OSHITWA 1

Okuninga etwalemo tali ti sha

Oilonga 17:22

ENGONGO: Etwalemo loye nali kale tali pendula ohokwe, tali ulike kutya owa hala okukundafana kombinga yashike, nokuulika kutya omolwashike oshikundafanwa osho sha fimana kovapwilikini voye.

NGHEE U NA OKU SHI NINGA:

Pendula ohokwe yovapwilikini. Opo u pendule ohokwe yovapwilikini voye, hoolola epulo, elombwelo, oshinima osho sha ningwa shili monghalamwenyo ile u popye kombinga yeenghundana.

Ngeenge owa mono kutya omupwilikini woye oku na ohokwe moshinima shonhumba ile oku na omalipulo onhumba, lundulula etwalemo loye, ndele to popi kombinga yaasho e na ohokwe musho.
Ulika kutya oshike wa hala oku ka kundafana kombinga yasho. Shilipaleka kutya etwalemo loye ola yelifa nawa kombinga yoshikundafanwa opo omuneumbo aha kale a limbililwa.
Ulika nghee oshikundafanwa sha fimana. Oshikundafanwa shoye nashi yandje elitulemo keemhumbwe dovapwilikini. Nava ude ko nghee oshikundafanwa tashi dulu oku va kwafela pauhandimwe.

Eshi to lilongekidile oshipopiwa, lipula kutya, ‘Eenghalo dilipi da taalela ovamwatate novamwameme vomeongalo letu?’ Opo nee to dutu etwalemo loye le likolelela keemhumbwe davo.