Ouwa oo hau di mokudulika kelongekido laKalunga loukwamutwe

OPO tu dule okukala twa unganekwa tu longe ehalo laJehova, Omunamapangelo aeshe, osha fimanenena okukala hatu dulika kuYe. Otwa dimina kutya Omona waye oye omutwe weongalo lopaKriste nohatu dulika kefinamhango loukwamutwe meembinga dimwe vali dokukalamwenyo. Okudulika kelongekido laKalunga loukwamutwe la tya ngaho ohaku etele ouwa aveshe ovo va kwatelwa mo.

² Ovanhu ova li va lombwelwa va kale hava dulika keenghonopangelo moshikunino shaEden. Elongekido la tya ngaho ola tumbulwa moipango yaKalunga oyo i li muGenesis 1:28 nosho yo 2:16, 17. Oinamwenyo oya li i na okukala hai dulika kovanhu, na Adam naEva ova li ve na okukala hava longo ehalo laKalunga nokudulika keenghonopangelo daye. Okudulika keenghonopangelo daKalunga monghedi ya tya ngaho okwa li taku ka etifa ombili nelandulafano. Efinamhango loukwamutwe ola ka divilikwa lwanima mo 1 Ovakorinto 11:3. Omuyapostoli Paulus okwa ti: “Onda hala nye mu shiive nokutya, Kristus Oye omutwe wakeshe omulumenhu, nomutwe womukainhu omulumenhu, nomutwe waKristus oKalunga.” Elongekido olo otali ulike kutya keshe umwe okwa teelelwa a dulike koukwamutwe, kakele kaJehova.

³ Ovanhu vahapu kunena kave shii efinamhango li na sha noukwamutwe noihava dulika kulo. Omolwashike mbela? Omolwaashi ovanhu votete muEden ova li va hoolola okuhadulika koukwamutwe waKalunga Omunamapangelo aeshe. (Gen. 3:4, 5) Ashike osho inashi va pa emanguluko lasha. Ponhele yaasho, ova ninga ovapangelwa voshishitwa shopamhepo shikolokoshi, Satana Ondiaboli. Ounashibofa wotete owa nyona po ekwatafano lovanhu naKalunga. (Kol. 1:21) Kungaho, ovanhu vahapu kunena ove li koshi yepangelo lomunawii. — 1 Joh. 5:19.

⁴ Eshi twe lihonga oshili yEendjovo daKalunga nokudulika kuyo, otwa manguluka ko kenwefemo laSatana. Tu li Eendombwedi de liyapula noda ninginifwa, otwa tambula ko Ounamapangelo waJehova monghalamwenyo yetu. Ohatu tu kumwe nohamba David oyo ya dimina kutya Jehova oye “Omupangeli waaishe.” (1 Omaf. 29:11) Ohatu popi nelininipiko kutya: “Shi dimbulukweni, nokutya Omwene Oye Kalunga. Oye tuu, e tu shita, fye ovaye, oshiwana shaye needi doufita waye.” (Eps. 100:3) Otwa dimina kutya Jehova omunene notu na okukala hatu dulika kuye filufilu, molwaashi oye a shita oinima aishe. (Eh. 4:11) Tu li ovakalele vaKalunga kashili, ohatu hopaenene Jesus Kristus, oo e tu tulila po oshihopaenenwa shiwa shi na sha nokudulika kuKalunga.

⁵ Jesus okwe lihonga shike momaudjuu oo a pita muo eshi a li kombada yedu? Ovaheberi 5:8 ova ti: “Nande Oye Omona okwe lilonga eduliko okouyehame ou e u humbata.” Jesus okwa kala ha dulika filufilu kuXe womeulu, nokuli naashi a li momaudjuu. Kakele kaasho, Jesus kali a ninga nande osha kehalo laye mwene. Kali ha popi omadiladilo aye mwene, noka li ha kongo efimano. (Joh. 5:19, 30; 6:38; 7:16-18) Pefimbo loukalele waye, okwa li ha hafele okulonga ehalo laXe, nonande okwa li a patanekwa nokuhepekwa. (Joh. 15:20) Ashike nande ongaho Jesus okwa kala ha dulika kuKalunga. Okwa li e “lininipika” fiyo “omokufya [komuti womahepeko, NW].” Okudulika kwaye filufilu kuJehova okwa etifa omauwa mahapu, molwaashi okwa pewa ondodo yopombada, okwa fimanekifa Xe nokwa xupifa ovanhu. — Fil. 2:5-11; Heb. 5:9.

OINIMA OMO TU NA OKUDULIKA KEENGHONOPANGELO

⁶ Ngeenge otwa kala hatu dulika kuKalunga mokulonga ehalo laye, ohatu ka henuka oisho nomaudjuu oo haa hange ovo inava hala okudulika kounamapangelo waJehova. Omutondi wetu, Ondiaboli, ota kondouwala alushe nafye a hala oku tu xwaka po. Ohatu ka finda omunawii oo ngeenge otwe mu kondjifa twa mana mo nokukala hatu dulika nelininipiko kuJehova. — Mat. 6:10, 13; 1 Pet. 5:6-9.

⁷ Ohatu dulika koukwamutwe waKristus meongalo nokeenghonopangelo odo a pa “omupiya omudiinini nomunaendunge.” Osho oshi na okunwefa mo oikala yetu nosho yo nghee hatu ungaunga navamwe. Okudulika kuKalunga meongalo oku na oku tu linyengifa tu kale hatu dulika kEendjovo daYe monghedi yetu aishe yoku mu longela. Okudulika kwa tya ngaho okwa kwatela mo oukalele, okukala pokwoongala nokukufa ombinga, ekwatafano letu novakulunhuongalo nosho yo okulongela kumwe kwetu nomalongekido eongalo. — Mat. 24:45-47; 28:19, 20; Heb. 10:24, 25; 13:7, 17.

⁸ Okudulika kuKalunga ohaku xumifa komesho ombili, eameno nosho yo elandulafano meongalo lopaKriste. Ovo hava dulika kuJehova ohava hopaenene omaukwatya aye. (1 Kor. 14:33, 40) Okukala mehangano laJehova okwe tu ningifa tu kale tu udite ngaashi ohamba David. Eshi David a li a didilika eyooloko olo li li pokati kovapiya vaJehova novakolokoshi, okwa popya nehafo a ti: “Oshilongo oshi nelao, ngeenge Omwene Oye Kalunga kasho.” — Eps. 144:15.

⁹ Melongekido li na sha nohombo nosho yo momaukwaneumbo, “omutwe womukainhu omulumenhu.” Ashike ovalumenhu ove na okudulika kuKristus, ofimbo omutwe waKristus oKalunga. (1 Kor. 11:3) Ovakulukadi ove na okukala hava dulika kovashamane vavo, nounona ove na okukala hava dulika kovadali vavo. (Ef. 5:22-24; 6:1) Moukwaneumbo ohamu kala ombili ngeenge oshilyo keshe ohashi dulika kefinamhango li na sha noukwamutwe.

¹⁰ Omushamane e li omutwe weumbo oku na okuungaunga noukwaneumbo waye pahole, ngaashi Kristus. (Ef. 5:25-29) Ngeenge oha wanifa po oinakuwanifwa yaye e li omutwe weumbo noha ungaunga nawa nomukulukadi nosho yo nounona, otava ka kala hava dulika kuye nehalo liwa. Omukulukadi oku na okukala ekwafo tali wapalele. (Gen. 2:18) Ngeenge oha yambidida omushamane waye nelididimiko nohe mu fimaneke, omushamane oha kala e mu hole nohashi fimanekifa Kalunga. (1 Pet. 3:1-4) Ngeenge ovashamane novakulukadi ohava dulika komayele Ombiibeli e na sha noukwamutwe, otava tulile po ounona vavo oshihopaenenwa shiwa shi na sha nokudulika kuKalunga.

¹¹ Okudulika kwetu kuKalunga ohaku kumu yo etaleko letu li na sha ‘novapangeli,’ ovo va “tulwa po kuKalunga.” (Rom. 13:1-7) Molwaashi Ovakriste ohava dulika keemhango doilongo, ohava futu oifendela, tava yandje ‘osho shomukesari, komukesari, naasho shaKalunga, kuKalunga.’ (Mat. 22:21) Shikwao vali, omalongekido okulonga oshitukulwa otaa tu kumwe neemhango deameno. Okudulika kovapangeli moinima aishe oyo ihe li omhinge neemhango daJehova douyuki, otashi tu kwafele tu kale hatu yandje elitulemo koilonga yokuudifa. — Mark. 13:10; Oil. 5:29.

¹² Okudulika kelongekido laKalunga li na sha noukwamutwe okwa kuma onghalamwenyo yetu aishe. Nomesho eitavelo, otu wete efiku olo eshi ovanhu aveshe tava ka kala hava dulika kuJehova Kalunga. (1 Kor. 15:27, 28) Ovo va tambula ko ounamapangelo waJehova notava kala tava dulika kuye fiyo alushe itava ka kala tuu va nangekwa noupuna nova hokiwa kuye!