Jehova ta tungilwa otembeli

Konima eshi Salomo a ninga ohamba yaIsrael, Jehova okwe mu pula a ti: ‘Owa hala ndi ku pe shike?’ Salomo okwa nyamukula a ti: ‘Ame omunyasha natango, kandi shii kutya nandi ninge shike. Kwafele nge u pe nge ounongo opo ndi dule okuwilika oshiwana shoye.’ Jehova okwa nyamukula a ti: ‘Molwaashi owa pula ounongo, ohandi ke ku ninga omulumenhu omunongoelela kombada yedu. Ohandi ke ku ninga yo oshipuna. Nongeenge owa kala to dulika kwaame, oto ka kala nomwenyo mule.’

Konima yefimbo, Salomo okwa li a tameka okutunga otembeli. Okwa li a longifa oshingoli shiwaelela, oshisilveri, oiti nosho yo omamanya mawa. Ovalumenhu novakainhu omayovi ovo va li ve na owino ova li va longa motembeli. Konima yomido heyali, otembeli oya li ya yapulilwa Jehova. Motembeli omwa li mu na oaltari oko kwa li haku ningilwa omayambo. Salomo okwa li a twa eengolo komesho yoaltari nokwiilikana ta ti: ‘Jehova, ondi shi shii kutya otembeli ei oinini nokai na ewapalo la denga mbada, ashike tambula ko elongelokalunga letu nokupwilikina komailikano etu.’ Mbela Jehova okwa li e uditile ngahelipi otembeli neilikano laSalomo? Diva eshi Salomo a mana okwiilikana, okwa li pa holoka omundilo wa dja keulu ndele tau xwike po omayambo oo a li koaltari. Jehova okwa li a hokwa otembeli oyo. Eshi Ovaisrael ve shi mona, ova li va hafa.

Ohamba Salomo oya li ya shiivika omolwounongo wayo muIsrael ashishe nokeenhele dokokule nokuli. Ovanhu ova li ha ve uya kuSalomo e va kwafele nomaupyakadi avo. Nokuli nohambanghainhu yokuSheba oya li ye uya i mu yeleke nomapulo madjuu. Eshi ya uda omanyamukulo aSalomo, oya ti: ‘Kanda li nda itavela osho ovanhu va lombwela nge kombinga yoye, ndele paife ondi wete kutya ove omunongoelela. Kalunga koye, Jehova, okwe ku nangeka noupuna.’ Onghalamwenyo yoshiwana shaIsrael oya li iwa novanhu ova li va hafa. Ashike oinima oya li pokulunduluka.