OSHILESHWA 13
Nghee omalongelokalunga oipupulu a popya oipupulu kombinga yaKalunga
Ngeenge Kalunga ohole, omolwashike omalongelokalunga oo taa ti kutya otae mu longele, haa longo oinima ii ihapu? Omalongelokalunga oo ooipupulu, nohaa popi oipupulu kombinga yaKalunga. Osho ohae shi ningi ngahelipi? Mbela Kalunga oku a uditile ngahelipi? Nota ka ninga po shike shi na sha nao?
1. Ongahelipi omalongelokalunga oipupulu haa hongo oipupulu kombinga yaKalunga?
Omalongelokalunga oipupulu, ponhele yokwiitavela oshili kombinga yaKalunga, okwa “itavela oipupulu.” (Ovaroma 1:25) Pashihopaenenwa, omalongelokalunga mahapu inaa honga oilyo yao edina laKalunga. Ashike Ombiibeli oya ti kutya ovanhu ove na okulongifa edina laKalunga. (Ovaroma 10:13, 14) Ovawiliki vomalongelokalunga vamwe ohava ti kutya ehalo laKalunga, ngeenge pa ningwa sha shii. Ashike oyo oipupulu. Kalunga haye nandenande omweetifi woinima ii. (Lesha Jakob 1:13.) Shi nyikifa oluhodi, oipupulu yomalongelokalunga oya ehenifa ovanhu kokule naKalunga.
2. Ongahelipi omalongelokalunga oipupulu a ulika okupitila meenghatu dao kutya kae na oshili?
Omalongelokalunga oipupulu ihaa ungaunga novanhu ngaashi Jehova ha ungaunga navo. Ombiibeli oya ti kutya ‘oulunde womalongelokalunga oipupulu owa hapupala.’ (Ehololo 18:5) Oule womido omafele, omalongelokalunga okwa kala taa kufa ombinga moinima yopapolotika, taa yambidida oita nokwa etifa efyo lovanhu vahapu. Ovawiliki vomalongelokalunga vamwe ova hala okupunapala, onghee ohava pula oilyo yavo i va pe oimaliwa. Eenghatu odo otadi ulike kutya kave shii Kalunga noitava dulu oku mu kalela po.— Lesha 1 Johannes 4:8.
3. Kalunga oku uditile ngahelipi omalongelokalunga oipupulu?
Ngeenge oho udifwa nai koinima oyo tai ningwa komalongelokalunga oipupulu, mbela oto diladila kutya Kalunga oha kala e udite ngahelipi? Oku hole ovanhu, ashike oha kala a handukila ovawiliki vomalongelokalunga ovo tava ti kutya otave mu longele, ashike ihava ungaunga nawa noilyo yavo. Okwa udaneka kutya ota ka hanauna po omalongelokalunga oipupulu ‘noitaa ka monika vali nandenande.’ (Ehololo 18:21) Mafiku, Kalunga ota ka xulifa po omalongelokalunga aeshe oipupulu.— Ehololo 18:8.
KONAKONA MOULE
Lihonga shihapu shi na sha nanghee Kalunga e udite kombinga yomalongelokalunga oipupulu. Lihonga yo kombinga yaasho omalongelokalunga oo a ninga nosho yo kutya omolwashike osho shihe na oku ku imba u lihonge kombinga yaJehova.
4. Kalunga ina hokwa omalongelokalunga aeshe
Ovanhu vahapu ova itavela kutya omalongelokalunga okwa fa eendjila da yoolokafana, odo tadi twala kuKalunga. Ndele mbela osho oshoshili ngoo? Lesha Mateus 7:13, 14, ndele tamu kundafana epulo tali shikula:
Ombiibeli oya popya shike shi na sha nondjila oyo tai twala komwenyo?
Dana OKAVIDIO, ndele tamu kundafana epulo tali shikula.
Mbela Ombiibeli oya ti kutya ope na omalongelokalunga mahapu oo taa hafifa Kalunga?
5. Omalongelokalunga oipupulu kae na ohole ngaashi Kalunga
Omalongelokalunga oo okwa ulika meenghedi dihapu kutya ihaa dulika kuKalunga. Onghedi imwe inyanyalifi omo e shi ulika omokukufa ombinga moita. Opo u mone oshihopaenenwa shimwe, dana OKAVIDIO, ndele tamu kundafana omapulo taa shikula.
Eengeleka dihapu oda dana onghandangala ilipi, pefimbo lOita Itivali yOunyuni?
Ou uditile ngahelipi onghandangala oyo da dana?
Lesha Johannes 13:34, 35; 17:16. Ndele tamu kundafana omapulo taa shikula:
Jehova oku na okukala e udite ngahelipi, ngeenge omalongelokalunga taa kufa ombinga moita?
Omalongelokalunga oipupulu okwa longa oinima ii ihapu. Omeenghedi dilipi wa mona omalongelokalunga a dopa okuhopaenena ohole yaKalunga?
Omalongelokalunga oipupulu kae na ohole ngaashi Kalunga
6. Kalunga okwa hala okumangulula ko ovanhu komalongelokalunga oipupulu
Lesha Ehololo 18:4,a ndele tamu kundafana epulo tali shikula:
Ou udite ngahelipi eshi wa shiiva kutya Kalunga okwa hala okukwafela ovanhu pauhandimwe, ovo va pukifwa komalongelokalunga oipupulu?
7. Twikila okulihonga kombinga yaKalunga kashili
Mbela omalongelokalunga oipupulu oku na okukuma etaleko loye li na sha naKalunga? Diladila komonamati oo ina tambula ko ewiliko lopandunge olo a pewa kuxe. Okwa fiya po eumbo, ndele ta ka kala nonghalamwenyo inai koshoka. Xe ina hokwa eenghatu domonamati. Omolwashike inashi yuka okupa xe ombedi, omolwonghedi yokukalamwenyo inai yuka oyo omona a hoolola?
Mbela osha yuka ngoo okupa Jehova ombedi nokweefa po oku mu longela omolweenghatu domalongelokalunga oipupulu?
VAMWE OHAVA TI: “Inandi hala okulihonga kombinga yaKalunga, molwaashi omalongelokalunga okwa etifa omaupyakadi mahapu neenghono.”
Mbela naave osho u udite ngaho?
Omolwashike eenghatu domalongelokalunga oipupulu dihe na oku kuma etaleko letu li na sha naJehova?
ENGONGO
Omalongelokalunga oipupulu okwa pukifa ovanhu shi na sha naKalunga okupitila mokulonga oilonga ii nosho yo momahongo ao oipupulu. Kalunga ota ka hanauna po omalongelokalunga a tya ngaho.
Eendululo
Ou uditile ngahelipi omahongo omalongelokalunga oipupulu nosho yo eenghatu dao?
Jehova oku udite ngahelipi shi na sha nomalongelokalunga oipupulu?
Kalunga ota ka ningila shike omalongelokalunga oipupulu?
TALA OUYELELE WA WEDWA PO
Lihonga eenghedi mbali omo omalongelokalunga mahapu a nyemateka Kalunga.
Omolwashike Jehova a hala tu mu longele pamwe navamwe?
“Mbela osha fimana ngoo okukala melongelokalunga la unganekwa?” (Oshitukulwa shi li ko jw.org)
Omupristeri a li a limbililwa shi na sha nelongelokalunga laye. Ndele osho kasha li she mu imba e lihonge oshili kombinga yaKalunga.
“Osho sha ningifa omupristeri a fiye po ongeleka yavo” (Kala oupafi!, Februali 2015)
Oule womido omafele, omalongelokalunga oipupulu okwa kala taa lombwele ovanhu oipupulu kombinga yaKalunga, noku va itavelifa kutya Kalunga ke na ko nasha nafye nomukwanyanya. Lihonga oshili kombinga yoipupulu oyo yopatatu.
a Opo u mone kutya omolwashike omalongelokalunga oipupulu taa popiwa mEhololo e li omukainhu oo ta ifanwa Babilon Shinene, tala Omafatululo oitya, oshitwa 1.