Pilatus okwa tya kuvo: “Taleni, omulumenhu oye ou!”

Pilatus okwa li a lombwela ongudu yovanhu oyo ya li ya hala okudipaa Jesus, a ti: “Inandi mona etimba li na sha naasho tamu mu popile. Herodes naye ine mu mona etimba.” (Lukas 23:14, 15) Opo Pilatus a kendabale okuxupifa Jesus, okwa li a longifa onghedi imwe vali, ndele ta ti kuvo: “Oshi li onghedindjikilile oku mu mangululila omulumenhu umwe pOpaasa. Inamu hala ndi mu mangululile Ohamba yOvajuda?” — Johannes 18:39.

Pilatus okwa li e shii omunadolongo Barabas, oo a shiivika e li ombudi, omutwindubo nosho yo omudipai. Onghee Pilatus okwe va pula a ti: “Olyelye mwa hala ndi mu mangululile, oBarabas ile oJesus, ou taku tiwa oKristus?” Molwaashi ova li va nwefwa mo kovapristeri ovakulunhu, ovanhu ova pula Barabas oye a mangululwe ponhele yaJesus. Pilatus okwa pula a ti: “Pwaava vavali, olyelye mwa hala ndi mu mangululile?” Ova tya: “OBarabas.” — Mateus 27:17, 21.

Pilatus okwa li a uda nai ndele ta pula ta ti: “Oshike ndi na okuninga po shi na sha naJesus, ou taku tiwa oKristus?” Ovanhu ova ti: “Na valelwe komuti!” (Mateus 27:22) Ova li va hala okudipaifa omulumenhu oo ehe na etimba lasha. Pilatus okwa pula a ti: “Omolwashike? Omulumenhu ou okwa longa owii washike? Inandi mona sha muye shoku mu dipaifa; onghee ohandi mu dengifa ashike, ndele handi mu mangulula.” — Lukas 23:22.

Nonande Pilatus okwa li ta ningi eenghendabala opo Jesus a mangululwe, ongudu yovanhu oya twikila okwiingida tai ti: “Na valelwe komuti!” (Mateus 27:23) Ovawiliki vomalongelokalunga ova li va twa ovanhu omaminimini opo va kale va hala okudipaifa Jesus. Kava li va hala ohonde yomukolokoshi ile yomudipai. Ndele ponhele yaasho, ova li va hala ohonde yomulumenhu oo ehe na etimba, oo a li a hambelelwa muJerusalem onga Ohamba oule womafiku atano a ya. Ngeenge ovahongwa vaJesus opo va li, ova li ashike va mwena.

Pilatus okwa li a mona kutya eenghendabala daye itadi ti sha. Ofimbo ongudu ya li tai ningi omaweelelo, okwa kufa omeva ndele ta kosho omake aye moipafi yongudu yovanhu. Okwe va lombwela a ti: “Ame nghi na etimba lohonde yomulumenhu ou. Taleni kutya otamu mu ningi ngahelipi.” Osho kasha li sha lundulula etaleko lavo. Ponhele yaasho, ova twikila ko tava ti: “Ohonde yaye nai uye kombada yetu nokombada yovana vetu.” — Mateus 27:24, 25.

Pilatus okwa li a hoolola oku va hafifa ponhele yokuninga osho e shii kutya oshi li mondjila. okwa li e va mangululila Barabas ngaashi va li va pula. Ova li va dula Jesus noku mu dengifa.

Konima eshi Jesus a dengwa edengo linyanyalifi, ovakwaita ova li ve mu twalwa mombala yaPilatus. Etangakwaita alishe ola li la ongala nokuungaunga nai naye. Ova li va tunga oshishani shomakiya noku shi mu djaleka komutwe waye. Ova li va pa Jesus olumbungu meke laye lokolulyo noku mu kambeka elapi loluvala lopeepela olo la li hali djalwa keehamba. Ove mu sheka tava ti: “Kundwa, oove Ohamba yOvajuda!” (Mateus 27:28, 29) Natango, ova li va fiila Jesus omate noku mu denga nomanghava moshipala. Ove mu kufa olumbungu noku li mu dengifa momutwe, naasho osha ningifa “oshishani shomakiya” shi mu twe nai.

Eshi Jesus e lididimikila eenghalo adishe odo, osha li sha kumwifa Pilatus ndele ta kongo po vali ondunge imwe yokuulika kutya ye ke na ondjo, a ti: “Taleni, omulumenhu ou ohandi mu eta kunye opo mu shiive kutya ame inandi mu mona ondjo yasha.” Mbela Pilatus okwa li ta diladila kutya ngeenge okwa eta Jesus pondje ta shisha ohonde ongudu yovanhu otai ka lundulula etaleko layo? Ofimbo Jesus a fikama komesho yongudu oyo, Pilatus okwa tya kuyo: “Taleni, omulumenhu oye ou!” — Johannes 19:4, 5.

Nonande Jesus okwa li a ehamekwa, okwa li a ulika oukwatya u didilikwedi eshi a li a mwena nokwa ngungumana, na Pilatus okwa li e shi didilika molwaashi eendjovo daye oda ulika kutya okwe mu fimaneka nokwa li e mu uditile oukwao wananghali.