Konakona eendjovo daKalunga

Kalunga oye lyelye?

Moshitukulwa eshi omu na omapulo oo tashi dulika ho kala to lipula kombinga yao nosha ulika kutya openi to dulu okuhanga omanyamukulo ao mOmbibeli yoye. Eendombwedi daJehova otadi ka kala da hafa okukundafana naave kombinga yomanyamukulo oo.

1. Kalunga oye lyelye?

Kalunga kashili oye Omushiti woinima aishe. Ombibeli otai ti kutya oye “Ohamba yaalushe,” sha hala okutya, oye aeke a kala ko alushe. (Ehololo 15:3, NW) Molwaashi Kalunga oye Odjo yomwenyo, oye aeke tu na okulongela. — Lesha Ehololo 4:11.

2. Kalunga okwa tya naanaa ngahelipi?

Kape na ou a mona Kalunga nandenande molwaashi Kalunga oye Omhepo, sha hala okutya, oku dule ovanhu kokule ovo a shitila kombada yedu. (Johannes 1:18; 4:24) Omaukwatya aKalunga ohae limonikila moinima oyo a shita. Pashihopaenenwa, ngeenge hatu diladila shi na sha nomitungilo doinima, omaludi oiimati e lili noku lili nosho yo eengala, otashi ke tu kwafela tu mone kutya Kalunga omunahole nomunongo. Ounene weshito ohau tu hololele kutya Kalunga oku na eenghono. — Lesha Ovaroma 1:20.

Kakele kaasho, ohatu tu dulu okulihonga shihapu shi na sha nomaukwatya aye okudja mOmbibeli. Pashihopaenenwa, otai tu lombwele osho Kalunga e hole naasho e tonde, nghee ha ungaunga novanhu nosho yo nghee he linyenge meenghalo di lili noku lili. — Lesha Epsalme 103:7-10.

3. Mbela Kalunga oku na edina?

Jesus okwa ti: “Tate yetu ou u li meulu! Edina loye nali yapulwe.” (Mateus 6:9) Nonande Kalunga oku na omadinafimaneko mahapu, oku na ashike edina limwe. Melaka keshe, ohali tumbulwa monghedi i lili. Pashihopaenenwa, mOshiwambo luhapu ohali tumbulwa taku ti “Jehova” ile omafimbo amwe “Yahweh.” — Lesha Exodus 15:3, OB-1954.

Edina laKalunga ola kufwa mo momatoloko Eembibeli dihapu nola pingenwa po nomadinafimaneko Omwene ile Kalunga. Ndele eshi Ombibeli ya li ya shangwa pehovelo, edina laKalunga ola li la holoka mo lwoikando i fike po 7 000 lwaapo. Jesus okwa li a shiivifila vamwe edina laKalunga, a li he li longifa ngeenge te va yelifile Eendjovo daKalunga. Kungaho, okwa li a kwafela ovanhu va shiive Kalunga. — Lesha Johannes 17:26.

4. Mbela Jehova oku na ko ngoo nasha nafye shili?

Jehova oha ulike kutya oku na ko nasha nafye eshi oye mwene ha pwilikine komailikano etu. (Epsalme 65:3) Ndele mbela eshi okumona oixuna kwa hapupala kunena otashi ulike kutya Kalunga ke na ko nasha nafye? Ovanhu vamwe ohava ti kutya Kalunga ohe tu etele okumona oixuna opo e tu yeleke, ndele osho kashi fi shoshili. Ombibeli oya ti: “Kalunga oku li kokule nouhenakalunga.” — Job 34:10; Lesha Jakob 1:13.

Kalunga okwe tu pa emanguluko lokuninga omatokolo. Mbela inatu pandula eshi tu na emanguluko lokuhoolola okulongela Kalunga? (Josua 24:15) Ope na okumona oixuna kuhapu molwaashi ovanhu vahapu ova hoolola okuningila vamwe owii. Ndele ohashi yahameke Jehova ngeenge ta tale okuhenouyuki kwa tya ngaho. — Lesha Genesis 6:5, 6.

Mafiku Jehova ota ka longifa Jesus opo a xulife po okumona oixuna nosho yo ovo have ku etifa. Jehova oku na omatomheno mawa eshi a efa okumona oixuna ku kale po oule wokafimbo. MOshungonangelo otamu ka nyanyangidwa oshitukulwa shimwe sha pambafana naashi osho tashi ka yelifa kutya omolwashike Kalunga a efa okumona oixuna ku kale po. — Lesha Jesaja 11:4.

5. Mbela Kalunga okwa hala tu ninge shike?

Jehova okwe tu shita tu na oukwatya wokudula okulihonga kombinga yaye nokukala tu mu hole. Okwa hala tu lihonge oshili kombinga yaye. (1 Timoteus 2:4) Ngeenge otwa konakona Ombibeli, ohatu dulu oku mu shiiva nota ka ninga Kaume ketu. — Lesha Omayeletumbulo 2:4, 5.

Otu na okukala tu hole Jehova unene shi dulife eshi tu hole omunhu keshe molwaashi oye e tu pa omwenyo. Ohatu ka ulika kutya otu hole Kalunga ngeenge hatu popi naye okupitila meilikano nokuninga osho ta pula tu ninge. (Omayeletumbulo 15:8) Jehova okwa hala tu kale hatu ungaunga novanhu vakwetu pahole. — Lesha Markus 12:29, 30; 1 Johannes 5:3.

Opo u mone ouyelele wa wedwa po, tala etukulwa 1 lembo Ombibeli otai hongo lela shike? olo la ulikwa opo, la nyanyangidwa kEendombwedi daJehova.

[Efano pepandja 23]

Mbela ope na ngoo etomheno liwa eshi Kalunga a efa okumona oixuna ku kale po oule wokafimbo?