“Efimbo la nunwa” oli li popepi

NGAASHI ashike omuprofeti Habakuk, ovahongwa vaJesus navo ova li va halelela okumona oixuna ku xulifwe po. Molwaashi ovahongwa ova li ve shii kutya Ouhamba waKalunga otau ka yukifa oinima kombada yedu, ova Ii va pula Jesus tava ti: “Tu lombwela: onaini hano eshi tashi ka ningwa, nedidiliko lokuuya kwoye [meenghono dOuhamba] nolexulilo lefimbo lounyuni olilipi?” (Mateus 24:3) Jesus okwa li e va nyamukula kutya Jehova Kalunga oye aeke e shii efimbo lokondadalunde kutya onaini Ouhamba tau ka pangela ombada yedu aishe. (Mateus 24:36; Markus 13:32) Ndele nande ongaho, Jesus nosho yo vamwe ova xunganeka shi na sha noiningwanima yonhumba oyo ya li tai ka ulika kutya efimbo olo oli li popepi. — Tala oshimhungu osho shi li kolulyo.

Mbela ito dimine kutya oiningwanima oyo otai ningwa keshe pamwe kunena? Jesus okwa li yo a xunganeka kutya oilonga yokuhonga ovanhu otai ka longwa mounyuni aushe. Okwa ti: “Evangeli eli louhamba otali udifilwa ounyuni aushe li ningile oiwana aishe ondombwedi, opo nee taku uya exulilo.” — Mateus 24:14.

Oilonga ya tya ngaho otai longwa kunena kEendombwedi daJehova. Eendombwedi di dule pomamiliyona aheyali otadi udifile ovanhu moilongo 236 lwaapo kombinga yaasho Ouhamba tau ka ninga, nohadi va kwafele va lundulule eenghedi davo opo va dule okuwanifa po oiteelelwa yaKalunga youyuki, oo a hala okuxulifa po okumona oixuna nosho yo oluhodi. Twikila okulihonga kombinga yOuhamba waKalunga opo u kale u na etimaumbwile loku ka kala mounyuni omo itamu ka kala nande okumona oixuna fiyo alushe.

[Oshimhungu pepandja 8]

Omishangwa odo tadi popi shi na sha nomafiku axuuninwa

MATEUS 24:6, 7; EHOLOLO 6:4

• Oita inene

MATEUS 24:7; MARKUS 13:8

• Omakakamo edu manene

• Ondjala

LUKAS 21:11; EHOLOLO 6:8

• Omikifi dolutapo

MATEUS 24:12

• Oukolokoshi otau hapupala

• Ohole yovanhu oya talala

EHOLOLO 11:18

• Okunyonwa kwedu

2 TIMOTEUS 3:2

• Ovanhu ove hole oimaliwa sha pitilila

• Okuhadulika kovakulunhu

• Ovanhu ove lihole unene vo vene

2 TIMOTEUS 3:3

• Ovanhu kave na ohole

• Ovanhu kave na ombili

• Ovanhu vahapu moulikumwe wovanhu kave na elipangelo

• Ovanhu vahapu ove tonde ouwa

2 TIMOTEUS 3:4

• Ohole yovanhu yokuhola omalihafifo oi dule oyo yokuhola Kalunga

2 TIMOTEUS 3:5

• Ovanhu vahapu otave liti kutya Ovakriste

MATEUS 24:5, 11; MARKUS 13:6

• Ope na ovaprofeti vahapu ovanaipupulu

MATEUS 24:9; LUKAS 21:12

• Ovakriste vashili ohava hepekwa

MATEUS 24:39

• Ovanhu ihava pwilikine komalondwelo Ombibeli

[Efano pepandja 8]

Eendombwedi daJehova mounyuni aushe ohadi hongo ovanhu kombinga yOuhamba waKalunga