“Dimbulukweni ovakwatelikomesho veni”

EENDJOVO odo da popiwa komuyapostoli Paulus, odo di li mOvaheberi 13:7, otadi dulu yo okutolokwa taku ti: “Dimbulukweni ovo tave mu wilike.” Okudja pOpentekoste 33 O.P. okuyuka komesho, ovayapostoli ovadiinini vOmwene Jesus Kristus ova kala tava wanifa po oshilonga osho ve li olutuwiliki olo la kala tali kwatele komesho mokuyandja ewiliko keongalo lopaKriste olo opo la li la totwa. (Oil. 6:2-4) Mo 49 O.P. lwaapo, olutuwiliki olo ola ka kala yo la kwatela mo vamwe ovo vehe fi ovayapostoli vaJesus. Eshi la li la pumbwa okutokola kombinga yomhata i na sha nepitotanda, ola li la kwatela mo ‘ovayapostoli novakulunhu muJerusalem.’ (Oil. 15:1, 2) Ola li li na oshinakuwanifwa shokukundafana oinima oyo ya kuma Ovakriste keshe pamwe. Ola li la tuma eenhumwafo nomalombwelo, oo a li a pameka omaongalo nokwa kwafela ovahongwa va kale tava diladila omuko umwe notava longo moukumwe. Omaongalo okwa li haa dulika nokuliyandja kewiliko lolutuwiliki, noshidjemo, okwa li a nangekwa noupuna kuJehova nokwa ninga exumokomesho. — Oil. 8:1, 14, 15; 15:22-31; 16:4, 5; Heb. 13:17.

² Konima yefyo lovayapostoli, opa li pa holoka oushunimonima. (2 Tes. 2:3-12) Ngaashi Jesus a li a xunganeka meyele laye li na sha noilya neu, omutondi okwa li a kuna eu (ovo vehe fi Ovakriste vashili) mokati koilya (Ovakriste ovavaekwa). Momukokomoko womafelemido, eengudu odo oda li da efuwa di kulile mumwe fiyo efimbo leteyo, “exulilo lefimbo lounyuni.” (Mat. 13:24-30, 36-43) Ovakriste ovavaekwa ova li va twikila okukala va hokiwa kuJesus pefimbo olo, ashike kapa li olutuwiliki, kapa li oupitilo wa yela kombada yedu oo Jesus a li ta longifa opo a yandje ewiliko kovashikuli vaye. (Mat. 28:20) Ndele nande ongaho, okwa li a xunganeka kutya otape ke uya elunduluko pefimbo leteyo.

³ “Olyelye hano omupiya omudiinini nomunaendunge”? Jesus Kristus okwa pula epulo olo ta ningi etwalemo lefaneko, olo li li oshitukulwa ‘shedidiliko’ li na sha ‘nexulilo lefimbo lounyuni.’ (Mat. 24:3, 42-47) Okwa ulika kutya omupiya oo omudiinini ota ka kala e lipyakidila nokuyandja eendja dopamhepo koshiwana shaKalunga ‘pefimbo lado.’ Ngaashi ashike a li a longifa ongudu yovalumenhu ponhele yomunhu umwe opo i kwatele komesho mefelemudo lotete, omupiya omudiinini oo Jesus ta longifa pexulilo longhalelo ei yoinima ke fi omunhu umwe.

OLYELYE “OMUPIYA OMUDIININI NOMUNAENDUNGE”?

⁴ Jesus okwa hoolola oolyelye va palule ovashikuli vaye? Osha yeleka okupopya kutya okwa li ta ka longifa Ovakriste ovavaekwa ovo ve li kombada yedu. Ombiibeli oya popya kutya ove li ‘ongudu youpristeri,’ nova pewa oshilonga ‘shokuhepaulula oilonga ya fimana yaau e va ifana mo momulaulu, va ye mouyelele waye tau kumwifa.’ (1 Pet. 2:9; Mal. 2:7; Eh. 12:17) Mbela ovavaekwa aveshe ovo ve li kombada yedu ove li omupiya omudiinini? Ahowe. Eshi Jesus a li a palula ongudu yovalumenhu 5 000 lwaapo nosho yo ovakainhu nounona, okwa li a yandja oikulya kovahongwa vaye, opo nee ovahongwa tave i pe ovanhu. (Mat. 14:19) Okwa li a palula ovanhu vahapu okupitila movanhu vanini. Kunena, ota yandje eendja dopamhepo monghedi ya faafana.

⁵ Onghee hano, “omukeleli weumbo omudiinini nomunaendunge” okwa fikama po mokangudu kanini kovamwatate ovavaekwa ovo hava kufa ombinga odikilila mokulongekida nokuyandja eendja dopamhepo pefimbo lokukala po kwaKristus. (Luk. 12:42) Momukokomoko womafiku axuuninwa, ovamwatate ovavaekwa ovo ve li “omupiya omudiinini nomunaendunge” ohava longo pamwe keembelewa detu da kula. Kunena, ovamwatate ovo ovavaekwa ove li Olutuwiliki lEendombwedi daJehova.

⁶ Kristus oha longifa Olutuwiliki olo opo li nyanyangide ouyelele u na sha nokuwanifwa kwomaxunganeko Ombiibeli nokuyandja ewiliko li li pefimbo kombinga yanghee omafinamhango Ombiibeli e na okutulwa moilonga monghalamwenyo yakeshe efiku. Eendja dopamhepo odo ohadi tukulwa okupitila momaongalo Eendombwedi daJehova. (Jes. 43:10; Gal. 6:16) Pefimbo lOmbiibeli, omupiya omulineekelwa oye kwa li ha kala omupashukili woinima aishe yomwene waye. Sha faafana, omupiya omudiinini nomunaendunge okwa pewa oshinakuwanifwa shokupashukila oukwaneumbo wopamhepo. Onghee hano, omupiya omudiinini oha pashukile yo oiniwe, oilonga yokuudifa, omalongekido e na sha noyoongalele, okunangekwa po kwovapashukili opo va wanife po oinakuwanifwa i lili noku lili mehangano nosho yo okunyanyangidwa kwoishangomwa ya kanghamena kOmbiibeli, oyo hai etele ‘ovapiya’ ouwa. — Mat. 24:45.

⁷ ‘Ovapiya’ ovo oolyelye? Oku shi popya paunafangwa, ovovo tava palulwa. Nale, ovapiya aveshe ova li ovavaekwa. Konima yefimbo, ovapiya ova ka kala va kwatela mo ongudu inene ‘yeedi’ dimwe. (Joh. 10:16) Eengudu adishe odo ohadi lipalula neendja dopamhepo odo hadi yandjwa komupiya omudiinini.

⁸ Pefimbo loudjuu munene, eshi Jesus te ke uya okutokola onghalelo ei youkolokoshi, ota ka pa omupiya omudiinini oshinakuwanifwa shokupashukila ‘oinima yaye aishe.’ (Mat. 24:46, 47) Ovo ve li mongudu yomupiya omudiinini otava ka pewa ondjabi yavo yomeulu. Otava ka pangela pamwe naKristus meulu pamwe noilyo ikwao yo 144 000. Nonande itaku ka kala vali omupiya omudiinini nomunaendunge kombada yedu, Jehova naJesus otava ka yandja ewiliko kovapangelwa vokombada yedu vOuhamba wopaMessias okupitila mwaavo tava ka nangekwa po va kale “oidale,” ile tu tye omalenga. — Eps. 45:16.

OMOLWASHIKE TU NA ‘OKUDIMBULUKA OVAKWATELIKOMESHO VETU’?

⁹ Ope na omatomheno mahapu oo tae tu kwafele tu ‘dimbuluke ovakwatelikomesho vetu’ nokukala twe ve lineekela. Omolwashike okuninga ngaho tashi tu etele ouwa? Omuyapostoli Paulus okwa ti: “Ovo hava pashukile eemwenyo deni ngaashi ovo tave ke di pulwa, opo ve shi ninge nehafo, hanokukema, osheshi osho itashi mu wapalele.” (Heb. 13:17) Osha fimanenena kufye okudulika nokuliyandja kewiliko olo hatu pewa kwaavo tava kwatele komesho molwaashi ohava pashukile eemwenyo detu omolweameno nonghalonawa yetu yopamhepo.

¹⁰ Paulus okwa popya mo 1 Ovakorinto 16:14, a ti: “Ashishe nashi longwe mohole.” Omatokolo oo haa ningwa omolwoshiwana shaKalunga okwe likolelela koukwatya oo wa denga mbada. Ovakorinto votete 13:4-8 ova popya kombinga yohole va ti: “Ohole i noutalanheni, ohole i nolukeno; ohole ihai fi efupa, ihai litange, ihai fulalala, ihai holoka nai, ihai kongo shayo vene, ihai kenyanana, ihai dimbulukwa owii ye u ningilwa, ihai nyakukilwa osho inashi yuka, ndele ohai nyakukilwa pamwe noshili; ohai tuvike aishe nohai itavele aishe, ohai teelele aishe, hai lididimikile aishe. Ohole ihai xulu po nande.” Molwaashi omatokolo aeshe oo haa ningwa omolwouwa wovapiya vaJehova okwa kanghamena kohole, natu kale tu udite twa amenwa omolwewiliko olo. Kakele kaasho, osho otashi ulike kutya Jehova oku tu hole.

¹¹ Ngaashi sha li mefelemudo lotete, ovalumenhu ovo Jehova ta longifa okukwatela komesho oshiwana shaye inava wanenena. Ndele nande ongaho, Jehova okwa kala ta longifa ovanhu inava wanenena mefimbo lonale opo va wanife po ehalo laye. Pashihopaenenwa, Noa okwa li a tunga ongulu yomomeva nokwa udifa okuuya kwehanauno lopefimbo laye. (Gen. 6:13, 14, 22; 2 Pet. 2:5) Moses okwa li a nangekwa po a pitife oshiwana shaJehova muEgipti. (Ex. 3:10) Ovalumenhu inava wanenena ova li va nwefwa mo va shange Ombiibeli. (2 Tim. 3:16; 2 Pet. 1:21) Okulongifa kwaJehova ovalumenhu inava wanenena kunena opo va kwatele komesho oilonga yokuudifa nokuninga ovanhu ovahongwa itashi nyono po elineekelo letu mehangano laYe. Ponhele yaasho, ohashi tu pameke molwaashi otu shii kutya nopehe na ekwafo laJehova, ehangano itali dulu okulonga oilonga aishe oyo tali longo. Okupitila momaudjuu nomoimoniwa, omupiya omudiinini okwa ulika kutya omhepo yaKalunga oyo tai wilike oinima. Oshitukulwa shehangano laJehova shi wetike osha mona omanangeko noupuna mahapu kunena. Onghee hano, natu kale hatu shi yambidida notwe shi lineekela nomutima aushe.

NGHEE HATU DULU OKUULIKA ELINEEKELO LETU

¹² Ovo va nangekwa po meongalo ohava ulike kutya ove na elineekelo mokutambula ko oinakuwanifwa nehafo noku i wanifa po noudiinini. (Oil. 20:28) Tu li ovaudifi vOuhamba, ohatu kufa ombinga nouladi moilonga yokuudifa eumbo neumbo, okuninga omalishuneko nomakonakonombiibeli. (Mat. 24:14; 28:19, 20) Opo tu mone ouwa pauyadi meendja dopamhepo da denga mbada odo hadi yandjwa komupiya omudiinini, ohatu lilongekidile okwoongala kwopaKriste nokukala puko, mwa kwatelwa oyoongalele. Ohatu mono ouwa muhapu mokutwaafana omukumo ngeenge hatu endafana novamwatate pokwoongala kwopaKriste. — Heb. 10:24, 25.

¹³ Ngeenge hatu yambidida ehangano pashimaliwa, ohatu ulike kutya otwe li lineekela. (Omayel. 3:9, 10) Ngeenge twa mona kutya ovamwatate vonhumba ove na omhumbwe, ohatu va kwafele meendelelo. (Gal. 6:10; 1 Tim. 6:18) Osho ohatu shi ningi omolwohole youmwainafana, hatu longifa alushe omhito keshe opo tu ulikile Jehova nosho yo ehangano laye kutya otwa pandula ouwa oo twa ulikilwa. — Joh. 13:35.

¹⁴ Ohatu ulike yo kutya otwe lineekela ehangano mokuyambidida omatokolo alo. Osho osha kwatela mo okushikula nelininipiko ewiliko laavo tava kwatele komesho, ngaashi ovapashukilishikandjo nosho yo ovakulunhuongalo. Ovamwatate ovo ova kwatelwa mwaavo tava ‘kwatele komesho,’ ovo tu na okukala hatu dulika kuvo nokuliyandja. (Heb. 13:7, 17) Nokuli nonande katu udite ko filufilu kutya omatokolo onhumba okwa ningwa omolwomatomheno ashike, otu shii kutya okudulika kuo otashi tu etele ouwa tau kalelele. Kungaho, Jehova ote ke tu nangeka noupuna omolwokudulika kwetu kEendjovo daye nokehangano laye. Osho otashi ulike kutya ohatu dulika kOmwene wetu, Jesus Kristus.

¹⁵ Otu na shili omatomheno mahapu oo tae tu kwafele tu kale twe lineekela omupiya omudiinini nomunaendunge. Satana, oo e li kalunga kounyuni ou, ota ningi eenghendabala da mana mo opo a shekife edina laJehova nehangano laYe. (2 Kor. 4:4) Ino efa u yulwe keemwiyo daSatana. (2 Kor. 2:11) Oku shii kutya oku na ko ashike ‘okafimbo kaxupi kongaho’ fimbo ina tulwa mombwili, nokwa tokola toko okupukifa Ovakriste vashili vahapu opo va efe po okulongela Jehova. (Eh. 12:12) Ashike natu eheneni popepi elela naJehova nonande Satana ota ningi eenghendabala da mana mo. Natu kaleni twe lineekela muJehova nosho yo oupitilo oo ta longifa okuwilika oshiwana shaye kunena. Mokuninga ngaho, ohatu ka kala oumwainafana wa hangana.