Ovamwainafana ovo va kulika
oikala ya yooloka
SHI he fi okuhenukwa, omatokolo oo haa ningwa kovadali ohaa nwefa mo ovana. Eshi osho shi li ngaho ngaashi ashike sha li moshikunino shaEden. Onghatu younashibofa yaAdam naEva oya nwefa mo ovanhu aveshe neenghono. (Genesis 2:15, 16; 3:1-6; Ovaroma 5:12) Ndelenee keshe umwe womufye oku na omhito okulalakanena ekwatafano liwa nOmushiti wetu ngeenge otwa hoolola oku shi ninga. Eshi osha ulikwa kehokololo laKain naAbel, ovamwainafana votete mondjokonona yovanhu.
Kape na eshangelo lopamishangwa tali ulike kutya Kalunga okwa popya naAdam naEva konima yokutewatewa kwavo muEden. Ndele nande ongaho, Jehova ina efa okupopya novanamati vavo. Pe he na omalimbililo, Kain naAbel ove lihonga kovadali vavo osho sha ningwa nale. Okwa li va mona “Ovakerubi ve na eongamukonda la xwama omundilo lokunangela po ondjila yokuya komuti womwenyo.” (Genesis 3:24, OB-1954) Ovalumenhu ava ova mona yo oushili weingido laKalunga olo kutya oshinhwi nouyahame otai ka kala po shili mokukalamwenyo.—Genesis 3:16, 19.
Kain naAbel ove na okukala kwa li ve shii eendjovo daJehova odo a popya keyoka eshi a ti: “Ame ohandi ka tula outondanhu pokati koye nomwalikadi . . . nokoludalo loye nokoludalo laye. Ye ota ka nyanyaula omutwe woye ndele ove to ke mu twa moshififinwa.” (Genesis 3:15) Osho Kain naAbel kwa li ve shii kombinga yaJehova okwa li tashi dulu oku va kwafela okukulika ekwatafano naye la hokiwa.
Mokudiladila kombinga yexunganeko laJehova nomaukwatya aye e li Omukwafi omunahole, pe he na omalimbililo okwa li sha etifa ehalo muKain naAbel okulalakanena okuhokiwa kuKalunga. Ndelenee fiyo opondodo ilipi kwa li ve na okukulika ehalo la tya ngaho? Mbela okwa li tave ke linyengifwa kehalo lavo lopaushitwe okulongela Kalunga nokukulika oupamhepo wavo fiyo oposhitwa shokukala neitavelo tali longo muye?—Mateus 5:3, NW.
Ovamwainafana tava yambe omayambo
Mokweendela ko kwefimbo, Kain naAbel ova yambela Kalunga omayambo. Kain okwa yamba oiimati yomepya, ndele Abel okwa yamba eshi sha dalwa tete shomoimuna yaye. (Genesis 4:3, 4) Ovalumenhu ava kashiimba okwa li ve na omido 100 lwaapo, omolwaashi Adam okwa li e na omido 130 eshi a mona okamonamati Set.—Genesis 4:25; 5:3.
Omayambo avo okwa ulika kutya Kain naAbel ova dimina onghalo yavo yokuhawanenena nokwa li va hala okuhokiwa kuKalunga. Osha yela kutya okwa li va diladila kombinga yeudaneko laJehova li na sha neyoka nOludalo lomukainhu. Shi na sha nefimbo nosho yo kutya eenghendabala okwa li di fike peni odo Kain naAbel va longifa mokukulika ekwatafano naJehova la hokiwa inashi popiwa. Ndelenee elinyengo laKalunga komayambo avo otali tu pe ouyelele u na sha nomadiladilo omoule akeshe umwe womuvo.
Ovahongwanhu vamwe otava ti kutya Eva okwa li a tala ko Kain e li “oludalo” olo tali ka hanauna po eyoka, nomolwaasho eshi Kain a dalwa Eva okwa ti: “Ame nde limonena omulumenhu kekwafo lOmwene.” (Genesis 4:1) Ngeenge Kain naye osho a li a itavela ngaho, okwa li a puka lelalela. Mepingafano naasho, eyambo laAbel ola ningwa neitavelo. Onghee hano, “meitavelo Abel okwa yambela Kalunga eyambo liwa li dule eli laKain.”—Ovaheberi 11:4.
Eudeko lopamhepo laAbel noku he na eudeko la tya ngaho kwaKain, hayo ashike ya li eyooloko pokati kovamwainafana ava. Opa li yo eyooloko moikala yavo. Onghee hano, “Omwene okwa tala nokuhokwa Abel noiyandjiwa yaye, ndelenee Ye ina tala Kain noiyandjiwa yaye.” Otashi dulika Kain ina diladila nande moule shi na sha neyambo laye nokwe li yandja ashike ngahenya. Ndelenee Kalunga ina hokwa elongelokalunga longaho. Kain okwa li a kulika oikala ii yomutima, na Jehova okwe shi mona mo kutya okwa li e na omalinyengotomheno a puka. Elinyengo laKain keanyo leyambo laye ola ulika oikala yaye yoshili. Ponhele yokukendabala okuyukifa oikala nosho yo omalinyengotomheno aye, “Kain okwa handuka unene, ndele ye a fidimika oshipala shaye.” (Genesis 4:5) Elihumbato laye ola holola omadiladilo nomalalakano aye oukolokoshi.
Elondwelo nelinyengo
Molwaashi Kalunga okwa shiiva oikala yaKain, okwe mu pukulula ta ti: “Molwashike wa handuka, nomolwashike wa fidimika oshipala shoye? Hasho ngaha: ngenge to longo ouwa to shiiva okuyelula omutwe woye, ndelenee ngenge ito longo ouwa, oulunde tau nangele poshivelo, ndee tau ku hokwa. Ndelenee ove u noku u pangela.”—Genesis 4:6, 7.
Mehokololo eli omu na oshilihongomwa sha fimana kufye. Doshili, oulunde otau nangele poshivelo wa teelela oku tu xwaka po. Ndele nande ongaho, Kalunga okwe tu pa emanguluko lokuhoolola kufye vene osho twa hala, nohatu dulu okuhoolola okuninga eshi shi li mondjila. Jehova okwa ladipika Kain a ‘longe ouwa,’ ndelenee ine mu fininika a lunduluke. Kain okwa hoolola ondjila yaye mwene.
Ehokololo la nwefwa mo ola twikila tali ti: “Ndele Kain okwa popya nondenge yaye Abel. Natu ye moixwa, ndele opa ningwa eshi va li moixwa, Kain okwa nukila Abel ndee te mu dipaa.” (Genesis 4:8) Kungaha, Kain okwa ninga omudipai omuhayavala iha dulika. Ina ulika nokuli nande elivelombedi lasha eshi Jehova e mu pula ta ti: “Ondenge yoye Abel oku li peni?” Ponhele yaasho Kain okwa nyamukula nomutima we likukutika nomonghedi yoku he na efimaneko, a ti: “Ame nghi shi shii. Aame mbela omufita wondenge yange?” (Genesis 4:9) Oipupulu oyo ya yukilila nosho yo okulikala kwaKain okukala noshinakuwanifwa okwa nyaneka pomutenya okuhenonghenda kwaye.
Jehova okwa finga Kain nokwe mu taataa a dje mo momudingonoko waEden. Efingo olo la tumbulwa molwaKain osha yela kutya okwa li tali ka kala la pitilila pwaalo la tumbulilwa nale edu, nomolwaye edu itali ka imika sha nande ne li longe. Kain okwa li ta ka kala epongo nomutewatewi kombada yedu. Okunyemata kwaKain molwokutokolelwa etokolo la kwata moiti, okwa ulika oshisho kutya edipao lamumwaina ote ke li pulwa, ndelenee ina ulika elivelombedi lashili. Jehova okwa tula po “edidiliko” molwaKain—tashi dulika eufomhango la mana mo olo la shiivika nola diininwa kuvakwao nola nuninwa okukelela opo a ha dipawe molwonghone.—Genesis 4:10-15.
Opo nee Kain “okwa dja po koshipala shOmwene nokwa tula medu laNod (Eelaelo) koushilo waEden.” (Genesis 4:16) Konima eshi a kufa omukainhu movamwaina ile movanakadona vovamwaina, okwa tunga oshilando osho a lukila omonamati waye wotete Henok. Lamek, oludalo laKain naye okwa li e na yo eamo lokulongifa eenghono ngaashi xekulu omuhenakalunga. Ndelenee epata laKain ola kombololwa po kEyelu pefimbo laNoa.—Genesis 4:17-24.
Oilihongomwa kufye
Ohatu dulu okulihonga mo sha mehokololo laKain naAbel. Omuyapostoli Johannes okwa kumaida Ovakriste va kale ve holafane, va “ha fe Kain, ou a dja momunawii nokwa dipaa ondenge yaye.” “Oilonga [yaKain] oya li ii, ndele inya yondenge yaye oya li youyuki.” Johannes okwa ti yo: “Keshe ou ta tondo omumwaxe oye omudipai; ndele mu shi shii, kape nomudipai e nomwenyo waalushe tau kala muye.” Heeno, onghedi oyo hatu kala nOvakriste vakwetu otai nwefa mo ekwatafano letu naKalunga nosho yo etimaumbwile letu lomwenyo. Itatu dulu okukala tu tonde ovaitaveli vakwetu ndele pefimbo olo tuu olo hatu hafele okuhokiwa kuKalunga.—1 Johannes 3:11-15; 4:20.
Osha yela kutya Kain naAbel okwa li va tekulwa monghedi ya faafana, ndelenee Kain ka li e na eitavelo muKalunga. Doshili, okwa ulika omhepo yOndiaboli, ‘omudipai wotete naxe yoipupulu.’ (Johannes 8:44) Onghatu yaKain otai ulike kutya atusheni otu na ehoololo nosho yo kutya ovo tava hoolola okunyona otave litongola ko vo vene kuKalunga, nonokutya Jehova ota tokola ovo itave livele ombedi.
Mepingafano naasho, Abel okwa li e na eitavelo tali longo muJehova. Doshili, “meitavelo Abel okwa yambela Kalunga eyambo liwa li dule eli laKain, [nomolwalo] a pewa ehepaululo nokutya, oye omuyuki, Kalunga eshi a hepaulula omayambo aye.” Nonande Omishangwa kadi na nande eendjovo odo da popiwa kuAbel, okupitila meitavelo laye li shii okuhopaenenwa ota “popi natango.”—Ovaheberi 11:4.
Abel oye a li wotete momusholondodo mule wovakanyateli voudiinini. Ohonde yaye oyo ‘ya kuwila Jehova onghuwo medu’ inai dimbuwa. (Genesis 4:10; Lukas 11:48-51) Ngeenge otwa kala neitavelo tali longo ngaashi Abel, nafye yo ohatu dulu okuhafela ekwatafano li na ondilo naJehova tali kalelele.
OMUNAMAPYA NOMUFITA WEEDI
•
Okulonga edu nokufila oshisho oinamwenyo oya li imwe yomoinakuwanifwa oyo Adam a pewa kuKalunga petameko. (Genesis 1:28; 2:15; 3:23) Omonamati waye Kain okwa ninga omunamapya ndele Abel okwa ninga omufita weedi. (Genesis 4:2) Molwaashi oikulya yovanhu aveshe okwa li ya kwatela mo ashike oiimati noimeno fiyo okonima yEyelu, mbela omolwashike kwa li sha pumbiwa okulifa eedi?—Genesis 1:29; 9:3, 4.
Opo eedi di kale tadi xupu nawa oda pumbwa okufilwa oshisho kovanhu. Oshilonga shaAbel otashi ulike kutya ovanhu okwa li hava lifa oimuna okudja petameko londjokonona yovanhu. Omishangwa inadi popya kutya ovanhu vopetameko okwa li hava longifa omashini oimuna e li eendja, ndelenee nande ongaho ovo hava li ashike oikwambidi otava dulu okulongifa olududi leedi. Nongeenge eedi oda fi, oipa yado ohai dulu okulongifwa. Pashihopaenenwa opo Jehova a djaleke Adam naEva, okwe va ningila “oikutu yoipa.”—Genesis 3:21.
Kutya nee oshike, osha yela kutya tete Kain naAbel okwa li hava longele kumwe. Okwa li hava eta po sha osho vakwao moukwaneumbo kwa li va pumbwa opo va djale nokulya nawa.
[Efano pepandja 21]
“Oilonga [yaKain] oya li ii, ndele inya yondenge yaye oya li youyuki”