Jehova Oha Nghonopaleke Oo A Loloka

“[Jehova] ota pe ava va loloka ouladi, ndee ta hapupalifa eenghono daau e he na eenghono.”—JESAJA 40:29.

1. Faneka opo pe fike eenghono odo di li moinima oyo Kalunga a shita.

EENGHONO daJehova inadi ngabekwa. Ndele oinima oyo a shita itai ulike tuu eenghono dinene! Okapambu kanininini haka ifanwa oatoma—oko ke li ekanghameno moshinima keshe—okanini neenghono, nokuli neta ashike limwe lomeva ola fikama po meeatoma eetriliyona efele limwe.a Omwenyo aushe kongonga yedu letu owe likolelela keenghono odo hadi yandjwa pamilandu doupambu ovo ve li metango. Ndele mbela eenghono di fike peni detango da pumbiwa okukaleka po omwenyo? Edu ohali mono ashike okatukulwa kanini keenghono adishe odo hadi ndulukwa ketango. Nande ongaho, okatukulwa kanini keenghono detango oko haka wile kedu oke dule kokulekule eenghono adishe kumwe odo hadi longifwa meefabrika domounyuni aushe.

2. Paushili, Jesaja 40:26 ota popi shike shi na sha neenghono daJehova?

² Kutya nee ohatu diladila koatoma ile ohatu yandje elitulemo kewangandjo olo linenenene, ohatu kumwifwa keenghono daJehova dinene. Itashi kumwifa eshi a dula okupopya ta ti: “Yeluleni omesho eni pombada, nye mu tale: Olyelye a shita oinima ei? Oye tuu ou ta pitifa mo eengudu dayo da wana komuvalu wado. Oye te i ifana aishe komadina ayo; eenghono daye odinene, nokudula kwaye okuhapu, kape na nande shimwe, tashi mu koyelele po.” (Jesaja 40:26) Heeno, Jehova ‘okudula kwaye okuhapu,’ noye Odjo ‘yeenghono dinene’ odo da longifwa mokufikamifa po ewangadjo alishe.

Eenghono di dule dopaushitwe oda pumbiwa

3, 4. (a) Oinima ilipi oyo tashi dulika i tu lolokife? (b) Epulo lilipi la pumbwa okukonakonwa?

³ Nande eenghono daKalunga inadi ngabekwa, ovanhu ohava loloka. Keshe apa hatu i, ohatu mono ovanhu va loloka. Ohava penduka va loloka, ohava i koilonga ile kofikola va loloka, ohava alukile keumbo va loloka noihava ka nangala ashike va loloka ndelenee ova dindoka. Vamwe ohava diladila kutya ngeno okwa li tava dulu okuya konhele yonhumba ndele tava fuda po naanaa nawanawa ngaashi sha pumbiwa. Tu li ovapiya vaJehova, nafye yo ohatu loloka, omolwaashi onghalamwenyo yetu yeliyandjo lometilokalunga otai pula okukondja neenghono. (Markus 6:30, 31; Lukas 13:24; 1 Timoteus 4:8) Ndele ope na oinima ihapu ikwao oyo hai fipi mo eenghono detu.

⁴ Nande otu li Ovakriste, inatu lya olusha lomaupyakadi oo haa hange ovanhu monghedi yakwalukeshe. (Job 14:1) Ouyahame, omauxupilo a nghundipala ile omaudjuu makwao oo e li apeshe monghalamwenyo otaa dulu okuteya omukumo nokweeta oilanduliko tai nghundipaleke. Shimwe vali sha wedwa komashongo aa osho omaupyakadi oo taa monika kwaavo tava hepekelwa ouyuki. (2 Timoteus 3:12; 1 Petrus 3:14) Omolwomafininiko efiku keshe ounyuni nosho yo epataneko okupataneka oilonga yetu yeudifo lOuhamba, vamwe vomufye otashi dulika tu kale twa loloka unene nohatu diladila tu shune pedu moilonga yaJehova. Natango, meenghendabala daye Satana Ondiaboli ota longifa keshe osho ta dulu okulongifa a teye po oudiinini wetu muKalunga. Hano, ongahelipi nee hatu dulu okumona eenghono dopamhepo odo da pumbiwa tu ha loloke ndele hatu efa?

5. Omolwashike mokuwanifa po oukalele wopaKriste pa pumbwa shihapu shi dulife peenghono domunhu?

⁵ Opo tu mone eenghono dopamhepo, otu na okulineekela muJehova, Omushiti omunaenghono adishe. Omuyapostoli Paulus okwa ulika kutya oukalele wopaKriste otau pula shihapu shi dulife peenghono dovanhu inava wanenena. Okwa shanga ta ti: “Emona tuu eli hatu li kwatele moitoo yedu, opo ouyadi weenghono u kale waKalunga, ndele u ha monike tau di mufye vene.” (2 Ovakorinto 4:7) Ovakriste ovavaekwa otava wanifa po “oshilongayakulo shehanganifo” payambidido loovakwao ovo ve na eteelelo lokombada yedu. (2 Ovakorinto 5:18; Johannes 10:16, OB-1986; Ehololo 7:9) Molwaashi tu li ovanhu inatu wanenena ohatu longo oilonga yaKalunga twa taalelwa komahepeko, itatu dulu oku shi ninga keenghono detu vene odo adike. Jehova ohe tu kwafele okupitila momhepo iyapuki, nopo nee okupitila moungone wetu eenghono daye otadi monika filufilu. Ndele eshilipaleko kutya “ovayuki otava pamekwa kOmwene” itali tu hekeleke tuu!—Epsalme 37:17.

‘Jehova oye eenghono detu’

6. Ongahelipi Omishangwa tadi tu shilipaleke kutya Jehova oye Ondjo yetu yeenghono?

⁶ Tate yetu yomeulu ‘okudula kwaye okuhapu’ nota dulu oku tu pameka noupu. Doshili, ohatu lombwelwa: “[Jehova] ota pe ava va loloka ouladi, ndee ta hapupalifa eenghono daau e he na eenghono. Ovanyasha ohava loloka, ovalumenhu ovanyasha ohava loloka ndee hava punduka nokuwila po; ndelenee ovo hava teelele Omwene, otava pewa eenghono dipe, otava yelula omavava pombada ngaashi eenhwa. Otava tondoka, ndee itava loloka, tava ende, ndele itava wile po.” (Jesaja 40:29-31) Omolwomafininiko oo a hapupala, omafimbo amwe otashi dulika tu kale tu udite ngaashi omutondoki oo a loloka omaulu aye a fa itaa dulu vali oku mu twala komesho. Ndele efikilo mefiyafano longhalamwenyo oli li ashike komesho, hano katu na okutjololoka. (2 Omafimbo 29:11) Omutondi wetu, Ondiaboli, ota kondouwala ‘ngaashi onghoshi tai kumbu,’ okwa hala e tu kwate moshipala. (1 Petrus 5:8) Natu dimbuluke kutya ‘Omwene oye omupameki wetu noshikelelifo shetu,’ nokwa ninga omafiloshisho mahapu okuyandja eenghono ‘kwaao a loloka.’—Epsalme 28:7.

7, 8. Oshike tashi ulike kutya Jehova okwa li a pameka David, Habakuk naPaulus?

⁷ Jehova okwa li a pa David eenghono odo da pumbiwa a dule okutwikila komesho nande a li a taalelwa komandangalati manene. Neitavelo linene nosho yo elineekelo, David okwa shanga ta ti: “[PuKalunga] ohatu ka [mona eenghono], nOye mwene ota ka lyataula ovatondi vetu.” (Epsalme 60:12, yelekanifa NW.) Jehova okwa pameka yo Habakuk opo a dule okuwanifa po oshinakuwanifwa shaye e li omuprofeti. Habakuk 3:19 ota ti: “Omwene Kalunga Oye eenghono dange. Ye ota pameke [eemhadi] dange ngaashi omakondo omenye ndele Ye ota endifile nge koikulundudu yange.” Natango osho shikonekwedi oshihopaenenwa shaPaulus, oo a shanga ta ti: “Aishe ohandi i dulu [omolwaKalunga] ou ta pameke nge.”—Ovafilippi 4:13, NW.

⁸ Ngaashi David, Habakuk naPaulus, otu na okukala neitavelo tali longo mokudula kwaKalunga oku tu pameka nosho yo meenghono daye oku tu xupifa. Eshi nee tu shii kutya Omwene Omunamapangelo aeshe Jehova oye Odjo ‘yeenghono detu,’ natu ka taleni keenghedi dimwe dokumona eenghono dopamhepo okudja momafiloshisho mahapu oo Kalunga ha yandje.

Omafiloshisho opamhepo oku tu pameka

9. Onghandangala yashike tai danwa koishangomwa yopaKriste moku tu palula?

⁹ Okukonakona Omishangwa nouladi pakwafo loishangomwa yopaKriste otaku dulu oku tu pameka. Omupsalme okwa imba ta ti: “Omulumenhu omunelao ou . . . ha hokwa omhango yOmwene [nohe i lesha, NW] omutenya noufiku. Ndele ye ota ka kala ngaashi omuti, ou wa twikwa pomatondokelo omeva ndee tau imifa oiimati yao pefimbo lao, nomafo ao ihaa lembe, naashishe eshi ta ningi osha fewa.” (Epsalme 1:1-3) Ngaashi ashike twa pumbwa okulya opo tu kale neenghono dokolutu, otwa pumbwa okulya oikulya yopamhepo oyo hai yandjwa kuKalunga okupitila mEendjovo daye nosho yo moishangomwa yopaKriste opo tu kale neenghono dopamhepo. Onghee hano okukonakona taku ti sha nosho yo okudilonga okwa pumbiwa.

10. Onaini tashi dulika tu mone efimbo lokukonakona nokudilonga?

¹⁰ Doshili, okudilonga ‘oinima yomoule yaKalunga’ oku na ondjabi. (1 Ovakorinto 2:10, NW) Ndele onaini hatu dulu okumona efimbo lokudilonga? Omona waAbraham Isak ‘okwa li a ya a ka endaaenda komaalala etango longuloshi [nelalakano a ka dilonge, NW].’ (Genesis 24:63-67) Omupsalme David ‘okwa diladila kombinga yaKalunga oufiku.’ (Epsalme 63:6) Ohatu dulu okukonakona Eendjovo daKalunga nosho yo okudilonga kudo ongula ile onguloshi, sha hala okutya, efimbo keshe. Okukonakona kwa tya ngaha nokudilonga ohaku twala kefiloshisho laJehova likwao tali pameke pamhepo—eilikano.

11. Omolwashike tu na okuyandja elitulemo linene mokwiilikana alushe?

¹¹ Okwiilikana alushe kuKalunga otaku tu kwafele tu kale twa pama. Onghee hano natu ‘diinine mokwiilikana.’ (Ovaroma 12:12) Omafimbo amwe otwa pumbwa okwiindila kondadalunde tu pewe ounongo nosho yo eenghono odo da pumbiwa mokulididimikila eyeleko. (Jakob 1:5-8) Otu na yo okupandula nokuhambelela Kalunga eshi hatu didilike ewanifo lomalalakano aye ile tu wete kutya okwe tu pameka tu twikile noilonga yaye. (Ovafilippi 4:6, 7) Ngeenge ohatu kala popepi naJehova meilikano, ke na fiku ne ke tu fiye po. David okwa imba ta ti: “Kalunga Oye omukwafi wange.”—Epsalme 54:6.

12. Omolwashike tu na okupula Kalunga e tu pe omhepo yaye iyapuki?

¹² Tate yetu yomeulu ote tu nghonopaleke note tu pameke okupitila momhepo yaye iyapuki, ile eenghono daye tadi longo. Paulus okwa shanga ta ti: “[Ohandi] tu eengolo koshipala [shaTate] . . . opo Ye e mu pe paupuna wefimano laye eenghono dokupameka omunhu womeni okOmhepo yaye.” (Ovaefeso 3:14-16) Otu na okwiilikana opo tu pewe omhepo iyapuki nokukala nelineekelo kutya Jehova ote ke i tu pa. Jesus okwa tomhafana ta ti: Ngeenge okaana oka pula oshi, mbela xe omunahole ote ke ka pa mbela eyoka? Hasho nandenande. Molwaashi okwa xulifa ta ti: “Hano nye ovaii [sha hala kutya ovalunde], ngenge omu shii okupa ovana veni oipewa iwa, unene Xo yeni yomeulu ta yandje Omhepo Iyapuki kuava tave mu indile.” (Lukas 11:11-13) Natu ilikane nelineekelo la tya ngaho nokudimbuluka alushe kutya ovapiya vaKalunga ovadiinini otava dulu ‘okupamekwa’ okupitila meenghono domhepo yaye.

Eongalo olo ekwafo linene

13. Ongahelipi tu na okutala ko okwoongala kwopaKriste?

¹³ Jehova ohe tu pameke okupitila mokwoongala kweongalo lopaKriste. Jesus okwa ti: “Oku ku na vavali ile vatatu va ongala medina lange, Ame ondi li mokati kavo.” (Mateus 18:20) Eshi Jesus a ninga eudaneko olo, okwa li ta kundafana oinima oyo kwa li ya pumbwa elitulemo laavo tava kwatele komesho meongalo. (Mateus 18:15-19) Ndelenee, eendjovo daye otadi longo di li efinamhango kokwoongala kwetu keshe, oyoongalele yoikandjo naayo yoitukulwa, hai hovelwa nohai xulifwa neilikano medina laye. (Johannes 14:14) Hano oshi li oufembanghenda okukala pokwoongala kwopaKriste kwa tya ngaha, kutya nee ope na ovakalipo vanini ile ope na ovakalipo omayovi. Onghee hano natu ulike olupandu molwaashi eemhito da tya ngaha oda longekidwa nelalakano oku tu pameka pamhepo noku tu twa omukumo mohole nomoilonga iwa.—Ovaheberi 10:24, 25.

14. Omauwa elipi hatu mono okudja meenghendabala dovakulunhuongalo Ovakriste?

¹⁴ Ovakulunhuongalo Ovakriste ohava yandje ekwafo lopamhepo nosho yo etwomukumo. (1 Petrus 5:2, 3) Paulus okwa kwafela nokwa twa omaongalo omukumo omo a li ta yakula, ngaashi ovapashukili ovaendi hava ningi kunena. Doshili, okwa kala alushe a hala okukala pamwe novaitaveli vakwao opo va tungafane nova twaafane omukumo. (Oilonga 14:19-22; Ovaroma 1:11, 12) Natu kale alushe nokuulika olupandu kovakulunhuongalo vomeongalo letu nosho yo ovapashukili Ovakriste vakwao, ovo tava dana onghandangala inene moku tu pameka pamhepo.

15. Ongahelipi ovaitaveli vakwetu meongalo letu ve li “ekwafo linene”?

¹⁵ Ovaitaveli vakwetu navo otava dulu okukala “ekwafo linene.” (Ovakolossi 4:10, 11, OB-1986) Ve li ‘ookaume kashili’ otava dulu oku tu kwafela pomafimbo oudjuu. (Omayeletumbulo 17:17, NW) Pashihopaenenwa, eshi ovapiya vaKalunga 220 va mangululwa mokamba yeenghwate yaSachsenhausen koshi yovapashukili vaNazi mo 1945, ova li va taalela okulidenga medimo londjila youle u fike peekilometa 200. Ova enda ve li mongudu, naava ve na eenghono ova kala tava nane oukala vanini vonhumba mu na vakwao ovo va nghundipala. Oshidjemo osha li shike? Molweendo loshiponga olo la pula eemwenyo dovanhu ve dulife po 10 000 daavo va li meekamba deenghwate, kape na nande oimwe yomEendombwedi daJehova ya fya. Omahokololo a tya ngaha oo taa holoka moishangomwa yoWatch Tower, mwa kwatelwa oYearbook of Jehovah’s Witnesses nosho yo embo Jehovah’s Witnesses—Proclaimers of God’s Kingdom, otaa ulike kutya Kalunga oha pameke oshiwana shaye shi kale sha pama.—Ovagalati 6:9.b

Okupamekwa koukalele wetu womomapya

16. Ongahelipi okukufa ombinga nope he na okufaula taku tu pameke pamhepo?

¹⁶ Okukufa ombinga ihaku faula moilonga yokuudifa Ouhamba otaku tu pameke pamhepo. Omalipyakidilo a tya ngaho otae tu kwafele tu yandje elitulemo kOuhamba waKalunga nokukaleka momadiladilo oukwaalushe osho yo eteelelo lomanangeko noupuna ao. (Judas 20, 21) Omaudaneko opamishangwa oo hatu popi moukalele wetu otae tu pe eteelelo notaa dulu oku tu kaleka twa tokola toko ngaashi omuprofeti Mika oo a ti: “Fye ohatu ka kala nokweenda medina lOmwene Kalunga ketu alushe fiyo alushe.”—Mika 4:5.

17. Omaetepo elipi taa yandjwa e na sha nomakonakonombibeli opeumbo?

¹⁷ Ekwatafano letu naJehova otali pamekwa eshi hatu longifa Omishangwa neenghono mokuhonga vamwe. Pashihopaenenwa, ngeenge to kwatele komesho ekonakonombibeli lopeumbo pakwafo lembo Ontseyo Ndjoka Tayi Fala kOmwenyo Gwaaluhe, okulesha nokukundafana omishangwa donhumba odo da yandjwa oshi li oshinima shopandunge. Eshi ohashi kwafele oo ta konakona notashi pameke eudeko letu lopamhepo. Ngeenge oo ta konakona oku na oudjuu wokuuda ko ehongo limwe lOmbibeli ile efaneko lonhumba, etukulwa limwe alike membo Ontseyo otali dulu okumanwa ko moikando i dulife pushimwe. Inatu hafa tuu mokulilongekida nawa nomokuninga eenghendabala da wedwa po opo tu kwafele ovanhu vakwetu va ehene kuKalunga!

18. Faneka nghee embo Ontseyo la kala tali longifwa nomupondo.

¹⁸ Omudo keshe, embo Ontseyo otali longifwa nomupondo okukwafela ovanhu omayovi va ninge ovapiya vaJehova ve liyandja, naava ova kwatela mo vahapu ovo ve he na eshiivo lomonakudiwa lOmbibeli. Pashihopaenenwa, omulumenhu Omuhindu muSri Lanka fimbo a li okaana okwa udile Ondombwedi tai popi kombinga yOparadisa. Konima yomido donhumba, omulumenhu okwa ya komukainhu oo, nodiva omulumenhu waye okwa hovela ekonakonombibeli nomulumenhu ou. Doshili, omulumenhu omunyasha okwa kala he ya keshe efiku omolwekonakono, nembo Ontseyo ola pwa ko meni lefimbo lixupi. Okwa hovela okukala pokwoongala keshe, okwa xulifa po ekwatafano laye nelongelokalunga laye lonale nokwa ninga omuudifi wonghundana yOuhamba. Eshi a ninginifwa okwa hangika nale ha kwafele nokuli umwe womovashiivikile okukonakona Ombibeli.

19. Eshi hatu kongo tete Ouhamba, ohatu dulu okukala tu na oushili washike?

¹⁹ Okukonga tete Ouhamba otaku tu etele ehafo olo tali tu pameke. (Mateus 6:33) Nande hatu hangika komayeleko e lili naku lili, ohatu twikile nehafo nosho yo nouladi okuudifa onghundana iwa. (Titus 2:14) Vahapu vomufye ova wanifa po oiteelelwa yoilonga youkokolindjila yefimbo liyadi, navamwe otava longo keenhele oko ku na omhumbwe inene yovaudifi. Kutya nee ohatu xumifa komesho oinima yOuhamba monghedi ei ile omeenghedi dikwao, otu na elineekelo kutya Jehova ita ka dimbwa nande oilonga yetu nosho ohole oyo twa ulika molwedina laye.—Ovaheberi 6:10-12.

Twikila paenghono daJehova

20. Ongahelipi hatu dulu okuulika kutya otwe lineekela meenghono odo hadi di kuJehova?

²⁰ Nomutima aushe, natu ulike kutya otwe lineekela muJehova nokupula kuye e tu pe eenghono. Osho ohatu dulu oku shi ninga mokulimonena ouwa pauyadi momafiloshisho opamhepo oo ha ningi okupitila ‘momupiya omudiinini.’ (Mateus 24:45) Ekonakono lopaumwene lEendjovo daKalunga nosho yo lomeongalo pakwafelo loishangomwa yopaKriste, eilikano tali di komutima, ekwafo lopamhepo okudja kovakulunhuongalo, oihopaenenwa iwa yovaitaveli vakwetu ovadiinini nosho yo okukufa ombinga ihaku faula moukalele oo amwe e li mokati komafiloshisho oo taa pameke ekwatafano letu naJehova notae tu pe eenghono tu dule okutwikila komesho noilonga yaye iyapuki.

21. Ongahelipi omuyapostoli Petrus naPaulus va ulika kutya ope na omhumbwe yeenghono odo hadi yandjwa kuKalunga?

²¹ Nonande tu na omaunghundi opanhu, Jehova ote ke tu pameka tu longe ehalo laye ngeenge otwe lineekela muye omolwekwafo. Mokukala neshiivo lomhumbwe yekwafo la tya ngaho, omuyapostoli Petrus okwa shanga ta ti: “Ou ha yakula, ne shi ninge keenghono te di pewa kuKalunga.” (1 Petrus 4:11) NaPaulus okwa ulika okulikolelela kwaye keenghono odo hadi yandjwa kuKalunga eshi a shanga ta ti: “Nda hokwa oungone nomadengo nomahepeko noluhepo nomafininiko omolwaKristus; osheshi ngenge ndi li oshingone, aame omunaenghono.” (2 Ovakorinto 12:10) Natu ulike etokolotoko la faafana nokweetela efimano Omwene Omunamapangelo aeshe Jehova, oo ha pameke oo a loloka.—Jesaja 12:2.

[Omashangelo opedu]

[Efano pepandja 22]

Ekwatafano letu naJehova otali pamekwa eshi hatu longifa Ombibeli mokuhonga vamwe

[Efano pepandja 23]

Oto nyamukula ngahelipi?

• Omolwashike oshiwana shaJehova sha pumbwa eenghono di dule edi dopaushitwe?

• Ope na euliko lopamishangwa lilipi kutya Kalunga oha pameke ovapiya vaye?

• Omafiloshisho amwe elipi Jehova a ninga oku tu pameka?

• Ongahelipi hatu dulu okuulika elineekelo letu kutya Kalunga ote ke tu pa eenghono?