“Ashishe shi ningeni okufimanekifa Kalunga”

TU LI ovapiya vaKalunga ve mu liyapulila, otu na oshinakuwanifwa shokufimanekifa Jehova mukeshe osho hatu popi naasho hatu ningi. Omuyapostoli Paulus okwa yandja efinamhango li na sha naasho, eshi a ti: “Ngeenge tamu li ile tamu nu, ile keshe tuu eshi tamu shi ningi, ashishe shi ningeni okufimanekifa Kalunga.” (1 Kor. 10:31) Osho osha kwatela mo okukanyatela komifikamhango daJehova douyuki, odo tadi holola oukwatya waye wa denga mbada. (Kol. 3:10) Natu kale ovahopaeleli vaKalunga, tu li ovayapuki. — Ef. 5:1, 2.

² Omuyapostoli Petrus okwa ladipika Ovakriste a ti: “Ngaashi ovana hava dulika, mokukala kweni inamu shikula vali omauhalu mwe a wanifa nale mokuhashiiva kweni. Ndelenee hopaeleleni Omuyapuki ou e mu ifana, nye mu ninge yo ovayapuki mokukala kweni akushe, osheshi pa shangwa: ‘Kaleni ovayapuki, osheshi Aame omuyapuki.’” (1 Pet. 1:14-16) Ngaashi muIsrael shonale, aveshe meongalo lopaKriste ova li va teelelika va kale ovayapuki. Osho osha hala okutya ova li ve na okukala va yela nohava henuka enwefemo loulunde nokoikala younyuni. Nokungaho, ove likalekelwa omolwoilonga iyapuki. — Ex. 20:5.

³ Okukala omuyapuki otashi ti okudulika keemhango nokomafinamhango aJehova, oo e li mOmishangwa Diyapuki. (2 Tim. 3:16) Otwe lihonga kombinga yaJehova neendjila daye okupitila mekonakonombiibeli noshe tu ehenifa popepi elela naye. Ekonakonombiibeli ole tu tomha kutya otu na okukonga tete Ouhamba waKalunga nokupitifa komesho okulonga ehalo laye monghalamwenyo yetu. (Mat. 6:33; Rom. 12:2) Osho otashi pula tu djale omunhu mupe. — Ef. 4:22-24.

OUKOSHOKI WOPAMHEPO NOWOPAENGHEDI

⁴ Haalushe hashi kala shipu okukanyatela komifikamhango daJehova douyuki. Omutondi wetu, Satana Ondiaboli, okwa hala oku tu amuna ko koshili. Omafimbo amwe, enwefemo lounyuni ou wa kolokosha nosho yo eamo letu loulunde ohali shi ningifa shidjuu. Otu na okukondja pamhepo opo tu kale metwokumwe neliyapulo letu. Ombiibeli otai tu lombwele tuha kale twa kumwa ngeenge twa taalela omapataneko ile omayeleko. Otu na okuhepekwa omolwouyuki. (2 Tim. 3:12) Natu kale twa hafa ngeenge twa taalela omayeleko, molwaashi otu shii kutya ohatu longo ehalo laKalunga. — 1 Pet. 3:14-16; 4:12, 14-16.

⁵ Nonande Jesus okwa li a wanenena, okwe lihonga eduliko eshi a li ta hepekwa. Ine liyandja nandenande komayeleko aSatana ile a kulike omahalo ounyuni. (Mat. 4:1-11; Joh. 6:15) Ka li nande a yandja elitulemo komaheka aSatana. Nonande oudiinini waye owe mu ningifa a kale e tondike kounyuni, okwa kala a kanyatela komifikamhango daJehova douyuki. Diva fimbo Jesus ina fya, okwa li a londwela ovahongwa vaye kutya navo otava ka tondika kounyuni. Okudja pefimbo opo fiyo okunena, ovashikuli vaJesus ova kala tava shakeneke omashongo, ashike ova kala ovaladi molwaashi ove shii kutya Omona waKalunga okwa finda ounyuni. — Joh. 15:19; 16:33; 17:16.

⁶ Opo tuha kale oshitukulwa shounyuni ou, otwa pumbwa okukanyatela komifikamhango daJehova douyuki, ngaashi Omuhongi wetu a ninga. Natango, opo tuhe limbwange mumwe noinima yopapolotika younyuni ou nosho yo momalipumomumwe akeshe efiku, otwa pumbwa okukondjifa enwefemo lounyuni ou wa xutuka paenghedi. Ohatu dulika filufilu komayele oo taa hangwa muJakob 1:21, taa ti: “Liduleni eenyata adishe nowii aushe, nye mu tambule nomwenyo wa ngungumana eendjovo da twikwa munye odo di na eenghono okuxupifa eemwenyo deni.” Okupitila mekonakonombiibeli nomokukala pokwoongala, ohatu mono nghee ‘eendjovo doshili da twikwa’ momadiladilo nomomitima detu, noitatu ka kala twa hala osho ounyuni tau xumifa komesho. Omuhongwa Jakob okwa shanga a ti: “Kamu shi shii hamba nokutya, oukaume wounyuni ou owo okutonda Kalunga? Hano ou a hala okukala kaume kounyuni, ota ningi omutondi waKalunga.” (Jak. 4:4) Omolwetomheno olo, Ombiibeli oye tu londwela sha kwata moiti kutya natu diinine omifikamhango daJehova douyuki nokukala twa yooloka ko filufilu kounyuni.

⁷ Ombiibeli oye tu londwela tu henuke okukufa ombinga melihumbato inali koshoka. Oya ti: “Ndelenee oluhaelo nakeshe tuu onyata youlunde ile olwisho inali tumbulwa nande vali mokati keni, ngaashi sha wapalela ovayapuki.” (Ef. 5:3) Onghee hano, inatu efa nande omadiladilo etu a nwefwe mo koinima oyo inai koshoka, ile ififohoni nokatu na okukala hatu kundafana kombinga yoinima ya tya ngaho. Kungaho, ohatu ulike kutya otwa kanyatela komifikamhango daJehova doukoshoki nodouyuki di na sha neenghedi.

OUKOSHOKI WOPALUTU

⁸ Ovakriste ova mona kutya osha fimana okukala va koshoka pamhepo, paenghedi nosho yo palutu. MuIsrael shonale, Kalunga oo e li omuyapuki okwa li a teelela onhanda i kale hai kala ya koshoka. Nafye otu na okukala twa koshoka opo Jehova “aha mone sha shoififahoni” mufye. — Deut. 23:14.

⁹ PaMbiibeli, ouyapuki noukoshoki wopalutu owa pambafana. Pashihopaenenwa, Paulus okwa ti: “Ovaholike, tu likosheni kedilo keshe naali lombelela naali lomhepo, fye tu wanifeni eyapulo mokutila Kalunga.” (2 Kor. 7:1) Onghee hano, Ovakriste aveshe ove na okukendabala va kale va koshoka palutu mokulikosha pandjikilile nokukosha oikutu yavo. Nonande eenghalo doilongo oda yoolokafana, ohatu dulu okumona noupu eefewa da wana nomeva opo tu kaleke omalutu etu a yela nokushilipaleka alushe kutya ounona vetu ova yela.

¹⁰ Omolwoilonga yetu yokuyandja oundombwedi, otwa shiivika nawa momidingonoko detu. Okukaleka po oukoshoki nelandulafano momaumbo etu meni nokombada, otashi dulu okuyandja oundombwedi kovashiinda. Oukwaneumbo aushe ou na okukala tau kufa ombinga mokukaleka po oukoshoki. Ovamwatate ove na okukala tava yandje elitulemo kokuwapaleka omaumbo nopolwaamba leumbo, ve na oushili kutya okukaleka oluumbo la yela nomaumbo e li melandulafano ohashi yandje efano liwa kuvamwe. Okuninga ngaho nosho yo okukwatela komesho oinima yopamhepo, oshi li edidiliko kutya omitwe domaukwaneumbo odi shii okutekula nawa omaukwaneumbo ado. (1 Tim. 3:4, 12) Ovamwameme navo ove na oshinakuwanifwa shokufiloshisho oinima, unene tuu meni lomaumbo. (Tit. 2:4, 5) Ounona ovo va tekulwa nawa ohava kala va koshoka palutu nohava kaleke eenduda davo da yela nawa nodi li melandulafano. Kungaho, omaukwaneumbo oo haa longele kumwe mokukaleka po oukoshoki otae lilongekidile oku ka kala mounyuni mupe wa koshoka koshi yOuhamba waKalunga.

¹¹ Kunena vahapu vomoshiwana shaJehova ohava longifa oyeendifo opo i va twale kokwoongala. Moitukulwa imwe, ohauto oi li oshinima sha fimana moukalele. Ohauto oi na okukalekwa ya yela noi li monghalo iwa. Omaumbo etu neehauto detu ohadi holola kutya otu li oshitukulwa shoshiwana shaJehova sha koshoka noshiyapuki. Efinamhango olo otali longo yo mokukaleka eendjato detu domomapya da yela nosho yo okukaleka Eembiibeli detu monghalo iwa.

¹² Oikutu yetu nokuliwapeka kwetu oku na okukala metwokumwe nomafinamhango opakalunga. Kape na oo ta ka kala a hala okuholoka komesho yomunhu a tumbala ngeenge okwa djala monghedi ififa ohoni ile ngeenge oikutu yaye oya dundakana nai. Mbela otu na okukala tu na etaleko la tya ngahelipi ngeenge hatu popile Jehova moukalele ile ngeenge tu li komutune? Okuliwapeka kwetu nonghedi yetu yokudjala otai dulu okunwefa mo etaleko lavamwe li na sha nelongelokalunga laJehova. Itashi ka kala shiwa okudjala oikutu itai wapalele ile ihatu yavelele vamwe. (Mika 6:8; 1 Kor. 10:31-33; 1 Tim. 2:9, 10) Onghee hano, ngeenge hatu lilongekidile okuya moilonga yomomapya, ile kokwoongala, ile koyoongalele yoshikandjo, ile koyoongalele yoshitukulwa, otu na okukaleka momadiladilo osho Ombiibeli tai ti kombinga youkoshoki wopalutu nosho yo kombinga yeholokepo liwa. Otwa hala alushe okufimaneka nokufimanekifa Jehova.

¹³ Osho otashi longo yo ngeenge hatu ka talela po keembelewa detu da kula ile koshitaimbelewa shEendombwedi daJehova. Dimbuluka kutya edina Betel otali ti “Eumbo laKalunga.” Onghee hano, otwa pumbwa okudjala nokulihumbata nawa ngaashi ashike ngeenge tu li pokwoongala pOlupale lOuhamba.

¹⁴ Nokuli nongeenge tu li pomalihafifo, otwa hala okuyandja elitulemo konghedi yetu yokudjala nokuliwapeka. Otashi dulika tu lipule kutya: ‘Mbela ohandi ka kala nda fya ohoni okuyandja oundombwedi wohangelela omolwonghedi omo nda djala?’

OMALIHAFIFO A KOSHOKA

¹⁵ Okufuwa po nosho yo omalihafifo okwa pumbiwa molwaashi ohaku kwafele omunhu a kale e na oukolele muwa. Pomhito imwe, Jesus okwa li a shiva ovahongwa vaye a ye pamwe navo konhele ye likalela opo vaka “tulumukwe po kanini.” (Mark. 6:31) Okufuwa po nosho yo omalihafifo oo a koshoka otaa dulu okweetifa po omalunduluko taa ti sha. Otaa dulu oku tu tulumukifa opo tu twikile vali noilonga yetu.

¹⁶ Molwaashi kunena oku na omaludi omalihafifo mahapu, Ovakriste ova pumbwa okuhoolola omalihafifo oo taa wapalele, tava ulike ounongo wopakalunga mwaasho tava ningi. Nonande omalihafifo okwa pumbiwa, kae fi naanaa oshinima sha fimanenena monghalamwenyo. Otwa londwelwa kutya “momafiku axuuninwa,” ovanhu otava ka kala ve ‘hole omalihafifo shi dulife okuhola Kalunga.’ (2 Tim. 3:1, 4, yelekanifa no-NW.) Omalihafifo mahapu itaa wapalele ovo va hala okukanyatela komifikamhango daJehova douyuki.

¹⁷ Ovakriste votete ova li ve na okuhenuka okukala momudingonoko omo hamu ningilwa omalihafifo inaa koshoka. Pomauliko omaudano omuRoma, ovatali ova li hava hafele okutala ovo tava mono oixuna. Omalwoodi, etiko lohonde nosho yo oluhaelo oya li hai ulikwa nelalakano lokuhafifa ovanhu vahapu, ashike Ovakriste votete ova li ve likaleka kokule noinima ya tya ngaho. Kunena, omalihafifo mahapu mounyuni okwa faafana naao onale, notaa wapalele omahalo ovanhu. Otwa pumbwa ‘okulitala nawa’ nhumbi hatu ende, nokuhenuka omalihafifo oo a xutuka. (Ef. 5:15, 16; Eps. 11:5) Nonande omalihafifo muo vene inaa puka, otashi dulika omudingonoko ile oinima oyo ya kwatelwa mo itai wapalele. — 1 Pet. 4:1-4.

¹⁸ Ope na omaludi omalihafifo a koshoka oo Ovakriste tava dulu okuhafela. Vahapu ova mona ouwa mokudulika komayele opaMishangwa nosho yo komaetepo mawa oo taa hangwa moishangomwa yetu.

¹⁹ Omafimbo amwe, omaukwaneumbo amwe otaa dulu okushivwa komaumbo Ovakriste vakwao. Ile otashi dulika ovamwatate novamwameme va shivwe kohango ile koshivilo shonhumba. (Joh. 2:2) Ovo va shiva ovanhu ove na oshinakuwanifwa shokupashukila keshe osho tashi ningwa po. Osha yela kutya omunhu okwa pumbwa okukala a lungama ngeenge ovanhu vahapu ova ongala pamwe. Poivilo ya tya ngaho ohapa kala omhepo yemanguluko oyo hai ningifa vamwe va dope okukala metwokumwe nelihumbato lopaKriste, va lye nokunwa sha pitilila unene nokuya nokuli momanyono a kwata moiti. Ve na osho momadiladilo, Ovakriste ovo ve na eendunge dokuyoolola ova mona nghee sha fimana okutula po omuvalu wa ngabekwa u na sha naavo tava ka kala pokavilo nonokutya otava mane pongapi. Ngeenge ope na oikunwa yoalkoholi, oi na okulongifwa pandjele. (Fil. 4:5) Ngeenge okwa ningwa eenghendabala opo okavilo ka kale ka hafifa notaka tulumukifa pamhepo, oikulya noikunwa hayo tai ka kala ya fimana ile tai lipulwa nayo.

²⁰ Oshiwa okuyakula vamwe. (1 Pet. 4:9) Ngeenge hatu shivi Ovakriste vakwetu ve uye va lye pamwe nafye komaumbo etu notu hafele pamwe, otwa hala okukaleka momadiladilo ovo tashi dulika va hepa. (Luk. 14:12-14) Ngeenge otu li ovaenda poivilo ya tya ngaho, elihumbato letu oli na okukala metwokumwe nomayele oo taa hangwa muMarkus 12:31. Oshiwa alushe okuulika olupandu omolwouwa oo twa ningilwa kuvamwe.

²¹ Ovakriste ohava hafele oshali yaKalunga oyo a yandja nove shii kutya otava dulu ‘okulya nokunwa ndele tava shambukilwa ouwa woilonga yavo idjuu.’ (Omuud. 3:12, 13) Ngeenge otwa kala hatu ningi keshe osho tashi ‘fimanekifa Kalunga,’ ovo va shiva ovaenda nosho yo ovaenda otava dulu okukala tava diladila shi na sha neendafano olo, ve na olupandu kutya ova palulwa pamhepo.

OMALIPYAKIDILO OKOFIKOLA

²² Ounona vEendombwedi daJehova ohava mono ouwa mehongo lomounyuni lopehovelo. Ofimbo ve li kofikola, ohave lihongo okulesha nokushanga nawa. Oilongwa ikwao oyo hai hongwa kofikola otai dulu okukwafela ovanyasha eshi tave litulile po omalalakano opamhepo. Pefimbo lomido odo ve li mofikola, ohava kala va halelela okuninga eenghendabala da mana mo opo va ‘dimbulukwe Omushiti wavo’ mokupitifa komesho oinima yopamhepo. — Omuud. 12:1.

²³ Ngeenge ou li omunyasha Omukriste ha i kofikola, kala wa lungama uha endafane novanyasha vomounyuni ou inashi pumbiwa. (2 Tim. 3:1, 2) Molwaashi Jehova okwe tu pa eameno olo twa pumbwa, ope na shihapu osho to dulu okuninga opo u henuke enwefe mo lounyuni. (Eps. 23:4; 91:1, 2) Longifa nawa omafiloshisho aJehova opo u liamene. — Eps. 23:5.

²⁴ Opo ovanyasha ovo ve li Eendombwedi ve liyoolole ko kounyuni fimbo ve li mofikola, vahapu ohava henuka okukufa ombinga momalipyakidilo a wedwa po ngaashi omaudano. Osho kashipu okuudiwako kovahongwa vakwao nosho yo kovahongi. Ashike osho sha fimanenena okuhafifa Kalunga. Osho osha hala okutya ou na okulongifa eliudo loye la deulwa nawa kOmbiibeli nokukala wa tokola okuhenuka okulidopa momafiyafanepo ounyuni ile uha kwatwe komhepo youkwashiwana. (Gal. 5:19, 26) Ovanyasha nanye otamu dulu okukanyatela komifikamhango daJehova douyuki ngeenge omwa kala hamu pwilikine komayele opaMbiibeli oo tamu pewa kovadali veni nokukala hamu endafana nookaume vawa meongalo.

OILONGA YOKULIKONGELA OMBOLOTO NEENDAFANO

²⁵ Omitwe domaukwaneumbo odi na oshinakuwanifwa shopaMishangwa shokufiloshisho omaukwaneumbo ado. (1 Tim. 5:8) Ashike nande ongaho, ovakalele ova didilika kutya osha fimana okupitifa komesho oinima yOuhamba ponhele yoilonga yokulikongela omboloto. (Mat. 6:33; Rom. 11:13) Ohatu ka henuka oisho nosho yo eemwiyo dokukala twa hala omaliko monghalamwenyo yetu, ngeenge otwa kala tu na etilokalunga notwa wanenwa koikulya nokoikutu oyo tu na. — 1 Tim. 6:6-10.

²⁶ Ovakriste aveshe ve liyapulila Jehova ovo hava longo oilonga yokulikongela omboloto ove na okukaleka momadiladilo omafinamhango Ombiibeli. Ngeenge otwa longifa omafiloshisho oo paushili, ohatu ka ulika kutya inatu hala nande okuninga oinima oyo tai nyono eemhango daKalunga ile eemhango doshilongo. (Rom. 13:1, 2; 1 Kor. 6:9, 10) Ohatu kaleke alushe momadiladilo oilanduliko ya nyika oshiponga oyo hai di meendafano lii. Tu li ovakwaita vaKristus, ohatu henuka okukufa ombinga meengeshefa odo tadi tu ningifa tu nyone omifikamhango dopakalunga, nokukala tuhe na ombinga nandenande ile tu tule oupamhepo wetu moshiponga. (Jes. 2:4; 2 Tim. 2:4) Katu na ekwatafano ‘naBabilon shinene,’ omalongelokalunga oo e li omutondi waKalunga. — Eh. 18:2, 4; 2 Kor. 6:14-17.

²⁷ Okudulika komifikamhango daJehova douyuki otaku ke tu kwafela tu henuke okuningila ongeshefa peenhele detu delongelokalunga. Elalakano letu lokweendafana nOvakriste vakwetu pokwoongala nosho yo poyoongalele inini naayo yakula olo okulongela Jehova pauyadi. Ohatu pewa eendja dopamhepo poshitaafula shaye nohatu hafele ‘okuhekelekafana.’ (Rom. 1:11, 12; Heb. 10:24, 25) Eendafano la tya ngaho oli na ashike okukala la kwatela mo oinima yopamhepo.

OKUKALA MOUKUMWE WOPAKRISTE

²⁸ Oshiwana shaJehova oshi na yo okudulika komifikamhango daye douyuki mokukala hashi ‘diinine oukumwe momhepo nomekwamo lombili.’ (Ef. 4:1-3) Ponhele yokukala tava lalakanene ouwa wavo vene, keshe umwe oha kendabala okuningila vamwe ouwa. (1 Tes. 5:15) Nopehe na omalimbililo, meongalo leni owa hanga mo oukwatya oo. Kashi na nee mbudi kutya otwa dja momihoko, moshiwana, moulikumwe wovanhu ulipi, ouxupilo ile kutya otu na ouhongelwe wa tya ngahelipi, atushe ohatu wilikwa komifikamhango douyuki da faafana. Nokuli naavo vehe fi eendombwedi ohava didilike mo omaukwatya mawa oo haa ulikwa koshiwana shaJehova. — 1 Pet. 2:12.

²⁹ Omuyapostoli Paulus okwa divilika kutya osha fimana okukala moukumwe, eshi a ti: “Olutu limwe nOmhepo imwe, ngaashi mwa ifanenwa meteelelo limwe mwe li pewa, eshi mwa ifanwa; Omwene umwe, eitavelo limwe, [eninginifo, NW] limwe, Kalunga umwe Xe yaaveshe, Oye ou ha kala kombada yaaveshe ndele ta longifa aveshe nota kala munye amushe.” (Ef. 4:4-6) Osho otashi ulike kutya otu na okukala tu na eudeko la faafana li na sha nomahovelohongo Ombiibeli nosho yo omahongo Ombiibeli omoule nokuulika kutya otwa dimina ounamapangelo waJehova. Jehova okwa pa oshiwana shaye elaka la koshoka loshili, opo shi mu longele shi na ediladilo limwe. — Sef. 3:9.

³⁰ Oukumwe nosho yo ombili yeongalo lopaKriste ohai tulumukifa aveshe ovo hava longele Jehova. Otwa mona ewanifo leudaneko laJehova olo tali ti: ‘Ohandi ka ongela oshixupe ngaashi eedi moshiunda.’ (Mika 2:12) Otwa hala okukala twa hangana mombili mokukanyatela komifikamhango daJehova douyuki.

³¹ Ovo va tambulwa ko meongalo laJehova la koshoka ovanelao. Opo tu ifanwe nedina laJehova, otwa pumbwa okuninga omaliyambo manene. Ngeenge otwa kala tu na ekwatafano liwa naJehova, ohatu ka kendabala noudiinini okukanyatela komifikamhango daye douyuki noku di honga vamwe. — 2 Kor. 3:18.