Natu hopaeneneni Jesus mokuudifa nouladi
‘Otwa li tu na ouladi oku mu udifila evangeli.’ — 1 TES. 2:2.
1. Omolwashike onghundana iwa yOuhamba ihafifa neenghono?
IHASHI kala tuu shihafifa okuuda onghundana iwa! Onghundana iwa kuhe na vali oyo onghundana iwa yOuhamba waKalunga. Onghundana oyo iwa otai tu shilipaleke kutya okumona oixuna, omikifi, oluhodi nosho yo efyo otai ka xula po. Otai tu kwafele yo tu kale tu na eteelelo lomwenyo waalushe, otai tu hololele omalalakano aKalunga notai tu kwafele tu kale tu na ekwatafano lopofingo naKalunga. Nopehe na omalimbililo, otashi dulika to diladila kutya ovanhu aveshe otava ka kala va hafa okuuda onghundana oyo Jesus a li a udifila ovanhu. Ndele shinyikifa oluhodi, havanhu aveshe hava kala va hala okupwilikina konghundana oyo.
2. Jesus okwa li a hala okutya shike eshi a ti kutya: ‘Ame onde uya okweeta etukauko’?
2 Jesus okwa li a lombwela ovahongwa vaye a ti: “Inamu tya, Ame nde uya ndi ete ombili kombada yedu, inandi uya okweeta ombili, ndelenee eongamukonda. Osheshi Ame nde uya okweeta ondubo [“etukauko,” NW] pokati komumati naxe, nokakadona naina, noshitenya omukainhu nainamweno. Ndele novaneumbo vomunhu mwene otava ningi ovatondi vaye.” (Mat. 10:34-36) Ovanhu vahapu ihava tambula ko onghundana iwa. Vamwe ove tonde ovo hava udifa onghundana iwa, nokuli novapambele vavo vopopepi.
3. Otwa pumbwa shike opo tu wanife po oilonga yetu yokuudifa?
3 Ngaashi Jesus, nafye ohatu udifa oshili, ndele ovanhu vahapu kunena navo ohave linyenge ngaashi ovanhu vopefimbo laJesus. Ashike osho osho twa teelela shi ningwe, molwaashi Jesus okwa li a lombwela ovahongwa vaye a ti: “Omupiya ke dule Omwene waye. Ngenge va taata nge, otave mu taata yo.” (Joh. 15:20) Moilongo ihapu ihatu hepekwa naanaa, ndele ohatu shekwa notu tondike. Onghee hano, otwa pumbwa eitavelo nosho yo ouladi opo tu lididimike moilonga yetu yokuudifa onghundana iwa. — Lesha 2 Petrus 1:5-8.
4. Omolwashike Paulus a li a pumbwa ‘ouladi’ opo a udife?
4 Omafimbo amwe otashi dulika u kale u udite shidjuu okukufa ombinga moukalele, ile ombinga imwe youkalele i kale ya fa itilifa. Ngeenge osho ngaho, haave auke ho kala u udite ngaho. Omuyapostoli Paulus okwa li ha udifa nouladi nokuhenoumbada nokwa li e na eudeko lihapu loshili, ndele omafimbo amwe okwa li ha mono shidjuu okuudifa. Paulus okwa li a shangela Ovakriste vokuTessalonika a ti: “Nande twa hangelwe opo twa hepekwa muFilippi ndele twa langaulwa, ngaashi mu shi shii, otwa li tu nouladi muKalunga oku mu udifila evangeli laKalunga omolwoodi linene.” (1 Tes. 2:2) Ovakwanepangelo vomuFilippi ova li va denga Paulus nomweendi pamwe naye Silas neeshokoto, ndele tave va idilile modolongo noku va tula meti. (Oil. 16:16-24) Ndele nande ongaho, Paulus naSilas ova li va twikila okuudifa “nouladi.” Mbela ongahelipi hatu dulu okuhopaenena Paulus naSilas? Opo tu mone enyamukulo, natu ka taleni kutya oshike sha li sha kwafela ovapiya vaKalunga vopefimbo lOmbibeli va popye nouladi oshili kombinga yaJehova, nohatu ke lihonga nghee hatu dulu okuhopaenena oshihopaenenwa shavo.
Ovapiya vaKalunga vopefimbo olo la tetekela Oukriste ova li va pumbwa ouladi ve lididimikile outondwe
5. Omolwashike ovapiya vaJehova ovadiinini hava kala alushe va pumbwa ouladi?
5 Jesus Kristus okwa tula po oshihopaenenwa sha denga mbada shokukala neyombamo nosho yo ouladi. Okudja pehovelo londjokonona yovanhu, ovapiya vaJehova aveshe ovadiinini ova li va pumbwa alushe okukala ve na ouladi. Omolwashike mbela? Konima younashibofa muEden, Jehova okwa li a xunganeka kutya otapa ka kala outondwe pokati kaavo tave mu longele naavo tava longele Satana. (Gen. 3:15) Outondwe wa tya ngaho owa li we limonikila diva eshi omulumenhu omuyuki Abel a li a dipawa komumwaxe. Konima yaasho, omulumenhu omudiinini Henok oo a li ko komesho yEyelu okwa li yo e tondike. Henok okwa li a xunganeka kutya Kalunga okwa li te ke uya pamwe novayapuki vaYe omayovi omilongo opo va hanaune po ovahenakalunga. (Jud. 14, 15) Ovanhu vahapu kava li va hokwa etumwalaka olo. Ova li ve tonde Henok notashi dulika ngeno ove mu dipaa ngeno Jehova ke mu kofifile mefyo. Henok kali tuu a ulika ouladi! — Gen. 5:21-24.
6. Omolwashike Moses a li a pumbwa ouladi opo a ka popye naFarao?
6 Diladila shi na sha nouladi oo Moses a li a ulika eshi a li ta popi naFarao. Farao okwa li omupangeli oo a li a talika ko kutya ke lile po ashike oikalunga, ndele naye mwene okwa li oshikalunga, omona woshikalunga shetango shedina Ra. Farao otashi dulika a li ha ilikana efano laye mwene, ngaashi ashike ooFarao vakwao. Okwa li ha pange, omunaenghono, e na ounhwa, e na ondudi noka li a ika okulombwelwa kuvamwe osho e na okuninga. Moses oo a li omufita woimuna omulininipiki okwa li ha ka popya lwoikando naFarao, nonande ka li a shivwa noina tambulwa ko. Moses okwa li a xunganeka kombinga yashike? Okwa li a xunganeka shi na sha nomahandukilo. Mbela okwa li a pula a ningilwe shike? Okwa li a pula Farao epitikilo opo a lekele ovapika omamiliyona va dje mo moshilongo. Mbela Moses okwa li a pumbwa ouladi? Heeno, okwa li e u pumbwa. — Num. 12:3; Heb. 11:27
7, 8. (a) Omayeleko elipi a hangele ovadiinini vopefimbo lonale? (b) Oshike sha li sha kwafela ovadiinini vopefimbo olo la tetekela Oukriste va ulike ouladi wokupopila nokuxumifa komesho elongelokalunga la koshoka?
7 Momukokomoko womafelemido oo a tetekela efimbo lOukriste, ovaprofeti nosho yo ovapiya vaKalunga vakwao ovadiinini ova li va twikila okupopila nouladi elongelokalunga la koshoka. Ounyuni waSatana kawa li u va hole. Paulus okwa ti: “[Ova] dipawa nomamanya, va shaahwa nokutetwa, va hepekwa nai, va dipawa nomaongamukonda. Va tembauka nova djala oikafa yeedi noyoikombo; va fya oluhepo, va fininikwa nova monifwa oixuna.” (Heb. 11:37) Oshike sha li sha kwafela ovapiya vaKalunga ovo ovadiinini va kale va pama? Paulus okwa popya meevelishe dimwe dopehovelo dOvaheberi 11 kutya oshike sha li sha pameka Abel, Abraham, Sara nosho yo vakwao vamwe opo va dule okulididimika. Okwa ti: “Inava mona eshi sha udanekwa, ndelenee ove shi tala ashike kokule nokwiitavela, nove shi kunda.” (Heb. 11:13) Nopehe na omalimbililo, ovaprofeti ngaashi Elia, Jeremia nosho yo ovadiinini vakwao vopefimbo olo la tetekela Oukriste, ovo va li va popila nouladi elongelokalunga lashili, ova li ve lididimika molwaashi ova li ve na elineekelo kutya omaudaneko aJehova otaa ka wanifwa. — Tit. 1:2.
8 Ovadiinini ovo vopefimbo la tetekela Oukriste ova li ve na eteelelo la twa nolihafifa li na sha nonakwiiwa. Shimha va nyumunwa, otava ka fika mewaneneno mokweendela ko kwefimbo notava ka “mangululwa moupika wenyonauko” okupitila moilonga yomupristeri Kristus Jesus nosho yo yovapristeri vaye 144 000. (Rom. 8:21) Jeremia nosho yo ovapiya vaKalunga vakwao ovadiinini vopefimbo lonale ova li ve na ouladi molwaashi Kalunga okwa li e va shilipaleka okupitila meudaneko olo a li a udanekela Jeremia a ti: “Vo otave ke ku lwifa, ndelenee itave ku dulu nande, osheshi Ame ondi li puove nohandi ku xupifa, Omwene osho ta ti.” (Jer. 1:19) Kunena, nafye ohatu ka kala twa pama ngeenge otwa kaleke momadiladilo omaudaneko aKalunga e na sha nonakwiiwa nosho yo eshilipaleko laye li na sha noku tu amena pamhepo. — Omayel. 2:7; Lesha 2 Ovakorinto 4:17, 18.
Ohole oya li ye linyengifa Jesus a udife nouladi
9, 10. Ongahelipi Jesus a li a ulika ouladi moipafi (a) yovawiliki vomalongelokalunga, (b) yongudu yovakwaita, (c) yomupristeri omukulunhu, (d) yaPilatus?
9 Omuhopaenenwa wetu Jesus okwa li a ulika ouladi meenghedi di lili noku lili. Pashihopaenenwa, nonande Jesus okwa li e tondike kwaavo va li ve na eenghonopangelo, ka li a haula etumwalaka olo Kalunga a li a hala ovanhu va shiive. Jesus okwa li a nyaneka pomutenya ovawiliki vomalongelokalunga ovanaenghono nokuhenoumbada omolwoikala yavo yokulishii ouyuki nomolwomahongo avo oipupulu. Jesus okwa li a popya monghedi ya yela noya yukilila eshi a li ta tokola ovalumenhu ovo. Pomhito imwe okwa li e va ula a ti: “Woo nye, ovanongo vomishangwa novafarisai, ovanaihelele nye, omwa fa eembila da kolongwa, da wapala okutalwa kombada, ndele meni lado omu yadi omakipa ovafi nonyata aishe! Osho nanye yo moipafi yovanhu mwa fa ovayuki, ndele meni omu yadi oihelele nomatauluko omhango.” — Mat. 23:27, 28.
10 Eshi Jesus a li a hangwa moshikunino shaGetsemane kongudu yovakwaita okwa li a ulika ouladi mokuliholola ye mwene. (Joh. 18:3-8) Konima yefimbo, Jesus okwa li a twalwa komesho yOmhangu yopombada yOvajuda nokupulwaapulwa komupristeri omukulunhu. Nonande Jesus okwa li e shii kutya omupristeri omukulunhu okwa li ta kongo omatomheno oku mu dipaifa, Jesus okwa li a koleka nokuhenoumbada kutya oye Kristus Omona waKalunga. Jesus okwa li yo a popya kutya otave ke mu mona “e li omutumba kolulyo lEenghono, ndee te uya ta ende moilemo yeulu.” (Mark. 14:53, 57-65) Okafimbo kaxupi konima yaasho, Jesus okwa li a mangwa nokutwalwa koshipala shaPilatus, oo a li ta dulu oku mu mangulula. Ndele Jesus ka li a nyamukula eshi a li ta lundilwa. (Mark. 15:1-5) Ashishe osho osha li tashi pula ouladi wa xwama.
11. Ouladi owa pambafana ngahelipi nohole?
11 Jesus okwa li a lombwela Pilatus a ti: “Onghee nda dalwa nde uya mounyuni ou, ndi [hepaulule] oshili.” (Joh. 18:37) Jehova okwa li a tuma Jesus opo a udife onghundana iwa, na Jesus okwa li a hafela okuudifa onghundana iwa molwaashi oku hole Xe womeulu. (Luk. 4:18, 19) Jesus okwa li yo e hole ovanhu nokwa li e shii kutya eemwenyo davo oda li monghuwo i na onghambe. Ngaashi Jesus, nafye ohatu udifa onghundana iwa nouladi notuhe na oumbada, molwaashi otu hole Jehova neenghono nosho yo ovanhu vakwetu. — Mat. 22:36-40.
Omhepo iyapuki ohai tu pameke tu udife nouladi
12. Oshike sha li sha etela ovahongwa vonale ehafo?
12 Oivike yonhumba konima yefyo laJesus, ovahongwa vaye ova li va hafa eshi Jehova a li a weda mo ovahongwa vape mokati kavo. Mefiku ashike limwe, ovanhu 3000 lwaapo, Ovajuda nosho yo ovo ve lidilululifwa va ninge veitavelo lOshijuda va dja koilongo ihapu, ovo va li ve uya okudana Opentekoste muJerusalem, ova li va ninginifwa. Ovanhu aveshe vomuJerusalem ova li tava popi kombinga yoshiningwanima osho. Ombibeli oya ti: “Eemwenyo daaveshe da hangika ketilo, novayapostoli va longa oinyengandunge noilongadidiliko.” — Oil. 2:41, 43.
13. Omolwashike ovamwatate va li va ilikana va pewe ouladi, naasho osha li sha etifa oidjemo ilipi?
13 Ovawiliki vomalongelokalunga ova li va handuka neenghono ndele tava kwata po Petrus naJohannes noku va idilila modolongo oufiku aushe, nova li ve va lombwela vaha popye vali kombinga yaJesus. Eshi va mangululwa, ova li va hokololela ovamwatate osho sha li sha ningwa po nova li va ilikana aveshe omolwomapataneko oo va li va shakeneka, va ti: ‘Omwene, pa ovapiya voye okupopya nouladi aushe eendjovo doye.’ Mbela osho osha li sha etifa oidjemo ilipi? Ombibeli oya ti: “Aveshe ova yadifwa Omhepo Iyapuki, ndele va popya nouladi Eendjovo daKalunga.” — Oil. 4:24-31.
14. Omhepo iyapuki ohai tu kwafele ngahelipi moilonga yetu yokuudifa?
14 Omhepo iyapuki yaJehova oyo ya li ya pameka ovahongwa va popye Eendjovo daye nouladi. Ouladi oo tu na wokuudifila vamwe oshili, nokuli naavo ve li omhinge netumwalaka letu, otwe u pewa kuJehova. Jehova ote ke tu pa omhepo yaye iyapuki ngeenge otwe mu indile ei tu pe. Kekwafo laJehova, ohatu ka kala tu na ouladi oo tau ke tu kwafela tu lididimike ngeenge hatu patanekwa. — Lesha Epsalme 138:3.
Ovakriste ohava udifa nouladi kunena
15. Oshili ohai tukaula ovanhu ngahelipi kunena?
15 Ngaashi mefimbo lonale, oshili otai twikile okutukaula ovanhu kunena. Ovanhu vamwe ohava tambula ko oshili nehafo, ofimbo vamwe ihave i tambula ko noinava fimaneka onghedi yetu yokulongela Kalunga. Ngaashi Jesus a li a xunganeka, vamwe ohave tu kembaula noku tu sheka, navamwe ove tu tonde nokuli. (Mat. 10:22) Omafimbo amwe ohatu popilwa mowii nohatu lundilwa omalundilo anyanyalifi okupitila moikundaneki. (Eps. 109:1-3) Ndele nande ongaho, oshiwana shaJehova otashi udifa nouladi onghundana iwa mounyuni aushe.
16. Oshimoniwa shilipi tashi ulike kutya ouladi otau dulu okulundulula etaleko laavo hatu udifile?
16 Ouladi wetu otau dulu okulundulula etaleko lavamwe li na sha netumwalaka lOuhamba. Omumwameme umwe wokuKyrgyzstan okwa ti: “Fimbo nda li moilonga yokuudifa, omuneumbo umwe okwa li a lombwela nge a ti: ‘Onda itavela muKalunga, ndele hamuKalunga kOvakriste. Ngeenge owe uya po vali pomuvelo wange apa, ohandi ku shiikile ombwa yange.’ Konima yaye okwa li ombwa ya kula i li melyenge. Ndele pefimbo loshikonga shokuyandja okafo Onghundana yOuhamba Onomola 37, ke na oshipalanyole, ‘Omalongelokalunga oipupulu oku li pokuxulifwa po!,’ onda li nda tokola okushuna ko keumbo lomulumenhu oo ndi ka tale ngeenge ohandi hange ko oilyo imwe youkwaneumbo waye. Ndele omulumenhu oye tuu oo oye a li e uya okuyeulula nge. Onda li nda ilikana kuJehova diva, ndele handi ti: ‘Wa lele po tate, ohandi dimbuluka eshi twa li hatu kundafana naave omafiku atatu a pita, nohandi dimbuluka yo ombwa yoye. Onda pita po ndi ku pe okafo aka, molwaashi naame onda itavela ashike Kalunga kashili umwe ngaashi ove. Mafiku Kalunga ota ka hanauna po omalongelokalunga oo ihae mu fimaneke. Oto ke lihonga shihapu kombinga yaasho ngeenge owa lesha okafo aka.’ Onda li nda kumwa eshi omulumenhu oo a tambula ko okafo Onghundana yOuhamba. Opo nee onda ya keumbo la landula ko. Konima ashike yominute dinini, omulumenhu oo okwa li e uya kwaame ta tondoka e kwete okafo kaye, ndele ta ti: ‘Onde ka lesha. Ondi na okuninga po shike opo ndiha ka hanaunwe po kuKalunga?’ ” Okudja opo, omulumenhu oo okwa hovela okukonakona Ombibeli nokukala ha i kokwoongala kwopaKriste.
17. Ongahelipi ouladi womumwameme umwe wa li wa kwafela omukonakonimbibeli umwe oo a li e na oumbada wokutila ovanhu?
17 Ouladi wetu otau dulu okukwafela vamwe va kale yo ve na ouladi. Omumwameme umwe wokuRusia okwa li a yandja oshifo komunhu umwe oo va li naye mobesa. Fimbo a li ta yandje oshifo, omulumenhu umwe okwa nuka mo moshipundi shaye ndele ta nyekula ko oshifo komumwameme, ndele te shi tonyo noku shi kupula poshi. Omulumenhu oo okwa li a ingida mokule ta tuku omumwameme ndele te mu kondjifa e mu pe ondjukifi yaye noku mu londwela kutya ina udifa mo vali momukunda omo. Omumwameme oo okwa li a ilikana kuJehova e mu kwafele nokwa li a dimbuluka eendjovo daJesus odo tadi ti: “Inamu tila ava tava dipaa olutu.” (Mat. 10:28) Omumwameme oo okwa li a fikama ndele ta popi nengungumano ta lombwele omulumenhu oo ta ti: “Itandi ku pe ondjukifi yange, nohandi ka twikila okuudifa momukunda omu.” Opo nee omumwameme oo okwa li a yeluka mo mobesa, ndele ka li e shii kutya mobesa omo omwa li yo omukonakonimbibeli waye. Omukonakonimbibeli oo ka li ha i kokwoongala kwopaKriste, molwaashi okwa li e na oumbada wokutila ovanhu. Konima eshi a li a mona ouladi womumwameme oo, okwa li a tokola okukala ha i kokwoongala.
18. Oshike tashi ke tu kwafela tu udife nouladi ngaashi Jesus?
18 Ngaashi Jesus, otwa pumbwa okukala tu na ouladi opo tu dule okuudifa mounyuni ou wovanhu va tukauka ko kuKalunga. Oshike tashi dulu oku tu kwafela opo tu udife nouladi? Otu na okukala tu na etimaumbwile li na sha nonakwiiwa. Otu na okukala tu hole Jehova neenghono nosho yo ovanhu vakwetu. Otu na okwiilikana kuJehova e tu pe ouladi. Otu na yo okudimbuluka alushe kutya itatu longo ofye atuke molwaashi Jesus oku li pamwe nafye. (Mat. 28:20) Omhepo iyapuki otai ke tu kwafela, na Jehova ote ke tu nangeka noupuna note ke tu yambidida. Onghee hano, ohatu dulu okupopya nouladi, hatu ti: “Omwene Oye omukwafi wange, ame ihandi tila; omunhu ota dulu okuninga nge shike?” — Heb. 13:6.
Oto nyamukula ngahelipi?
• Omolwashike ovapiya vaKalunga va pumbwa ouladi?
• Oshike hatu lihongo shi na sha nouladi kovapiya vaKalunga ovadiinini ovo va li ko pefimbo olo la tetekela Oukriste?
• Oshike hatu lihongo kuJesus Kristus shi na sha nouladi?
• Oshike hatu lihongo kOvakriste vonale shi na sha nouladi?
• Oshike hatu lihongo kOvakriste vakwetu kunena shi na sha nouladi?
[Efano pepandja 23]
Jesus okwa li a nyaneka pomutenya ovawiliki vomalongelokalunga oipupulu nokuhenoumbada
[Efano pepandja 25]
Jehova ohe tu pe ouladi opo tu dule okuudifa