Kaleka po ombili noukoshoki meongalo

OMUDO keshe, ovanhu omamiliyona ohava mbobolokele komhunda yaJehova oyo i li elongelokalunga la koshoka, osho shi li metwokumwe newanifo lexunganeko lOmbiibeli. (Mika 4:1, 2) Ihatu kala tuu twa hafa eshi ovanhu ovo tava mbobolokele ‘meongalo laKalunga’! (Oil. 20:28) Ohava pandula eshi ve na omhito yokulongela Jehova pamwe nafye nokuhafela oukoshoki nombili moparadisa yetu yopamhepo. Omhepo iyapuki yaKalunga nosho yo omayele opandunge oo taa hangwa mEendjovo daye ohae tu kwafele tu kaleke po ombili nokukaleka eongalo la koshoka. — Eps. 119:105; Sak. 4:6.

² Ngeenge otwa tula moilonga omafinamhango Ombiibeli, kungaho otwa djala “omunhu mupe.” (Kol. 3:10) Ohatu henuka okushokonona oinima ihafele nosho yo omataleko a yoolokafana. Ngeenge otwa kala hatu tale ko oinima ngaashi Jehova he i tale ko, ohatu ka henuka omhepo yetukauko oyo i li mounyuni nokulonga twa hangana tu li oumwainafana womounyuni aushe. — Oil. 10:34, 35.

³ Ashike efimbo nefimbo, ohapa holoka omaupyakadi oo taa dulu okunyona po ombili noukumwe weongalo. Oshike hashi etifa omaupyakadi a tya ngaho? Peemhito dihapu, okuhatula moilonga omayele Ombiibeli. Natango otwa pumbwa okukondjifa okuhawanenena kwetu, molwaashi atushe otu li ovalunde. (1 Joh. 1:10) Otashi dulika umwe a katuke onghatu ihe li pandunge oyo tai dulu okuxumifa komesho elihumbato inali koshoka meongalo. Otashi dulika tu udife nai vamwe omolweendjovo detu inadi diladilwa nawa ile oilonga yetu ile tu pundukifwe kwaasho vamwe va popya ile va ninga. (Rom. 3:23) Ngeenge otwe lihange monghalo ya tya ngaho, oshike hatu ka ninga po opo tu yukife oinima?

⁴ Jehova oku tu hole noku na ko nasha nafye. MEendjovo daye omu na omayele aasho tu na okuninga ngeenge pa holoka omaupyakadi. Ope na ekwafo lopahole olo hatu pewa kovafita vopamhepo, sha hala okutya, kovakulunhuongalo. Ngeenge otwa tula moilonga omayele avo opamishangwa, ohatu dulu okukala vali tu na ekwatafano liwa navamwe nokukaleka po ekwatafano liwa naJehova. Ngeenge otwa pewa outekuduliko ile epukululo molwaashi twa ninga epuko lonhumba, ohatu dulu okukala noushili kutya epukululo la tya ngaho otali ulike kutya Tate yetu womeulu oku tu hole. — Omayel. 3:11, 12; Heb. 12:6.

NGHEE TU NA OKUKANDULAPO OKUHAUDAFANA INAKU KWATA MOITI

⁵ Omafimbo amwe otashi dulika pa holoke okuhaudafana ile omaupyakadi inaa kwata moiti pokati kaavo ve li meongalo. Okuhaudafana kwa tya ngaho oku na okukandulwa po diva momhepo youmwainafana noyohole. (Ef. 4:26; Fil. 2:2-4; Kol. 3:12-14) Luhapu omaupyakadi opaumwene oo a kuma ekwatafano loye nOvakriste vakweni otaa dulu okupongololwa po mokutula moilonga omayele omuyapostoli Petrus oo taa ti “ohole yeni yokuholafana nai kale ya xwama, osheshi ohole ohai fufile onduba yomatimba.” (1 Pet. 4:8) Ombiibeli oya ti: “Atushe ohatu puka luhapu.” (Jak. 3:2) Ngeenge otwa tula moilonga efinamhango li na sha nanghee tu na okuungaunga navamwe, sha hala okutya, okuungaunga navamwe ngaashi twa hala va ungaunge nafye, ohatu ka dimina po vamwe nokudimbwa omanyono oo inaa kwata moiti. — Mat. 6:14, 15; 7:12.

⁶ Ngeenge owa didilike kutya umwe okwa udifwa nai kwaasho wa popya ile wa ninga, ou na okukatuka eenghatu opo u pange ombili naye nopehe na okwoongaonga. Dimbuluka kutya ekwatafano loye naJehova nalo ola kumwa. Jesus okwa pa ovahongwa vaye omayele a ti: “Ove ngenge to twala oshali shoye koaltari, ndele oko wa dimbulukila omumwanyoko nokutya, e na sha naave, fiya ko oshali shoye koaltari, u ye manga mu ka pafane ombili nomumwanyoko, ove u aluke u ka yandje oshali shoye.” (Mat. 5:23, 24) Otashi dulika mu kale inamu udafana namukweni. Ngeenge osho, kundafaneni mwa manguluka. Ngeenge oilyo aishe yeongalo ohai kundafana ya manguluka, ohashi kwafele opo paha holoke okuhaudafana nokukandula po omaupyakadi oo tashi dulika a holoke po omolwokuhawanenena.

OKUYANDJA OMAYELE OPAMISHANGWA OO A PUMBIWA

⁷ Omafimbo amwe, ovapashukili otashi dulika va mone sha pumbiwa okuyandja omayele komunhu wonhumba opo va yukife omadiladilo aye. Ashike haalushe hashi kala shipu. Omuyapostoli Paulus okwa li a shangela Ovakriste vokuGalatia a ti: “Ovamwatate, omunhu ngeenge ta hangika a nyona, opo nee onye ava vopamhepo mu pukululeni nomhepo yonheni.” — Gal. 6:1.

⁸ Mokulifa oufita, ovapashukili otava dulu okwaamena eongalo koiponga ihapu yopamhepo, naasho otashi dulu okukelela omaupyakadi a kwata moiti oo taa dulu okuholoka po. Ovakulunhuongalo ohava longo noudiinini opo oilonga yavo meongalo i kale tai tu kumwe naasho Jehova a udaneka okupitila muJesaja a ti: “Keshe umwe [womuvo] ta ka kala ngaashi oshikelelifo shokukelela omhepo nongaashi ehondameno lokuyaama oshikungulu ngaashi omakungulukilo omeva medu loluteni nomudidimbe wemanya lile medu lenotelo.” — Jes. 32:2.

OKUDIDILIKA MO OVO VEHE NA ELANDULAFANO

⁹ Omuyapostoli Paulus okwa li a londwela vamwe ovo va li ve na enwefemo lii meongalo. Okwa ti: ‘Ohatu mu lombwele, mu amuke kukeshe tuu omumwatate ta ende moupote ndele iha shikula omapukululo oo mwe a pewa kufye.’ Okwa yelifa eendjovo odo a ti: “Ngeenge oku na ou iha udu ko eendjovo detu monhumwafo ei, mu didilikeni, nye inamu endafana naye, opo a fye ohoni. Ndele inamu mu tala ngaashi omutondadi weni, ndele mu pukululeni ngaashi omumwaxo.” — 2 Tes. 3:6, 14, 15.

¹⁰ Omafimbo amwe, otashi dulika umwe oo a nyona enyono la kwata moiti olo tali dulu oku mu kondifa mo meongalo a kale e udite ehe na ondjo nota ulike kutya okwa dina filufilu omifikamhango daKalunga odo di na okuwilika Ovakriste. Osho osha kwatela mo oinima ngaashi ondede, okukembaula ile oumbodo. Otashi dulika a kale “he lidopo moinima oyo inai mu pamba.” (2 Tes. 3:11, NW) Ile otashi dulika a kale ha kengelele ovanhu opo e va lile ile ha kufa ombinga momalihafifo oo inaa koshoka. Okuhe na elandulafano otaku dulu okushekifa nai eongalo nokunwefa mo Ovakriste vamwe.

¹¹ Ovakulunhuongalo otava ka kendabala tete okukwafela omunhu oo ehe na elandulafano moku mu pa omayele a kanghamena kOmbiibeli. Ashike ngeenge ota twikile okukala a dina omafinamhango Ombiibeli nonande okwa kumaidwa lwoikando, ovakulunhuongalo otava dulu okutokola eongalo li pewe oshipopiwa shelondwelo. Otava ka longifa eendunge dokuyoolola va tokole ngeenge onghalo yonhumba oya kwata moiti ile otai kumu vamwe nai opo ku yandjwe oshipopiwa shelondwelo. Oo ta ka yandja oshipopiwa ota ka yandja omayele taa wapalele e na sha nelihumbato lokuhe na elandulafano, ashike ita ka tumbula edina lomunhu oo ehe na elandulafano. Onghee hano, ovo ve shii onghalo oyo ya kundafanwa moshipopiwa otava ka kala va angala okweendafana nomunhu oo, nonande otava ka twikila okweendafana naye pamhepo, tave ‘mu pukulula ngaashi omumwaxe.’

¹² Ngeenge Ovakriste ovadiinini ova kala tave lihumbata nawa, otashi ka kwafela oo ehe na elandulafano a kale a fya ohoni notashi ke mu linyengifa a lundulule oikala yaye. Ngeenge osha yela kutya okwa efa po oikala yokuhe na elandulafano, ita ka talwa ko vali ehe na elandulafano.

OKUPONGOLOLA PO OMANYONO ONHUMBA A KWATA MOITI

¹³ Okuhakonenena omapuko avamwe noku va dimina po inashi hala okutya katu na ko nasha nomanyono ile kutya otwa panda osho va ninga. Hamapuko aeshe taku dulu okutiwa kutya okwa etifwa kokuhawanenena noinashi yuka okulipwililikila omanyono a kwata moiti. (Lev. 19:17; Eps. 141:5) Ehangano lOmhango ola ulika kutya omanyono amwe okwa kwata moiti e dule makwao, naasho osha faafana nelongekido lopaKriste kunena. — 1 Joh. 5:16, 17.

¹⁴ Jesus okwa popya kondadalunde kutya omaupyakadi a kwata moiti oo tashi dulika a holoke pokati kOvakriste oku na okupongololwa po ngahelipi. Didilika eenghatu odo a popya eshi a ti: “Omumwanyoko ngeenge ta nyono kwoove, [1] inda u ke mu pukulule mu li po amuke vavali; ndele ngeenge te ku udu, opo nee ove wa likola omumwanyoko. Ndele ngeenge ita udu ko, [2] ka ifane ko umwe ile vavali, eendjovo adishe opo di tokolwe komakanya [eendombwedi] mbali ile nhatu. Ndele ngeenge ite va udu, [3] shi lombwela eongalo. Ndele ngeenge ita udu ko keongalo, opo nee u kale we mu tala ngaashi omupaani nongaashi omufutifi.” — Mat. 18:15-17.

¹⁵ Okutala kefaneko olo Jesus a landulifa ko muMateus 18:23-35, osha fa shi li ngaha kutya limwe lomomanyono oo a popiwa muMateus 18:15-17 ola kwatela mo oinima i na sha noimaliwa ile oiniwe, ngaashi omunhu ina dula okufuta omukuli ile a kengelela shi na sha noimaliwa. Ile enyono otashi dulika li kwatele mo yo okulundila, osho tashi dulu okunyona po edina liwa laumwe.

¹⁶ Ngeenge ou na oumbangi kutya umwe meongalo okwa nyona kwoove enyono loludi la tya ngaho, ino endelela okuya kovakulunhuongalo noku va pula ve mu pule ponhele yoye. Ngaashi Jesus a popya, inda u ka popye tete naao mwa ningafana nai naye. Kendabaleni mu kandule po oupyakadi oo u li pokati keni vavali nopehe na okukwatela mo umwe. Kalekeni momadiladilo kutya Jesus ina tya ‘inda ko ashike oshikando shimwe nokuholola enyono laye.’ Onghee hano, ngeenge omunhu ina tambula ko enyono laye nokupula a diminwe po, otashi ka kala shiwa okushuna ko kuye vali. Ngeenge oupyakadi owa kandulwa po monghedi ya tya ngaho, omunyoni ote ke ku pandula eshi ino lombwela vamwe kombinga yenyono laye ile eshi ino nyona po edina laye liwa meongalo. Kungaho owa “likola omumwanyoko.”

¹⁷ Ngeenge omunyoni okwa tambula ko epuko laye, a pula ediminepo nokwa katuka eenghatu a yukife oinima shi na sha nenyono laye, inashi pumbiwa vali mu twikile noshinima osho. Nonande enyono laye ola li la kwata moiti, enyono la tya ngaho otali dulu okupongololwa po pokati kovanhu ovo va kwatelwa mo.

¹⁸ Ngeenge ito dulu okulikola omumwanyoko moku mu hololela enyono laye, “mu li po amuke vavali,” oto dulu okuninga ngaashi Jesus a ti kutya “ka ifane ko umwe ile vavali,” nokupopya nomumwanyoko natango. Ovo to i navo nava kale ve na elalakano lokulikola omumwanyoko. Ngeenge otashi shiiva, nava kale ve na oumbangi waasho sha ningwa po, ashike ngeenge kape na oo e na oumbangi, oto dulu okupula umwe ile vavali va ka kale eembangi peenghundafana odo. Oto dulu okupula ovo ve na owino moshinima osho tamu ungaunga nasho notava dulu okumona ngeenge osho sha ningwa po osha puka shili ile hasho. Ovakulunhuongalo ovo va hoololwa va ninge eembangi kave lile po eongalo molwaashi olutu lovakulunhuongalo halo le va pa oshinakuwanifwa osho.

¹⁹ Ngeenge oupyakadi inau kandulwa po konima eshi wa ninga eenghendabala dokupopya nomunyoni lwoikando nowa ya ko nomunhu umwe ile vavali, nou udite kutya ino hala okweefa shi xulile opo, oto dulu okushiivifila ovapashukili meongalo oshinima osho. Dimbuluka kutya elalakano lavo olo okukaleka po ombili noukoshoki meongalo. Ngeenge owa lombwele ovakulunhuongalo, efela oshinima osho momake avo nokulineekela muJehova. Ino efa nande elihumbato laumwe li ku pundukife ile li nyone po ehafo loye moilonga yaJehova. — Eps. 119:165.

²⁰ Ovafita voshiunda otava ka konakona oshinima osho. Ngeenge opa monika oumbangi oo tau ulike kutya omunhu oo okwa nyona enyono la kwata moiti noi ne livela ombedi noi na hala okudimina epuko laye nokukatuka eenghatu di li mondjila, otashi ka kala pandunge opo okomitiye yovapashukili i konde mo omunyoni oo meongalo. Kungaho, ova amena oufita nova kaleka po oukoshoki weongalo. — Mat. 18:17.

OKUUNGAUNGA NOMANYONO A KWATA MOITI

²¹ Omanyono amwe a kwata moiti, ngaashi oluhaelo, okunyona ohombo, oushenge, okusheka Kalunga, oushunimonima, okulongela oikalunga nosho yo omanyono makwao a yukila oko, otaa pula shihapu shihe fi ashike okudiminwa po komunhu oo a ningilwa sha. (1 Kor. 6:9, 10; Gal. 5:19-21) Molwaashi oukoshoki wopamhepo nowopaenghedi weongalo ou li moshiponga, omanyono a kwata moiti a tya ngaho oku na okulopotwa kovakulunhuongalo ovo va ungaunge nao. (1 Kor. 5:6; Jak. 5:14, 15) Vamwe otashi dulika vaye kovakulunhuongalo opo va ka lopote omanyono avo ile va ka lopote omanyono avamwe. (Lev. 5:1; Jak. 5:16) Kashi na nee mbudi kutya ovakulunhuongalo ova uda ngahelipi enyono lonhumba la kwata moiti, ovakulunhuongalo vavali ohava ningi tete omakonakono e na sha nenyono olo la kwatela mo Ondombwedi ya ninginifwa. Ngeenge ova mono kutya osho va lopotelwa oshoshili nope na oumbangi oo tau ulike kutya omunhu wonhumba okwa nyona enyono la kwata moiti, olutu lovakulunhuongalo otali ka unganeka okomitiye yopamhangu ya kwatela mo ovakulunhuongalo vatatu va ungaunge noshinima sha tya ngaho.

²² Ovakulunhuongalo ohava pashukile oufita noukeka moku u amena koinima aishe oyo tai dulu okunyona po oupamhepo weongalo. Ohava kendabala yo okulongifa Eendjovo daKalunga noukeka opo va pe outekuduliko omunhu oo a nyona noku mu kwafele a kale vali e na oupamhepo muwa. (Jud. 21-23) Osho oshi li metwokumwe nomayele oo omuyapostoli Paulus a pa Timoteus a ti: ‘Ohandi ku anifa koshipala shaKalunga noshOmwene Kristus Jesus, ou te uya okutokola ovanamwenyo novafi. Hanyena, vela ombedi, kumaida monheni nokulonga.’ (2 Tim. 4:1, 2) Okuninga ngaho otashi dulika shi pule efimbo lihapu, ashike osho oshimwe shomoilonga youdiinini yovakulunhuongalo. Eongalo ohali pandula eenghendabala dovakulunhuongalo nole va tala ko kutya ove “lilongela okufimanekwa shili.” — 1 Tim. 5:17.

²³ Ngeenge ovapashukili ova mono kutya omunyoni oku na ondjo, ohava ningi tete eenghendabala opo ve mu kwafele a kale vali e na oupamhepo muwa. Ngeenge omunyoni okwe livela ombedi shili notava dulu oku mu kwafela, ota dulu okupewa outekuduliko moku mu hanyena paumwene ile moipafi yaavo ve li eembangi pefimbo lomhangu, nokungaho otashi ka londwela ovo ve li po va kale ve na oumbada wokunyona. (2 Sam. 12:13; 1 Tim. 5:20) Efimbo keshe omunhu ta hanyenwa pamhangu, oha tulilwa po omangabeko onhumba. Osho otashi ka kwafela omunyoni a ‘yukife omalila’ eemhadi daye konima yaasho. (Heb. 12:13) Mokweendela ko kwefimbo, omangabeko oo a li a tulilwa po oo a li a nyona otaa ka kufwa po eshi ta twikile okuninga exumokomesho lopamhepo.

ESHIIVIFO LI NA SHA NOKUHANDUKILWA

²⁴ Ngeenge okomitiye yopamhangu oya mono kutya omunyoni okwe livela ombedi ndele oshinima osho oshi na oupu shi shiivike meongalo ile momudingonoko ile ngeenge eongalo ola pumbwa okulungama shi na sha nomunyoni oo e livela ombedi, ohapa ningwa eshiivifo li li pauxupi pefimbo lokwoongala kwOnghalamwenyo yopaKriste noilonga yokuudifa. Ove na okutya: “[Edina lomunhu] okwa handukilwa.”

ETOKOLO LI NA SHA NOKUKONDWA

²⁵ Peemhito dimwe, omunyoni otashi dulika e lipwililikile enyono laye noha dopa okutambula ko ekwafo olo ta pewa. Otashi dulika a kale ita ulike ‘oilonga ei tai wapalele elivelombedi’ pefimbo lomhangu. (Oil. 26:20) Oshike shi na okuningwa po? Monghalo ya tya ngaho, otashi ka kala pandunge okukonda mo omunyoni meongalo, nokungaho ita dulu okweendafana noshiwana shaJehova sha koshoka. Ovo va kondwa otava dulu okunwefa mo nai eongalo, nomolwaasho oshi li pandunge okwaamena oukoshoki wopaenghedi nowopamhepo weongalo nokwaamena edina lalo liwa. (Deut. 21:20, 21; 22:23, 24) Omuyapostoli Paulus okwa li a londwela ovakulunhuongalo vokeongalo lokuKorinto nghee ve na okutala ko omunyoni oo a li meongalo lavo a ti: ‘Na yandjwe momake aSatana, opo [eongalo], li xupifwe.’ (1 Kor. 5:5, 11-13) Paulus okwa popya vali shi na sha navamwe ovo va li va kondwa mefelemido lotete molwaashi ova li va tukululila oshili oshibofa. — 1 Tim. 1:20.

²⁶ Ngeenge okomitiye yopamhangu oya tokola kutya omunyoni oo ine livela ombedi na kondwe mo, oi na oku mu shiivifila kutya oya tokola shike, tai mu yelifile nawa omatomheno opamishangwa oo e mu kondifa. Ngeenge oya shiivifile omunyoni shi na sha naasho ya tokola, oi na oku mu lombwela kutya ngeenge oku wete kutya okomitiye inai tokola nawa, ota dulu okuninga eindilo opo oshikumhungu shaye shi talululwe, ta shange onhumwafo, ta yelifa nawa kutya omolwashike a hala shi talululwe. Ota ka pewa oule womafiku aheyali opo a shange eindilotalululo olo okudja fiku okomitiye ye mu lombwela kutya okwa kondwa. Ngeenge ovakulunhuongalo ova pewa eindilotalululo la shangwa, otava ka kwatafana nomupashukilishikandjo, oo ta ka hoolola ovakulunhuongalo va pyokoka va kale mokomitiye oyo tai ka ungaunga vali noshikumhungu osho. Otava ka ninga eenghendabala opo va ungaunge noshinima osho moule woshivike shimwe okudja eshi va yakula onhumwafo yeindilotalululo. Ngeenge pa ningwa eindilotalululo, eshiivifo li na sha nekondo ohali kalekwa manga. Ndele pefimbo opo tuu opo, omunhu oo a nyona oha indikwa okunyamukula nokwiilikana pokwoongala nosho yo okuwanifa po oinakuwanifwa ye likalekelwa.

²⁷ Eindilotalululo oli li elongekido lopahole olo hali pewa omunyoni noku mu pitika a popye vali etaleko laye. Onghee hano, ngeenge omunyoni okwa ningile owina ndele ta kala ine uya okushakena novakulunhuongalo ovo tava ka kundafana naye shi na sha neindilotalululo laye, oku na okuningwa eshiivifo kutya okwa kondwa konima eshi kwa ningwa eenghendabala da yeleka a kwatafanwe naye.

²⁸ Ngeenge omunyoni ina hala okuninga eindilotalululo, okomitiye yopamhangu otai ke mu yelifila kutya okwa pumbwa okulivela ombedi nosho yo kutya eenghatu dilipi a pumbwa okukatuka opo a ka dule okwaalulilwa meongalo monakwiiwa. Osho otashi ke mu kwafela noshi li pahole, noshi na yo okuningwa nelineekelo kutya ota ka lundulula eenghedi daye nomokweendela ko kwefimbo ota ka kala a wana okwaalukila kehangano laJehova. — 2 Kor. 2:6, 7.

ESHIIVIFO LI NA SHA NOKUKONDWA

²⁹ Ngeenge omunyoni ine livela ombedi okwa kondwa mo meongalo, oku na okuningwa eshiivifo li li pauxupi, tali ti: “[Edina lomunhu] ke fi vali Ondombwedi yaJehova.” Osho otashi ka londwela ovo vadiinini meongalo opo va efe po okweendafana naye. — 1 Kor. 5:11.

OKULITETA KO KEHANGANO

³⁰ Outumbulilo “okuliteta ko” otau ulike keenghatu odo hadi katukwa komunhu oo e li Ondombwedi ya ninginifwa ndele ta tokola ye mwene kutya ina hala vali okukala metwokumwe nomifikamhango dopaKriste mokupopya kutya ina hala vali okushiivika ile okukala umwe womEendombwedi daJehova. Ile otashi dulika a ulike kutya ina hala vali okukala oshilyo sheongalo lopaKriste okupitila meenghatu daye, ngaashi okuninga oshilyo shehangano lonhumba lomounyuni olo li na omalalakano e li omhinge nomahongo Ombiibeli, nokungaho ehangano olo ola tokolwa kuJehova Kalunga. — Jes. 2:4; Eh. 19:17-21.

³¹ Omuyapostoli Johannes okwa popya shi na sha novanhu vopefimbo laye ovo va li va tokola kutya inava hala vali okukala Ovakriste vashili, a ti: “Vo ova dja mufye, ndelenee kava li ve noukumwe nafye; osheshi ngeno ova li ve noukumwe nafye, ngeno ova kala nafye.” — 1 Joh. 2:19.

³² Ngeenge omunhu okwe liteta ko, onghalo yaye koshipala shaJehova oya yooloka ko kwaayo yOmukriste oo ine lipyakidila vali, oo iha kufa vali ombinga moukalele. Omunhu otashi dulika a kale ine lipyakidila vali molwaashi iha konakona Eendjovo daKalunga pandjikilile. Ile otashi dulika e na omaupyakadi opaumwene ile ta hepekwa ndele ta kanifa ouladi wokulongela Jehova. Ovakulunhuongalo nosho yo vamwe meongalo otava ka twikila okukwafela pamhepo Omukriste oo ine lipyakidila vali. — Rom. 15:1; 1 Tes. 5:14; Heb. 12:12.

³³ Mepingafano naasho, ngeenge Omukriste wonhumba okwa tokola okuliteta ko, oku na okuningwa eshiivifo pauxupi opo eongalo li shiivifilwe, taku ti: “[Edina lomunhu] ke fi vali Ondombwedi yaJehova.” Omunhu a tya ngaho oha ungaungwa naye ngaashi oo a kondwa.

OKWAALULILWA MEONGALO

³⁴ Omunhu oo a kondwa ile e liteta ko keongalo ota dulu okwaalulilwa meongalo ngeenge okwa ulike kutya okwe livela ombedi nokwa ulika oule wefimbo la yeleka kutya okwa efa po onghalamwenyo inai koshoka. Na kale ta ulike kutya okwa halelela okukala e na ekwatafano liwa naJehova. Ovakulunhuongalo ohava efa pa pite efimbo la wana, pashihopaenenwa eemwedi dihapu, odula, ile shi dulife opo nokuli, she likolelela keenghalo, opo omunhu a ulike kutya okwe livela ombedi shili. Ngeenge olutu lovakulunhuongalo ola yakula onhumwafo yomunhu ta pula a alulilwe meongalo, okomitiye yokwaalulila meongalo oi na okukundafana naye ngeenge otashi shiiva. Okomitiye otai ka konakona oumbangi oo tau ulike “oilonga” yomunhu oo oyo “ya wapalela elidilululo” nokutokola ngeenge okwa wana okwaalulilwa meongalo pefimbo olo ile hasho. — Oil. 26:20.

³⁵ Ngeenge omunhu oo a hala okwaalulilwa meongalo okwa kondelwa keongalo limwe, okomitiye yokwaalulila meongalo olo oi na okukundafana nomunhu oo nokupwilikina keindilo laye. Ngeenge oilyo yokomitiye yokwaalulila oya mono kutya okwa wana okwaalulwa, oi na okutumina omaetepo ayo kolutu lovakulunhuongalo vokeongalo oko kwa kondelwa omunhu oo. Eekomitiye odo da ungaunga nomunhu oo otadi ka longela kumwe nokushilipaleka kutya odi na omauyelele aeshe opo di ninge etokolo li li pauyuki. Ashike etokolo li na sha nokwaalulila omunhu meongalo oli na okuningwa kokomitiye yokwaalulila oyo ya li ya ungaunga naye tete.

ESHIIVIFO LI NA SHA NOKWAALULILWA MEONGALO

³⁶ Ngeenge okomitiye yokwaalulila oya mono kutya omunhu oo a kondwa ile e liteta ko kehangano okwe livela ombedi shili nokwa wana okwaalulilwa meongalo, eongalo omo a kondelwa ohali shiivifilwa kutya okwa alulilwa meongalo. Ngeenge omunhu oo oku li keongalo limwe, nalo oli na okushiivifilwa. Eshiivifo olo oli na okuningwa taku ti: “[Edina lomunhu] okwa ninga vali Ondombwedi yaJehova.”

OMANYONO A KWATELA MO OUNONA VANINI OVO VA NINGINIFWA

³⁷ Ounona vanini ovo va ninginifwa, ovo va nyona omanyono a kwata moiti ove na okulopotwa kovakulunhuongalo. Ngeenge ovakulunhuongalo tava ungaunga nomanyono a kwata moiti oo a kwatela mo okaana kanini, oshiwa ovadali va ninginifwa vokaana oko va kale po. Ove na okulongela kumwe nokomitiye yopamhangu, mokuhenuka okwaamena okaana oko ka nyona kaha pewe outekuduliko oo ka pumbwa. Okomitiye oi na okuungaunga nokaana oko ngaashi ashike hai ungaunga novakulunhu ovo va nyona, mokukendabala oku ka pa outekuduliko noku ka kwafela ka kale vali ke na oupamhepo muwa. Ashike ngeenge okaana inake livela ombedi, oke na okukondwa mo meongalo.

NGEENGE OMUUDIFI INA NINGINIFWA A NYONA

³⁸ Oshike shi na okuningwa po ngeenge ovaudifi inava ninginifwa va nyona enyono la kwata moiti? Molwaashi inava ninginifwa ve li Ondombwedi, itava dulu okukondwa. Nonande otashi dulika kave udite ko naanaa omifikamhango dOmbiibeli, ngeenge ova pewa omayele opahole otaa dulu oku va kwafela va ‘yukife omalila’ eemhadi davo. — Heb. 12:13.

³⁹ Ngeenge omuudifi i na ninginifwa ine livela ombedi konima eshi ovakulunhuongalo vavali va kundafana naye nokukendabala oku mu kwafela, otashi ka kala shiwa okushiivifila eongalo. Oku na okuningwa eshiivifo li li pauxupi, kutya: “[Edina lomunhu] ke fi vali omuudifi ina ninginifwa.” Opo nee eongalo otali ka tala ko omunyoni oo onga omunhu womounyuni. Nonande omunyoni oo ina kondwa, Ovakriste ove na okukala va lungama shi na sha nokweendafana naye. (1 Kor. 15:33) Ke na vali okuyandja olaporta yoilonga yomomapya.

⁴⁰ Konima yefimbo, omunhu oo ina ninginifwa oo a li a kufwa oshinakuwanifwa shouudifi otashi dulika a ka kale vali a hala okuninga omuudifi. Monghalo ya tya ngaho, ovakulunhuongalo vavali ove na okukundafana naye nokutala kutya okwa ninga exumokomesho la tya ngahelipi. Ngeenge okwa wana, oku na okuningwa eshiivifo pauxupi, tali ti: “[Edina lomunhu] okwa ninga vali omuudifi ina ninginifwa.”

JEHOVA OHA NANGEKE NOUPUNA ELONGELOKALUNGA LI NA OMBILI NOLA KOSHOKA

⁴¹ Aveshe ovo hava endafana neongalo laKalunga kunena otava hafele omanangeko noupuna opamhepo oo Kalunga a pa oshiwana shaye. Otu na eendja dopamhepo da denga mbada, notu na omeva oshili a wana taa tulumukifa. Otwa amenwa yo omolwefiloshisho laJehova olo a tula po koshi youkwamutwe waKristus. (Eps. 23; Jes. 32:1, 2) Okukala moparadisa yopamhepo momafiku aa axuuninwa madjuu oshe tu kwafela tu kale tu udite twa amenwa.

⁴² Ngeenge otwa kaleke po ombili noukoshoki meongalo, ohatu twikile okweefa ouyelele wetu woshili yOuhamba u minikile. (Mat. 5:16; Jak. 3:18) Omolwenangekonoupuna laJehova, ohatu ka hafela okumona ovanhu vahapu tave mu shiiva notave mu longele pamwe nafye eshi hatu longo ehalo laye.