Nghee eongalo la unganekwa

MONHUMWAFO yotete oyo omuyapostoli Paulus a li a shangela Ovakorinto, okwa popya mo oshili ya fimana kombinga yaKalunga. Okwa ti: “Kalunga Ye ke fi Kalunga kedongakano, ndelenee okombili.” Opo nee okwa popya vali kombinga yokwoongala a ti: “Aishe nai ningwe keenghedi diwa nokushikulafana.” — 1 Kor. 14:33, 40.

² Pehovelo lonhumwafo oyo, Paulus okwa yandja omayele e na sha nokuhaudafana oko kwa li meongalo lomuKorinto. Okwa li a kumaida ovamwaxe va kale “nondaka imwe” nokukala ‘hava udafana meendunge dimwe nomokudiladila shimwe.’ (1 Kor. 1:10, 11) Opo nee okwe va pa omayele e likolelela koinima ya yoolokafana oyo ya li ya kuma oukumwe weongalo. Okwa li e va kwafela va mone kutya ova pumbwa okulonga moukumwe, a longifa efaneko loilyo yolutu. Okwa li a ladipika aveshe meongalo lopaKriste, kashi na nee mbudi kutya ova li ve na oinakuwanifwa ilipi, va filafane oshisho pahole. (1 Kor. 12:12-26) Okulongela kumwe kwa tya ngaho meongalo otaku ulike kutya otwa unganekwa.

³ Ndele mbela eongalo lopaKriste ola li li na okuunganekwa ngahelipi? Olyelye a li te ke li unganeka? Ola li tali ka kala li na omutungilo wa tya ngahelipi? Oolyelye va li tava ka kala ve na oinakuwanifwa? Ngeenge otwa efa Ombiibeli i tu wilike, ohatu ka mona omanyamukulo a yela e na sha nomapulo oo. — 1 Kor. 4:6.

OLA UNGANEKWA KUKALUNGA

⁴ Eongalo lopaKriste ola totwa po pOpentekoste yo 33 O.P. Oshike hatu dulu okulihonga keongalo lomefelemudo lotete? Eongalo olo ola totwa po kuKalunga nola unganekwa monghedi iwa. Ehokololo lOmbiibeli li na sha naasho sha li sha ningwa muJerusalem omido 2 000 lwaapo da pita otali yandje oumbangi wa yela kutya eongalo lOvakriste ovavaekwa ola totwa po kuKalunga. (Oil. 2:1-47) Ola li etungo laye, ile tu tye oukwaneumbo waye. (1 Kor. 3:9; Ef. 2:19) Omaongalo opaKriste kunena okwa unganekwa nohaa longo taa landula oshihopaenenwa osho sha tulwa po kOvakriste vomefelemudo lotete.

⁵ Eongalo lotete ola li li na ovahongwa 120 lwaapo. Oilyo oyo oyo ya li ya tililwa omhepo iyapuki tete, shi li ewanifo laJoel 2:28, 29. (Oil. 2:16-18) Ndele mefiku olo tuu olo, ovanhu 3 000 lwaapo ova li va ninginifwa ndele tave uya meongalo lovavaekwa. Ova li va tambula ko eendjovo di na sha naKristus ‘nova diinina okukala melongo lovayapostoli.’ Konima yaasho, Jehova okwa li “a wedela mo mongudu yavo ava tava xupifwa.” — Oil. 2:41, 42, 47.

⁶ Oilyo yeongalo lomuJerusalem oya li ya hapupala neenghono, nomolwaasho omupristeri omukulunhu wOvajuda okwa li a ngongota kutya ovahongwa ova yadifa Jerusalem nehongo lavo. Hauxuuninwa movahongwa ovo vape vomuJerusalem omwa li mwa kwatelwa ovapristeri Ovajuda vahapu ovo va li va ninga oilyo yeongalo. — Oil. 5:27, 28; 6:7.

⁷ Jesus okwa ti: ‘Otamu ka ninga eendombwedi dange muJerusalem nomuJudea ashishe nomuSamaria nofiyo okominghulo dounyuni.’ (Oil. 1:8) Osho osha li sha ningwa eshi ovahongwa ovo va li muJerusalem va li ve lihanena muSamaria nomuJudea ashishe konima yomahepeko manene oo a li a holoka po muJerusalem okudja pefyo laStefanus. Ashike keshe opo va li va ya, ova li va twikila okuudifa onghundana iwa nokuninga ovanhu vahapu ovahongwa, mwa kwatelwa Ovasamaria vamwe. (Oil. 8:1-13) Konima vali yefimbo, onghundana iwa oya li ya udifilwa nomupondo ovanhu ovo vehe fi Ovajuda noinava pita etanda. (Oil. 10:1-48) Oilonga yokuudifa ya tya ngaho oya kwafela ovanhu vahapu va ninge ovahongwa nopo pa totwe omaongalo mape kondje yaJerusalem. — Oil. 11:19-21; 14:21-23.

⁸ Omalongekido elipi a li a ningwa opo ku shilipalekwe kutya eongalo keshe olo opo la totwa po ola li la unganekwa notali wilikwa kuKalunga? Kekwafo lomhepo iyapuki yaKalunga, opa li pa nangekwa ovafita va life oufita. Paulus naBarnabas ova li va nangeka po ovakulunhuongalo momaongalo oo va li va talela po pefimbo lolweendo lavo lotete loutumwa. (Oil. 14:23) Omushangi wOmbiibeli Lukas okwa li a hokolola kombinga yokwoongala oko Paulus a li a ninga novakulunhuongalo vomeongalo lomuEfeso. Paulus okwa tya kuvo: “Litaleni hano nye vene, nye mu pashukile oshuunda ashishe, omo mwa nangekwa kOmhepo Iyapuki, eshi e mu ninga ovafita vokulifa eongalo laKalunga, e li lilikolela nohonde [yOmona waye, NW].” (Oil. 20:17, 28) Ova li va nangekwa po ve li ovakulunhuongalo molwaashi ova li va wanifa po oiteelelwa yopamishangwa. (1 Tim. 3:1-7) Omulongi pamwe naPaulus, Titus, okwa li a pewa oshinakuwanifwa shokunangeka po ovakulunhuongalo momaongalo omuKreta. — Tit. 1:5.

⁹ Eshi pa li pa totwa omaongalo mahapu, ovayapostoli novakulunhu muJerusalem ova li natango ve na oshinakuwanifwa shinene shokupashukila omaongalo opaKriste mounyuni aushe mefelemudo lotete molwaashi ovo va li oilyo yolutuwiliki pefimbo olo.

¹⁰ Omuyapostoli Paulus okwa li a shangela eongalo lopaKriste lokuEfeso te li yelifile kutya ngeenge ola longo mewiliko lomhepo yaKalunga, otali dulu okukaleka po oukumwe mokudulika kewiliko laJesus Kristus e li omutwe weongalo. Okwa li yo a ladipika Ovakriste ovo va kulike oukwatya welininipiko nokudiinina ‘oukumwe momhepo’ nokukala nombili naaveshe meongalo. (Ef. 4:1-6) Opo nee okwa tofa mEpsalme 68:18 noku li yukifa komafiloshisho aJehova e na sha novalumenhu ovo va pyokoka pamhepo opo va wanife po omhumbwe momaongalo ve li ovayapostoli, ovaprofeti, ovaudifi, ovafita novahongi. Ovalumenhu va tya ngaho ove li eeshali da dja kuJehova, nohava kwafele eongalo li kule pamhepo, naasho osho Jehova a hala. — Ef. 4:7-16.

OMAONGALO KUNENA OHAA SHIKULA OSHIHOPAENENWA SHOVAYAPOSTOLI

¹¹ Kunena, omaongalo aeshe Eendombwedi daJehova ohaa shikula oshihopaenenwa shonale shi na sha nanghee omaongalo e na okuunganekwa. Molwaashi otu li moukumwe, osho osha hanganifa omaongalo aeshe omo oilyo yeedi dimwe hai kwafele ovamwaxe ovavaekwa. (Sak. 8:23) Jesus Kristus oye a ningifa oshinima osho tashi shiiva. Okwa wanifa po shili eudaneko laye eshi a kala pamwe novahongwa vaye ovavaekwa “omafiku aeshe, fiyo okexulilo lefimbo lounyuni.” Ovanhu ovo va li va etwa meongalo olo la li tali kulu, ova li va tambula ko onghundana iwa, ve liyapulila Jehova filufilu nova ninginifwa ve li ovahongwa vaJesus. (Mat. 28:19, 20; Mark. 1:14; Oil. 2:41) Ova li va didilika mo ‘omufita muwa,’ Jesus Kristus, e li Omutwe woufita aushe, oo wa fikama po mOvakriste ovavaekwa nosho yo “eedi” dimwe. (Joh. 10:14, 16; Ef. 1:22, 23) “Oshuunda shimwe” osho ohashi longo moukumwe mokukala tashi dulika noudiinini koukwamutwe waKristus nosho yo ‘komupiya omudiinini nomunaendunge,’ oo a nangekwa po kuKristus noku li oupitilo oo ta longifa oku tu wilika. Natu twikileni okukala twe lineekela filufilu omupiya oo. — Mat. 24:45.

ONGHANDANGALA OYO TAI DANWA KOMAHANGANO OPAVETA

¹² Ehangano ola tota po omahangano onhumba opaveta opo li dule okuyandja eendja dopamhepo pefimbo la wapala nokuudifa onghundana iwa yOuhamba fimbo exulilo inali uya. Omahangano oo opaveta okwa shangifwa she likolelela keemhango doilongo i lili noku lili, nohaa longele kumwe. Omahangano oo otaa xumifa komesho okuudifwa kwonghundana iwa mounyuni aushe.

NGHEE OITAIMBELEWA YA UNGANEKWA

¹³ Ngeenge tapa totwa oshitaimbelewa shonhumba, ohapa nangekwa ovakulunhuongalo vatatu ile ve dule po va kale oilyo yOkomitiye yOshitaimbelewa opo va pashukile oilonga moshilongo ile moilongo oyo i li koshi yoshitaimbelewa osho. Oshilyo shimwe shomuvo ohashi longo shi li omuunganeki wokomitiye oyo.

¹⁴ Omaongalo omoshitukulwa oo e li koshi yoshitaimbelewa keshe ohaa unganekwa moikandjo. Omaongalo oo okwa yooloka momuvalu, she likolelela kutya oku li peni, kutya ohaa popi elaka lilipi nosho yo omuvalu womaongalo oo e li moshitukulwa osho tashi pashukilwa koshitaimbelewa. Ohapa nangekwa omupashukilishikandjo a pashukile omaongalo moshikandjo keshe. Oshitaimbelewa ohashi pe omupashukilishikandjo omalombwelo e na sha nanghee e na okuwanifa po oinakuwanifwa yaye.

¹⁵ Omaongalo ohaa dimine omalongekido oo haa di kehangano, oo e lile po ouwa waaveshe. Ohaa tambula ko ovo va nangekwa po ve li ovakulunhuongalo, ovo hava pashukile oilonga moitaimbelewa, moitukulwa nomomaongalo. Ohaa tambula ko yo eendja dopamhepo odo hadi yandjwa komupiya omudiinini nomunaendunge pefimbo la wapala. Kunena, omupiya omudiinini naye oha dulika filufilu koukwamutwe waKristus, komafinamhango Ombiibeli noha shikula ewiliko lomhepo iyapuki. Eshi hatu longo moukumwe, ohatu mono oidjemo ihafifa ya faafana naayo yOvakriste vomefelemudo lotete oyo ya popiwa mOmbiibeli taku ti: “Omaongalo a pamekwa meitavelo, nefiku keshe omuvalu wovakwaneongalo owa hapupala.” — Oil. 16:5.