Nghee twa unganekwa tu longe ehalo laJehova

MOUNYUNI aushe omu na omahangano mahapu opalongelokalunga, opapolotika, opangeshefa nosho yo opanghalafano, oo e na omalalakano, omataleko nomadiladilo opanhu a yoolokafana. Ashike ope na ehangano limwe olo la yooloka ko filufilu kwaao. Eendjovo daKalunga otadi ulike kutya ehangano olo ehangano lEendombwedi daJehova.

² Oshihafifa eshi wa ninga oshilyo shehangano laJehova. Owa mona kutya ehalo laKalunga olilipi, nopaife oto li longo. (Eps. 143:10; Rom. 12:2) Ou li omuudifi e lipyakidila to longo pamwe novamwaxo ovanahole mounyuni aushe. (2 Kor. 6:4; 1 Pet. 2:17; 5:9) Ngaashi sha udanekwa mEendjovo daKalunga, osho otashi ku etele omanangeko noupuna mahapu nosho yo ehafo linene. (Omayel. 10:22; Mark. 10:30) Mokulonga ehalo laJehova noudiinini paife, oto lilongekidile onakwiiwa itunhula oyo tai ka kalelela. — 1 Tim. 6:18, 19; 1 Joh. 2:17.

³ Omushiti wetu Munenenene Jehova oku na ehangano lomounyuni aushe le likalekelwa noye mwene te li wilike. Otwe lineekela filufilu muYe molwaashi oye Omutokoli, Omuyandjimhango nOhamba yetu. (Jes. 33:22, yelekanifa no-NW.) Molwaashi oku li Kalunga kelandulafano, okwa ninga omalongekido opo tu ‘longe pamwe naye’ eshi ta wanifa po elalakano laye. — 2 Kor. 6:1, 2.

⁴ Eshi exulilo longhalelo yoinima ei tali ehene popepi neenghono, ohatu xumu komesho okupitila mewiliko lOhamba oyo ya nangekwa po, Kristus Jesus. (Jes. 55:4; Eh. 6:2; 11:15) Jesus okwa li a xunganeka kutya ovashikuli vaye otava ka longa oilonga i dule oyo a longa eshi a li ta wanifa po oukalele waye kombada yedu. (Joh. 14:12) Osho osha li tashi ka ningwa molwaashi omuvalu wovashikuli vaJesus owa li tau ka hapupala nova li tava ka longa oshitukulwa shinene. Ova li tava ka udifa onghundana iwa yOuhamba mounyuni aushe. — Mat. 24:14; 28:19, 20; Oil. 1:8.

⁵ Oushili oo ou liwetikile nokuli nale. Ndele ngaashi Jesus a popya, oilonga yokuudifa onghundana iwa otai ka xula po peufwafimbo laJehova. Omaxunganeko oo e li mEendjovo daKalunga otaa ulike kutya efiku linene nolitilifa ola ehena popepi. — Joel 2:31; Sef. 1:14-18; 2:2, 3; 1 Pet. 4:7.

⁶ Molwaashi otwa shiiva ehalo laJehova pefimbo eli lexulilo, otwa pumbwa okuninga eenghendabala da mana mo opo tu kale hatu longo ehalo laye. Osho otashi pula tu shiive nawa nghee ehangano laKalunga hali longo nokulongela kumwe nalo filufilu. Ehangano ohali longo she likolelela komafinamhango opamishangwa, mwa kwatelwa eemhango, oipango, omalombwelo, omaufomhango nosho yo omahongo oo e li mEendjovo daKalunga da nwefwa mo. — Eps. 19:7-9.

⁷ Ngeenge oshiwana shaJehova osha dulika kewiliko olo le likolelela kOmbiibeli, ohashi kala pamwe nombili nokulonga moukumwe. (Eps. 133:1; Jes. 60:17; Rom. 14:19) Oshike hashi pameke ekwatafano lovamwatate keshe pamwe? Ohole. Molwaashi otu na ohole, ohatu ungaunga novamwatate she likolelela kohole. (Joh. 13:34, 35; Kol. 3:14) Kungaho, ohatu endele pamwe noshitukulwa shehangano laJehova shomeulu, molwaashi oshi li ehalo laye.

OSHITUKULWA SHEHANGANO LAJEHOVA SHOMEULU

⁸ Ovaprofeti ngaashi Jesaja, Hesekiel naDaniel ova li va mona omamoniko e na sha noshitukulwa shehangano laJehova shomeulu. (Jes., etuk. 6; Hes., etuk. 1; Dan. 7:9, 10) Sha faafana, omuyapostoli Johannes okwa mona emoniko li na sha nelongekido lomeulu ngaashi sha popiwa membo lEhololo. Okwa mona Jehova e li kolukalwapangelo laye a dingililwa kovaengeli, tava ingida tava ti: “Omuyapuki, Omuyapuki, Omuyapuki, Omwene Kalunga, Omunaenghono adishe, ou a li ko noku li ko ndele te uya.” (Eh. 4:8) Johannes okwa mona yo Odjona yaKalunga Jesus Kristus ‘i li mokati kolukalwapangelo.’ — Eh. 5:6, 13, 14; Joh. 1:29.

⁹ Emoniko li na sha naJehova e li omutumba kolukalwapangelo otali ulike kutya oye Omutwe wehangano laye. Omafimbo otete 29:11, 12, okwa popya shi na sha nondodo yaye ya tumbala, a ti: “Omwene, ounene owoye, neenghonopangelo odoye, noshinge oshoye, nouyelele owoye nepangelofimano oloye, heeno, aishe yomeulu nokombada yedu oyoye. Oshilongo oshoye Omwene, ndele Oove Omupangeli waaishe! Oupuna nefimano tali di kwoove, ndele Ove ho pangele ashishe. Ndele meke loye omu neenghono nepangelonghono. Ndele momapangelelo eke loye hamu di enenepeko neyombamo.”

¹⁰ E li omulongi pamwe naJehova, Jesus Kristus okwa pewa ondodo ya tumbala meulu nokwa pewa eenghono. Kalunga “aishe okwe i tula koshi yeemhadi daye, ndele okwe mu pa a kale omutwe waaishe keongalo.” (Ef. 1:22) Omuyapostoli Paulus okwa popya kombinga yaJesus a ti: “Kalunga okwe mu lenga, nokwe mu luka edina li li kombada yomadina aeshe, opo aveshe ve nokutwa eengolo medina laJesus naava vomeulu novokombada yedu naava vokoshi yedu, nelaka keshe li nokufimaneka Kalunga Xe nokuhepaulula, kutya Jesus Kristus Oye Omwene.” (Fil. 2:9-11) Kungaho, ohatu dulu okukala twe lineekela filufilu mewiliko li li pauyuki laJesus Kristus.

¹¹ Omuprofeti Daniel okwa mona emoniko li na sha nOmuxungu e li koshipangelapundi shaYe shomeulu novaengeli ‘eyovi lwomayovi tave mu longele, nomayovi omulongo lwomayovi omulongo ve li ofika koshipala shaye.’ (Dan. 7:10) Ombiibeli oya popya kutya etangakwaita lovaengeli olo oli li “eemhepo dokuyakula, va tuminwa eyakulo laavo tava ka fyuulula exupifo.” (Heb. 1:14) Oishitwa aishe oyo yopamhepo oya unganekwa ‘momalukalwapangelo ile momauhamba, momapangelo ile momapangelonghono.’ — Kol. 1:16.

¹² Ngeenge otwa kala hatu dilonga koinima i na sha noshitukulwa shehangano laJehova shomeulu, ohatu ka uda ko elinyengo laJesaja kemoniko omo a li a ‘mona Omwene e li omutumba kolukalwapangelo la kula nola yeluka, novaserafi ve li ofika kombada yaye.’ Jesaja okwa ti: “Woo aame! Onda kana, osheshi aame omunhu ndi nomilungu da nyata nonda kala mokati kovanhu ve nomilungu da nyata; osheshi omesho ange okwa mona Ohamba, Omwene womatanga ovakwaita.” Jesaja okwa li a kumwa nokwe lininipika eshi a uda ko ounene wehangano laJehova. Okwa li a kumwa neenghono kwaasho a li a mona, nomolwaashi eshi meulu mwa li mwa dja elombwelo li na sha noilonga ye likalekelwa yoku ka shiivifa etokolo laJehova, okwa li a nyamukula a ti: “Aame ou, tume nge!” — Jes. 6:1-5, 8.

¹³ Okushiiva nokukala nolupandu li na sha nehangano laJehova ohashi linyengifa yo oshiwana shaYe monghedi ya faafana kunena. Eshi ehangano laJehova tali xumu komesho, natu kendabale okweenda pamwe nalo. Ohatu kendabala okuulika kutya otwe lineekela mehangano laJehova kunena.

EHANGANO LAJEHOVA OTALI XUMU KOMESHO

¹⁴ Jehova okwa popiwa pafaneko ta shingi etemba linenenene lomeulu mexunganeko laHesekiel etukulwa 1. Etemba olo tali vilima otali faneke oshitukulwa shehangano laJehova shihe wetike. Ota shingi etemba olo noku li wilika pahole, te li longifa metwokumwe nelalakano laye. — Eps. 103:20.

¹⁵ Elola keshe letemba olo oli na elola likwao li li meni lalo la indakana, ashike aeshe oku na olumbubu li fike pamwe. Kungaho opo ashike taku dulu okutiwa kutya omalola ohaa ‘yuka keembinga adishe nhee.’ (Hes. 1:17) Omalola ohaa dulu okutanauka meendelelo. Ashike etemba olo ihali ende nopehe na ewiliko lasha ile ounongo washa. Jehova iha efa ehangano laye li yuke ashike kombinga keshe oko la hala okuyuka. Hesekiel 1:20 okwa ti: “Keshe apa omhepo ya hala i ye, oko ya ya.” Osho otashi ulike kutya Jehova oye ha wilike ehangano laye li yuke oko omhepo yaye ya hala li yuke. Natu lipule kutya: ‘Ohandi endele ngoo pamwe nehangano?’

¹⁶ Okweendela pamwe nehangano laJehova osha kwatela mo shihapu shihe fi ashike okukala pokwoongala nokukufa ombinga moukalele. Opo tu endele pamwe nehangano, osha fimanenena okuninga exumokomesho nokukula pamhepo. Natu “shiive okutongola oinima ei iwa unene” nokukala hatu lipalula neendja dopamhepo odo di li pefimbo. (Fil. 1:10; 4:8, 9; Joh. 17:3) Natu dimbuluke kutya opo ehangano li kale la unganekwa nawa, otashi pula elongelokumwe. Onghee hano, natu kale tu shii kutya osha fimana okulongifa keshe osho tu na, kutya nee oiniwe ile eeshali dopamhepo opo tu wanife po oilonga oyo twa pewa kuJehova. Eshi hatu endele pamwe netemba laJehova lomeulu, onghalamwenyo yetu otai ka kala metwokumwe netumwalaka olo hatu udifa.

¹⁷ Kekwafo lehangano laJehova, ohatu twikile okulonga ehalo laYe. Dimbuluka kutya Jehova oye Omushingi wetemba olo lomeulu. Onghee hano, okweendela pamwe netemba laJehova otaku ulike kutya otwe mu fimaneka notwe mu lineekela e li Emanya letu. (Eps. 18:31) Ombiibeli oya udaneka ya ti: “Omwene ota ka yandja eenghono koshiwana shaye; oshiwana shaye Omwene te ke shi punika nombili.” (Eps. 29:11) Molwaashi otu li oshitukulwa shehangano laJehova kunena, otu na eenghono nosho yo ombili oyo ha yandje koshiwana shaye sha unganekwa i li enangeko noupuna. Nopehe na omalimbililo, ohatu ka twikila okumona omanangeko noupuna eshi hatu longo ehalo laJehova paife nosho yo fiyo alushe.