‘Hafela Jehova’

“[Hafela] Omwene, ndee Ye te ku pe, eshi sha wapalela omutima woye.”—EPSALME 37:4.

1, 2. Olyelye e li Odjo yelao lashili, nongahelipi ohamba David ya yukifa elitulemo koushili oo?

“OVANELAO [ovovo va shiiva omhumbwe yavo yopamhepo, NW], . . . ovanelao ovananghenda, . . . ovanelao ovanambili.” Pamwe nomautumbulilo makwao ahamano aavo ve li ovanelao, omatumbulo oo oku li etwalemo la tongomana lEudifo lokOmhunda laJesus olo la shiivika apeshe, olo la shangwa komushangi wEvangeli Mateus. (Mateus 5:3-11) Eendjovo daJesus otadi yandje eshilipaleko kutya ohatu dulu okumona elao.

² Eimbilo liyapuki olo la shangwa kohamba David yaIsrael shonale otali yukifa elitulemo kOdjo yelao lashili, Jehova. David okwa ti: “[Hafela] Omwene, ndee Ye te ku pe, eshi sha wapalela omutima woye.” (Epsalme 37:4) Ndele oshike tashi dulu okuninga okushiiva Jehova nosho yo okushiiva omaukwatya aye mahapu ‘kuhafifa’? Ongahelipi okukonakona osho a ninga nosho yo osho ta ka ninga mokuwanifa po elalakano laye tashi ku pe etimaumbwile lokumona “eshi sha wapalela omutima woye”? Okukonakona moule Epsalme 37, ovelishe 1 fiyo 11, otaku yandje omanyamukulo.

“Ino va ningila ondubo”

3, 4. Ngaashi sha shangwa mEpsalme 37:1, omayele elipi David ta yandje, nomolwashike okupwilikina kuo sha wapala kunena?

³ Otu li ‘momafimbo madjuu,’ noukolokoshi owa hapupala. Otwa mona ewanifo leendjovo domuyapostoli Paulus odo tadi ti: “Ovanhu [vai] novakengeleledi otava ka ehena komesho mowii nokupukifa nokupuka.” (2 Timoteus 3:1, 13) Oshipu okukumwa kwaasho tashi monika sha fa omupondo nehepuluko lovakolokoshi. Aishe oyo otai dulu oku tu piyaaneka sha hala okutya tai twikifa okumona ko kwetu kwopamhepo. Didilika nghee eendjovo doketameko dEpsalme 37 tadi tu londwele koshiponga osho tashi dulu okuningwa po, tadi ti: “Ino handuka nande molwovanawii, novanyonauni ino va ningila ondubo.”

⁴ Oikundaneki younyuni otai tu shiivifile omauyelele e na sha noilonga i he li pauyuki efiku keshe. Ovanangeshefa ve he li pauyuki otava ningi oinima nope he na okuhandukilwa. Omolwokulihola mwene, ovalongi vominyonena otava nyokoma ovo inava amenwa. Ovadipai ihava monika va kwatwe ile ihava handukilwa. Oihopaenenwa aishe oyo yokupengifa ouyuki otai dulu oku tu handukifa nokupiyaaneka ombili yetu yopamadiladilo. Okupondola oko ovakolokoshi va fa tava mono otaku dulu nokuli oku tu twifa ondubo. Ndele mbela okuhanduka kwetu otaku ka xwepopaleka onghalo? Mbela okutwila ondubo omauwa oo a fa taa hafelwa kovakolokoshi otaku lundulula oilanduliko oyo tava ka mona? Ahowe, hasho nandenande! Noinatu pumbwa nande ‘okuhanduka.’ Omolwashike mbela?

5. Omolwashike ovakolokoshi va faafanifwa nomwiidi?

⁵ Omupsalme ota nyamukula ta ti: “Vo ve li ngaashi omwiidi, ou u he kwete kukukuta, otava lembe ngaashi oimeno italala.” (Epsalme 37:2) Omwiidi mupe wa twima otau dulu okumonika muwa, ndele diva eehoni otadi lembe ndele tadi fi. Osho osha faafana novakolokoshi. Okukala kwavo va fa va hepuluka itaku kalelele. Ngeenge va fi, oinima oyo ve limonena shi he li pauyuki ihai va kwafele. Keshe umwe xuuninwa ota mono oshilanduliko shi li pauyuki. Paulus okwa shanga ta ti: “Ondjabi youlunde oyo efyo.” (Ovaroma 6:23) Ovakolokoshi nosho yo aveshe ovo ve he fi ovayuki xuuninwa otava ka mona “ondjabi” yavo ndele opuwo. Kaku fi tuu okukalamwenyo ku he na ondjabi yasha!—Epsalme 37:35, 36; 49:17, 18.

6. Oshilihongomwa shilipi hatu dulu okulihonga mEpsalme 37:1, 2?

⁶ Ndele mbela otu na okweefa ehepuluko lopakafimbo lovakolokoshi li tu piyaaneke? Oshilihongomwa osho hatu lihongo meevelishe mbali dotete dEpsalme 37 osho: Ino efa okupondola kwavo ku ku efife onghatu oyo wa katuka yokulongela Jehova. Ponhele yaasho, yandja elitulemo loye komanangeko noupuna nomalalakano opamhepo.—Omayeletumbulo 23:17.

“Lineekela Omwene, u longe ouwa”

7. Omolwashike tu na okulineekela Jehova?

⁷ Omupsalme okwe tu ladipika ta ti: “Lineekela Omwene, u longe ouwa.” (Epsalme 37:3a) Ngeenge twa wililwa po koisho ile nokuli komalimbililo, otwa pumbwa okulineekela Jehova filufilu. Oye ta yandje eameno lopamhepo filufilu. Moses okwa shanga ta ti: “Ou e li omutumba meameno laau wOkombadambada, [ota] kala momudidimbe wOmunaenghono adishe.” (Epsalme 91:1) Ngeenge hatu piyaanekwa kehapupalo lokuhenamhango olo li li monghalelo ei yoinima, otwa pumbwa okulineekela Jehova unene. Ngeenge tu na omando ya fonghoka, ohatu kala twa hafa ngeenge kaume te tu yambidida. Sha faafana, ngeenge ohatu kendabala okweenda moudiinini, otwa pumbwa ekwafo laJehova.—Jesaja 50:10.

8. Ongahelipi okukufa ombinga moukalele wopaKriste taku tu kwafele tu henuke okukala unene hatu piyaanekwa kokuhepuluka kwovakolokoshi?

⁸ Ekandulepo limwe lokuhapiyaanekwa kokuhepuluka kwovakolokoshi olo okukala twe lipyakidila nokukonga ovo va fa eedi noku va kwafela va mone eshiivo lashili lokushiiva omalalakano aJehova. Eshi twa taalela ehapupalo loukolokoshi, otwa pumbwa okukala twe lipyakidila filufilu nokukwafela vamwe. Omuyapostoli Paulus okwa ti: “Inamu dimbwa okulonga ouwa nokutukula muayo mu i kwete, osheshi omayambo a tya ngaha Kalunga e a hokwa.” “Ouwa” munenenene oo hatu dulu okulonga oo okulombwela vamwe onghundana iwa ikumwifi yOuhamba waKalunga. Okuudifa kwetu moipafi oku li shili “omahambeleloyambo.”—Ovaheberi 13:15, 16; Ovagalati 6:10.

9. Yelifa ekumaido laDavid li na sha ‘nokukala moshilongo.’

⁹ David okwa twikila ko ta ti: “Kala moshilongo, u diinine oshili!” (Epsalme 37:3b) ‘Oshilongo’ shopefimbo laDavid osha li oshitukulwa osho Jehova kwa li a pa Ovaisrael, Edu lEudaneko. Pefimbo lepangelo laSalomo, eengaba dasho oda li da hanga kuDan kolundume fiyo okuBerseba kolukadi. Omo omo mwa kala Ovaisrael. (1 Eehamba 4:25) Kunena, keshe apa tu li kombada yedu, otwa teelela efimbo olo eshi edu alishe tali ka ninga oparadisa mounyuni mupe wouyuki. Lwopokati opo, otu li meameno lopamhepo.—Jesaja 65:13, 14.

10. Ohatu ka mona oshidjemo shilipi ngeenge ohatu “diinine oshili”?

¹⁰ Oshike tashi ka kala oshidjemo ngeenge ohatu “diinine oshili”? Eyeletumbulo la nwefwa mo otali tu dimbulukifa tali ti: “Omulumenhu e shii kulineekelwa ta nangekwa noupuna shili.” (Omayeletumbulo 28:20) Oudiinini wetu mokuudifa onghundana iwa keshe opo tu li nosho yo kukeshe umwe ngaashi hatu dulu otau dulu okweetifa shili ondjabi tai di kuJehova. Pashihopaenenwa, Frank nomukainhu waye Rose, ova ya moukokolindjila omido 40 da pita modoolopa kolundume laSkotolanda. Ovanhu vanini ovo va li ve na ohokwe moshili oko ova li va twalwatwalwa. Va tokola toko, ovalihomboli ovo ovakokolindjila ova tameka oilonga yavo yokuudifa nokuninga ovanhu ovahongwa. Modoolopa omo paife omu na eongalo tali xumu komesho. Oudiinini wovalihomboli ovo owa nangekwa noupuna shili kuJehova. Frank ota hokolola nelininipiko ta ti: “Enangeko noupuna linene ololo ashike kutya natango otu li moshili nohatu longifwa kuJehova.” Heeno, ngeenge ohatu “diinine oshili” ohatu mono nokupandula omanangeko noupuna mahapu.

‘Hafela Jehova’

11, 12. (a) Ongahelipi hatu dulu ‘okuhafela’ Jehova? (b) Elalakano lilipi to dulu okutula po shi na sha nekonakono lopaumwene noshidjemo otashi dulika shi kale shilipi?

¹¹ Opo tu pameke ekwatafano letu naJehova nosho yo okudiinina oku mu lineekela, otu na ‘oku mu hafela.’ (Epsalme 37:4a) Ongahelipi hatu dulu oku shi ninga? Ponhele yokukala twa pwila meenghalo detu nonande otashi dulika di kale didjuu, ohatu yandje elitulemo letu kuJehova. Onghedi imwe omo hatu dulu oku shi ninga oyo okulongifa efimbo tu leshe Eendjovo daye. (Epsalme 1:1, 2) Mbela okulesha kwoye Ombibeli ohaku ku etele ehafo? Otaku ke ku etela ehafo ngeenge oto lesha nelalakano lokulihonga shihapu shi na sha naJehova. Omolwashike ito mwena po konima yokulesha oshitukulwa shonhumba ndele to lipula kutya: ‘Oshitukulwa eshi otashi hongo nge shike kombinga yaJehova?’ Oto ka mona tashi kwafa okukala u na okambo koididilikwa ile ombapila yokushanga ngeenge to lesha Ombibeli. Efimbo keshe to kanghama po u dilonge kutya osho wa lesha osha hala okutya shike, shanga oitwa oyo tai ku dimbulukifa amwe omomaukwatya aKalunga ahokwifa. Mepsalme limwe, David okwa imba ta ti: “Eendjovo domokanya kange nomadilongo omomutima wange nae ku wapalele, Omwene, emanya lange nOmukulili wange.” (Epsalme 19:14) Elitulemo neenghono letu mEendjovo daKalunga ola ‘wapalela’ Jehova nolihafifa kufye.

¹² Ongahelipi hatu dulu okumona ehafo mokukonakona nomokudilonga? Ohatu dulu oku shi ninga elalakano letu tu lihonge shihapu ngaashi hatu dulu shi na sha naJehova nosho yo eendjila daye. Oishangomwa ngaashi Omuntu omunenenene ngoka a li ko nale nosho yo Draw Close to Jehovaha otai tu pe ouyelele muhapu oo hatu dulu okudilonga nolupandu. David okwa shilipaleka yo ovayuki kutya Jehova ‘ote ke va pa eshi sha wapalela omutima wavo.’ (Epsalme 37:4b) Elineekelo la tya ngaho olo le linyengifa omuyapostoli Johannes opo a shange eendjovo edi tadi ti: “Elineekelo eli letu tu li na muye oleli: ngenge hatu mu indile sha pahalo laye, ote tu udu. Hano ngenge tu shi shii nokutya, Ye ote tu udu keshe tuu eshi hatu shi indile, otu shi shii yo, aishe oyo twe i mu indila, ohatu i pewa.”—1 Johannes 5:14, 15.

13. Momido opo da di ko, etamunukemo lilipi loilonga yokuudifa Ouhamba la didilikwa moilongo ihapu?

¹³ Tu li ovakanyateli voudiinini, ehafo letu linenenene olo okumona eyukipalifo lounamapangelo waJehova. (Omayeletumbulo 27:11) Mbela omitima detu kadi yadi ehafo eshi twa uda oilonga inene yokuudifa oyo tai longwa kovamwatate moilongo oyo kwa li tai pangelwa kookanyamukulwa? Otwa teelela nehafo okumona kutya emanguluko lilipi natango tali ke uya po fimbo exulilo longhalelo ei inali uya. Vahapu vomovapiya vaJehova ovo ve li moilongo oyo yokouninginino ohava udifile noudiinini ovalihongi, eenhauki nosho yo ovanhu ovo hava kala efimbo lixupi koilongo oyo notava hafele emanguluko lokulongela Kalunga. Oshi li ehalo letu la mana mo kutya ngeenge oohandimwe ovo tava shuna komaumbo avo, otava ka twikila okweefa ouyelele woshili u minikile nokuli nomomilaulu odo tadi monika da fa da kwata moiti.—Mateus 5:14-16.

“Ondjila yoye i tula meke lOmwene”

14. Euliko lilipi li li po kutya ohatu dulu okulineekela Jehova?

¹⁴ Kali fi tuu epepelelwo okushiiva kutya oisho yetu nosho yo osho tashi monika sha fa tashi tu findile poshi unene otai dulu okukufwa po! Ngahelipi mbela? David ota ti: “Ondjila yoye i tula meke lOmwene, u mu lineekele; Oye note shi ningi.” (Epsalme 37:5) Meongalo letu otu na euliko lihapu kutya ohatu dulu okulineekela Jehova omolwekwafo. (Epsalme 55:23) Ovo ve li moukalele wefimbo liyadi, kutya nee ovakokolindjila, ovapashukili ovaendi, ovatumwa ile ovaliyambi ovo tava longo koBetel, otava dulu okuyandja oumbangi kutya efiloshisho laJehova oli shii okulineekelwa. Omolwashike ito popi navamwe ovo u shii ndele to va pula nghee Jehova e va kwafela? Nope he na omalimbililo oto ka uda oimoniwa ihapu tai ulike kutya nokuli nomomafimbo madjuu, eke laJehova lokukwafela ihali xupipala nande. Oha yandje alushe oipumbiwa yonghalamwenyo.—Epsalme 37:25; Mateus 6:25-34.

15. Ouyuki woshiwana shaKalunga otau minikile ngahelipi?

¹⁵ Ngeenge ohatu ningi Jehova omulineekelwa wetu noku mu lineekela filufilu, ohatu dulu okumona oushili weendjovo domupsalme da shikula ko tadi ti: “Ta ka holola ouyuki woye ngaashi ouyelele, neyukifilo loye ongaashi omutenya.” (Epsalme 37:6) Tu li Eendombwedi daJehova, luhapu ohatu hepaululwa panghedi ya penga. Ndele Jehova oha pashula omesho ovanamitima da yuka opo e va kwafele va mone kutya oukalele wetu womoipafi ohau linyengifwa kohole yokuhola Jehova nosho yo ovanhu vakwetu. Ndele nande elihumbato letu la yuka ohali hepaululwa panghedi ya penga kuvahapu, itali dulu okuholekwa. Jehova ohe tu kwafele okupita momapataneko nomayeleko aeshe. Oshidjemo, ouyuki woshiwana shaKalunga otau minikile ngaashi etango mokati komutenya.—1 Petrus 2:12.

‘Limwenenena nokuteelela’

16, 17. Metwokumwe nEpsalme 37:7, paife olo efimbo lashike, nomolwashike?

¹⁶ Eendjovo domupsalme da landula ko otadi ti: “[Limwenenena Omwene, OB-1954] u mu teelele; ino mbilingwa molwou, ondjila yaye i nomholo, nomolwomulumenhu ta wanifa oumbudi waye.” (Epsalme 37:7) Apa David ota divilike omhumbwe yokuteelela Jehova nelidiiniko a katuke onghatu. Nonande exulilo longhalelo ei inali uya natango, osho itashi tu nyematifa. Mbela inatu mona kutya onghenda nelidiiniko laJehova oi dule kokule osho kwa li hatu diladila tete? Mbela itatu dulu okuulika paife kutya nafye ohatu teelele nelidiiniko eshi twe lipyakidila nokuudifa onghundana iwa fimbo exulilo inali uya? (Markus 13:10) Paife olo efimbo lokuhenuka okuninga oinima momhulukuta oko taku dulu oku tu kanififa ehafo letu nosho yo eameno letu lopamhepo. Paife olo efimbo lokukondjifa enwefemo la nyonauka lounyuni waSatana shi dulife nale. Nopaife olo efimbo lokudiinina oukoshoki wopaenghedi ndele inatu tula nande moshiponga onghatu yetu i li pauyuki oyo tu na naJehova. Natu twikile okweefa omadiladilo a nyata nokuhenuka eenghatu inadi yuka shi na sha naavo voukashike kookanhu wa yooloka ko kuwetu ile nokuli ovo voukashike kookanhu wa fa wetu.—Ovakolossi 3:5.

¹⁷ David okwe tu pa omayele taa ti: “Efa ehandu, u dje mo monya. Ino mbilingwa; opo u ha longe owii. Osheshi ovaningi vowii otava ka kombololwa po, ndelenee ava tava teelele Omwene, otava ka nangala oshilongo.” (Epsalme 37:8, 9) Heeno, ohatu dulu okuteelela nelineekelo efimbo olo li li poduka, eshi Jehova ta ka kufa ko enyonauko alishe kombada yedu nosho yo ovo have li eta.

“Ngenge pa pita okafimbo kaningholi”

18, 19. Etwomukumo lilipi wa mona mEpsalme 37:10?

¹⁸ “Ngenge pa pita okafimbo kaningholi, omuhenakalunga ita kala po vali, nonganga to talaatala onhele yaye, ke po vali nande.” (Epsalme 37:10) Eendjovo odo itadi tu tu tuu omukumo eshi hatu ehene pexulilo longhalelo ei nosho yo exulilo lokumanguluka ko kuJehova kwa nyika oshiponga! Kutya nee epangelo loludi lilipi la totwa po kovanhu, otali ka dopa. Nopaife otu li popepi nefimbo lokushuna kokupangelwa kuKalunga, outeokratika washili, Ouhamba waJehova momake aJesus Kristus. Ouhamba waKalunga otau ka pangela filufilu ounyuni aushe nokukufa po aveshe ovo tave u pataneke.—Daniel 2:44.

¹⁹ Mounyuni mupe koshi yOuhamba waKalunga, nande ou va konge, ku na nande apa to ka dula okuhanga “omuhenakalunga.” Doshili, keshe oo ta ka tukululila Jehova oshibofa ota ka kombwa po diva. Kape na oo ta ponokele ounamapangelo waye ile oo ta ka anya okudulika keenghonopangelo dopakalunga ta ka kala po. Ovanhu vakweni otava ka kala ve ku fa pamadiladilo ve na ehalo lokuhafifa Jehova. Itashi ka eta tuu eameno—itapa ka kala omakumba, omivelo doitenda, itapa ka kala nande osho tashi ka nyona po elineekelo nelao alishe!—Jesaja 65:20; Mika 4:4; 2 Petrus 3:13.

20, 21. (a) Oolyelye ve li “ovananheni” ovo va tongwa mEpsalme 37:11, nopeni hava mono “ombili inene”? (b) Omanangeko noupuna elipi hatu ka mona ngeenge ohatu hopaenene David Munene?

²⁰ Opo nee “ovananheni vo otava ka fyuulula edu.” (Epsalme 37:11a) Ndele mbela oolyelye ve li “ovananheni”? Oshitya osho sha tolokwa ‘onheni’ osha dja koshitya shopefina tashi ti “hepeka, lininipikifa, lyatela pedu.” Heeno, “ovananheni” ovovo va teelela nelininipiko Jehova a kufe po okuhenouyuki akushe oko taku va hepeke. “[Otava] ka hafela ombili inene.” (Epsalme 37:11b) Nokuli nopaife ohatu mono ombili inene moparadisa yopamhepo oyo i niwe keongalo lashili lopaKriste.

²¹ Nonande inatu mangululwa natango komahepeko, ohatu kwafelafana nokuhekeleka ovo va polimana. Oshidjemo, ewaneneno lashili lomomutima ohali xumifwa komesho mokati koshiwana shaJehova. Ovamwatate ovo va nangekwa po ve li ovafita otava yakula nohole omolweemhumbwe detu dopamhepo—nokuli omafimbo amwe neemhumbwe detu dopalutu—tave tu kwafele tu lididimikile okuhepekelwa ouyuki. (1 Ovatessaloniki 2:7, 11; 1 Petrus 5:2, 3) Ombili oyo kai fi tuu emona li na ondilo! Otu na yo eteelelo lomwenyo waalushe mOparadisa yombili i li popepi. Onghee hano, natu hopaeneneni David Munene, Kristus Jesus, oo ouladi waye omolwaJehova we mu linyengifa e mu longele noudiinini fiyo exulilo. (1 Petrus 2:21) Mokuninga ngaho, ohatu ka twikila okukala nelao, hatu tange oo twa hafela, Jehova Kalunga ketu.

[Omashangelo opedu]

Oto dulu okunyamukula?

• Oilihongomwa ilipi we lihonga mEpsalme 37:1, 2?

• Ongahelipi to dulu ‘okuhafela’ Jehova?

• Euliko lilipi li li po kutya ohatu dulu okulineekela Jehova?

[Efano pepandja 23]

“Lineekela Omwene, u longe ouwa”

[Efano pepandja 25]

“Ovananheni vo otava ka fyuulula edu”