Kain okwa dipaa Abel omolwehandu

Konima eshi Adam naEva va dja moshikunino shaEden, ova ka dala ounona vahapu. Omona wavo woshiveli, Kain, okwa li omunamapya, ofimbo ondenge yaye, Abel, a li omufita woimuna.

Efiku limwe Kain naAbel ova li va ningila Jehova omaxwikiloyambo. Mbela ou shii kutya exwikiloyambo oshike? Exwikiloyambo olo oshali ye likalekelwa oyo hai pewa Jehova. Jehova okwa li a hokwa eyambo laAbel, ashike ka li a hafela eyambo laKain. Osho osha li sha handukifa neenghono Kain. Jehova okwa li a londwela Kain kutya ngeenge okwa kala a handuka, ehandu laye otali dulu oku mu ningifa a longe owii. Ashike Kain ka li a pwilikina.

Ponhele yaasho, Kain okwa li a lombwela Abel a ti: “Natu ye moixwa.” Ofimbo ve li moixwa ovo aveke, Kain okwa ponokela omumwaina ndele te mu dipaa. Jehova okwa li ta ka ninga po shike kombinga yaasho? Jehova okwa li a handukila Kain ndele te mu tumu a ka kale kokulekule noukwaneumbo wavo. Kain ka li vali a pitikwa a alukile keumbo lavo.

Oshike hatu lihongo moshinima osho? Otashi dulika tu handuke ngeenge oinima oya kala itai tu endele nawa ngaashi twa li twa teelela. Ngeenge otwa didilike kutya otwa handuka, ile ngeenge vakwetu ove tu londwele molwaashi ova mona kutya otwa handuka, otu na okulundulula diva oikala yetu nokupangela omaliudo etu fimbo inae tu pangela.

Molwaashi Abel okwa li e hole Jehova nokwa li ha longo osho sha yuka, Jehova ote ke mu dimbuluka. Eshi Jehova ta ka ninga edu oparadisa ota ka nyumuna Abel.