Kaleni mu li ofika ndele taleni nhumbi Jehova te mu xupifa!
“Fikameni, kaleni mu li ofika ndee taleni nhumbi Omwene te mu xupifa.”—2 OMAFIMBO 20:17.
1, 2. Omolwashike eponokelo ‘laGog medu laMagog’ olo li li popepi li na oilanduliko inene li dule oshiponga shopaiwana shoukulo?
OUKULO owa hokololwa kuvamwe u li eponokelo okuponokela omudingonoko wounyuni, nokuli neputuko lo vene. Shi shii okuudiwa ko, oshiponga osho oshi na okutalika ko sha kwata moiti. Mepingafano naasho, ope na nokuli oshilanduliko shinene sheponokelo limwe olo omudingonoko wounyuni tau yandje elitulemo linini kusho ile itau yandje nandenande elitulemo kusho. Olo shike mbela?
2 Olo eponokelo ‘laGog medu laMagog’ olo tali popiwa kOmbibeli muHesekiel etukulwa 38. Mbela oshi li omutoto okupopya kutya eponokelo olo oli na oshilanduliko shinene shi dule oshiponga shopaiwana shoukulo? Hasho nande, omolwaashi eponokelo laGog kali fi eponokelo okuponokela omapangelo opanhu. Otali ponokele epangelo laKalunga lomeulu. Ndelenee Omushiti ota dulu filufilu okuungaunga neponokelo laGog lonyanya, hangaashi ovanhu ovo tashi dulika have shi pondola ashike kanini mokuungaunga nomaponokelo okuponokela onghalelo yavo.
Eponokelo okuponokela epangelo laKalunga
3. Ovapangeli vounyuni ova kala tava shivwa va ninge shike okudja mo 1914, nove linyenga ngahelipi?
3 Elipumomumwe pokati kOhamba yaKalunga tai pangele paife nonghalelo yaSatana youkolokoshi ola kala tali twikile okudja eshi Ouhamba waKalunga wa dikwa po meulu mo 1914. Okudja pefimbo olo, ovapangeli vopanhu ova kala tava shiivifilwa va dulike kOmupangeli oo a hoololwa kuKalunga. Ndelenee ova anya oku shi ninga, ngaashi sha xunganekwa taku ti: “Eehamba dedu tadi fikama, ovapangeli otava kundafana pamwe notava tu ondubo nOmwene nomuvaekwa waye, tava ti: Tu tokauleni omapando avo, fye tu liduleni omiya davo!” (Epsalme 2:1-3) Okukondjifa epangelo lOuhamba osha yela kutya otaku ka hanga oshitwa shako shaxuuninwa pefimbo leponokelo laGog yaMagog.
4, 5. Ongahelipi ovanhu tava dulu okulwifa epangelo laKalunga lomeulu ihali monika?
4 Otashi dulika tu lipule kutya ongahelipi ovanhu tava dulu okulwifa epangelo lomeulu ihali monika. Ombibeli otai holola kutya epangelo olo ola fikama po ‘momayovi efele nomilongo nhe nanhe, ava va kulilwa medu,’ pamwe ‘nOdjona,’ Kristus Jesus. (Ehololo 14:1, 3; Johannes 1:29) Molwaashi olomeulu, epangelo olo lipe ola popiwa li li “omaulu mape,” ofimbo shi li pandunge eshi ovapangelwa valo vokedu tava ifanwa ‘edu lipe.’ (Jesaja 65:17; 2 Petrus 3:13) Vahapu vomovapangeli pamwe naKristus 144 000 ova mana nale eengeda davo kombada yedu moudiinini. Kungaha ova ulika kutya ova wana okutambula oinakuwanifwa yavo ipe yokulonga meulu.
5 Ndelenee oshixupe shinini sho 144 000 oshi li natango kombada yedu. Mwaavo ve dule po 15- 000 000 ovo va li pedano lOuvalelo wOmwene mo 2002, ovanhu ashike 8 760 va ulika eteelelo lavo lokukala va hoololelwa oshilonga osho shomeulu. Keshe umwe oo a tokola okuponokela oilyo yomonakwiiwa yOuhamba oyo ya xupa po, ota lwifa shili Ouhamba waKalunga.—Ehololo 12:17.
Ohamba tai findana
6. Jehova naKristus ohava tale ko ngahelipi omapataneko oo taa ningilwa oshiwana shaYe?
6 Elinyengo laJehova komapataneko okupataneka Ouhamba waye wa dikwa po ola xunganekwa taku ti: “Ou omukali womeulu ote shi va yolele, Omwene ote shi va ningile oshiyele. Ndee opo nee ote ke va hanyena mehandu, nomokukeshuka kwaye ote ke va tilifa, ta ti: Ame tuu ou nda nangeka ohamba yange muSion komhunda yange iyapuki.” (Epsalme 2:4-6) Efimbo laKristus ola fika paife, koshi yewiliko laJehova, “a ka findane.” (Ehololo 6:2) Jehova ota tale ko ngahelipi omapataneko oo taa ningilwa oshiwana shaye pefimbo lefindano laxuuninwa? Ongaashi tae mu ningilwa oku mu kondjifa nosho yo okukondjifa Ohamba yaye tai pangele. Jehova ota ti: “Ou te mu kumu, ota kumu ondada yeisho [lange, NW].” (Sakaria 2:8) NaJesus okwa popya nomufindo kutya oha tale osho ovanhu tava ningile ovamwaxe ovavaekwa ile tava dopa oku shi va ningila sha fa oye te shi ningilwa ile ine shi ningilwa.—Mateus 25:40, 45.
7. Omolwomatomheno elipi ovo ‘vongudu inene’ va hokololwa mEhololo 7:9 tava mono ehandu laGog?
7 Doshili, ovo tava yambidida oshixupe shovavaekwa navo otava ka mona yo ehandu laGog. Oilyo oyo ‘yomedu lipe’ laKalunga yomonakwiiwa oyo “ongudu inene” ya ifanwa ‘moiwana aishe nomomaludi aeshe, movanhu aveshe nomomalaka aeshe.’ (Ehololo 7:9) Otava popiwa ve li “ofika va taalela olukalwapangelo nOdjona, va djalekwa oikutu itoka to.” Kungaha, ova hokiwa kuKalunga naKristus Jesus. Ova humbata “oivale yomilunga momake avo,” tava tange Jehova oo e na oufemba wokukala Omupangeli weshito alishe, oo epangelo laye li lilwe po kepangelo lOhamba oyo a nangeka po, Jesus Kristus, “Odjona yaKalunga.”—Johannes 1:29, 36.
8. Eponokelo laGog otali ka ningifa Kristus a ninge shike, noshidjemo otashi ka kala shike?
8 Eponokelo laGog otali ka ningifa Ohamba yaKalunga ya nangekwa po i katuke onghatu nokulwa oita yaHarmagedon. (Ehololo 16:14, 16) Ovo va anya okudimina ounamapangelo waJehova otava ka hanaunwa po. Mepingafano naasho, ovo ve lididimikila oudjuu omolwoudiinini wavo kOuhamba waKalunga, otava ka mona epepelelwo tali kalelele. Shi na sha naasho, omuyapostoli Paulus okwa shanga ta ti: “Osho edidiliko letokolo laKalunga la yuka, nokutya nye mu talwe mwa wapalela ouhamba waKalunga, ngaashi tamu u hepekelwa yo. Kalunga okwe shi tala sha yuka okwaalulila ovahepeki veni omahepeko, noku mu pa, onye tuu ava mwa hepekwa, etulumuko pamwe nafye omokuholoka kwOmwene Jesus, fiku ta di meulu pamwe novaengeli vaye ovanaenghono, omomalaka omundilo, fiku ta handukile ava inava shiiva Kalunga noitava dulika kevangeli lOmwene wetu Jesus.”—2 Ovatessaloniki 1:5-8.
9, 10. (a) Ongahelipi Jehova a pa Juda efindano okufinda ovatondi vatilifa? (b) Ovakriste kunena ove na okutwikila okuninga shike?
9 Pefimbo loudjuu unene tau uya oo tau ka xula po puHarmagedon, Kristus ota ka lwifa owii aushe. Ndele itashi ka kala sha pumbiwa ovashikuli vaye va lwe, nokuli ngaashi kwa li inashi pumbiwa kovakalimo vouhamba waJuda womapata avali omido omayovi da pita. Oita oya li yaJehova nokwa li a yandja efindano. Ehokololo otali lesha tali ti: “Omwene okwa tula ovanhu va ninge ekukwila konima yovana vaAmmon novaMoab novovanhu vokeemhunda daSeir, ava ve uya okulwifa Ovajuda, ndele va tewa po. Shaashi ovana vaAmmon novaMoab va hovela okulwifa ovanhu vokeemhunda daSeir, ve va hanaune po noku va mana po, ndele eshi va mana po ovanhu vokeemhunda daSeir, ove lipilukila mokulidipaa. [NOvajuda] eshi ve uya monhele omo va dula okutala ombuwa, ndele eshi va tala ongudu, va mona oimhu ya nangala pedu, ndele kapa li nande umwe a xupa po.”—2 Omafimbo 20:22-24.
10 Osha li naanaa ngaashi Jehova a xunganeka ta ti: “Hanye tamu ka lwa.” (2 Omafimbo 20:17) Osho osha tulila po Ovakriste oshihopaenenwa ve shi shikule eshi Jesus Kristus ta i “a ka findane.” Pokati opo, otava twikile okulwifa owii, hanoilwifo yo vene, ndele onoilwifo yopamhepo. Kungaha, otava ‘dulu owii nouwa.’—Ovaroma 6:13; 12:17-21; 13:12; 2 Ovakorinto 10:3-5.
Oolyelye tava ka wilika eponokelo laGog?
11. (a) Eengudu dopanhu dilipi Gog ta ka longifa okuwanifa po eponokelo laye? (b) Oshike sha kwatelwa mo mokukala oupafi pamhepo?
11 Gog yaMagog okwa hololwa e li Satana Ondiaboli monghalo yaye ya shunduka okudja mo 1914. E li oshishitwa shopamhepo, ita dulu okuwanifa po eponokelo laye sha yukilila, ndelenee ota ka longifa eengudu dopanhu di longe oilonga yaye. Eengudu dopanhu odo otadi ka kala dilipi? Ombibeli itai tu pe ouyelele wokondadalunde, ndele otai tu pe omauliko onhumba oo taa dulu oku tu kwafela tu koneke kutya otadi ka kala dilipi. Eshi oiningwanima younyuni tai ningwa mokuwanifa omaxunganeko Ombibeli, ohatu ka mona kanini nakanini efano la yela nawa. Oshiwana shaJehova ohashi henuka okutengeneka ndele ohashi kala oupafi pamhepo, shi shii filufilu oiningwanima yopapolotika noyopamalongelokalunga oyo tai tu kumwe nomutungilo womawanifo omaxunganeko Ombibeli.
12, 13. Omuprofeti Daniel okwa xunganeka ngahelipi eponokelo laxuuninwa okuponokela oshiwana shaKalunga?
12 Omuprofeti Daniel okwa yandja ouyelele shi na sha neponokelo laxuuninwa lokuponokela oshiwana shaKalunga, eshi a shanga ta ti: “Yo [ohamba yokolundume] otai ka fikama nehandu linene [i] hanaune po nokuyapulila enyonauko ovanhu vahapu. Ndele yo otai ka dika otenta youhamba wayo pokati kefuta nomhunda iyapuki yotembeli.”—Daniel 11:44, 45.
13 Pefimbo lOmbibeli, ‘efuta’ ola li Efuta Linene ile Efuta lopokati nosho yo ‘omhunda iyapuki’ oya li Sion, oyo Jehova a ti: “Ame tuu ou nda nangeka ohamba yange muSion komhunda yange iyapuki.” (Epsalme 2:6; Josua 1:4) Kungaha, meityo lopamhepo, edu li li “pokati kefuta nomhunda iyapuki” otali faneke oshilongo shopamhepo sha hepuluka shOvakriste ovavaekwa. Inava shiivika vali ve li oshitukulwa shefuta lovanhu ovo ve liteeka ko kuKalunga, ndele ova teelela oku ka pangela pamwe naKristus Jesus mOuhamba womeulu. Osha yela kutya ovapiya vaKalunga ovavaekwa pamwe noovakwao ovadiinini vongudu inene, otava ka kala oshihakanwa shohamba yokolundume eshi tai ka ponokela neponokelo layo lonyanya mokuwanifa po exunganeko laDaniel.—Jesaja 57:20; Ovaheberi 12:22; Ehololo 14:1.
Ovapiya vaKalunga otave ke linyenga ngahelipi?
14. Oinima itatu ilipi oshiwana shaKalunga tashi ka ninga ngeenge sha ponokelwa?
14 Ovapiya vaKalunga otava ka teelelwa va ninge shike ngeenge ova ponokelwa? Natango, elinyengo loshiwana shaKalunga shonale pefimbo laJosafat otali yandje oshihopaenenwa. Didilika kutya ovakalimo vasho ova li va lombwelwa va ninge oinima itatu: (1) va fikame, (2) va kale ve li ofika, nosho yo (3) va tale nhumbi Jehova te va xupifa. Ongahelipi oshiwana shaKalunga kunena tashi katuka metwokumwe neendjovo odo?—2 Omafimbo 20:17.
15. Otashi ti ngahelipi koshiwana shaJehova okufikama?
15 Va fikame: Nope he na okutengauka, oshiwana shaKalunga otashi ka twikila okudiinina onghatu yasho yokuyambidida Ouhamba waKalunga. Otashi ka twikila okudiinina onghatu yasho yokuhenombinga kwopaKriste. Otashi ka kala ‘sha pama, itashi tengauka’ moilonga yasho youdiinini yokulongela Jehova notashi ka twikila okufimanekifa Jehova moipafi omolwouwanghenda waye. (1 Ovakorinto 15:58; Epsalme 118:28, 29) Omafininiko opaife ile omonakwiiwa itaa dulu oku va efifa onghatu yokuhokiwa kuKalunga.
16. Omonghedi ilipi ovapiya vaJehova tava ka kala ve li ofika?
16 Va kale ve li ofika: Ovapiya vaJehova itava ka kendabala okulixupifa vo vene, ndele otava ka tula elineekelo lavo alishe muJehova. Oye ashike ta dulu okuxupifa ovapiya vaye medongakano lounyuni, nokwa udaneka oku shi ninga. (Jesaja 43:10, 11; 54:15; Omaimbilokemo 3:26) Okulineekela muJehova otaku ka kwatela mo okulineekela oupitilo u wetike kunena oo a kala ta longifa oule womido omilongo okuwanifa omalalakano aye. Shi dulife nale, Ovakriste vashili otava ka kala va pumbwa okutula elineekelo lavo movalongelikalunga vakwao ovo va nangekwa po kuJehova nosho yo kOhamba yaye tai pangele, va kwatele komesho. Ovalumenhu ovo ovadiinini otava ka wilika oshiwana shaKalunga. Okulipwililikila ewiliko lavo otashi dulu okweeta oshiponga shinene.—Mateus 24:45-47; Ovaheberi 13:7, 17.
17. Omolwashike ovapiya vaKalunga ovadiinini tava ka mona nhumbi Jehova te va xupifa?
17 Va tale nhumbi Jehova te va xupifa: Exupifo otali ka kala ondjabi yaaveshe ovo tava diinine onghatu yavo youdiinini wopaKriste nove lineekela muJehova omolwexupifo. Fiyo ovili yaxuuninwa—nosho yo fiyo opopo tava dulu—otava ka shiivifa euyo lefiku letokolo laJehova. Eshito alishe oli na okushiiva kutya Jehova oye Kalunga kashili nosho yo kutya oku na ovapiya ovadiinini kombada yedu. Itapa ka kala vali omhumbwe yomhata ya lepalifwa i na sha noufemba wounamapangelo waJehova.—Hesekiel 33:33; 36:23.
18, 19. (a) Ongahelipi eimbilo lefindano olo li li muExodus etukulwa eti-15 tali ulike nghee omaliudo aavo tava ka xupa meponokelo laGog taa ka kala? (b) Oshike sha wapala okuningwa koshiwana shaKalunga paife?
18 Neenghono da pepalekwa, oshiwana shaKalunga otashi ka ya mounyuni mupe, shi na ehalo okwiimba eimbilo lefindano, nokuli ngaashi Ovaisrael vonale va ningile konima yokumangululwa kwavo okupitila mEfuta Litilyana. Omolwolupandu laalushe okupandula Jehova molweameno laye, pauhandimwe nosho yo ve li ongudu, otava ka hopaenena eendjovo donale, tadi ti: “Ame nda hala okwiimbila efimano [laJehova], osheshi Ye omufimanekwa pombada. [Jehova] Ye omukwanyati. Edina laye [Jehova]. . . . Eke loye lokolulyo, akutu [Jehova], lo tali teyaula omutondadi. Nomepangelonghono loye ove to denge poshi ovatondi voye; Ove to pitifa mo oupyuhandu woye; wo tau va lungwinifa ngaashi omwiidi. . . . Ndele mouwanghenda woye ove wa endifa oshiwana shoye we shi kulila; neenghono doye we va fikifa konhele yoye iyapuki. . . . Ove to va fikifa ndee to va twike medu leemhunda lefyuululo loye, konhele, Ove [Jehova] we i lilongekidila, Ove u kalelele mo, kotembeli, omake oye a tunga, Omwene. [Jehova] ta ka kala nokupangela fiyo alushe fiyo ndongolondongo.”—Exodus 15:1-19, yelekanifa OB-1954.
19 Paife, eshi ve na etimaumbwile lomwenyo waalushe la twa shi dulife nale, kali fi tuu efimbo liwa kovapiya vaKalunga okuulika eliyandjo lavo kuJehova nokupepaleka etokolotoko lavo loku mu longela e li Ohamba yavo yaalushe!—1 Omafimbo 29:11-13.
Oto dulu okuyelifa?
• Omolwashike eponokelo laGog tali ningwa okuponokela ovavaekwa nosho yo eedi dimwe?
• Ongahelipi oshiwana shaKalunga tashi ka fikama?
• Osha hala okutya ngahelipi okukala ofika?
• Ongahelipi oshiwana shaKalunga tashi ka mona nhumbi te shi xupifa?
[Efano pepandja 28]
Jehova okwa pa Josafat nosho yo oshiwana shaye efindano, noka va li va pumbwa okulwa
[Efano pepandja 30]
Ovavaekwa nosho yo eedi dimwe otadi kufa ombinga mokuyambidida ounamapangelo waJehova
[Efano pepandja 31]
Ngaashi Ovaisrael vonale, oshiwana shaKalunga mafiku otashi ka imba eimbilo lefindano