Okumona oixuna oko ku li mounyuni aushe okwa pumbwa okuxulifwa po

OKUMONA oixuna oku li apeshe kunena, novanhu vahapu ovo ve na olukeno ohava kwafele ovo tava mono oixuna. Pashihopaenenwa, ovahakuli vopaunamiti ohava longo moipangelo eevili dihapu tava ningi omalufo opo va kwafele ovanaudu ile ovo va mona oiponga. Ookadimamundilo, ovapolifi, ovatotimhango novanhu ovo hava yandje ekwafo lopaulumomhumbwe ohava kendabala okuxulifa po okumona oixuna ile oku ku kelela. Eenghendabala da tya ngaho ohadi kwafele neenghono oohandimwe, ndele ovanhu pauhandimwe ile omahangano itaa dulu okuxulifa po okumona oixuna mounyuni aushe. Mepingafano naasho, Kalunga ota dulu nota ka xulifa po okumona oixuna mounyuni aushe.

Embo lOmbibeli laxuuninwa otali yandje eshilipaleko tali ti: “[Kalunga] ota feta po omahodi momesho avo, nefyo itali kala po vali ile oluhodi ile okulila ile ouyahame itau kala po vali, osheshi eshi shotete osha xula po.” (Ehololo 21:4) Natu ka tale kutya eudaneko olo otali ka tya shike kovanhu vahapu. Eudaneko olo ola ngonga pauxupi elalakano laKalunga li na sha nokuxulifa po okumona oixuna akushe. Kalunga ota ka wanifa po eudaneko olo mokuxulifa po oita kombada yedu, ondjala, omikifi, ouhenouyuki nosho yo ovakolokoshi aveshe. Kape na omunhu ta dulu okuxulifa po oinima oyo.

Osho Ouhamba waKalunga tau ka ninga

Kalunga ota ka wanifa po omaudaneko aye okupitila momunhu omunaenghono omutivali meshito alishe, omunyumunwa Jesus Kristus. Mafiku Jesus ota ka pangela ombada yedu alishe e li Ohamba, nokape na oo te ke mu kondjifa. Ovanhu itava ka pangelwa vali keehamba dopanhu, keepresidende ile kovanapolitika vamwe ve lili. Ponhele yaasho, otava ka pangelwa kOhamba imwe nosho yo kepangelo limwe, sha hala okutya, kOuhamba waKalunga.

Ouhamba waKalunga otau ka xulifa po omapangelo opanhu aeshe. Ombibeli oya xunganeka okudja nale, ya ti: “Kalunga ou komeulu ota ka dika ouhamba itau ka teka po fiyo alushe, nepangelo lawo itali ka yandjwa koshiwana shimwe. Ndele owo otau ka nyanyaula notau ka teyaula omauhamba aeshe noku a xulifa po, ndelenee owo vene tau ka kala fiyo alushe.” (Daniel 2:44) Ovanhu aveshe kombada yedu otava ka kala va hangana koshi yepangelo limwe liyuki, Ouhamba waKalunga.

Jesus okwa li a popya lwoikando kombinga yOuhamba oo eshi a li kombada yedu. Okwa li e u tumbula moshihopaenenwa sheilikano eshi a li ta hongo ovahongwa vaye nghee ve na okwiilikana, a ti: “Ouhamba woye nau uye; ehalo loye nali wanifwe kombada yedu yo ngaashi meulu.” (Mateus 6:10) Didilika kutya Jesus okwa kwatakanifa Ouhamba nokuwanifwa kwehalo laKalunga kombada yedu, olo kutya Kalunga okwa hala okuxulifa po okumona oixuna kombada yedu alishe.

Epangelo laKalunga olo li li pauyuki otali ka etela ovanhu omanangeko noupuna oo omapangelo opanhu itaa dulu nandenande oku va etela. Dimbuluka kutya Jehova okwa yandja Omona waye a ninge oikulila opo ovanhu va dule okumona omwenyo waalushe. Pefimbo lepangelo lopahole lOuhamba waKalunga, ovanhu otava ka alulilwa mewaneneno kanini nakanini. Mbela osho otashi ka eta oidjemo ilipi? Jehova “ota ka hanauna po efyo fiyo alushe, ndele Omwene, Kalunga ta ka feta po omahodi momesho aaveshe.” — Jesaja 25:8.

Vamwe otashi dulika va pule tava ti: ‘Omolwashike Kalunga ina katuka onghatu nale? Okwa teelela shike?’ Oshoshili kutya Jehova okwa li ta dulu okuxulifa po nale okumona oixuna akushe ile oku ku kelela, ashike okwa efa okumona oixuna ku kale po, hamolwetomheno lokulihola mwene, ndele opo ovana vaye vokombada yedu va mone ouwa tau kalelele. Efimbo limwe ovadali ovanahole navo ohava efa okaana kavo ka pite meenghalo didjuu ngeenge ove shii kutya osho otashi ke ka etela ouwa tau kalelele. Sha faafana, Jehova oku na omatomheno mawa eshi a efa okumona oixuna ku kale po pakafimbo, nomatomheno oo okwa yelifwa mOmbibeli. Omatomheno oo okwa kwatela mo oinima ngaashi emanguluko lokuninga omatokolo, oulunde nosho yo omhata i na sha noufemba waJehova wokupangela. Ombibeli oya yelifa yo kutya oshishitwa shopamhepo shikolokoshi osha efuwa ashike shi pangele ounyuni oule wefimbo la ngabekwa.a

Nonande itatu dulu okuyelifa omatomheno aeshe apa kutya omolwashike pe na okumona oixuna, ope na oinima ivali oyo tai tu pe eteelelo notai tu tu omukumo. Shotete: Jehova ote ke tu nangeka noupuna muhapu shi dulife okumona oixuna oko tashi dulika tu pite muko. Kakele kaasho, Kalunga okwe tu shilipaleka a ti: “Inya yonale itai dimbulukuwa vali, nongaashi kape na ou te i diladila momutima waye.” (Jesaja 65:17) Kalunga ota ka xulifa po filufilu oluhodi nokumona oixuna oko kwa etifwa kowii oo a efa u kale po oule wokafimbo.

Oshitivali: Kalunga okwa tula po efiku lokondadalunde olo itali dulu okulundululwa omo ta ka xulifa po okumona oixuna. Dimbuluka kutya omuprofeti Habakuk okwa li a pula Jehova kutya fiyo onaini ta efa oukolokoshi neemhata i kale po. Jehova okwa li e mu nyamukula a ti: “Emoniko tali ka teelela efimbo la nunwa . . . lo [itali ka tokelwa, NW].” (Habakuk 2:3) Ngaashi hatu ke shi mona moshitukulwa tashi landula, ‘efimbo olo la nunwa’ oli li popepi.

[Eshangelo lopedu]

[Oshimhungu pepandja 7]

Omishangwa odo tadi popi shi na sha nomauwa oo taa ka hafelwa monakwiiwa

ITAPA KA KALA VALI OITA:

“Ileni, mu tale oilonga yOmwene, ou ta longo oitilifilonga kombada yedu. Ou ta xulifa po oita fiyo okeengaba dedu.” — Epsalme 46:9, 10.

OVAHOLIKE VETU OTAVA KA NYUMUKA:

“Otaku ka kala enyumuko lovayuki nolovalunde.” — Oilonga 24:15.

OIKULYA OTAI KA KALA YA WANENA OVANHU OVASHE:

“Moshilongo namu kale oshishipo shoilya, yo i mene fiyo keexulo deemhunda.” — Epsalme 72:16.

ITAKU KA KALA VALI OMIKIFI:

“Ndele onakukala mo nande umwe ta ti: Aame oshingone.” — Jesaja 33:24.

OVAKOLOKOSHI OTAVA KA HANAUNWA PO:

“Ndelenee ovahenakalunga tava ka dudwa mo moshilongo, novaliteeki tava ka kufwa mo musho.” — Omayeletumbulo 2:22.

OTAKU KA KALA OUYUKI:

“Tala, ohamba [Kristus Jesus] otai ka pangela pauyuki, nomalenga otaa ka tokola etokolo la yuka.” — Jesaja 32:1.

[Omafano pepandja 7]

Ouhamba waKalunga otau ka xulifa po okumona oixuna keshe oko tashi dulika hatu piti muko