Oshike to ka uda nokumona pokwoongala kwetu kwopaKriste?

Ovanhu vahapu ihava i vali keengeleka molwaashi kave wete tashi kwafa sha noihava kala ve udite va hekelekwa. Ndele mbela omolwashike to ladipikwa u uye kokwoongala kwopaKriste kwEendombwedi daJehova? Oshike to ka uda nokumona kokwoongala kwa tya ngaho?

Okwoongala oko ohaku kala kuhafifa, novanhu ohava ulikilafana ohole. Ovakriste vonale ova li va unganekwa momaongalo, va li hava ongala pamwe opo va longele Kalunga nokukonakona Omishangwa nosho yo okutwaafana omukumo. (Ovaheberi 10:24, 25) Ova li hava kala ve udite ouumbo, molwaashi ova li hava ongala nOvakriste vakwao ovo ve na ohole, nova li va panga oukaume novamwaxe ovo vopamhepo. (2 Ovatessaloniki 1:3; 3 Johannes 14) Eendombwedi daJehova kunena ohadi landula oshihopaenenwa shOvakriste ovo vonale nohadi hafele yo okwoongala kwado.

Ouwa oo hau di mokutula moilonga omafinamhango Ombibeli. Ngaashi sha li hashi ningwa pefimbo lOmbibeli, kunena nafye ohatu ongala pamwe atushe, ovashamane, ovakulukadi nounona. Pokwoongala kwa tya ngaho, ovalumenhu ovo ve li ovahongi va pyokoka ohave tu kwafele tu mone nghee hatu dulu okutula moilonga omafinamhango Ombibeli mokukalamwenyo kwetu. (Deuteronomion 31:12; Nehemia 8:8) Ohapa kala yo oitukulwa omo ovapwilikini aveshe tava dulu okukufa ombinga muyo nohapa imbwa yo omaimbilo, nokungaho ohashi tu pe omhito tu hepaulule eteelelo letu lopaKriste. — Ovaheberi 10:23.

Okwoongala oko ohaku pameke eitavelo letu. Omuyapostoli Paulus okwa li a shangela eongalo limwe lopefimbo laye a ti: “Onda djuulukwa oku mu mona, . . . mu pamekwe, nokutya, ngenge tu lieni pamwe, ame ndi hekelekwe keitavelo letweni, oleni nolange.” (Ovaroma 1:11, 12) Nafye kunena ohatu pamekwa ngeenge hatu ongala pandjikilile novaitaveli vakwetu, nohashi tu kwafele tu kale twa tokola toko okukala metwokumwe nomifikamhango dopaKriste.

Omolwashike ito ongala pamwe nafye oshikando tashi uya opo u liudile ko nou limonene ko ove mwene kutya okwoongala kwetu ohaku ningwa naanaa monghedi ya tya ngahelipi? Shilipalekwa kutya oto ka tambulwa ko nombili. Ihaku umbwa ongalo nandenande. Keshe ou a hala okwa manguluka okukala pokwoongala kwa tya ngaho nopehe na ofuto yasha.

• Onghedi omo hatu ningi okwoongala kwetu oye likolelela koshihopaenenwa shilipi?

• Ouwa ulipi hatu ka mona ngeenge otwa kala hatu kala pokwoongala kwopaKriste?