Otu shi shii ngahelipi kutya Kalunga oku na ko nasha nafye shili?
OVANHU ova kala tave lipula oule womafelemido kombinga yepulo eli la fimana kutya: Ngeenge Kalunga oku tu hole, omolwashike pe na okumona oixuna kuhapu? Otashi dulika to dimine kutya ngeenge ou hole omunhu wonhumba, iho kala wa hala omunhu a tya ngaho a mone oixuna, nongeenge okwa i moupyakadi wonhumba oto ka kendabala oku mu kwafela. Molwaashi ope na okumona oixuna kuhapu neenghono mounyuni, ovanhu vahapu otava diladila kutya Kalunga ke na ko nasha nafye. Onghee hano, osha fimana okukonakona tete oumbangi oo tau ulike kutya Kalunga oku tu hole shili nonokutya oku na ko nasha nafye.
Eshito otali yandje oumbangi kutya Kalunga oku na ohole
Jehova Kalunga oye a “shita eulu nedu nefuta nakeshe eshi shi li mo.” (Oilonga 4:24) Ngeenge otwa dilonga kwaasho Jehova a shita, otu na okufika pexulifodiladilo kutya oku na ko nasha nafye. Pashihopaenenwa, diladila kombinga yoinima oyo hai ku hafifa. Mbela iho hafele okulya oikulya iwa? Jehova okwa li ta dulu okushita ashike oludi limwe loikulya opo tu dule okukala nomwenyo. Ndele okwa shita oikulya yomaludi mahapumahapu opo tu hafele omilyo di lili noku lili. Natango, Jehova okwa feweka edu nomiti di lili noku lili dikumwifi, eengala nosho yo omitungilo dedu odo tadi ningifa onghalamwenyo i kale ihafifa noihokwifa kufye.
Diladila yo shi na sha nanghee twa shitwa. Otwa shitwa hatu dulu okuyola, okuhafela omusika nosho yo okuhafela ewapalo loinima, nonande oinima oyo inai pumbiwa lela opo tu kale nomwenyo. Ashike oinima oyo oi li eeshali da dja kuKalunga odo tadi ningifa onghalamwenyo i kale iwa. Diladila yo kombinga yekwatafano loye navamwe. Olyelye iha hafele eendafano lopahole nookaume vawa ile okupapatelwa kuumwe oo e hole neenghono? Osho osho shi li ngaho molwaashi oukwatya wetu wokudula okukala tu hole vamwe ou li oshali ya dja kuKalunga omunahole. Molwaashi Kalunga okwa shita ovanhu noukwatya wohole, osho otashi ulike kutya Kalunga ohole.
Ombibeli otai tu shilipaleke shi na sha nohole yaKalunga
Ombibeli otai tu lombwele kutya Kalunga oye ohole. (1 Johannes 4:8) Ohole yaye oi liwetikile meshito nosho yo mEendjovo daye Ombibeli. Pashihopaenenwa, Ombibeli otai yandje ewiliko li na sha nanghee ovanhu tava dulu okukala ve na oukolele, otai ladipike ovanhu va kale ve na ondjele moinima aishe notai londwele ovanhu shi na sha noukolwe nosho yo oufukenhu. — 1 Ovakorinto 6:9, 10.
Ombibeli otai yandje yo omayele opandunge e na sha nanghee hatu dulu okulongela kumwe novanhu vakwetu nosho yo nghee hatu dulu okuungaunga navamwe nefimaneko nosho yo nolune. (Mateus 7:12) Ombibeli oya tokola oinima oyo hai etifa okumona oixuna, ngaashi olwisho, olwaambo, ondubo, eteyohombo nosho yo okudipaa. Ngeenge keshe umwe okwa kendabala okutula moilonga omayele mawa oo taa hangwa mOmishangwa, mounyuni itamu ka kala okumona oixuna kuhapu.
Kalunga okwa ulika ohole yaye monghedi ya tongomana eshi a yandja Omona waye, Jesus, a kulile ovanhu. Johannes 3:16 okwa ti: “Osho Kalunga a kala e hole ounyuni, Oye a yandja Omona waye Ewifa, opo keshe ou te mu itavele a ha kane, ndelenee a kale e nomwenyo waalushe.” Onghee hano, Jehova okwa ninga nale elongekido li na sha nokuxulifa po filufilu efyo nokumona oixuna akushe. — 1 Johannes 3:8.
Ope na oumbangi muhapu oo tau ulike kutya Jehova oku tu hole. Onghee hano, osha yela kutya Kalunga ina hala okutala ovanhu tava mono oixuna. Ota ka katuka eenghatu opo a xulife po okumona oixuna, nomolwaasho inatu pumbwa okumbeleka kutya Kalunga ota ka xulifa po ngahelipi okumona oixuna molwaashi Ombibeli oya popya kondadalunde kutya ote ke shi ninga ngahelipi.
[Efano pepandja 4]
Oukwatya wokudula okuulika ohole oo oshali ya dja kuKalunga omunahole