Kala u na oikala yopamadiladilo ya fa yaKristus
“Kaleni mu na oikala yopamadiladilo ya fa yaKristus Jesus mokati keni.” — ROM. 15:5, NW.
1. Omolwashike tu na okukala tu na oikala yopamadiladilo ya fa yaKristus?
JESUS KRISTUS okwa ti: ‘Ileni kuame, nye mu lilonge kuame, osheshi Aame omunambili momutima onde lininipika; ndee tamu limonene eemwenyo deni etulumuko.’ (Mat. 11:28, 29) Eshivo olo otali holola nawa oikala yopahole yaJesus yopamadiladilo. Kape na omunhu ta dulu oku tu tulila po oshihopaenenwa shiwa tu shi shikule ngaashi Jesus. Nonande Jesus Omona waKalunga noku na eenghono, okwa li a udila ovanhu oukwao wananghali nolukeno, unene tuu ovo va li tava mono oixuna.
2. Ohatu ka konakona omaukwatya aJesus elipi?
2 Moshitukulwa eshi nosho yo ikwao ivali tai landula ko, ohatu ka kundafana nghee hatu dulu okukulika oikala ‘yopamadiladilo ya fa yaKristus’ noku i hopaenena monghalamwenyo yetu. (1 Kor. 2:16) Ohatu ka konakona omaukwatya aJesus aa taa landula apa: Ombili nelininipiko, olune, okudulika kuKalunga, ouladi nosho yo ohole i na oudiinini.
Lihonga okukala omunambili ngaashi Kristus
3. (a) Oshilihongomwa shelininipiko shimwe shilipi Jesus a li a honga ovahongwa vaye? (b) Jesus okwa li e linyenga ngahelipi eshi ovahongwa vaye va li va ulika kutya ove na ounghundi?
3 Jesus, Omona waKalunga a wanenena, okwa li e uya kombada yedu nehalo liwa opo a longe mokati kovanhu inava wanenena novalunde. Vamwe vomovanhu ovo lwanima ova li tave ke mu dipaa. Ndele nande ongaho, Jesus okwa kala alushe e na ehafo nosho yo elipangelo. (1 Pet. 2:21-23) ‘Okutala’ koshihopaenenwa shaJesus otaku ke tu kwafela tu kale twa hafa notu na elipangelo ngeenge hatu ungaunga nokuhawanenena kwavamwe nosho yo ngeenge va nyona kufye. (Heb. 12:2) Jesus okwa li a shiva ovahongwa vaye ve litwike ondjoko yaye nove lihonge kuye. (Mat. 11:29) Mbela oshike va li tava dulu okulihonga kuye? Oshinima shimwe osho va li tava dulu okulihonga kuJesus oshosho kutya okwa li omunambili nokwa li ha ungaunga novahongwa vaye nelidiiniko nonande ova li hava ningi omapuko. Oufiku oo wa tetekela efyo laye, Jesus okwa li a kosha eemhadi dovahongwa vaye, opo e va honge oshilihongomwa shokukala ‘nomutima we lininipika’ osho va li itava ka dimbwa nandenande. (Lesha Johannes 13:14-17.) Konima yefimbo, eshi Petrus, Jakob naJohannes va li va dopa “okukala oupafi,” Jesus okwa li e va udila oukwao wananghali nokwa dimina ounghundi wavo. Jesus okwa li a pula a ti: ‘Simon, owa kofa? Kaleni oupafi, nye mu ilikane, mu ha hangike komayeleko, heeno, omhepo oya hala, ndelenee ombelela oi na oungone.’ — Mark. 14:32-38.
4, 5. Ongahelipi oshihopaenenwa shaJesus tashi dulu oku tu kwafela tu ungaunge nomaunghundi avamwe?
4 Mbela ohatu ke linyenga ngahelipi ngeenge ope na omumwatate ile omumwameme umwe oo e na omhepo yefiyafanepo, ha handuka diva ile iha tambula ko diva omayele oo ta pewa kovakulunhuongalo ile ‘komupiya omudiinini nomunaendunge’? (Mat. 24:45-47) Otashi dulika tu mone shipu okutambula ko nokudimina po ovanhu vomounyuni ngeenge tava ulike omaukwatya okuhawanenena, ndele otashi dulika tu mone shidjuu okutambula ko omaunghundi ovamwatate noku va dimina po. Ngeenge omaunghundi avamwe ohae tu handukifa noupu, otwa pumbwa okulipula kutya: ‘Mbela ongahelipi handi dulu okuhopaenena “omadiladilo aKristus”?’ Otu na alushe okudimbuluka kutya Jesus ka li ha handukile ovahongwa vaye, nokuli nopeemhito odo va li va ulika ounghundi wonhumba wopamhepo.
5 Natu ka tale kwaasho sha li sha ningilwa omuyapostoli Petrus. Eshi Jesus a li a lombwela Petrus a dje mo mowato a ende kombada yomeva a yuka kuye, Petrus okwa li e shi ninga oule wokafimbo. Opo nee eshi Petrus a mona oshikungulu shomhepo okwa hovela okuningina. Mbela Jesus okwa li a handukila Petrus ndele te mu ula kutya: “Owe shi likongela, lihonga oshilihongomwa”? Hasho nandenande! ‘Jesus okwa nana diva eke laye nokwe mu kwata ndele ta ti kuye: Omunaitavelo linini ove, oshike wa limbililwa?’ (Mat. 14:28-31) Mbela ngeenge hatu ungaunga nomumwatate wonhumba oo tashi dulika ehe na eitavelo la kola, ohatu dulu ngoo okunana eke letu lopafaneko noku mu kwafela a kale e na eitavelo la kola? Onghedi omo Jesus a li a ungaunga naPetrus nombili otai tu hongo kutya nafye osho tu na okukala hatu ungaunga navamwe ngaho.
6. Jesus okwa li a honga shike ovayapostoli vaye shi na sha nokulalakanena efimano?
6 Petrus okwa li yo ha kufa ombinga meemhata odo ovayapostoli va kala hava tu kutya olyelye munene mokati kavo. Jakob naJohannes ova li va hala oku ka kala omutumba pamwe naJesus mOuhamba waye, umwe okolumosho naumwe okolulyo. Eshi Petrus novayapostoli vakwao ve shi uda, ova li va handuka neenghono. Jesus okwa li e shii kutya ovayapostoli vaye oshi na oupu va nwefwa mo koikala yovanhu vomomudingonoko omo va putukila. Jesus okwa li e va ifana kuye, ndele ta ti: “Onye omu shi shii, ovapangeli voiwana ohave i pangele, novanaenghono ohava longifa eenghono davo kuyo. Ndelenee hasho shi kale mokati keni, ndelenee ou womunye a hala a ninge munene mokati keni, ye na kale omuyakuli weni.” Opo nee okwa li e va lombwela kombinga yoshihopaenenwa shaye, a ti: “Ongaashi nOmona wOmunhu ine uya okuyakulwa, ndele okuyakula nokuyandja omwenyo waye u ninge oikulila yavahapu.” — Mat. 20:20-28.
7. Ongahelipi keshe umwe womufye ta dulu okuxumifa komesho oukumwe meongalo?
7 Okuhopaenena oikala yelininipiko yaJesus yopamadiladilo otaku dulu oku tu kwafela tu ‘kale vanini’ mokati kovamwatate. (Luk. 9:46-48) Okuninga ngaho otaku ka xumifa komesho oukumwe. Jehova, e li ngaashi xe youkwaneumbo munene, okwa hala ovana vaye ‘va kale kumwe nombili,’ sha hala okutya, va kale hava longele kumwe. (Eps. 133:1) Jesus okwa li a ilikana kuXe shi na sha nOvakriste vashili aveshe va kale moukumwe, opo ‘ounyuni u kale u shii kutya Oye e mu tuma nonokutya oku va hole, ngaashi Xe e mu hole.’ (Joh. 17:23) Onghee hano, ngeenge otwa kala tu li moukumwe otashi ke tu didilikifa kutya fye ovashikuli vaKristus. Ndele opo tu hafele oukumwe oo, otu na okukala hatu tale ko omaunghundi avamwe ngaashi Kristus he a tale ko. Jesus okwa li ha dimine po vamwe, nokwe tu honga kutya ohatu ka diminwa po ashike ngeenge otwa kala hatu dimine po vamwe. — Lesha Mateus 6:14, 15.
8. Oshike hatu dulu okulihonga moshihopaenenwa shovapiya vaKalunga ovo ve mu longela efimbo lile?
8 Ohatu dulu yo okulihonga shihapu mokuhopaenena eitavelo laavo va kala tava hopaenene oshihopaenenwa shaKristus oule womido dihapu. Ngaashi Jesus, ovapiya vaKalunga ovo luhapu ohava kenukile vakwao omolwokuhawanenena kwavo. Ove lihonga kutya okukala nolukeno ngaashi Kristus ohaku tu kwafele tu “humbate oungone waava inava pama” nohaku xumifa komesho oukumwe. Kakele kaasho, ohashi ladipike yo eongalo alishe li hopaenene oikala yopamadiladilo yaKristus. Ovapiya vaKalunga ovo ova hala ovamwaxe navo va kale ve na oikala yopamadiladilo ya fa yaKristus, ngaashi omuyapostoli Paulus a li a halela Ovakriste vokuRoma eshi a ti: “Kalunga kelididimiko nokehekeleko ne mu kwafe mu kale hamu udafana pamadiladilo aKristus Jesus, opo mu hambelele Kalunga, Xe yOmwene wetu Jesus Kristus.” (Rom. 15:1, 5, 6) Okulongela Jehova twa hangana otaku mu fimanekifa.
9. Omolwashike twa pumbwa omhepo iyapuki opo tu shikule oshihopaenenwa shaJesus?
9 Jesus okwa li a kwatakanifa okukala ‘nomutima we lininipika’ noukwatya wombili, oyo i li oshitukulwa shoshiimati shomhepo iyapuki yaKalunga. Onghee hano, eshi hatu lihongo kombinga yoshihopaenenwa shaJesus otwa pumbwa omhepo iyapuki yaJehova, opo tu dule okushikula oshihopaenenwa shaye nawanawa. Otu na okwiilikana kuKalunga e tu pe omhepo yaye iyapuki notu na okukendabala tu imike omaukwatya oo e li oshitukulwa shoshiimati shayo ngaashi, “ohole, ehafo, ombili, onheni, [olune, NW], ouwa, oudiinini, engungumano, elididimiko.” (Gal. 5:22) Kungaho, ohatu ka hafifa Tate yetu womeulu, Jehova, ngeenge otwa shikula oshihopaenenwa shaJesus shokukala ovalininipiki novanambili.
Jesus okwa li ha ungaunga navamwe nolune
10. Jesus okwa li a ulika ngahelipi olune?
10 Olune nalo oli li yo oshitukulwa shoshiimati shomhepo iyapuki. Jesus okwa li ha ungaunga alushe navamwe nolune. Keshe oo a li te mu kongo nomutima aushe okwa li he mu “tambula ko nomutima aushe omolwolune laye.” (Lesha Lukas 9:11, NW.) Mbela oshike hatu dulu okulihonga monghedi omo Jesus a li a ulika olune? Omunhu oo e na olune oha kala e na omhepo youkaume, onghedi iwa, ha udile vamwe oukwao wananghali noku na onghenda. Jesus okwa li e na omaukwatya a tya ngaho. Okwa li ha udile ovanhu onghenda ‘molwaashi ova li va hepekwa, nova loloka va fa eedi dihe na omufita.’ — Mat. 9:35, 36.
11, 12. (a) Hokolola oshiningwanima shimwe osho tashi ulike kutya Jesus oku na onghenda. (b) Oshike hatu dulu okulihonga moshihopaenenwa osho?
11 Jesus ka li ashike ha udile ovanhu onghenda ndele okwa li yo ha ningi ngaashi ta dulu opo e va kwafele. Natu ka tale koshihopaenenwa shimwe. Opa li omukainhu umwe oo a kala ta vele oudu wetiko lohonde oule womido 12. Omukainhu oo okwa li e shii kutya paMhango yaMoses, onghalo yaye oya li ye mu ningifa a kale ina koshoka nosho yo ovanhu ovo tave mu kumu. (Lev. 15:25-27) Molwaashi Jesus okwa li a shiivika kutya oku na omaukwatya mawa noha ungaunga nawa novanhu, omukainhu oo okwa li a tomwa a itavele kutya Jesus ota dulu oku mu velula. Omukainhu oo okwa kala te lipopile ta ti: “Shimha tuu nda [kumu] koshikutu shaye ohandi veluka.” Nonande osha li she mu pula ouladi, okwe shi ninga ndele diva okwa li e udite a veluka.
12 Jesus okwa li a didilika kutya ope na umwe oo e mu kuma, nokwa li a talaatala opo a mone kutya olyelye. Omukainhu oo tashi dulika a li a tila kutya ota hanyenwa molwaashi a nyona Omhango, okwa li a twa eengolo peemhadi daJesus ta kakama noku mu lombwela oshili. Mbela Jesus okwa li a hanyena omukainhu oo a li ta hepekwa koudu? Hasho nandenande! Ponhele yaasho, Jesus okwa li a shilipaleka omukainhu oo a ti: “Omumwangekadona, eitavelo loye ole ku velula. Inda nombili.” (Mark. 5:25-34) Omukainhu oo ka li tuu a hekelekwa eshi a uda eendjovo donghenda da tya ngaho!
13. (a) Oikala yaJesus oya li ya yooloka ko ngahelipi kwaayo yOvafarisai? (b) Jesus okwa li ha ungaunga ngahelipi nounona?
13 Kristus ka li ha longifa eenghonopangelo daye mokuwedela komitengi davamwe ngaashi Ovafarisai ovanamitima dikukutu va li hava ningi. (Mat. 23:4) Mepingafano naasho, Jesus okwa li ha hongo ovanhu kombinga yeendjila daJehova, te shi ningi nonghenda nonelidiiniko. Jesus okwa li kaume kashili kovashikuli vaye nokwa li ha ungaunga alushe navo nonghenda nonohole. (Omayel. 17:17, NW; Joh. 15:11-15) Ounona navo ova li hava kala va manguluka ngeenge ve li naJesus, nosha yela kutya naye okwa li ha kala a manguluka ngeenge e li navo. Ka li ha kala e udite kutya okwe lipyakidila unene noke na efimbo lokupopya nounona. Pomhito imwe, ovahongwa vaye ovo va li natango ve na oikala yokukala ve wete va fimana ngaashi ovawiliki vomalongelokalunga vomomudingonoko wavo, ova li tava kendabala okukelela ovanhu ovo va li tava eta ounona kuJesus e va kume. Jesus ka li a panda eshi ovahongwa vaye va li tava kelele ovanhu va ete ounona kuye. Onghee hano, okwa li e va lombwela a ti: “Efeni ounona ve uye kuame nye inamu va kelela ko, osheshi ouhamba waKalunga owaava ve li ngaashi ava.” Opo nee, Jesus okwa li a kufa okaana opo a honge ovahongwa vaye oshilihongomwa sha fimanenena, a ti: “Oshili ohandi mu lombwele: Ou ita tambula ouhamba waKalunga ngaashi okaana, ita i mo muwo.” — Mark. 10:13-15.
14. Ounona ohava mono ouwa ulipi ngeenge ova kala ve niwe ko nasha navo shili?
14 Diladila pauxupi nghee ounona vamwe vomwaavo va li tava ka kala ve udite konima yomido donhumba ngeenge ova ningi ovakulunhu, eshi tava ka dimbuluka kutya Jesus Kristus okwa li he ‘va ukata momake aye, ndele te va nangeke noupuna.’ (Mark. 10:16) Nokunena ounona otava ka kala va hafa ngeenge va kulu eshi tava diladila kombinga yovakulunhuongalo nosho yo vamwe ovo va li hava ulike kutya ove na ko nasha navo shili. Ndele osho sha fimanenena oshosho kutya, ounona ovo hava kala ve niwe ko nasha navo shili meongalo fimbo vanini, ohave lihongo kutya omhepo yaJehova oi li mokati koshiwana shaye.
Kala u na olune mounyuni ou wovanhu vehe na olune
15. Omolwashike tuhe na okukala twa kumwa eshi ovanhu vahapu ihava ulike olune kunena?
15 Ovanhu vahapu kunena ihava ulikile vamwe olune. Nomolwaasho oshiwana shaJehova hashi ungaungwa nasho nai efiku keshe keefikola, koilonga, momalweendo nosho yo ngeenge shi li moukalele. Ngeenge twa ungaungwa nafye nai otashi dulika tu ude nai, ndele katu na okukala twa kumwa kwaasho. Jehova okwa li a nwefa mo Paulus a londwele Ovakriste vashili komesho yefimbo kutya ‘momafiku aa axuuninwa’ madjuu otava ka kala va dingililwa kovanhu ovo ve ‘lihole vo vene novehe na ohole.’ — 2 Tim. 3:1-3.
16. Ongahelipi hatu dulu okuulika olune meongalo ngaashi Kristus?
16 Mepingafano nounyuni oo we tu dingilila wovanhu vehe na olune, ohatu dulu okuhafela eendafano tali tulumukifa meongalo lashili lopaKriste. Atusheni ohatu dulu okudana onghandangala mokuxumifa komesho eendafano la tya ngaho ngeenge otwa hopaenene Jesus. Mbela osho ohatu dulu oku shi ninga ngahelipi? Vahapu meongalo ova pumbwa okukwafelwa nokutuwa omukumo molwaashi ove na oupyakadi wokuhenoukolele ile ve li meenghalo dikwao vali didjuu. ‘Momafiku aa axuuninwa,’ omaupyakadi a tya ngaho otashi dulika a hapupale, ndele nande ongaho, kemape. Pefimbo lOmbibeli, Ovakriste navo ova li va hangwa komaupyakadi a faafana. Ngaashi Ovakriste vonale va li hava kwafelafana, nafye otwa pumbwa okukala hatu kwafelafana. Pashihopaenenwa, Paulus okwa li a kumaida Ovakriste vakwao a ti: “[Popyeni nehekeleko neemwenyo da polimana, NW], yakuleni oingone, aveshe va taleni onheni.” (1 Tes. 5:14) Osho osha kwatela mo okukala hatu ulike olune ngaashi Kristus.
17, 18. Omeenghedi dimwe dilipi hatu dulu okuhopaenena olune laJesus?
17 Ovakriste ove na oshinakuwanifwa ‘shokutambula ko ovamwaxe nolune’ nokuungaunga navo monghedi omo ngeno Jesus ta ungaunga navo, tava ulike kutya ove na ko nasha shili naavo va kala ve shii oule womido nosho yo ovo inava shakeneka nale. (3 Joh. 5-8) Ngaashi Jesus a li he linyengifwa konghenda a kwafele vamwe, nafye osho tu na okuninga ngaho, mokukala alushe hatu tulumukifa vamwe. — Jes. 32:2; Mat. 11:28-30.
18 Atusheni ohatu dulu okuulikila vamwe olune moku va ningila sha osho tashi ulike kutya otu na ko nasha nouwa wavo. Otu na okukonga eemhito nokuninga eenghendabala da mana mo opo tu va kwafele. Paulus okwa ladipika Ovakriste a ti: “Mokuhola ovamwaxo filafaneni olukeno, mokufimanekafana pafaneni oshihopaelelwa.” (Rom. 12:10) Osho osha hala okutya, otu na okushikula oshihopaenenwa shaKristus mokukala hatu ungaunga navamwe nohamu nonolune, nokulihonga okuulika ‘ohole yashili ihe neliningifo.’ (2 Kor. 6:6) Paulus okwa yelifa shi na sha nohole oyo ya fa yaKristus a ti: “Ohole i noutalanheni, ohole i nolukeno; ohole ihai fi efupa, ihai litange, ihai fulalala.” (1 Kor. 13:4) Ponhele yokukwatela ovamwatate novamwameme onghone, natu dulikeni komayele aa taa ti: “Kalafaneni mu noukaume nokufilafana onghenda nokudiminafana po omatimba, ngaashi Kalunga e mu dimina po muKristus.” — Ef. 4:32.
19. Okuulika olune la fa laKristus ohaku eta oidjemo iwa ilipi?
19 Ngeenge otwa kendabala okukulika nokuulika olune la fa laKristus efimbo keshe nomonghalo keshe, otashi ke tu etela omanangeko noupuna mahapu. Omhepo yaJehova otai ka dula okulonga meongalo ya manguluka, notai ka kwafela keshe umwe a imike omaukwatya oshiimati shomhepo. Kakele kaasho, ngeenge otwa shikula oshihopaenenwa shaJesus osho e tu fiila nokukwafela vamwe va ninge sha faafana, okulongela Kalunga kwetu twa hangana notwa hafa otaku ke mu hafifa. Onghee hano, natu kendabale alushe okuhopaenena Jesus mokukala hatu ungaunga navamwe nombili nonolune.
Oto dulu okuyelifa?
• Jesus okwa li a ulika ngahelipi kutya ‘omunambili momutima nokwe lininipika’?
• Jesus okwa li ha ulike olune ngahelipi?
• Omeenghedi dimwe dilipi hatu dulu okukala ovanambili notu na olune ngaashi Kristus mounyuni ou inau wanenena?
[Efano pepandja 11]
Ngeenge ope na omumwatate oo e na eitavelo tali tengauka ngaashi laPetrus, mbela ohatu ke mu kwafela ngoo?
[Efano pepandja 13]
Oshike to dulu okuninga po opo u kale ho ulike olune meongalo?