Omukwaita nokakadona kanini

MuSiria omwa li okakadona kanini Okaisrael ke li kokule neumbo lavo. Oka li ka kufwa po poukwaneumbo wavo ketangakwaita laSiria ndele taka ka ninga omupiya womukulukadi womukulunhu wetangakwaita wedina Naeman. Okakadona oko oka li haka longele Jehova nonande ovanhu ovo ve ka dingilila kava li have mu longele.

Naeman okwa li e na omukifi unyanyalifa nokwa li alushe ha kala ta ehama. Okakadona oko oka li ka hala ke mu kwafele. Oka li ka lombwela omukulukadi waNaeman ka ti: ‘Ondi shii umwe oo ta dulu okuvelula omushamane woye. MuIsrael omu na omuprofeti waJehova wedina Elisa. Ota dulu okuvelula omushamane woye.’

Omukulukadi waNaeman okwe mu lombwela ngaashi naanaa a lombwelwa kokakadona oko kanini. Naeman okwa li a halelela okukendabala keshe shimwe, nomolwaasho okwa li a ya keumbo laElisa muIsrael. Okwa li a teelela Elisa e mu yakule ngaashi omunhu oo a fimana. Ponhele yoku ka popya naye ye mwene, Elisa okwa tuma ovapiya vaye va ka popife Naeman noku mu pa etumwalaka olo tali ti: ‘Inda u ke likoshe luheyali momulonga waJordan. Opo nee oto veluka.’

Naeman okwa li a nyemata neenghono ndele ta ti: ‘Okwa li ndi shii omuprofeti ou ota velula nge mokwiifana Kalunga kaye nokuyelula eke laye kombada yange. Ashike ponhele yaasho, okwa lombwela nge ndi ye komulonga oo u li muIsrael. MuSiria omu na omilonga diwa. Omolwashike itatu i ko?’ Naeman okwa li a handuka ndele ta fiye po eumbo laElisa.

Ovapiya vaNaeman ove mu kwafela a diladile pandunge. Ove mu pa omayele va ti: ‘Mbela ino hala okuninga osho wa lombwelwa opo u veluke? Osho omuprofeti oo e ku lombwela oshanafangwa. Omolwashike mbela ito shi ningi?’ Naeman okwa pwilikina. Opo nee okwa ya komulonga waJordan nokuningina momeva luheyali ndele ta di mo a veluka filufilu. Okwa li a pandula unene ndele ta i a ka pandule Elisa. Naeman okwa tya: ‘Paife ondi shi shii kutya Jehova oKalunga kashili.’ Mbela oto diladila kutya okakadona kanini Okaisrael oka li ke udite ngahelipi eshi Naeman a li a veluka?