Natu kaleni hatu ende pamhepo opo tu ka mone omwenyo nombili

‘Ihatu ende pambelela ndele opamhepo.’ — ROM. 8:4.

1, 2. (a) Onghalo ya nyika oshiponga ilipi tai dulu okuholoka po ngeenge omunhu okwa kala ta piyaanekwa kusha eshi ta shingi? (b) Oupyakadi ulipi tau dulu okuholoka po ngeenge otwa efa tu piyaanekwe pamhepo?

HAMUSHANGA umwe woyeendifo wokoU.S.A. okwa ti: “Ope na oinima ihapu hai piyaaneke ovashingi voihauto, noupyakadi wa tya ngaho otau ende tau naipala omudo keshe.” Eengodi dopeke odo dimwe domoinima yopaelektronika oyo hai piyaaneke ovashingi voyeendifo. Mekonakono limwe olo opo la ningwa, ovanhu va konda poshititatu shimwe ovo va li va pulwaapulwa ova ti kutya eehauto davo oda li da botswa ile hanga da botswa keehauto dovashingi ovo va li tava popi meengodi dopeke. Okuninga oinima imwe vali pefimbo olo to shingi otashi dulika shi kale tashi monika sha fa oshinima shiwa okuninga, ndele otashi dulu okweetifa oilanduliko inyikifa oluhodi.

² Oupamhepo wetu nao otau dulu okuningilwa oshinima sha faafana. Ngaashi ashike omushingi wohauto oo ta piyaanekwa koshinima shonhumba ha dopa luhapu okumona kutya okwa yuka moshiponga, omunhu oo ta piyaanekwa pamhepo naye ota dulu okulandula noupu ondjila oyo tai mu twala moshiponga. Eitavelo letu otali ka nghundipala ngeenge otwa yapuka mo mondjila yoshili nokweefa po omalipyakidilo opamhepo. (1 Tim. 1:18, 19) Omuyapostoli Paulus okwa li a londwela Ovakriste vokuRoma shi na sha noupyakadi oo, eshi a ti: “Omadiladilo ombelela oo efyo, ndele omadiladilo [omhepo] omwenyo nombili.” (Rom. 8:6) Mbela Paulus okwa li a hala okutya shike? Oshike tashi dulu oku tu kwafela tu kale hatu ‘diladila pamhepo’ nokuhenuka ‘okudiladila pambelela’?

‘Kape netokolo loku va kanifa’

3, 4. (a) Paulus okwa ti kutya okwa li ta kondjo noupyakadi ulipi? (b) Omolwashike tu na okukala tu na ohokwe yokukonakona onghalo oyo Paulus a li a pita muyo?

³ Omuyapostoli Paulus okwa popya monhumwafo oyo a li a shangela Ovaroma shi na sha noupyakadi oo a li ta kondjo nao, oo kutya ombelela yaye nomadiladilo aye okwa kala taa kondjifafana. (Lesha Ovaroma 7:21-23.) Paulus ka li a kwatwa keamo lokukala te liyukipalifa ile e liuditile unene olukeno a fa ngeno a wililwa po neenghono koulunde ndele ita dulu nokulikwafa kuye mwene. Kakele kaasho, okwa li Omukriste a pyokoka, omuvaekwa nokwa li yo a hoololwa a ninge “omuyapostoli [koiwana, NW].” (Rom. 1:1; 11:13) Ndele mbela omolwashike Paulus a li a shanga shi na sha noupyakadi oo a li ta kondjo nao?

⁴ Paulus okwa li a dimina shili kutya ita dulu okulonga ehalo laKalunga ngaashi a hala nopehe na ekwafo lasha. Omolwashike mbela? Okwa ti: “Aveshe ova nyona, nove he noshinge shaKalunga.” (Rom. 3:23) Molwaashi Paulus naye owomoludalo laAdam, okwa li a kumwa koilanduliko youlunde noka li a wanenena. Nafye otu li monghalo ya faafana naai yaye molwaashi atusheni inatu wanenena nohatu kala mekondjo la faafana nolaye efiku keshe. Kakele kaasho, ope na oinima ihapu oyo tai dulu oku tu piyaaneka noku tu ningifa tu yapuke mo ‘mondjila ya finana ei tai twala komwenyo.’ (Mat. 7:14) Ndele ngaashi Paulus, nafye otu na okukala tu na elineekelo kutya ohatu ka findana.

5. Openi Paulus a li a hanga ekwafo nosho yo epepelelo?

⁵ Paulus okwa ti: “Olyelye ta mangulula nge . . . ? Kalunga na pandulwe omolwaJesus Kristus, Omwene wetu!” (Rom. 7:24, 25) Opo nee, okwa li a popya shi na sha naava “ve li muKristus Jesus,” sha hala okutya, Ovakriste ovavaekwa. (Lesha Ovaroma 8:1, 2.) Jehova okwa tambula ko ovavaekwa ve li ovana vaye e shi ninga okupitila momhepo yaye iyapuki nove na eteelelo loku ka kala ‘ovafyuululi pamwe naKristus.’ (Rom. 8:14-17) Omhepo iyapuki yaKalunga nosho yo eitavelo lavo mekuliloyambo laKristus oyo hai va kwafele va findane mekondjo olo Paulus a popya, nomolwaasho ‘kape netokolo loku va kanifa.’ Ova mangululwa yo “momhango youlunde noyefyo.”

6. Omolwashike ovapiya vaKalunga aveshe ve na okuyandja elitulemo keendjovo daPaulus?

⁶ Nonande Paulus okwa li ta popi nOvakriste ovavaekwa, osho a popya shi na sha nomhepo yaKalunga nosho yo ekuliloyambo laKristus otashi etele ovapiya vaJehova aveshe ouwa, kashi na nee mbudi kutya ove na eteelelo lilipi. Paulus okwa li a nwefwa mo a yandje omayele oo kOvakriste ovavaekwa, ndele osha fimanenena kovapiya vaKalunga aveshe va ude ko osho a li a popya nokukendabala va mone mo ouwa.

Nghee Kalunga a “tokola oulunde mombelela”

7, 8. (a) Omeityo lilipi Omhango ya li ya “nyengifwa kombelela”? (b) Kalunga okwa wanifa po shike okupitila momhepo yaye iyapuki nosho yo mekuliloyambo?

⁷ Paulus okwa dimina mOvaroma etukulwa eti-7 kutya oulunde ou na eenghono shili u dule ombelela inai wanenena. Ndele metukulwa eti-8 okwa popya shi na sha neenghono domhepo iyapuki. Omuyapostoli oo okwa yelifa nghee omhepo yaKalunga tai dulu okukwafela Ovakriste va dule okukala metwokumwe nehalo laJehova nokukala va hokiwa kuye eshi tava kondjifa eenghono doulunde. Paulus okwa popya kutya Kalunga okwa wanifa po oshinima shimwe osho inashi wanifwa po kOmhango yaMoses, e shi ninga okupitila momhepo yaye iyapuki nosho yo mekuliloyambo lOmona waye.

⁸ Omhango yaMoses nosho yo oipango yayo ihapu oya li ya tokola ovalunde. Kakele kaasho, ovapristeri ovakulunhu ovo va li hava longo koshi yOmhango oyo kava li va wanenena nomayambo avo kaa li ta dulu okuxulifa po oulunde filufilu. Nomolwaasho taku dulu okutiwa kutya Omhango oya “nyengifwa kombelela.” (OB-1954) Kalunga “okwa tokola oulunde mombelela” eshi a “tuma Omona waye mwene molupe lombelela ya nyika oulunde” noku mu yandja e li ekuliloyambo, nokungaho, okwa wanifa po osho sha li sha “nyenga omhango.” Oshidjemo, Ovakriste ovavaekwa ova talwa ko ovayuki kuKalunga pakanghameno leitavelo lavo mekuliloyambo laJesus. Ovavaekwa ova ladipikwa yo vaha ‘ende pambelela ndele opamhepo.’ (Lesha Ovaroma 8:3, 4.) Ndele opo va ka pewe “oshishani shomwenyo,” ove na okutwikila okuninga ngaho fiyo opexulilo lokukalamwenyo kwavo kwokombada yedu. — Eh. 2:10.

9. Oshitya “omhango” osho sha longifwa mOvaroma 8:2 otashi ulike kushike?

⁹ Kakele ‘kOmhango’ yaMoses, Paulus okwa li yo a tumbula “omhango yOmhepo” nosho yo ‘omhango youlunde noyefyo.’ (Rom. 8:2) Ndele mbela eemhango odo otadi ulike kushike? Oshitya “omhango” osho sha longifwa pomhito oyo itashi ulike komifikamhango donhumba, ngaashi odo di li mOmhango yaMoses. Embo limwe lomauyelele ola ti: “Oshitya shOshigreka osho sha tolokwa omhango momushangwa oo otashi ulike keamo lomeni olo hali ningifa omunhu a katuke eenghatu — kutya nee odiwa ile odii — nohali longo la fa omhango. Oshitya osho otashi ulike yo koukwatya oo hau ningifa omunhu a kale e na onghedi yonhumba yokukalamwenyo.”

10. Omeityo lilipi tu li koshi yomhango youlunde nefyo?

¹⁰ Omuyapostoli Paulus okwa ti: “Ngaashi oulunde wa etwa mounyuni komunhu umwe, nefyo okoulunde, osho nee efyo ole uya movanhu aveshe, shaashi aveshe va nyona.” (Rom. 5:12) Atusheni otu li koshi yomhango youlunde nefyo molwaashi otu li oludalo laAdam. Ombelela yetu ilunde ohai kala tai tu fininike tu ninge oinima oyo tai nyemateke Kalunga, noshidjemo otashi ka kala efyo. Omuyapostoli Paulus okwa popya monhumwafo oyo a li a shangela Ovagalati kutya eenghatu noikala ya tya ngaho oi li “oilonga yombelela.” Opo nee, okwa weda ko a ti: “Ava tava longo oilonga ya tya ngaha, itava ka fyuulula ouhamba waKalunga.” (Gal. 5:19-21) Ovanhu ovo hava longo oilonga ya tya ngaho vamwe aveke naavo hava ende pambelela. (Rom. 8:4) ‘Eamo lavo lomeni’ nosho yo ‘onghedi yavo yokukalamwenyo’ oi li filufilu pambelela. Ndele mbela ovanhu ovo hava i moluhaelo, hava longele oikalunga, hava kufa ombinga moumhulile ile hava nyono omanyono makwao a kwata moiti ovo aveke hava ende pambelela? Hasho nandenande! Oilonga yombelela oya kwatela mo yo oinima imwe oyo vamwe tashi dulika va kale ve i tala ko ashike i li omaunghundi ongaho, ngaashi efupa, ehandu, eenhamanana nondubo. Mbela ope na ngoo umwe womufye ta dulu okutya iha ende nandenande pambelela?

11, 12. Jehova okwe tu pa efiloshisho lilipi opo tu dule okufinda omhango youlunde nefyo, noshike tu na okuninga opo tu kale twa hokiwa kuye?

¹¹ Inatu hafa tuu eshi Jehova e shi ninga tashi shiiva opo tu dule okufinda omhango youlunde nefyo! Jesus okwa ti: “Osho Kalunga a kala e hole ounyuni, Oye a yandja Omona waye Ewifa, opo keshe ou te mu itavele a ha kane, ndelenee a kale e nomwenyo waalushe.” Ngeenge otwa kala tu na olupandu omolwohole oyo Kalunga e tu ulikila nokukala neitavelo tali longo mekuliloyambo laJesus Kristus, itatu ka tokolwa vali omolwoulunde oo twa fyuulula. (Joh. 3:16-18) Osho otashi ke tu linyengifa tu popye nomukumo ngaashi Paulus oo a ti: “Kalunga na pandulwe omolwaJesus Kristus”!

¹² Onghalo oyo tu li muyo otai dulu okufaafanifwa nokuhakula omunhu oo a kwatwa komukifi wa kwata moiti. Ngeenge omunhu a tya ngaho okwa hala okuveluka filufilu, oku na okuninga ngaashi ndokotola te mu lombwele. Sha faafana, nonande okukala tu na eitavelo tali longo mekuliloyambo otaku dulu oku tu kwafela tu manguluke ko komhango youlunde nefyo, natango inatu wanenena nohatu nyono. Onghee hano, otwa pumbwa okuninga shihapu opo tu kale tu na oupamhepo muwa, twa hokiwa kuKalunga noku tu nangeke noupuna. Paulus okwa popya yo shi na sha nokweenda momhepo eshi a li ta popi kombinga yokulonga “ouyuki, ou tau pulwa komhango.”

Ongahelipi hatu dulu okweenda pamhepo?

13. Okweenda momhepo otashi ti shike?

¹³ Okweenda otashi ulike keenghatu odo hatu katuka ngeenge hatu di ponhele yonhumba twa finda kuikwao ile ngeenge hatu lalakanene oshinima shonhumba. Onghee hano, okweenda momhepo itashi ti kutya okukala ihatu ningi omapuko nandenande, ndele otashi ti okukala hatu ningi alushe exumokomesho lopamhepo. (1 Tim. 4:15) Otu na okukala hatu ningi eenghendabala ngaashi hatu dulu tu ende, ile tu tye, tu kale metwokumwe newiliko lomhepo efiku nefiku. Ngeenge otwa kala ‘nokweenda momhepo’ ohatu ka kala twa hokiwa kuKalunga. — Gal. 5:16.

14. Ovanhu “ava ve li pambelela” ove na eamo lokuninga shike?

¹⁴ Paulus okwa li a popya monhumwafo yaye oyo a li a shangela Ovaroma shi na sha neengudu dovanhu dopavali odo di na oikala yopamadiladilo ya yoolokafana. (Lesha Ovaroma 8:5.) Pomhito oyo Paulus ka li ta popi kombinga yomalutu opambelela eshi a longifa oshitya ombelela. MOmbibeli, oshitya ‘ombelela’ omafimbo amwe ohashi longifwa okuulika koulunde nokuhawanenena kwombelela yetu inghundi. Oinima ya tya ngaho oyo hai etifa ekondjifafano pokati kombelela nomadiladilo oo Paulus a tumbula metetekelo. Ndele mepingafano naPaulus, “ava ve li pambelela” ihava ningi nokuli eenghendabala va kondjife oinima oyo. Ovanhu va tya ngaho ohava “diladila eshi shopambelela,” ponhele yokukonakona kutya Kalunga okwa hala va ninge shike nokutambula ko ekwafo olo te va pe. Luhapu ohava yandje ashike elitulemo komahalo avo opambelela. Ndele mepingafano naasho, ‘ava ve li pamhepo’ ohava kendabala okukala tava diladila ‘eshi shomhepo,’ sha hala okutya, omafiloshisho nomalipyakidilo opamhepo.

15, 16. (a) Ongahelipi okukala hatu diladila oshinima shonhumba haku kumu oikala yetu yopamadiladilo? (b) Ovanhu vahapu kunena ohava yandje elitulemo kushike?

¹⁵ Lesha Ovaroma 8:6. Fimbo omunhu ina ninga oshinima shonhumba, kutya nee oshiwa ile oshii, oku na okukala tete a diladila kombinga yasho. Ovanhu ovo hava kala tava diladila alushe oinima yopambelela lwanima ohava ka kala ashike tava yandje elitulemo kuyo. Ohava kala ashike tava popi, tava diladila nokulalakanena oinima yopambelela.

¹⁶ Ndele mbela ovanhu vahapu kunena ohava yandje unene elitulemo kushike? Omuyapostoli Johannes okwa ti: “Keshe eshi shi li mounyuni, ngaashi okahalu kombelela nokahalu komesho noifulalala yokukalamwenyo, inai dja muTate, ndelenee oya dja mounyuni.” (1 Joh. 2:16) Okahalu ka tya ngaho oka kwatela mo oinima ngaashi okukala wa duka koluhaelo, okulalakanena etumba nosho yo oiniwe. Luhapu oinima ya tya ngaho ohai kala momambo, moifo, moifokundaneki, meemuvi, keeprograma doko-TV nosho yo kointaneta molwaashi ovanhu vahapu oyo ve hole noyo hava kala tava diladila. Ndelenee “omadiladilo ombelela oo efyo,” sha hala okutya, omunhu ota fi pamhepo paife nomonakwiiwa ota ka fya meityo lo lelalela. Omolwashike mbela? Omolwaashi “ombelela [ohai] diladila olwoodi naKalunga, shaashi ihai dulika komhango yaKalunga, ngaashi itai shi dulu. Ndele ava hava pangelwa kombelela itava dulu okuwapalela Kalunga.” — Rom. 8:7, 8, yelekanifa no-NW.

17, 18. Oshike tashi dulu oku tu kwafela tu kale hatu diladila pamhepo, noshidjemo otashi ka kala shike?

¹⁷ Mepingafano novanhu ovo hava diladila pambelela, ava hava ‘diladila pamhepo otava ka mona omwenyo nombili,’ sha hala okutya, otava ka mona omwenyo waalushe monakwiiwa nopaife ove na ombili yokomwenyo nove na ombili naKalunga. Ndele mbela oshike tashi ke tu kwafela tu kale tu na ‘omadiladilo omhepo’? Otu na okukala hatu yandje alushe elitulemo koinima yopamhepo nokukala tu i hole. Kungaho, ohatu ka yandja elitulemo ‘kokudulika komhango yaKalunga nokukala metwokumwe’ nomadiladilo aye. Ohatu ka kala yo tu shii kutya oshike tu na okuninga po ngeenge tu li momayeleko nohatu ka ninga omatokolo opandunge oo e li metwokumwe newiliko lomhepo.

¹⁸ Onghee hano, osha fimanenena okukala hatu diladila oinima yopamhepo. Ohatu dulu okuninga ngaho ‘mokumanga oiya yomadiladilo’ etu, mokukala tu na onghedindjikilile yokuninga oinima yopamhepo mokukalamwenyo kwetu akushe, mwa kwatelwa okwiilikana pandjikilile, okulesha nokukonakona Ombibeli, okukala pokwoongala nokukufa ombinga moukalele. (1 Pet. 1:13) Natu kaleni hatu diladila oinima yopamhepo, ponhele yokweefa tu piyaanekwe koinima yopambelela. Kungaho, ohatu ka kala nokweenda momhepo nohatu ka pewa omanangeko noupuna, molwaashi okudiladila pamhepo otashi ka tya omwenyo nombili. — Gal. 6:7, 8.

Oto dulu okuyelifa?

• Omeityo lilipi ‘omhango ya li ya nyengwa,’ nongahelipi Kalunga a li a wanifa po osho sha nyenga omhango?

• ‘Omhango youlunde noyefyo’ oshike, nongahelipi hatu dulu okumanguluka ko kuyo?

• Otu na okuninga po shike opo tu kale tu na ‘omadiladilo omhepo’?

[Omafano pepandja 12, 13]

Oho ende ngoo pamhepo ile opambelela?