Onghandangala oyo Kristus ta dana melongekido laKalunga

“PEHOVELO Kalunga okwa shita eulu nedu,” nakeshe osho a shita osha li sha “wapala unene.” (Gen. 1:1, 31) Jehova okwa li a shita ovanhu ve na etimaumbwile li na sha nonakwiiwa. Ndele ounashibofa muEden owa ya moshipala onghalonawa yovanhu pakafimbo. Ashike elalakano laJehova li na sha nedu nosho yo ovanhu inali lunduluka. Kalunga okwa ulika kutya oludalo laAdam olo hali dulika otali ka xupifwa. Elongelokalunga lashili ola li tali ka tungululwa, na Kalunga ota ka hanauna po Satana pamwe noilonga yaye aishe. (Gen. 3:15) Natango oinima otai ka kala ya “wapala unene.” Jehova ota ka wanifa po omaudaneko aye aeshe okupitila mOmona waye, Jesus Kristus. (1 Joh. 3:8) Onghee hano, osha fimanenena okudimina onghandangala oyo Kristus ta dana melongekido laKalunga. — Oil. 4:12; Fil. 2:9, 11.

KRISTUS OTA DANA ONGHANDANGALA ILIPI?

² Ngeenge hatu diladila konghandangala oyo Kristus ta dana melongekido laKalunga, ohatu ka mona kutya onghandangala oyo ta dana oya kwatela mo shihapu. Jesus oku li Omuxupifi, Omupristeli Omukulunhu, Omutwe weongalo, nopaife oku li Ohamba yOuhamba waKalunga. Okudilonga konghandangala keshe oyo ta dana, otashi ke tu kwafela tu kale tu na olupandu linene li na sha nelongekido laKalunga, nohole yetu yokuhola Kristus Jesus otai ka kala yomoule. Ombiibeli oya popya kutya oku na vali eendodo dimwe.

³ Pefimbo loukalele waKristus wokombada yedu, osha li sha yela nawa kutya ovanhu ovo hava dulika otava dulu okuhanganifwa naKalunga okupitila muKristus. (Joh. 14:6) E li Omuxupifi wovanhu, Jesus okwa yandja omwenyo waye u ninge oikulila yavahapu. (Mat. 20:28) Nomolwaasho Jesus ine tu tulila po ashike oshihopaenenwa shi na sha nelihumbato lopaKalunga. Ndele okwa pewa oshinakuwanifwa sha fimanenena shi na sha nokuwanifa po elalakano laJehova li na sha novanhu. Oye aeke e shi ningifa tashi shiiva opo tu kale twa hokiwa kuKalunga. (Oil. 5:31; 2 Kor. 5:18, 19) Efyo laJesus lopayambo nenyumuko laye ola yeululila omhito ovanhu ovo hava dulika opo va ka mone omanangeko noupuna taa kalelele koshi yepangelo lOuhamba waKalunga womeulu.

⁴ E li Omupristeli Omukulunhu, Jesus oku “uditile oungone wetu olukeno” noha popile ovashikuli vaye vashili kombada yedu opo va diminwe po. Omuyapostoli Paulus okwa popya a ti: “Omupristeri wetu omukulunhu haye ou, ehe uditile oungone wetu olukeno, ndelenee Oye ou a shindwa moinima aishe ngaashi fye, ndelenee ke netimba.” Opo nee Paulus okwa ladipika ovo va ulika eitavelo muJesus Kristus opo va tambule ko elongekido olo lokuhanganifwa naKalunga, a ti: “Tu yeni hano kolukalwa lefilonghenda tu neyombamo, tu talwe nonghenda fye tu mone efilonghenda loku tu kwafa pefimbo liwa.” — Heb. 4:14-16; 1 Joh. 2:2.

⁵ Jesus oku li yo Omutwe weongalo lopaKriste. Ngaashi ashike ovashikuli vaye vomefelemudo lotete va li inava pumbwa omuwiliki wopanhu, nafye kunena inatu mu pumbwa. Jesus oha yandje ewiliko okupitila momhepo iyapuki nomovafita ovo va nangekwa po, ovo tave ke lihokolola kuye nokuXe womeulu shi na sha nokufila oshisho oufita waKalunga. (Heb. 13:17; 1 Pet. 5:2, 3, 3) Jehova okwa xunganeka kombinga yaJesus a ti: “Tala, Ame onde mu lenga a ninge [ondombwedi] kovanhu, a ninge ohamba nomupangeli koiwana.” (Jes. 55:4) Jesus okwa koleka ewanifo lexunganeko olo eshi a lombwela ovahongwa vaye a ti: “Inamu itavela mu ifanwe omupukululi, osheshi omupukululi weni umwe aeke, Oye Kristus.” — Mat. 23:10.

⁶ Molwaashi Jesus oku na ko nasha nafye nokwa hala oku tu kwafela, okwe tu shiva a ti: “Ileni kwaame, nye amushe hamu longo nomwa lolokifwa, Ame ohandi mu pe etulumuko. Litwikeni ondjoko yange nye mu lilonge kwaame, osheshi Aame omunambili, momutima onde lininipika; ndele tamu monene eemwenyo deni etulumuko. Osheshi ondjoko yange oiwa nomutengi wange omupu.” (Mat. 11:28-30) Jesus Kristus oha ungaunga noinima yeongalo lopaKriste nombili nomonghedi oyo tai eta etalaleko. Kungaho, okwa ulika kutya oku li ‘omufita muwa,’ noha hopaenene Xe womeulu, Jehova Kalunga. — Joh. 10:11; Jes. 40:11.

⁷ Monhumwafo yotete oyo Paulus a shangela Ovakorinto, okwa yelifa mo vali onghandangala imwe oyo Jesus Kristus ta dana a ti: ‘Oye e nokupangela fiyo ota tula ovatondi vaye aveshe koshi yeemhadi daye. Ndele oinima aishe ngeenge ya tulwa mepangelo laye, opo nee Omona Ye mwene ote ke litula yo koshi yaau e mu tulila ko aishe, Kalunga, opo a kale omunaashishe moinima aishe.’ (1 Kor. 15:25, 28, yelekanifa no-KB-74.) Fimbo Jesus a li i ne uya kombada yedu, okwa li omulongi pamwe naKalunga “omunongoelela,” omushitwa wotete weshito laKalunga. (Omayel. 8:22-31) Eshi Kalunga a li a tuma Jesus kombada yedu, okwa li a longa ehalo laYe efimbo keshe. Okwe lididimikila eyeleko linenenene nokwa fya e li omudiinini kuXe. (Joh. 4:34; 15:10) Molwaashi Jesus okwa kala omudiinini fiyo omefyo, Kalunga okwe mu nyumunina omwenyo womeulu noku mu pa oufemba a ninge Ohamba yOuhamba womeulu. (Oil. 2:32-36) Kungaho, Kristus Jesus okwa pewa oshilonga sha fimanenena kuKalunga opo a kwatele komesho oishitwa yopamhepo omayovi inaenghono mokuhanauna po omapangelo opanhu kombada yedu nokuxulifa po oukolokoshi aushe. (Omayel. 2:21, 22; 2 Tes. 1:6-9; Eh. 19:11-21; 20:1-3) Opo nee Ouhamba waKalunga womeulu, oo tau ka kala koshi yewiliko laKristus, oo auke tau ka kala tau pangele kombada yedu alishe. — Eh. 11:15.

OKUDIMINA ONGHANDANGALA OYO TA DANA OTASHI TI SHIKE?

⁸ Omuhopaenenwa wetu Jesus Kristus, okwa wanenena. Okwa pewa oshinakuwanifwa shoku tu fila oshisho. Opo tu mone ouwa mefiloshisho laye lopahole, otwa pumbwa okukala ovadiinini kuJehova nokukala hatu endele pamwe nehangano laJehova tali xumu komesho.

⁹ Ovashikuli vaJesus vomefelemudo lotete ova li va dimina filufilu onghandangala oyo Kristus ta dana melongekido laKalunga. Ova li ve shi ulika okupitila mokukala moukumwe koshi yomutwe wavo Kristus, tava dulika kewiliko laye, ngaashi va li ve li pewa okupitila momhepo iyapuki. (Oil. 15:12-21) Omuyapostoli Paulus okwa popya kombinga youkumwe wOvakriste ovavaekwa eshi a ti: “Mokudiinina oshili mohole, tu kule moinima aishe mwaau a ninga omutwe, omuKristus, mwaau olutu alishe ngaashi la tulwa kumwe notali kwatelwa kumwe komufipa keshe, otali kulu li tungikike mohole, keshe tuu oshinhimbu shi fike pashiyelekifo shasho.” — Ef. 4:15, 16.

¹⁰ Ngeenge keshe umwe meongalo ta longele kumwe navakwao nokulandula ewiliko laKristus e li omutwe, ohapa kala ekulo nosho yo ohole, oyo i li ‘oshimangifo sha wana shokumanga kumwe.’ — Joh. 10:16; Kol. 3:14; 1 Kor. 12:14-26.

¹¹ Oiningwanima yomounyuni oyo i li metwokumwe nokuwanifwa kwomaxunganeko Ombiibeli otai ulike sha yela kutya okudja 1914, Jesus Kristus okwa pewa eenghono dOuhamba. Paife ota pangele mokati kovatondi vaye. (Eps. 2:1-12; 110:1, 2) Osho oshi na eityo lilipi kwaavo ve li kombada yedu kunena? Mafiku Jesus ota ka dana onghandangala yaye e li Ohamba yeehamba nOmwene woovene, eshi ta ka wanifa po oshilonga osho a pewa kuKalunga shokutokola ovatondi vaye. (Eh. 11:15; 12:10; 19:16) Opo nee eudaneko laJehova li na sha nexupifo olo la popiwa pehovelo lounashibofa wovanhu otali ka wanifilwa ovo ve li kolulyo laKristus. (Mat. 25:34) Inatu hafa tuu eshi twa dimina onghandangala oyo Kristus ta dana melongekido laKalunga! Natu kaleni twa hangana eshi hatu wanifa po oukalele wetu mounyuni aushe koshi yewiliko laKristus momafiku aa axuuninwa.