele mafiku otapa ka ningwa oshiningwanima shikumwifi. Ombibeli oya xunganeka kutya: “[Eembinga] odo omulongo we di mona, noshiliyani, ovo tava ka tonda ombwada ndee tave i dula, tai kala hamuhele ndee tava li ombelela yayo, ndee tave i xwike momundilo.” (Ehololo 17:16) Omapangelo opapolotika otaa ka ponokela ombadilila nomonghedi ikumwifi omalongelokalunga oipupulu noku a hanauna po filufilu. Mbela oshike tashi ke linyengifa omapangelo opapolotika a katuke onghatu ya tya ngaho? Embo lEhololo otali nyamukula tali ti: ‘Kalunga okwe shi tula momitima davo, va wanife omhangela yaye.’ (Ehololo 17:17) Heeno, Kalunga ota ka katukila onghatu omalongelokalunga oipupulu omolwoilonga yao inyanyalifi oyo a kala taa longo medina laye. Eshi ta ka katuka onghatu oyo i li pauyuki, ota ka longifa omapangelo opapolotika e li oshilongifo shaye shokuhanauna po omalongelokalunga oipupulu, nonande omalongelokalunga oo okwa kala a panga oukaume nomapangelo opapolotika.

Mbela ou na okuninga shike ngeenge ino hala oku ka hanaunwa po pehanauno lomalongelokalunga oipupulu? Omutumwa umwe waKalunga ota ladipike ovanhu ta ti: ‘Djeni mo musho, nye ovanhu vange!’ (Ehololo 18:4) Doshili, paife olo efimbo lokufiya po omalongelokalunga oipupulu. Mbela osho osha hala okutya katu na okukala oilyo yelongelokalunga nande olimwe ile kutya katu na okwiitavela muKalunga? Hasho sha hala okutya ngaho, molwaashi ovo inava itavela Kalunga ile ihave mu longele navo otava ka hanaunwa po. (2 Ovatessaloniki 1:6-9) Ponhele yaasho, otu na okukala melongelokalunga lashili, ngeenge otwa hala oku ka xupa. Ndele mbela ongahelipi to dulu okudidilika mo elongelokalunga lashili?

Nghee elongelokalunga lashili tali dulu okudidilikwa mo

Elongelokalunga lashili ohali imike oiimati iwa ilipi? — Mateus 7:17.

Oiimati iwa oyo tai didilikifa elongelokalunga lashili

◼ OVALONGELIKALUNGA VASHILI OVE HOLAFANE: Ovalongelikalunga vashili “kave fi oshitukulwa shounyuni,” kave na oukwamuhoko, ndele ove “holafane.” (Johannes 13:35; 17:16, NW; Oilonga 10:34, 35) Ponhele yokudipaafana, ohava yandjele ovamwaxe eemwenyo davo, tave shi ningi nehalo liwa. — 1 Johannes 3:16.

◼ OVE LINEEKELA EENDJOVO DAKALUNGA: Ponhele yokuhonga ‘eenghulunghedi’ nosho yo “oipango yovanhu,” ehongo lavo ola kanghamena kEendjovo daKalunga, Ombibeli. (Mateus 15:6-9) Omolwashike mbela? Omolwaashi ‘Omishangwa adishe oda yandjwa keenghono domhepo yaKalunga nodi shii okulonga nokukumaida nokupukulula.’ — 2 Timoteus 3:16.

◼ OHAVA KALA NOMAUKWANEUMBO E NA OMAKWATAFANO A KOLA NOHAVA DIININE OMIFIKAMHANGO DOPAENGHEDI DA DENGA MBADA: Elongelokalunga lashili ohali hongo ovalumenhu va kale “nokuhola ovakainhu vavo ngaashi omalutu avo vene,” novakainhu va kale va ‘fimaneka ovalumenhu vavo,’ nosho yo ounona va ‘dulike kovakulunhu vavo.’ (Ovaefeso 5:28, 33; 6:1) Kakele kaasho, ovo ve na oinakuwanifwa yokukwatela komesho momaongalo ova teelelwa va kale ve na oihopaenenwa iwa ngeenge tashi uya pelihumbato lopaenghedi. — 1 Timoteus 3:1-10.

Mbela ope na ngoo elongelokalunga olo li li metwokumwe nomifikamhango odo? Embo Holocaust Politics, la nyanyangidwa mo 2001, ola ti: “Ngeno ovanhu vahapu ova li hava tula moilonga omahongo Eendombwedi daJehova nokuhopaenena oikala yado, ngeno edipao linene olo la ningwa koNazi, ngeno inali ningwa, nosho yo ngeno mounyuni itamu kala omadipao opamihoko.”

Eendombwedi daJehova, odo di li moilongo 235, ihadi udifa ashike omifikamhango dopaenghedi odo di li mOmbibeli, ndele ohadi kala yo metwokumwe nado. Oto ladipikwa u pule Eendombwedi daJehova di ku kwafele u lihonge osho Kalunga a hala u ninge, opo u mu longele monghedi ya yuka. Paife olo efimbo lokukatuka eenghatu. Ino ongaonga, molwaashi omalongelokalunga oipupulu oku li pokuxulifwa po! — Sefanja 2:2, 3.

Ngeenge owa hala okuuda ouyelele muhapu shi na sha netumwalaka lOmbibeli olo hali udifwa kEendombwedi daJehova, oto dulu okushangela kEendombwedi daJehova, to longifa ondjukifi oyo i li pedu.

□ Kwafelei nge mu tumine nge oshishangomwa Kaleni oupafi!

□ Onda hala yo ekonakonombibeli loshali lopeumbo.

[Eshangelo pepandja]

[omusholondodo pepandja 3]

Omalongelokalunga oipupulu ohaa nwefa mo ‘eehamba adishe dokedu’

[omusholondodo pepandja 3]

‘Djeni mo musho, nye ovanhu vange!’