Jesus ta koshola otembeli

Pefimbo lokwenye mo 30 O.P., Jesus okwa li a ya kuJerusalem. Ovanhu vahapu ova li ve uya moshilando omolwOpaasa. Ova li va yamba omayambo oinamwenyo kotembeli shi li oshitukulwa shokudana oshivilo. Ovanhu vamwe ova li va etelela oinamwenyo, ashike vamwe ove i landa muJerusalem.

Eshi Jesus a ya kotembeli, okwa li a mona ovanhu tava landifile mo oinamwenyo. Ova li tava likola oimaliwa monhele yaJehova yelongelokalunga. Mbela Jesus okwa li e linyenga ngahelipi? Okwa li a ninga ongola yeengodi ndele ta taataa mo eedi neengobe motembeli. Okwa undulila pedu oitaafula yovalandifi ndele ta tileshi oimaliwa yavo. Jesus okwa lombwela aveshe ovo va li tava landifa eenghuti a ti: ‘Kufe i mo oinima ei omu. Ongulu yaTate hayo mu ninga onhele yeengeshefa!’

Ovanhu motembeli ova li va kuminwa osho Jesus a ninga. Ovahongwa vaye ova li va dimbuluka exunganeko li na sha naMessias olo tali ti: ‘Ohandi ka kala ndi na ouladi wongulu yaJehova.’

Lwanima mo 33 O.P., Jesus okwa li vali a koshola otembeli oshikando oshitivali. Ka li a efa ovanhu va ulike okuhenefimaneko nongulu yaXe.