Etukulwa 9

Onghalamwenyo yaJesus moukwaneumbo wavo fimbo a li okaana

ESHI Jesus a kulila muNasaret, Nasaret osha li okadoolopa kanini kongaho. Okadoolopa oko oka li koshitukulwa shokeemhunda shaGalilea, popepi ashike nolufilu liwa laJisreel.

Eshi Maria naJosef va li va ya naJesus kuNasaret okudja kuEgipti, Jesus otashi dulika a li e na omido mbali lwaapo, nosha yela kutya Maria okwa li ashike e na okaana kamwe, Jesus. Ndele meni lefimbo lixupi, Maria naJosef ova li yo va dala Jakob, Josef, Simon naJudas, nova li yo va dala ounona voukadona. Lwanima, Jesus okwa li e na ovamwaina vahamano lwaapo.

Jesus okwa li yo e na ovapambele. Otwe lihonga nale shi na sha namhedi yaye Johannes, oo a li hadi koshitukulwa osho sha li kokule eekilometa dihapu okudja muJudea. Jesus okwa li yo e na omupambele umwe Salome omumwaina waMaria, oo a li hadi popepi navo muGalilea. Salome okwa li a hombolwa kuSebedeus, novanamati vavo vavali, Jakob naJohannes ova li oomhedi vaJesus. Katu shi shii ngeenge eshi Jesus a li ta kulu okwa li ha kala pamwe efimbo lile novamati ovo, ashike lwanima ova ka panga oukaume wopofingo.

Josef okwa li e na okulonga noudiinini opo a yambidide oukwaneumbo waye oo wa li tau hapupala. Josef okwa li omuhongi woipilangi, onghee hano, Jesus okwa li ha ifanwa “omona womuhongi womiti” molwaashi Josef okwa li a tekula Jesus e li ngaashi okaana kaye. Josef okwa li a honga Jesus opo naye a ninge omuhongi woipilangi, na Jesus okwa li e lihonga nawa, nomolwaasho ovanhu lwanima va li hava ti kutya Jesus “omuhongi womiti.”

Oukwaneumbo waJosef owa kala wa lenga okulongela Jehova Kalunga. Opo va wanife po Omhango yaKalunga, Josef naMaria ova li hava hongo ovana vavo ehongo lopamhepo ‘fimbo ve li omutumba meumbo, fimbo ve li mondjila tava ende, ngeenge tava ka nangala nosho yo ngeenge tava penduka.’ Otu na yo oushili kutya Josef okwa li ha i pandjikilile pamwe noukwaneumbo waye koshinagoga osho sha li muNasaret opo va ka longele Kalunga. Nopehe na omalimbililo, Josef noukwaneumbo waye ova li hava hafele neenghono okuya pandjikilile kotembeli yaJehova oyo ya li muJerusalem. Mateus 13:55, 56; 27:56; Markus 15:40; 6:3; Deuteronomion 6:6-9.

▪ Jesus okwa li e na ovamwaina vangapi lwaapo, nomadina avamwe vomuvo oolyelye?

▪ Oomhedi vaJesus vatatu ovo ve shiivike nawa ovo oolyelye?

▪ Oilonga yokomake ilipi Jesus a li ha longo, nomolwashike?

▪ Ehongo la fimanenena lilipi Josef a li a pa oukwaneumbo waye?