Ovaisrael ova li va tukululila Jehova oshibofa

Fimbo Ovaisrael va li mombuwa, Korah, Datan, Abiram navakwao 250 ova li va tukululila Moses oshibofa. Ova li va ula Moses tava ti: ‘Otwe ku loloka. Hano nye naAron onye ashike mwa wana okukala tamu kwatele komesho? Jehova oku li pamwe nafye atushe, ndele ke li ashike pamwe naave nosho yo naAron.’ Jehova ka li a hokwa oshinima sha tya ngaho. Okwa li e wete kutya Ovaisrael ovo oye va tukululila oshibofa.

Moses okwa li a lombwela Korah novayambididi vaye ta ti: ‘Ileni ketwali mongula, eteleleni oikwatelwa yomundilo nomatwimino. Jehova ote ke tu ulikila kutya okwa hoolola lyelye.’

Efiku la landula ko, Korah navakwao 250 ova li va ka shakeneka Moses ketwali. Korah navakwao ova li va ninga omatwiminoyambo va fa ovapristeri. Opo nee Jehova okwa li a lombwela Moses naAron ta ti: ‘Djeni mo mongudu yaKorah navakwao.’

Nonande Korah okwa li a ya kuMoses ketwali, Datan naAbiram novaneumbo lavo ova li va anya okuya ko. Jehova okwa li a lombwela Ovaisrael va kale kokule nonhanda yaKorah, yaDatan naAbiram. Diva, Ovaisrael ova li va ehena kokule. Datan, Abiram novaneumbo lavo ova li va fikama pondje yeenhanda davo. Opo nee, edu ola li la makuka ndele tali va pona po. Natango, omundilo owa li wa dja meulu ndele tau xwike po Korah navakwao 250 ovo va li petwali.

Jehova okwa li a lombwela Moses a ti: ‘Kufa onhaili yomukulunhu wepata keshe nokushanga ko edina laye. Ashike konhaili yepata laLevi, shanga ko edina laAron. Di tula metwali, nonhaili yomulumenhu oo nda hoolola otai ka tutuma eengala.’

Efiku la landula ko, Moses okwa li a eta eenhaili adishe ndele te di ulikile ovakwatelikomesho. Onhaili yaAron oya li ya tutuma eengala noiimati yomuti wamandel ya pya. Kungaho, Jehova okwa li a koleka kutya okwa hoolola Aron oye a kale omupristeri omukulunhu.