Honga ounona voye
Olwisho ola li la ningifa Gehasi a kale ina hokiwa kuKalunga
MBELA opa li efimbo limwe wa li wa hala oshinima shonhumba neenghono?— a Ngeenge osho, ovanhu vahapu navo osho hava kala ve udite ngaho. Ndele mbela ou na okukendabala okumona osho wa hala mokupopya oipupulu?— Ahowe, ku na okuninga ngaho. Omunhu oo ha ningi ngaho oku na olwisho. Natu ka taleni nghee omulumenhu wedina Gehasi a li a ningifwa kolwisho a kale ina hokiwa vali kuKalunga. Gehasi okwa li omupiya waElisa oo a li omuprofeti waKalunga kashili, Jehova.
Elisa naGehasi ova li ko eedula eyovi lwaapo ofimbo Omona waKalunga Jesus ina dalwa e li omunhu kombada yedu. Jehova okwa li a longifa Elisa opo a longe oikumwifilonga. Pashihopaenenwa, Ombibeli otai popi kombinga yomulumenhu umwe oo a li a fimana metangakwaita laAssiria, oo a li e na omukifi mwii woshilundu. Kapa li pe na oo a dula oku mu velula, ashike Elisa okwa li e mu velula.
Eshi Elisa a li ta longifwa kuKalunga a velule ovanhu, ka li ha tambula oimaliwa. Mbela ou shii kutya omolwashike?— Omolwaashi Elisa okwa li e shii kutya Jehova oye a li ha longo oikumwifilonga oyo ndele haye mwene. Eshi Naeman a velulwa, okwa li a hafa neenghono nokwa li a hala okupa Elisa omaano oshingoli, oshisiliveli nosho yo oikutu iwa. Ashike Elisa ka li a tambula ko omaano oo, ndele Gehasi okwa li e a halelela.
Eshi Naeman a ya, Gehasi okwa li e mu shikula ta endelele nopehe na okulombwela Elisa. Eshi a hanga Naeman, mbela ou shii eshi e mu lombwela? — ‘Elisa okwa tuma nge ndi ku lombwele kutya puye ope uya ovaenda vavali paife. Okwa hala u mu pe oikutu ivali opo a shiive oku i pa ovalumenhu ovo.’
Ashike Gehasi okwa li ashike ta popi oipupulu. Oye mwene a li a tota ehokololo loipupulu kombinga yovatalelipo ovo vavali. Okwa li a popya oipupulu ya tya ngaho molwaashi okwa li a hala oikutu oyo Naeman a li ta pe Elisa. Naeman ka li e shi shii kutya Gehasi ote mu lombwele oipupulu. Onghee hano, okwa li a pa Gehasi omaano oo nehafo. Okwa li nokuli a yandja oinima ihapu kuGehasi i dule pwaayo a li a pula. Mbela ou shii kutya oshike sha ka ningwa po lwanima? —
Eshi Gehasi a alukila keumbo, Elisa okwe mu pula a ti: ‘Owa ile peni?’
Gehasi okwa li e mu nyamukula ta ti: ‘Kandi na apa nda ile.’ Ndele Jehova okwa li a kwafela Elisa opo a shiive kutya Gehasi okwa ile peni. Opo nee, Elisa okwe mu lombwela ta ti: ‘E li kali fi efimbo lokutambula oimaliwa noikutu.’
Gehasi okwa li a tambula oimaliwa noikutu oyo ya li ihe fi yaye. Onghee hano, Kalunga okwa li a ningifa opo oshilundu osho sha li muNaeman shi kwate Gehasi. Oshike hatu lihongo moshihopaenenwa osho?— Oshinima shimwe osho hatu lihongo mo oshosho kutya katu na okukala hatu toto omahokololo nokupopya oipupulu.
Omolwashike mbela Gehasi a li a tota ehokololo loipupulu?— Omolwaashi okwa li e na olwisho. Okwa li a hala okukala e na oinima oyo ihe fi yaye nokwa li a kendabala opo e i mone mokupopya oipupulu. Molwaashi okwa popya oipupulu, okwa li a kwatwa komukifi mwii neenghono onghalamwenyo yaye aishe.
Gehasi okwa li yo a hangwa koilanduliko inyikifa oluhodi i dule oshilundu. Mbela ou shii kutya oilipi?— Ka li vali a hokiwa kuKalunga. Inatu ninga nande osha osho tashi tu ningifa tu kale inatu hokiwa kuKalunga. Ponhele yaasho, natu kaleni ovanalukeno nokutukulilafana osho tu na navakwetu.
[Eshangelo lopedu]
a Ngeenge oto lesha nokaana, ou na okukanghama pokamufinda oko ke lile po oku ku dimbulukifa u kanghame po nokupula okaana ka popye omadiladilo ako.
Lesha omishangwa edi mOmbibeli yoye
2 Eehamba 5:5, 20-27; Judas 21