Diladila pamhepo u kale nomwenyo!
“Okudiladila pamhepo otashi ti omwenyo.”—OVAROMA 8:6, NW.
KASHI fi oshinima shipu okukala twa koshoka paenghedi koshipala shaKalunga mokati kounyuni wa pilalala oo tau fimaneke okuhafifa ouhalu wombelela. Ndelenee, Omishangwa otadi kondjifafanifa “ombelela” nosho yo “omhepo” mokuulika sha yela eyooloko pokati koilanduliko itilifa oyo tai pitike umwe a pangelwe kombelela youlunde nosho yo omanangeko noupuna taa di mokuliyandja kenwefemo lomhepo iyapuki yaKalunga.
1, 2. Ombibeli otai ningi ekondjifafano lashike pokati ‘kombelela’ ‘nomhepo’?
2 Pashihopaenenwa, Jesus Kristus okwa ti: “Omhepo oyo tuu tai yandje omwenyo; ombelela kai na eshi tai kwafa. Eendjovo edi nde di mu lombwela, odo omhepo nomwenyo.” (Johannes 6:63) Omuyapostoli Paulus okwa shangela Ovakriste muGalatia ta ti: “Ombelela oi nondubo nOmhepo, nOmhepo i nondubo nombelela; ohai kalafana i nondubo.” (Ovagalati 5:17) Paulus okwa ti vali: “Ou ta kunu mombelela yaye, ota ka teya enyonauko kombelela; ndele ou ta kunu mOmhepo, oye ta ka teya omwenyo waalushe okOmhepo.”—Ovagalati 6:8.
3. Oshike sha pumbiwa opo tu efe po omahalo noikala ya puka?
3 Omhepo iyapuki yaJehova—eenghono daye tadi longo—otai dulu okududa mo “okahalu kombelela” ya nyata nosho yo okupangelwa kenyonauko lombelela yetu youlunde. (1 Petrus 2:11) Okumangululwa koupika woikala ya puka, osha fimana tu kale tu na ekwafo lomhepo iyapuki yaKalunga, omolwaashi Paulus a shanga ta ti: “Osheshi okudiladila pambelela otashi ti efyo, ndele okudiladila pamhepo otashi ti omwenyo nombili.” (Ovaroma 8:6, NW) Okudiladila pamhepo otashi ti ngahelipi?
“Okudiladila pamhepo”
4. “Okudiladila pamhepo” otashi ti ngahelipi?
4 Eshi Paulus a shanga kombinga ‘yokudiladila pamhepo,’ okwa longifa oshitya shOshigreka osho tashi ulike “onghedi yokudiladila, omadiladilo, . . . elalakano, ehalo, onghendabala.” Oshityalonga she shi pamba otashi ti “okukala to diladila panghedi yonhumba.” Kungaha, okudiladila pamhepo otashi ti okukala to pangelwa noto linyengifwa keenghono daJehova tadi longo. Otashi ulike kutya ohatu kala nehalo liwa okweefa okudiladila kwetu, oikala yetu nosho yo omahalo etu a kale koshi yenwefemo la wanenena lomhepo iyapuki yaKalunga.
5. Omounene u fike peni tu na okudulika kenwefemo lomhepo iyapuki?
5 Omounene u fike peni tu na okudulika kenwefemo lomhepo iyapuki oyo ya divilikwa kuPaulus eshi a popya okukala ‘ovapiya omolwomhepo.’ (Ovaroma 7:6, NW) She likolelela keitavelo lavo mekuliloyambo laJesus, Ovakriste ova mangululwa kokupangelwa koulunde nokungaha ova “fya” mo monghalo yavo yonale oyo ya li ngaashi oupika. (Ovaroma 6:2, 11) Ovo va fya pafaneko monghedi ya tya ngaha ove na natango omwenyo palutu nova manguluka paife okushikula Kristus ve li “ovapiya vouyuki.”—Ovaroma 6:18-20.
Elunduluko linene
6. Elunduluko lashike la ningwa kwaavo tava ningi “ovapiya vouyuki”?
6 Elunduluko okudja mokukala “ovapiya voulunde” nokulongela Kalunga tu li “ovapiya vouyuki” olikonekwedi shili. Shi na sha navamwe ovo va lunduluka ngaha, Paulus okwa shanga ta ti: “Nye mwe liyelifa, mwa yapulwa nomwa yukipalifwa omedina lOmwene Jesus Kristus nokOmhepo yaKalunga ketu.”—Ovaroma 6:17, 18; 1 Ovakorinto 6:11.
7. Omolwashike sha fimana okukala hatu tale ko oinima ngaashi Jehova?
7 Opo tu mone elunduluko likonekwedi la tya ngaha, tete otu na okulihonga nghee Jehova ha tale ko oinima. Omafelemudo a pita, omupsalme David okwa ilikana kuKalunga nomutima aushe ta ti: “Omwene, ulikile nge eendjila doye . . . , ame ndi ende moshili yoye, Ove u longe nge.” (Epsalme 25:4, 5) Jehova okwa pwilikina kuDavid nota dulu yo okunyamukula eilikano la tya ngaho lovapiya vaye kunena. Molwaashi eendjila daKalunga nosho yo oshili yaye oda koshoka nodiyapuki, okudiladila kudo otashi ka kala ekwafo ngeenge hatu yelekwa tu wanife okahalu kombelela inai koshoka.
Onghandangala ya fimana yEendjovo daKalunga
8. Omolwashike sha fimana unene tu konakone Ombibeli?
8 Eendjovo daKalunga, Ombibeli, oi li oshidjemo shomhepo yaye. Onghee hano, onghedi imwe ya fimana yokupitika omhepo i longe mufye omokulesha nokukonakona Ombibeli—efiku keshe ngeenge tashi shiiva. (1 Ovakorinto 2:10, 11; Ovaefeso 5:18) Okuyadifa omadiladilo etu nosho yo omitima detu noshili nosho yo nomafinamhango Ombibeli, otaku ke tu kwafela tu lwife okuponokelwa kwoupamhepo wetu. Heeno, ngeenge omayeleko oku he na oukoshoki taa holoka, omhepo yaKalunga otai dulu oku tu dimbulukifa omalondwelo opamishangwa nosho yo omafinamhango taa wilike oo taa dulu okupameka etokolo letu tu katuke metwokumwe nehalo laKalunga. (Epsalme 119:1, 2, 99; Johannes 14:26) Onghee hano, inatu pukifwa mokulandula ondjila ya puka.—2 Ovakorinto 11:3.
9. Ongahelipi ekonakono lOmbibeli tali pameke etokolo letu tu diinine ekwatafano letu naJehova?
9 Eshi hatu twikile nekonakono letu lashili nolouladi lOmishangwa nekwafo loishangomwa ye likolelela kOmbibeli, omhepo yaKalunga otai nwefa mo omadiladilo etu nosho yo omitima detu nokuningifa efimaneko letu lokufimaneka omifikamhango daJehova li kale la pama. Ekwatafano letu naKalunga otali ningi oshinima sha fimana unene monghalamwenyo yetu. Ngeenge hatu shakeneke omayeleko, ihatu diladila nghee tashi ka kala shihafifa okukufa ombinga menyono. Ponhele yaasho, oshisho shetu osho okukanyatela oudiinini wetu kuJehova. Olupandu la kola lokupandula ekwatafano letu naye otali tu kumike tu lwife ehalo keshe olo tali dulu oku li nyona po ile oku li hanauna po.
“Omhango yoye ondi i hole shi fike peni!”
10. Omolwashike okufimaneka omhango yaJehova kwa pumbiwa opo tu diladile pamhepo?
10 Ngeenge otwa hala okudiladila pamhepo, eshiivo lokushiiva Eendjovo daKalunga inali wana. Ohamba Salomo oya li i na eudeko liwa lomifikamhango daJehova, ndelenee oya dopa okukala mudo pefimbo laxuuninwa lokukalamwenyo kwayo. (1 Eehamba 4:29, 30; 11:1-6) Ngeenge otu li ovadiladili pamhepo, ohatu ka mona omhumbwe hayokushiiva ashike osho Ombibeli tai ti, ndelenee oyokudulika yo komhango yaKalunga nomutima aushe. Eshi otashi ti okuninga ekonakono lolela lomifikamhango daJehova nokukendabala tu di shikule nouladi. Omupsalme okwa li noikala yoludi la tya ngaho. Okwa imba ta ti: “Omhango yoye ondi i hole shi fike peni! Efiku alishe ohandi i dilonga.” (Epsalme 119:97) Ngeenge ohatu lipula shili nokushikula omhango yaKalunga, otai tu linyengifa okuulika omaukwatya opakalunga. (Ovaefeso 5:1, 2) Ponhele yokukala hatu nanwa kokunyona tu he na ekwafo, ohatu ulike oiimati yomhepo nehalo lokuhafifa Jehova otali tu alula ko kowii, “koilonga yombelela.”—Ovagalati 5:16, 19-23; Epsalme 15:1, 2.
11. Oto hokolola ngahelipi kutya omhango yaJehova tai dilike oluhaelo oi li eameno kufye?
11 Ongahelipi hatu dulu okukulika efimaneko lomoule nosho yo ohole yokuhola omhango yaJehova? Onghedi imwe oyo okukonakona ongushu yayo noukeka. Diladila omhango yaKalunga oyo ya ngabekela enangalafano mohombo nosho yo oyo tai kelele oluhaelo nenyonohombo. (Ovaheberi 13:4) Mbela okudulika komhango ei otaku tu kelele sha shiwa? Ngeno mbela Tate womeulu omunahole ota ningi ngoo omhango oyo tai tu kelele ekwafo lasha? Doshili hasho nande! Tala kwaasho tashi ningwa mokukala kwavahapu ovo ihava kala metwokumwe nomifikamhango daJehova dopamikalo. Okumita luhapu ohaku va twala kelikufo lomadimo ile tashi dulika meehombo inadi teelelwa nodi he na elao. Vahapu ove na okutekula ounona pe he na omushamane ile omukainhu. Natango, ovo hava kufa ombinga moluhaelo otave liyandje vo vene komikifi hadi tandavele pamilele. (1 Ovakorinto 6:18) Ndelenee ngeenge omupiya waJehova a nyona omolwoluhaelo, oilanduliko yopamadiladilo otai dulu okukala inyemateka. Okukendabala okumweneka omaliudo e na etimba oo tae ku yahameke otaku dulu okweeta okulondokwa keemhofi nosho yo oudjuu wopamadiladilo. (Epsalme 32:3, 4; 51:5) Ndelenee mbela inashi yela nawa kutya omhango yaJehova tai kelele oluhaelo oya tulwa po oku tu amena? Heeno, ope na shili ouwa wa kula okudiinina oukoshoki wopamikalo!
Ilikana ekwafo kuJehova
12, 13. Omolwashike sha yuka okwiilikana ngeenge twa kondekelwa komahalo oulunde?
12 Okudiladila pamhepo otashi pula shili eilikano tali di komutima. Osha yuka okupula ekwafo lomhepo yaKalunga, omolwaashi Jesus a ti: “Ngenge omu shii okupa ovana veni oipewa iwa, unene Xo yeni yomeulu ta yandje Omhepo Iyapuki kuava tave mu indile.” (Lukas 11:13) Meilikano, ohatu dulu okupopya kutya otwa pumbwa omhepo i tu kwafele shi na sha nomaunghundi etu. (Ovaroma 8:26, 27) Ngeenge otwa didilika omahalo oulunde ile oikala yao tai tu kwata, ile ngeenge omwiitaveli mukwetu omuholike ta popi oshinima eshi kufye, otashi ka kala pandunge okutumbula omaupyakadi kondadalunde momailikano etu nokupula ekwafo laKalunga mokufinda oikala oyo.
13 Jehova ota dulu oku tu kwafela tu litule mo mouyuki, moukoshoki, mouwa nosho yo moinima oyo i shii okupandulwa. Ndelenee inashi wana tuu oku mu ilikana twa mana mo opo ‘ombili yaKalunga’ i amene omitima detu nosho yo omadiladilo etu! (Ovafilippi 4:6-8) Onghee hano natu ilikaneni omolwekwafo laJehova tu “[lalakanene] ouyuki netilokalunga neitavelo nohole nelididimiko noutalonheni.” (1 Timoteus 6:11-14) Omolwekwafo laTate yetu womeulu, oisho nomayeleko itai ka kula fiyo oposhitwa opo hatu ka kala tu he na elipangelo. Ponhele yaasho, okukala kwetu otaku ka didilikwa omolwengungumano olo twa pewa kuKalunga.
Ino nyikifa omhepo oluhodi
14. Omolwashike omhepo yaKalunga i li eenghono tadi eta oukoshoki?
14 Ovapiya vaJehova va pyokoka ohava longifa epukululo laPaulus: “Omhepo inamu i dima po.” (1 Ovatessaloniki 5:19) Molwaashi omhepo yaKalunga oyo ‘omhepo youyapuki,’ oya koshoka noiyela. (Ovaroma 1:4) Ngeenge tai longo mufye, omhepo ya tya ngaha oi li eenghono tadi eta ouyapuki ile oukoshoki. Otashi tu kwafa tu kale tu na onghalamwenyo ya koshoka oyo tai didilikwa keduliko lokudulika kuKalunga. (1 Petrus 1:2) Eenghedi keshe inadi koshoka otadi tula po okuhahokiwa komhepo oyo, naashi otashi dulu okukala noilanduliko ya nyika oshiponga. Ngahelipi?
15, 16. (a) Ongahelipi hatu dulu okunyikifa omhepo yaKalunga oluhodi? (b) Ongahelipi hatu dulu okuhenuka okunyikifa omhepo yaJehova oluhodi?
15 Paulus okwa shanga ta ti: “Omhepo Iyapuki yaKalunga inamu mu i nyikifa oluhodi, osheshi [oyo tai] mu tulwa oshilimbo fiyo kefiku lekulilo.” (Ovaefeso 4:30) Omishangwa otadi ulike omhepo yaJehova i li ngaashi edidiliko ile ‘oshilimbo shaasho tashi ya,’ omolwOvakriste ovadiinini ovavaekwa. Naashi osho omwenyo womeulu ihau fi. (2 Ovakorinto 1:22, NW; 1 Ovakorinto 15:50-57; Ehololo 2:10) Omhepo yaKalunga otai dulu okuwilika ovavaekwa nosho yo vakwao ovo ve na eteelelo lokombada yedu monghalamwenyo ya wanenena notai dulu oku va kwafela va henuke oilonga youlunde.
16 Omuyapostoli okwa londwela tu kondjife oikala i na sha nokupopya oipupulu, okuvaka, elihumbato lififa ohoni nosho tuu. Ngeenge otwa pitike tu nanwe koinima ya tya ngaho, ohatu ka kondjifa omayele a nwefwa mo Eendjovo daKalunga. (Ovaefeso 4:17-29; 5:1-5) Nande panghedi inini, ohatu ka nyikifa oluhodi omhepo yaKalunga, ndelenee doshili, eshi oshinima osho twa hala okuhenuka. Doshili, ngeenge umwe womufye okwa tameke okulipwililikila omayele Eendjovo daJehova, otashi dulika hatu tameke okukulika oikala ile oukwatya oo tau dulu okutwala mokunyona nokukanifa filufilu okuhokiwa kwetu kuKalunga. (Ovaheberi 6:4-6) Nonande otashi dulika itatu kufa ombinga moulunde paife, otashi dulika tu li mondjila okuuka kombinga ya tya ngaha. Ngeenge ohatu twikile okukala itatu tu kumwe newiliko lomhepo, ohatu ke i nyikifa oluhodi. Ohatu ka lwifa yo nokunyikifa Jehova oluhodi, oo e li odjo yomhepo iyapuki. Tu li ovanhu ve hole Kalunga, inatu hala nande okuninga ngaho. Ponhele yaasho, natu ilikane omolwekwafo laJehova opo tu ha nyikife omhepo yaye oluhodi, ndele oku tu dulifa tu fimanekife edina laye liyapuki mokutwikila nokudiladila pamhepo.
Twikila nokudiladila pamhepo
17. Omalalakano amwe opamhepo ashike tu na okulitulila po, nomolwashike shi li pandunge okulonga opo tu a mone?
17 Onghedi ididilikwedi kufye yokutwikila nokudiladila pamhepo oyo okutula po omalalakano opamhepo nokulonga tu a mone. She likolelela keemhumbwe detu nosho yo eenghalo detu, omalalakano etu otaa dulu okukala a kwatela mo okuxwepopaleka eenghedindjikilile detu dokukonakona, okutamununa mo ekufombinga letu moilonga yokuudifa ile okulalakanena omaufembanghenda okondadalunde oilonga, ngaashi oukalele woukokolindjila wefimbo liyadi, oilonga yaBetel ile oilonga youtumwa. Eshi otashi ka kaleka omadiladilo etu e lipyakidila noinima yopamhepo notashi ke tu kwafela tu he liyandje komaunghundi etu opanhu ile okukala hatu linyengifwa kokulalakanena omaliko nosho yo omahalo e he li pamishangwa oo a sha unene monghalelo ei yoinima. Doshili, ei onghatu yopandunge, omolwaashi Jesus okwa ladipika ta ti: “Inamu liongelela omamona kombada yedu, oko eenhwishi noilemo hai nyonauna, [naaku ovalunga] hava fe, ndee tava vake. Ndelenee liongeleleni omamona meulu, omo eenhwishi ile oilemo ihai nyonauna namu ovalunga ihava fe ndee itava vake. Osheshi oko kwa kala emona loye, oko kwa kala yo omutima woye.”—Mateus 6:19-21.
18. Omolwashike sha fimana tu twikile nokudiladila pamhepo momafiku aa axuuninwa?
18 Okudiladila pamhepo nosho yo okukondjifa omahalo ounyuni osho onghatu younongo ‘momafiku aa axuuninwa.’ (2 Timoteus 3:1-5) Doshili, “ounyuni otau xulu po pamwe nokahalu [kao]; ndelenee ou ta longo ehalo laKalunga oye ta kala alushe.” (1 Johannes 2:15-17) Pashihopaenenwa, ngeenge omunyasha Omukriste ta lalakanene oilonga yefimbo liyadi, eshi otashi ka kala shi li ewiliko pefimbo lomido didjuu dounyasha ile odo opo a ningi omukulunhu. Ngeenge ta fininikwa e liyandje, omunhu a tya ngaho ota ka kala netimaumbwile la yela laasho a hala okuwanifa moilonga yaJehova. Omunhu wopamhepo a tya ngaha ote ke shi tala ko shi he li pandunge ile shi li oulai nokuli, okweefa po okuhanga omalalakano opamhepo omolwokukonga ouwa wopamaliko ile elihafifo keshe tali udanekwa okuyandjwa koulunde. Dimbuluka kutya Moses oo a li omunhu wopamhepo okwa ‘hoololele okuhepekwa pamwe noshiwana shaKalunga nokwa dina ouwa wopokafimbo womoulunde.’ (Ovaheberi 11:24, 25) Kutya nee otu li ovanyasha ile ovakulunhu, ohatu ningi ehoololo la faafana ngeenge hatu twikile nokudiladila pamhepo ponhele yokudiladila pambelela inai wanenena.
19. Ohatu ka mona omauwa ashike ngeenge ohatu twikile nokudiladila pamhepo?
19 “Okudiladila pambelela otashi ti ounaita naKalunga,” omanga “okudiladila pamhepo otashi ti omwenyo nombili.” (Ovaroma 8:6, 7, NW) Ngeenge ohatu twikile nokudiladila pamhepo, ohatu ka mona ombili oyo i li ya pumba. Omitima detu nomadiladilo etu otaa ka kala a amenwa kenwefemo longhalo yetu youlunde. Ohatu ka kala hatu dulu okukondjifa omayeleko oo tae tu twala menyono. Nohatu ka kala tu na ekwafo laKalunga tu pondole mekondjo tali twikile pokati kombelela nomhepo.
20. Omolwashike hatu dulu okukala noushili kutya ohatu dulu okufindana moita pokati kombelela nomhepo?
20 Okutwikila nokudiladila pamhepo, ohatu kaleke po ekwatafano la fimana naJehova, odjo yomwenyo nosho yo omhepo iyapuki. (Epsalme 36:10; 51:13) Satana Ondiaboli novakalelipo vaye otava ningi keshe shimwe osho tava dulu okuteya po ekwatafano letu naJehova Kalunga. Otava kendabala okupangela omadiladilo etu, ve shi shii kutya ngeenge otwe liyandje muo, eshi konahiya otashi twala kounaita naKalunga nosho yo kefyo. Ndelenee ohatu dulu okufindana moita ei pokati kombelela nomhepo. Eshi osha li oshimoniwa shaPaulus, molwaashi mokushanga kombinga yekondjo laye mwene, tete okwa pula ta ti: “Olyelye ta mangulula nge molutu eli lefyo?” Opo nee, mokuulika kutya emanguluko otali shiiva, okwa ti: “Kalunga na pandulwe omolwaJesus Kristus, Omwene wetu!” (Ovaroma 7:21-25) Nafye ohatu dulu okupandula Kalunga molwaKristus omolwokuyandja onghedi yokukondjifa omaunghundi opanhu nokutwikila okudiladila pamhepo pamwe neteelelo likumwifi lomwenyo waalushe.—Ovaroma 6:23.
[Efano pepandja 14]
Okukonakona Ombibeli otaku tu kwafele tu lwife okuponokelwa kwoupamhepo wetu
[Efano pepandja 15]
Osha yuka okwiilikana omolwekwafo laJehova tu finde omahalo oulunde
[Efano pepandja 16]
Omalalakano opamhepo otae tu kwafele tu twikile nokudiladila pamhepo
[Efano pepandja 17]
Oto dimbuluka?
• Okudiladila pamhepo otashi ti ngahelipi?
• Ongahelipi hatu dulu okupitika omhepo yaJehova i longe mufye?
• Yelifa kutya omolwashike, mekondjo letu lokukondjifa oulunde sha fimana tu konakone Ombibeli, tu dulike komhango yaJehova notu ilikane kuye.
• Ongahelipi okutula po omalalakano opamhepo taku tu kaleke mondjila tai twala komwenyo?