Onhumwafo ya dja kOlutuwiliki

Kovaitaveli vakwetu ovaholike:

Tu li ovalongeli vaJehova, otu hole Eendjovo daye, Ombiibeli. Otwa tomhwa kutya odi na ondjokonona i li paushili, otadi yandje ewiliko li shii okulineekelwa li na sha nonghalamwenyo notadi yandje oumbangi oo tau ulike kutya Jehova oku hole ovanhu. (Epsalme 119:105; Lukas 1:3; 1 Johannes 4:19) Otwa halelela okukwafela vakwetu ve lihonge oshili i na ondilo oyo i li mEendjovo daKalunga. Opo tu dule okuninga ngaho, otwa hafa neenghono eshi twa longekida embo eli, li na oshipalanyole “Osho to dulu okulihonga mOmbiibeli.” Ohatu mu indile mu tu pitike tu mu lombwele pauxupi kombinga yembo eli.

Embo eli ola nuninwa unene ounona. Ndele nande ongaho, otali dulu yo okulongifwa okukwafela ovakulunhu ovo ve na ehalo lokulihonga shihapu kombinga yOmbiibeli. Molwaashi Ombiibeli embo lovanhu aveshe, otu na oushili kutya atushe ohatu dulu okumona ouwa mokulesha oilihongomwa oyo i li mo, oyo tai dulu oku tu kwafela tu kale twa hafa shili.

Embo eli oli na omahokololo Ombiibeli e na sha nonghalamwenyo yovanhu okudja keshito wa yuka komesho. Opa ningwa eenghendabala ngaashi tashi dulika opo omahokololo Ombiibeli aa e li membo eli a kale monghedi ipu, ya yela noku li melandulafano she likolelela kunghee oiningwanima ya ningwa.

Ashike embo eli inali hokolola ashike omahokololo Ombiibeli. Eendjovo nomafano oo e li mo okwa longekidwa monghedi oyo tai ningifa omahokololo Ombiibeli a kale e na eityo nokuulika kutya ovanhu ovo va ulikwa ova li ve na omaliudo a tya ngahelipi.

Embo eli otali tu kwafele tu mone kutya Ombiibeli embo la popya kombinga yovanhu ovo va li hava dulika kuJehova naavo inava dulika kuye. Otali tu ladipike yo tu lihonge shihapu moihopaenenwa yavo. (Ovaroma 15:4; 1 Ovakorinto 10:6) Ola tukulwa moitukulwa i li 14. Pehovelo loshitukulwa keshe, ope na ouyelele u li pauxupi woilihongomwa oyo hatu dulu okulihonga mo.

Ngeenge ou li omudali, oto dulu okulesha oshileshwa nokaana koye ndele tamu kundafana omafano oo a kanghamena koshileshwa osho. Opo nee otamu dulu okulesha omishangwa mOmbiibeli oko kwa kanghamena oshileshwa. Kwafela okaana koye ka kwatakanife osho ka lesha mOmbiibeli noshileshwa osho shi li membo. Onghedi oyo otai dulu yo okulongifwa ngeenge taku kwafelwa omukulunhu opo a shiive etumwalaka lOmbiibeli pauxupi.

Otwe lineekela kutya embo eli otali ka kwafela ovanamitimadiwa aveshe, kutya nee ovanyasha ile ovakulunhu, ve lihonge Eendjovo daKalunga nokutula moilonga oilihongomwa yado monghalamwenyo yavo. Osho otashi ke va kwafela yo va longele Jehova ve li oilyo youkwaneumbo waye u holike.