Twikileni okuulika ouwa
“Ouwa keshe nouyuki noshili,
oyo oshiimati [shouyelele, OB-1954].”—OVAEFESO 5:9.
OUWA wa shiya ko oo omunhu keshe ta dulu okuninga oo okufimaneka Jehova. Kunena, ovanhu omamiliyona osho tava ningi mokuhambelela Kalunga omolwouwa waye. Tu li Eendombwedi daJehova didiinini, nomutima aushe ohatu tu kumwe nomupsalme oo a imba ta ti: “Ouwa woye unene u fike peni, ou we u [tuvikilila] ava, have ku tila.”—Epsalme 31:20.
2, 3. Oshike tashi dulu okuholoka po ngeenge oilonga yetu yokuninga ovanhu ovahongwa itai yambididwa kelihumbato liwa?
2 Etilofimaneko lokutila Jehova ohali tu linyengifa tu mu hambelele molwouwa waye. Ohali tu linyengifa yo tu ‘hambelele Omwene noku mu fimaneka nokushiivifa oshinge shouhamba waye.’ (Epsalme 145:10-13) Eshi osho hashi tu kufifa ombinga nouladi moilonga yokuudifa Ouhamba noyokuninga ovanhu ovahongwa. (Mateus 24:14; 28:19, 20) Doshili, oilonga yetu yokuudifa oi na okuyambididwa kelihumbato liwa. Ngeenge hasho, ohatu ka etela edina liyapuki laJehova odino.
3 Ovanhu vahapu ohave liti kutya otava longele Kalunga, ndelenee elihumbato lavo itali tu kumwe nomifikamhango da tulwa po mEendjovo daye da nwefwa mo. Shi na sha navamwe ovo va li ve he li metwokumwe nomapopyo avo kutya ohava longo ouwa, omuyapostoli Paulus okwa shanga ta ti: “Ove ou ho longo ovanhu, iho lilongo [ove] mwene; ho udifa va ha vake, ndele ove ho vake; ho ti, vo va ha haele, ndele ove ho haele? . . . Omolweni edina laKalunga tali shekwa movapaani, ngaashi pa shangwa.”—Ovaroma 2:21, 22, 24.
4. Elihumbato letu liwa oli na oshidjemo shilipi?
4 Ponhele yokweetela edina laJehova odino, ohatu kendabala oku li fimanekifa nelihumbato letu liwa. Eshi oshe linyengifa nawa ovo ve li pondje yeongalo lopaKriste. Shimwe oshosho kutya ohashi tu kwafele okumweneka ovapataneki vetu. (1 Petrus 2:15) Nashimwe sha fimana unene oshosho kutya elihumbato letu liwa otali shilile ovanhu kehangano laJehova, notashi va yeululile ondjila opo ve mu fimaneke nova mone omwenyo waalushe.—Oilonga 13:48.
5. Omapulo elipi tu na okukonakona?
5 Molwaashi otu li ovanhu inava wanenena, mbela ongahelipi hatu dulu okuhenuka elihumbato olo tali dulu okweetela Jehova odino notali dulu okupundukifa ovo tava kongo oshili? Doshili, mbela ongahelipi hatu shi pondola okuulika ouwa?
Oshiimati shouyelele
6. Imwe ‘yomoilonga yomulaulu ihai imike’ oilipi, noiimati ilipi i na okukala i liwetikile mOvakriste?
6 Tu li Ovakriste ve liyandja, ohatu hafele oshinima shonhumba osho hashi tu kwafele tu henuke ‘oilonga yomulaulu ihai imike.’ Oilonga ei oya kwatela mo oilonga hai dinifa Kalunga ngaashi oipupulu, okuvaka, etukano, omapopyo inaa koshoka kombinga yomilele, elihumbato lififa ohoni, omashendjo oulai nosho yo oukolwe. (Ovaefeso 4:25, 28, 31; 5:3, 4, 11, 12, 18) Ponhele yokukufa ombinga moilonga ya tya ngaha, fye ohatu ‘ende ngaashi ovana vouyelele.’ Omuyapostoli Paulus ota ti kutya “ouwa keshe nouyuki noshili oyo oshiimati shouyelele.” (Ovaefeso 5:8, 9) Hano opo tu twikile okuulika ouwa otu na okweenda mouyelele. Ndelenee ouyelele ou owoludi lilipi?
7. Otu na okuninga shike opo tu twikile okuulika oshiimati shouwa?
7 Nande inatu wanenena, ohatu dulu okuulika ouwa ngeenge ohatu ende mouyelele wopamhepo. Omupsalme okwa imba ta ti: “Ondjovo yoye oyo olamba yeemhadi dange, nouyelele mondjila yange.” (Epsalme 119:105) Ngeenge otwa hala okukala hatu ulike ‘oiimati youyelele’ okupitila ‘mouwa keshe,’ otu na okukala alushe hatu longifa nawa ouyelele wopamhepo oo tau hangika mEendjovo daKalunga, oo hau konakonwa noukeka moishangomwa yopaKriste nohau kundafanwa pandjikilile pokwoongala kwetu kwelongelokalunga. (Lukas 12:42; Ovaroma 15:4; Ovaheberi 10:24, 25, OB-1986) Otwa pumbwa yo okuyandja elitulemo le likalekelwa moshihopaenenwa nomomahongo aJesus Kristus, “ouyelele wounyuni” nosho yo “evadimo lefimano [laJehova].”—Johannes 8:12; Ovaheberi 1:1-3.
Oshiimati shomhepo
8. Omolwashike hatu dulu okuulika ouwa?
8 Pe he na omalimbililo, ouyelele wopamhepo ohau tu kwafele tu ulike ouwa. Kakele kaasho, ohatu dulu okuulika oukwatya ou shaashi ohatu wilikwa komhepo iyapuki ile eenghono daKalunga tadi longo. Ouwa ou li oshitukulwa ‘shoiimati yomhepo.’ (Ovagalati 5:22) Ngeenge otwe liyandje mewiliko lomhepo iyapuki yaJehova, otai ka imika mufye oshiimati shayo shikumwifi shouwa.
9. Ongahelipi hatu dulu okulonga metwokumwe neendjovo daJesus odo da shangwa muLukas 11:9-13?
9 Okukala twa hala neenghono adishe okuhafifa Jehova okupitila mokuulika oshiimati shomhepo shouwa, oshi na oku tu linyengifa tu longe metwokumwe neendjovo daJesus odo tadi ti: “Indileni, ndee tamu pewa, kongeni, ndee tamu mono, kongholeni, ndee tamu yeululwa. Osheshi keshe tuu ou ta indile, ota pewa, nakeshe tuu ou ta kongo, ota mono, naau ta konghola, ota yeululwa. Ndele olyelye womunye xe ou, omona waye ngenge te mu indile oshi, te mu pe eyoka ponhele yoshi, ile mu indile ei, te mu pe ngeno ondye? Hano nye [inamu wanenena nokungaha otamu yelekanifwa novai], ngenge omu shii okupa ovana veni oipewa iwa, unene Xo yeni yomeulu ta yandje Omhepo Iyapuki kuava tave mu indile.” (Lukas 11:9-13) Natu landule ekumaido laJesus mokwiilikana tu pewe omhepo yaJehova opo tu twikile okuulika oshiimati shayo shouwa.
‘Kaleni hamu longo ouwa’
10. Eenghedi dilipi omo Jehova ha ulike ouwa waye da tumbulwa muExodus 34:6, 7?
10 Molwouyelele wopamhepo hau di mEendjovo daKalunga nosho yo nekwafo lomhepo iyapuki yaKalunga, ohatu dulu ‘okukala hatu longo ouwa.’ (Ovaroma 13:3, NW) Okupitila mokukonakona Ombibeli ihaku faula, ohatu lihongo unene nghee hatu dulu okuhopaenena ouwa waJehova. Oshitukulwa sha tetekela osha popya kombinga yeenghedi omo Kalunga ha ulike ouwa waye odo da ingidilwa Moses, da shangwa muExodus 34:6, 7, omo hatu lesha taku ti: “Omwene Kalunga, omunefilonghenda, Kalunga [omunalukeno], omunanheni, nomunene mouwanghenda [nomoshili], nouwanghenda waye te u diinine kovanhu omayovi, ou ta dimi po omanyonauno nomatauluko nomatimba, ndelenee Ye ita efa okuhandukila.” (Yelekanifa NW.) Ekonakono la mana mo li na sha nomaulikilo ouwa waJehova otali ke tu kwafela tu ‘kale hatu longo ouwa.’
11. Eshiivo lokushiiva kutya Jehova omunefilonghenda nomunalukeno oli na oku tu linyengifa ngahelipi?
11 Eingido eli lopakalunga otali tu londwele tu hopaenene Jehova mokukala tu na onghenda nolukeno. Jesus okwa ti: “Ovanelao ovananghenda, osheshi ovo tava ka filwa onghenda.” (Mateus 5:7; Lukas 6:36) Molwaashi otu shii kutya Jehova omunalukeno, otwe linyengifwa tu kale ovanhu vawa nove na olukeno mokweendafana kwetu navamwe, mwa kwatelwa ovo hatu udifile. Eshi oshi li metwokumwe nomayele aPaulus oo taa ti: “Eendjovo deni nadi kale alushe [dolukeno, NW], da fingala omongwa, nye mu kale mu shi shii nhumbi mu nokunyamukula keshe umwe.”—Ovakolossi 4:6.
12. (a) Molwaashi Kalunga omunanheni, fye otu na okulinyenga ngahelipi mokweendafana kwetu navamwe? (b) Ouwanghenda waJehova otau tu linyengifa tu ninge shike?
12 Molwaashi Kalunga omunanheni, ehalo letu ‘okukala hatu longo ouwa’ otali tu linyengifa tu kale hatu lididimikile omaunghundi manini ovaitaveli vakwetu nokukala hatu tale komaukwatya avo mawa. (Mateus 7:5; Jakob 1:19) Ouwanghenda waJehova otau tu linyengifa tu ulike ohole i na oudiinini, nonande otu li meenghalo didjuu unene. Doshili, eshi oshi li sha wapala.—Omayeletumbulo 19:22.
13. Otu na okulihumbata ngahelipi opo tu ulike kutya Jehova ‘omunene moshili’?
13 Molwaashi Tate yetu womeulu ‘omunene moshili’ otwa hala ‘okuliholola ofye ovayakuli vaKalunga meendjovo doshili.’ (2 Ovakorinto 6:3-7) Imwe yomoinima iheyali oyo i li oixuna koshipala shaJehova oyo ‘elaka li noipupulu nondombwedi i noipupulu tai tandavelifa oipupulu.’ (Omayeletumbulo 6:16-19) Onghee hano ehalo letu okukala hatu hafifa Kalunga ole tu linyengifa tu ‘efe oipupulu notu popye oshili.’ (Ovaefeso 4:25) Inatu dopa nande okuulika ouwa monghedi ei ya fimana neenghono.
14. Omolwashike tu na okukala hatu dimine po vamwe?
14 Eingido laKalunga kuMoses oli na oku tu linyengifa tu kale hatu dimine po vamwe, shaashi Jehova okwa hala okudimina po. (Mateus 6:14, 15) Doshili, Jehova oha handukile ovanyoni inave livela ombedi. Onghee hano otu na okudiinina omifikamhango daye douwa di na sha nokukaleka po oukoshoki wopamhepo meongalo.—Leviticus 5:1; 1 Ovakorinto 5:11, 12; 1 Timoteus 5:22.
‘Litaleni nawa’
15, 16. Ongahelipi ekumaido laPaulus olo la shangwa mOvaefeso 5:15-19 tali dulu oku tu kwafela tu twikile okuninga ouwa?
15 Opo tu twikile okuulika ouwa nande twa dingililwa kowii, otwa pumbwa okuyadifwa nomhepo yaKalunga nokutala nhumbi hatu ende. Omolwaasho Paulus a kumaida Ovakriste muEfeso ta ti: “Litaleni hano nawa nhumbi hamu ende, hangaashi omalai, ndelenee ngaashi ovanaendunge; longifeni nawa efimbo, osheshi omafiku [omai]. Onghee hano inamu kala mu he neendunge, ndele shiiveni ehalo lOmwene [olilipi]. Inamu kolwa komaviinyu omo hamu di eliefo, ndelenee yadifweni kOmhepo; mu tongafane nomapsalme nomalwiimbo opamhepo, nokwiimbila nokuhambelela Omwene momitima deni.” (Ovaefeso 5:15-19) Doshili, ekumaido eli ole tu wapalela lela momafiku aa axuuninwa madjuu.—2 Timoteus 3:1.
16 Opo tu twikile okulonga ouwa, otu na okutala nawa nhumbi hatu ende kutya ongaashi ovo tava longifa ounongo wopakalunga. (Jakob 3:17) Otu na okuhenuka omanyono a kwata moiti notu na okuyadifwa nomhepo iyapuki nokuliyandja opo tu wilikwe kuyo. (Ovagalati 5:19-25) Mokutula moilonga ehongo lopamhepo olo hatu pewa pokwoongala kwopaKriste nopoyoongalele inini naayo ya kula, ohatu ka dula okutwikila okulonga ouwa. Eendjovo daPaulus kOvaefeso otadi dulu yo oku tu dimbulukifa kutya pokwoongala kwetu kwokulongela Kalunga ohatu mono omauwa taa di mokwiimba kwetu taku di komutima ‘omalwiimbo opamhepo,’ oo mahapu omuo taa yandje elitulemo komaukwatya opamhepo ngaashi ouwa.
17. Ngeenge eenghalo itadi pitike Ovakriste ovo ve na omaudu a kwata moiti va kale pokwoongala nope he na okufaula, oushili washike tava dulu okukala ve na?
17 Mbela ongahelipi kombinga yovaitaveli vakwetu ovo itava dulu okukala pokwoongala kwopaKriste nope he na okufaula omolwomaudu oshinamenena a kwata moiti? Otashi dulika va kale ve udite ve na omitima da teyauka molwaashi itava dulu okulongela Jehova meendafano la yukilila novamwaxe novamwaina vopamhepo. Ndelenee otava dulu okukala noushili kutya Jehova oku udite ko eenghalo davo, note va kaleke mouyelele, ote va pe omhepo yaye iyapuki noku va kwafela va twikile okulonga ouwa.—Jesaja 57:15.
18. Oshike tashi tu kwafele tu twikile okuulika ouwa?
18 Opo tu twikile okuulika ouwa otashi tu pula tu kale twa lungamena ovo hatu ningi eendafano navo nokweefa po ovo ‘ve tonde ouwa.’ (2 Timoteus 3:2-5; 1 Ovakorinto 15:33) Okutula moilonga omayele oo otashi ke tu kwafela tu henuke ‘okunyikifa oluhodi omhepo iyapuki yaKalunga’ mokukala hatu longo itatu tu kumwe newiliko layo. (Ovaefeso 4:30) Natango, ohatu kwafelwa okulonga ouwa ngeenge hatu kala neendafano lopofingo naavo okukalamwenyo kwavo taku ulike kutya vo ovaholi vouwa notava wilikwa komhepo iyapuki yaJehova.—Amos 5:15; Ovaroma 8:14; Ovagalati 5:18.
Ouwa ohau eta oidjemo iwa
19-21. Hepaulula oimoniwa oyo tai ulike oshidjemo shokuulika ouwa.
19 Okweenda mouyelele wopamhepo, okuliyandja mewiliko lomhepo yaKalunga nokutala nhumbi hatu ende otashi ke tu kwafela tu henuke owii notu ‘kale hatu longo ouwa.’ Naashi otashi dulu yo okweeta oidjemo iwa. Diladila koshimoniwa shaZongezile, umwe womEendombwedi daJehova moSouth Africa. Ongula imwe eshi a li ta i kofikola, okwa tala omuvalu munini woimaliwa yaye oyo a tuvikila kombaanga. Okambapila oko ka dja meshina loimaliwa loautomatika oke mu ulikila omuvalu wa puka wa pitilila pe N$42 000. Osekuliti yopombaanga novanhu vamwe ove mu ladipika a nane ko oimaliwa oyo noku i tuvikila mombaanga i lili. Ovalihomboli vEendombwedi ovo ha kala puvo ovo aveke ve mu pandula eshi ina nana ko nande oimaliwa yomuvalu wonhumba.
20 Efiku loilonga la landula ko, Zongezile okwa lopota epuko olo kombaanga. Osha monika mo kutya oku na onomola yokombaanga oyo hanga ye lifa naayo yomunangeshefa oshipuna oo a tuvikila oimaliwa konomola ya puka. Molwaashi omunangeshefa okwa li a kumwa eshi Zongezile ina longifa nande oimaliwa yonhumba yomwaayo, okwe mu pula ta ti: “Elongelokalunga loye olilipi?” Zongezile okwa yelifa kutya ye oumwe womEendombwedi daJehova. Okwa li a pandulwa nomutima aushe kovanambelewa vombaanga ovo va popya tava ti: “Otwa hala ngeno ovanhu aveshe va kale ovayuki ngaashi Eendombwedi daJehova.” Doshili, oilonga youyuki nouwa otai dulu okuningifa vamwe va fimaneke Jehova.—Ovaheberi 13:18.
21 Oilonga youwa inai pumbwa okukala inene opo i kale i na oshidjemo shiwa. Oku shi faneka: Omunyasha Ondombwedi oo ta longo e li omuudifi wefimbo liyadi kukamwe komounhunhu vaSamoa okwa li e na okuya koshipangelo shopomudingonoko wavo. Omanga ovanhu va li va teelela okumona ondokotola, Ondombwedi oyo oya mona kutya omukulukadi omukulupe oo a li a shaama naye okwa li ta vele unene. Oya efela omukulukadi oo a ye ponhele yayo opo a mone ouhaku diva. Konima yefimbo, Ondombwedi oyo oya shakena nomukulukadi omukulupe oo ponhele yomalandifilo. Omukulukadi okwe i dimbuluka nosho yo oshilonga shayo shouwa poshipangelo. Omukulukadi oo okwa ti: “Paife ondi shi shii kutya Eendombwedi daJehova odi hole ovanhu vakwao shili.” Nande nale ka li e linyengifwa ketumwalaka lOuhamba, ouwa oo a ulikilwa kOndombwedi owa li u na oshidjemo shiwa. Okwa tambula ko ekonakonombibeli lopeumbo nokwa hovela okumona eshiivo lEendjovo daKalunga.
22. Onghedi ya tongomana unene omo hatu dulu ‘okukala hatu longo ouwa’ oilipi?
22 Otashi dulika shili to dulu okuhepaulula oimoniwa oyo tai ulike ongushu yokuulika ouwa. Onghedi imwe ya tongomana unene ‘yokukala hatu longo ouwa’ oyo okukala hatu kufa ombinga itatu faula mokuudifa onghundana iwa yOuhamba waKalunga. (Mateus 24:14) Natu kale hatu kufa ombinga nouladi moilonga ei i na ondilo unene, tu wete kutya ei oyo onghedi imwe hatu dulu okulonga ouwa, unene tuu kwaavo tava ulike ohokwe. Sha fimana unene, oukalele wetu nelihumbato letu liwa otai fimaneke Jehova, oo e li odjo youwa ya shiya ko.—Mateus 19:16, 17.
Twikila ‘okuninga ouwa’
23. Omolwashike oukalele wopaKriste u li oshilonga shiwa?
23 Pe he na omalimbililo oukalele wetu ou li oshilonga shiwa. Otashi ti exupifo kufye nokwaavo tava pwilikine ketumwalaka lOmbibeli nokuya mondjila oyo tai twala komwenyo waalushe. (Mateus 7:13, 14; 1 Timoteus 4:16) Ngeenge hatu taalelwa kokuninga omatokolo, ehalo letu lokulonga ouwa otashi dulika li tu linyengife tu lipule: ‘Mbela etokolo eli otali ka nwefa mo ngahelipi oilonga yange yokuudifa Ouhamba? Mbela onghatu ei handi diladila okukatuka oi li tuu shili pandunge? Mbela otai ka kwafela nge tuu ndi dule okukwafela vamwe va tambule ko “evangeli laalushe” nokuya mekwatafano lopofingo naJehova Kalunga?’ (Ehololo 14:6) Elao linene otali ka monika ngeenge etokolo otali xumifa komesho oinima yOuhamba.—Mateus 6:33; Oilonga 20:35.
24, 25. Eenghedi dimwe omo hatu dulu okuninga ouwa meongalo odilipi, nohatu dulu okukala tu na oushili washike ngeenge ohatu twikile okuulika ouwa?
24 Inatu dina nandenande oidjemo iwa youwa. Ohatu dulu okukala hatu ulike oukwatya ou mokuyambidida eongalo lopaKriste nokuninga osho hatu dulu opo tu file oshisho oukalinawa walo. Doshili, ohatu ningi nawa ngeenge hatu kala pokwoongala kwopaKriste nope he na okufaula nokukufa ombinga muko. Okukala po kwetu otaku tu omukumo ovalongelikalunga vakwetu, neekomenda detu da longekidwa nawa otadi va tungu pamhepo. Ohatu ningi yo ouwa ngeenge hatu longifa oiniwe yetu mokukaleka po Olupale lOuhamba nongeenge hatu kwafele moku li fila nawa oshisho. (2 Eehamba 22:3-7; 2 Ovakorinto 9:6, 7) Doshili, “fimbo tu nomhito, tu ningileni aveshe ouwa, ndelenee unene tuu ovo oovakwetu vomeitavelo.”—Ovagalati 6:10.
25 Itatu dulu okushiiva komesho yefimbo onghalo keshe oyo tai tu pula tu ulike ouwa. Hano ngeenge hatu shakeneke omashongo mape, natu konge ouyelele mOmishangwa nokwiilikana tu pewe omhepo iyapuki yaJehova nokuninga keshe osho hatu dulu opo tu wanife po ehalo laye liwa nola wanenena. (Ovaroma 2:9, 10; 12:2) Ohatu dulu okulineekela kutya Jehova ote ke tu nangeka noupuna muhapu mokutwikila kwetu okuulika ouwa.
1. Ovanhu omamiliyona kunena otava ulike ngahelipi kutya otava tu kumwe nEpsalme 31:20?
[Efano pepandja 15]
Eendjovo daKalunga nosho yo omhepo yaye iyapuki otai tu kwafele tu ulike ouwa
[Efano pepandja 16]
Okuulika ouwa ohaku eta oidjemo iwa
[Efano pepandja 18]
Oto nyamukula ngahelipi?
• Ongahelipi hatu dulu okuninga ouwa wa shiya ko?
• Omolwashike ouwa tau ifanwa “oshiimati shouyelele”?
• Omolwashike ouwa tau ifanwa ‘oshiimati shomhepo’?
• Elihumbato letu liwa oli na oshidjemo sha tya ngahelipi?