Nghee ovakulunhuongalo hava ulikile ovanyoni ohole nonghenda

1. Oshike tashi dulu okuningwa po, konima ngeenge umwe okwa nyono enyono la kwata moiti?

MOSHITUKULWA sha dja ko, otwe lihonga osho Paulus a li a lombwela eongalo lomuKorinto osho li na okuninga, eshi omulumenhu umwe a li a nyona enyono la kwata moiti. Omunyoni oo ka li e lidilulula, onghee okwa li e na okukufwa mo meongalo. Ashike ngaashi omushangwa wenenediladilo we shi popya, Kalunga ota dulu okukwafela vamwe ve lidilulule. (Rom. 2:4) Ongahelipi ovakulunhuongalo tava dulu oku va kwafela ve lidilulule?

2-3. Oshike tu na okuninga po, ngeenge otwa didilike kutya omwiitaveli mukwetu okwa nyona enyono la kwata moiti, nomolwashike?

² Ovakulunhuongalo itava ka dula okukwafela umwe, ngeenge kave shii kutya okwa nyona enyono la kwata moiti. Oshike mbela tu na okuninga po, ngeenge otu shii kutya omwiitaveli mukwetu okwa nyona enyono la kwata moiti notu shi shii kutya enyono la tya ngaho otali dulu oku mu kufifa mo meongalo? Otwa pumbwa oku mu ladipika a ye kovakulunhuongalo, opo a ka kwafelwe. — Jes. 1:18; Oil. 20:28; 1 Pet. 5:2.

³ Oshike tu na okuninga po, ngeenge omunyoni okwa anye oku ka popya novakulunhuongalo? Otwa pumbwa okuya kovakulunhuongalo, opo tu shilipaleke kutya okwa mona ekwafo olo a pumbwa. Ngeenge otwa ningi ngaho, ohatu ka ulika kutya otu hole omumwatate, ile omumwameme oo. Ngeenge omunyoni okwa twikile nokuninga osho shii, ota ka nyona po ekwatafano laye liwa naJehova. Ota ka nyona po yo edina liwa leongalo. Onghee ohatu katuka onghatu nouladi, molwaashi otu hole Jehova nosho yo omunyoni. — Eps. 27:14.

NGHEE OVAKULUNHUONGALO HAVA KWAFELE OVO VA NYONA ENYONO LA KWATA MOITI

4. Oshike ovakulunhuongalo ve na okukaleka momadiladilo, eshi tava ka popya nomunhu, oo a nyona enyono la kwata moiti?

⁴ Ngeenge umwe meongalo okwa nyono enyono la kwata moiti, olutu lovakulunhuongalo ohali hoolola ovamwatate vatatu va pyokoka mokati kavo, opo va ka popye nomunyoni.a Ovalumenhu ovo, ova pumbwa okukala ve na ondjele nosho yo elininipiko. Eshi tava kendabala okukwafela omunyoni e lidilulule, ova pumbwa okudimbuluka kutya itava dulu oku mu fininika a lundulule. (Deut. 30:19) Ove na yo okukala ve shii kutya havanhu aveshe tave ke lidilulula, ngaashi ohamba David ya li ya ninga. (2 Sam. 12:13) Ovanyoni vamwe otashi dulika va hoolole okuhadulika komayele aJehova. (Gen. 4:​6-8) Ashike nonande ongaho, elalakano lovakulunhuongalo okukwafela omunyoni e lidilulule. Oshike ovakulunhuongalo ve na okudimbuluka, ngeenge tava ka popya nomunhu oo a nyona?

5. Ovakulunhuongalo ove na okukala nomaukwatya elipi, eshi tava ka popya nomunyoni? (2 Timoteus 2:​24-26) (Tala yo efano.)

⁵ Ovakulunhuongalo ova tala ko omunyoni e li odi ya kana i na ondilo. (Luk. 15:​4, 6) Onghee ngeenge tava ka popya nomunyoni, inava pumbwa okupopya naye tava hanyauka, ile okuungaunga naye nonyanya. Ove na yo okudimbuluka kutya, ove na okuninga shihapu shihe fi ashike okupula omapulo. Ova pumbwa okuulika omaukwatya, oo a popiwa mu 2 Timoteus 2:​24-26. (Lesha.) Ovakulunhuongalo ova pumbwa okukala ve na omwenyo muwa nosho yo onghenda, eshi tava kendabala okukwafela omunyoni.

6. Ongahelipi ovakulunhuongalo hava longekida omitima davo, ofimbo inava ka popya nomunyoni? (Ovaroma 2:4)

⁶ Ovakulunhuongalo ohava longekida omitima davo. Ohava kendabala okuhopaenena Jehova, eshi tava ungaunga nomunyoni. Ohava dimbuluka eendjovo daPaulus, odo tadi ti: “Kalunga okwa hala oku ku kwafela u lidilulule omolwonghenda yaye.” (Lesha Ovaroma 2:4.) Ovakulunhuongalo ove li ovafita nova pumbwa okushikula ewiliko laKristus nokuhopaenena onghedi yaye, eshi tava file oshisho eongalo. (Jes. 11:​3, 4; Mat. 18:​18-20) Ofimbo inava ka popya nomunyoni, ohava ilikana kuJehova, opo va kwafele omunyoni e lidilulule. Ohava ningi omapekapeko mOmishangwa nosho yo moishangomwa yetu, nokwiilikana kuJehova, opo e va kwafele va ude ko onghalo yomunyoni. Ohava konakona yo osho sha ningifa omunhu a nyone. — Omayel. 20:5.

7-8. Ongahelipi ovakulunhuongalo tava ka hopaenena elididimiko laJehova, eshi tava ka popya nomunyoni?

⁷ Ovakulunhuongalo ohava hopaenene elididimiko laJehova. Ohava kaleke momadiladilo nghee Jehova a li a ungaunga novanyoni monakudiwa. Pashihopaenenwa, Jehova okwa li e lididimikila Kain nokwa li e mu lombwela osho tashi dulu oku mu ningilwa, ngeenge okwa kala ina lundulula etaleko laye nosho yo enangeko noupuna olo ta ka mona, ngeenge okwa dulika. (Gen. 4:​6, 7) Jehova okwa li a tuma omuprofeti Natan, opo a pe David omayele nokwa li a longifa efaneko, olo la li la kwafela David e lidilulule. (2 Sam. 12:​1-7) Jehova ‘okwa kala nokutuma ovaxunganeki vaye omafiku nomafiku’ kOvaisrael, eshi va li itava dulika kuye. (Jer. 7:​24, 25) Ka li a teelela oshiwana shaye shi lidilulule, opo eshi kwafele. Ndele ponhele yaasho, okwa li a katuka onghatu tete, opo e shi kwafele shi lidilulule.

⁸ Ovakulunhuongalo ohava shikula oshihopaenenwa shaJehova, eshi tava kendabala okukwafela ovo va nyona enyono la kwata moiti. Oha ve va ‘kumaida nonheni,’ ngaashi sha popiwa mu 2 Timoteus 4:2. Onghee omukulunhuongalo okwa pumbwa alushe okukala a ngungumana noku na elididimiko, opo a kwafele omunyoni a longe osho sha yuka. Ngeenge omukulunhuongalo okwa kala a handuka, omunyoni ita ka pwilikina komayele aye noite ke lidilulula.

9-10. Ongahelipi ovakulunhuongalo tava ka kwafela omunyoni a didilike kutya eenghatu odo a katuka ode mu ningifa a nyone?

⁹ Ovakulunhuongalo ohava kendabala okutala kutya oshike sha ningifa omunyoni a nyone. Pashihopaenenwa, mbela oshike sha nghundipaleka ekwatafano laye naJehova? Mbela oha lesha ngoo Ombiibeli pandjikilile nokuya moukalele? Mbela okwa efa po okwiilikana kuJehova pandjikilile? Mbela okwa efa omahalo a puka e mu pangele? Oha kala noolyelye, ile oha kufa ombinga momalihafifo elipi? Oinima oyo otashi dulika ya kuma ngahelipi omutima waye? Mbela okwa didilika nghee omatokolo nosho yo eenghatu daye da kuma Xe yaye, Jehova?

¹⁰ Ovakulunhuongalo otava dulu okupula omunyoni omapulo, oo tae ke mu kwafela a diladile kutya oshike sha nghundipaleka ekwatafano laye naJehova noshe mu twala menyono. Osho ohave shi ningi pahole, ashike ove na okuhenuka oku mu pula omapulo opaumwene, e na sha noinima oyo inava pumbwa okushiiva. (Omayel. 20:5) Ngaashi ashike Natan a li a longifa efaneko, opo a kwafele David, otava dulu yo okulongifa efaneko, opo va kwafele omunhu a diladile shi na sha neenghatu daye, noku didilike kutya omolwashike a nyona. Otashi dulika petalelepo lotete omunhu a hovele okukala e udite ondjo omolweenghatu daye. Otashi dulika nokuli e lidilulule.

11. Jesus okwa li a ungaunga ngahelipi naavo va nyona?

¹¹ Ovakulunhuongalo ohava kendabala okuhopaenena Jesus. Eshi a li ta ungaunga naSaul wokuTarsus, Jesus omunyumunwa okwa li a pula Saul epulo, ta ti: “Saul, Saul, omolwashike to hepeke nge?” Jesus okwa li a pula Saul epulo olo, opo e mu kwafele a mone kutya osho a li ta ningi osha puka. (Oil. 9:​3-6) Shi na sha ‘nomukainhu Isabel,’ Jesus okwa ti: “Onde mu pa omhito e lidilulule.” — Eh. 2:​20, 21.

12-13. Ongahelipi tashi dulika ovakulunhuongalo va pe omunyoni efimbo, opo e lidilulule? (Tala yo efano.)

¹² Ngeenge ovakulunhuongalo ova hopaenene Jesus, itava ka diladila kutya omunyoni ke na efiku e lidilulule. Ovanhu vamwe otashi dulika ve lidilulule petalelepo lotete, ashike vamwe otashi dulika va kufe efimbo. Onghee ovakulunhuongalo otashi dulika va ninge omalongekido va ka popye nomunyoni lwoikando i dulife pushimwe. Otashi dulika konima eshi omunyoni a talelwa po oshikando shotete, ta ka hovela okudiladila kombinga yaasho va kundafana. Otashi dulika a ulike elininipiko nokupula Jehova e mu dimine po omatimba aye. (Eps. 32:5; 38:18) Kungaho, petalelepo tali shikula ko, omunyoni otashi dulika a kale e na etaleko la yooloka ko kwaalo a li e na petalelepo lotete.

¹³ Ovakulunhuongalo ohava ulike oukwao wananghali nosho yo onghenda, eshi tava kwafele omunyoni e lidilulule. Ohava ilikana kuJehova, opo a nangeke noupuna eenghendabala davo nove na elineekelo kutya omunyoni ote ke lidilulula. — 2 Tim. 2:​25, 26.

14. Olyelye naanaa ha kwafele omunyoni e lidilulule, nomolwashike hatu tile ngaho?

¹⁴ Ohatu kala twa hafa neenghono, ngeenge omunyoni e lidilulula. (Luk. 15:​7, 10) Nonande ovakulunhuongalo ohava ningi ngaashi tava dulu, opo va kwafele omunyoni, mbela olyelye naanaa ha kwafele omunyoni e lidilulule? Dimbuluka eendjovo daPaulus odo a shanga shi na sha novanyoni, eshi a ti: “Kalunga otashi dulika e ke va pe omhito ve lidilulule.” (2 Tim. 2:25) Onghee Jehova oye ha kwafele omunyoni a lundulule okudiladila kwaye nosho yo oikala yaye. Paulus okwa popya osho hashi ningwa po, konima ngeenge umwe okwe lidilulula. Omunhu a tya ngaho oha kala e na eshiivo lashili lOmishangwa, naasho ohashi mu kwafele a henuke eemwiyo daSatana. — 2 Tim. 2:26.

15. Ongahelipi ovakulunhuongalo tava ka twikila okukwafela omunyoni, oo e lidilulula?

¹⁵ Ngeenge omunyoni okwe lidilulula, ovakulunhuongalo otava ka twikila oku mu talela po, opo ve mu kwafele a pameke eitavelo laye noku mu kwafela a finde omayeleko aSatana noku ninge osho sha yuka. (Heb. 12:​12, 13) Oshoshili kutya ovakulunhuongalo itava ka lombwela vamwe kombinga yaasho omunyoni a ninga. Ndele mbela eongalo ola pumbwa okushiiva shike?

‘VA PUKULULENI MOIPAFI’

16. She likolelela ku 1 Timoteus 5:​20, Paulus okwa li ta ulike koolyelye eshi a ti, “moipafi”?

¹⁶ Lesha 1 Timoteus 5:20. Paulus okwa li a lombwela Timoteus, omukulunhuongalo mukwao, a pukulule ovo ‘tava nyono moipafi.’ Ndele mbela okwa li a hala okutya oshike? Ka li a hala okutya eongalo alishe ola pumbwa okushiiva osho omunyoni a ninga. Ndele ponhele yaasho, okwa li ta ulike kwaavo ve shii nale osho omunyoni a ninga. Otashi dulika ve shi mona, ile oye e va lombwela ye mwene. Ovakulunhuongalo otava ka lombwela ovo va mona osho omunyoni a ninga, kutya omunyoni okwa kwafelwa.

17. Ngeenge vahapu meongalo ova shiiva kutya umwe okwa nyona enyono la kwata moiti, eshiivifo lilipi hali ningwa, nomolwashike?

¹⁷ Omafimbo amwe, otashi dulika vamwe meongalo ve shii kutya umwe okwa nyona enyono la kwata moiti. Pomhito ya tya ngaho, “moipafi” otashi dulika mwa kwatelwa eongalo alishe. Onghee omukulunhuongalo ota ka shiivifila eongalo kutya omumwatate, ile omumwameme wonhumba okwa handukilwa. Omolwashike? Paulus okwa nyamukula a ti: Opo “shi kale elondwelo kwaaveshe,” vaha nyone enyono la kwata moiti.

18. Oshike osho ovakulunhuongalo tava ka ninga po, ngeenge okaana ka ninginifwa, oko ke li koshi yeedula 18, oka nyono enyono la kwata moiti? (Tala yo efano.)

¹⁸ Oshike osho ovakulunhuongalo tava ka ninga po, ngeenge okaana ka ninginifwa, oko ke li koshi yeedula 18, oka nyono enyono la kwata moiti? Olutu lovakulunhuongalo otali ka ninga elongekido, opo ovakulunhuongalo vavali va ka popye nokaana oko pamwe novadali vako Ovakriste.b Ovakulunhuongalo otava ka pula ovadali osho va ninga po nale, opo va kwafele okaana kavo ke lidilulule. Ngeenge okaana oka pwilikine komayele ovadali vako noka ninga omalunduluko, ovakulunhuongalo otashi dulika va tokole va efe ovadali va twikile okukwafela okaana kavo. Kakele kaasho, Kalunga okwa pa ovadali oshinakuwanifwa shokudeula ovana vavo pahole. (Deut. 6:​6, 7; Omayel. 6:20; 22:6; Ef. 6:​2-4) Ovakulunhuongalo otava ka twikila okupula ovadali nokushilipaleka kutya okaana ota ka mono ekwafo, olo ka pumbwa. Oshike osho ovakulunhuongalo tava ka ninga po, ngeenge okaana oka anye okuninga omalunduluko? Monghalo ya tya ngaho, ovakulunhuongalo vatatu otava ka popya vali nokaana oko pamwe novadali vako.

“JEHOVA OMUNALUKENO NOMUNANGHENDA”

19. Ongahelipi ovakulunhuongalo hava kendabala okuhopaenena Jehova, ngeenge tava ungaunga novanyoni?

¹⁹ Ovakulunhuongalo ove na oshinakuwanifwa shokukaleka eongalo la koshoka. (1 Kor. 5:7) Ashike ohava ningi ngaashi tava dulu, opo va kwafele omunhu e lidilulule. Eshi tava kwafele omunyoni e lidilulule, ohava kala ve na elineekelo kutya omunhu a tya ngaho ota ka ninga omalunduluko. Omolwashike mbela? Omolwaashi ova hala okuhopaenena Jehova, oo e li “omunalukeno nomunanghenda.” (Jak. 5:11) Omuyapostoli Johannes okwa li ha ungaunga novamwaxe pahole. Okwa shanga a ti: “Ovamwange ovaholike, ohandi mu shangele shi na sha noinima ei, opo muha nyone. Ndele ngeenge umwe okwa nyono, otu na omukwafi oo e li puTate, sha hala okutya omuyuki Jesus Kristus.” — 1 Joh. 2:1.

20. Oshike hatu ka kundafana moshitukulwa shaxuuninwa shomoitukulwa ei?

²⁰ Shinyikifa oluhodi, omafimbo amwe Omukriste otashi dulika a anye okulidilulula. Ngeenge osho osha ningwa, oku na okukufwa mo meongalo. Ongahelipi ovakulunhuongalo tava ka ungaunga noshinima sha tya ngaho? Osho ohatu ke shi kundafana moshitukulwa shaxuuninwa shomoitukulwa ei.