Ninga exumokomesho li wetike
“Aishe ei i diinina, ove u kale muyo, opo okweehena kwoye komesho ku monike kuaveshe.” — 1 TIM. 4:15.
1, 2. Timoteus okwa li e na onghalamwenyo ya tya ngahelipi eshi a li omunyasha elela, noshike sha li sha ningwa po eshi a li e na omido 20 lwaapo?
TIMOTEUS okwa putukila muGalatia, oshitukulwalongo shaRoma, osho kunena hashi ifanwa Turkey. MuGalatia omwa li mwa totwa omaongalo opaKriste mahapu moule womido omilongo konima yefyo laJesus. Lwopokati opo, omunyasha Timoteus naina nosho yo inakulu ova li va ninga Ovakriste nova li meongalo limwe lomwaao. (2 Tim. 1:5; 3:14, 15) Nopehe na omalimbililo, Timoteus okwa li a hafela onghalamwenyo e li omunyasha Omukriste momudingonoko oo a li e shii nawa. Ndele ombadilila, opa li pa ningwa omalunduluko onhumba.
2 Eshi omuyapostoli Paulus a li molweendo laye etivali loutumwa, okwa li a talela po oshitukulwa shaGalatia, nopefimbo opo otashi dulika Timoteus a li e li pokuwanifa omido 20 ile opo ashike a wanifa omido 20 nasha. Pefimbo letalelepo laPaulus, tashi dulika muListra, okwa li a uda Timoteus ta “popiwa nawa kovamwatate” momaongalo omoshitukulwa. (Oil. 16:2) Timoteus okwa li a ulika kutya okwa pyokoka nonande okwa li omunyasha natango. Onghee hano, Paulus nosho yo olutu lovakulunhuongalo vomeongalo looTimoteus ova li ve mu tenheka omake pawiliko lomhepo iyapuki, ve mu pa oshilonga she likalekelwa meongalo. — 1 Tim. 4:14; 2 Tim. 1:6.
3. Timoteus okwa li a pewa oufembanghenda woilonga we likalekelwa ulipi?
3 Timoteus okwa li a pewa eshivo le likalekelwa, a ninge omweendi pamwe nomuyapostoli Paulus. (Oil. 16:3) Timoteus ka li tuu a kumwa nokwa hafa neenghono omolweshivo la tya ngaho! Timoteus okwa li ta ka kala omweendi pamwe naPaulus, nomafimbo amwe okwa li ta ka kala ha i navamwe momalweendo, ta wanifa po oilonga i lili noku lili oyo a li a pewa kovayapostoli nokovakulunhu. Paulus naTimoteus ova li va longa oilonga youtumwa oyo ya li ya pameka neenghono ovamwatate pamhepo. (Lesha Oilonga 16:4, 5.) Onghee hano, Timoteus okwa li a shiivika nawa kOvakriste vahapu omolwexumokomesho lopamhepo olo a li a ninga. Omuyapostoli Paulus okwa li a shangela Ovafilippi konima yomido omulongo lwaapo okudja eshi va kala tava longo naTimoteus a ti: “Ame nghi na umwe ta diladila ngaashi [Timoteus], e mu file oshisho shili, . . . Ndelenee oulineekelwa waye omu u shii eshi a kala pamwe naame ongaashi xe nomona okuyakula evangeli.” — Fil. 2:20-22.
4. (a) Timoteus okwa li e lineekelelwa oshinakuwanifwa sha kwata moiti shilipi? (b) Omapulo elipi taa dulu okupulwa shi na sha neendjovo daPaulus odo di li mu 1 Timoteus 4:15?
4 Pefimbo opo Paulus a li a shangela Ovafilippi, okwa li e lineekelela Timoteus oshinakuwanifwa sha kwata moiti, shokunangeka po ovakulunhuongalo nosho yo ovayakuliongalo. (1 Tim. 3:1; 5:22) Osho otashi ulike kutya Timoteus okwa li a ninga omupashukili Omukriste omulineekelwa. Ndele monhumwafo oyo tuu oyo, Paulus okwa li a ladipika Timoteus kutya ‘okweehena kwaye komesho naku monike kuaveshe.’ (1 Tim. 4:15) Mbela exumokomesho laTimoteus kala li li liwetikile nale monghedi ididilikwedi neenghono? Ngeenge osho ngaho, Paulus okwa li a hala okutya shike eshi a popya eendjovo odo, nongahelipi hatu dulu okumona ouwa momayele aye?
Ulika omaukwatya opamhepo
5, 6. Oukoshoki wopamhepo weongalo lokuEfeso owa li wa ya moshiponga shashike, na Timoteus okwa li e na okwaamena ngahelipi eongalo olo?
5 Natu ka konakoneni eevelishe donhumba muTimoteus wotete, etukulwa 4. (Lesha 1 Timoteus 4:11-16.) Fimbo Paulus a li ina shanga eendjovo odo, okwa li a ya kuMakedonia, ndele okwa li a pula Timoteus a fyaale muEfeso. Omolwashike mbela? Omolwaashi moshilando osho omwa li vamwe ovo tava etifa etukauko meongalo omolwokuhonga omahongo oipupulu. Timoteus okwa li e na okwaamena eongalo opo li kale la koshoka pamhepo. Mbela Timoteus okwa li ta ka wanifa po ngahelipi oshinakuwanifwa osho? Okwa li e na okutulila po vamwe oshihopaenenwa shiwa opo ve shi landule.
6 Paulus okwa li a lombwela Timoteus a ti: “Kala omuhopaelelwa wovaitaveli meendjovo nomokweenda, mohole, momhepo, meitavelo nomoukoshoki.” Paulus okwa weda ko vali a ti: “Aishe ei i diinina, ove u kale muyo, opo okweehena kwoye komesho ku monike kuaveshe.” (1 Tim. 4:12, 15) Timoteus okwa li e na okuninga exumokomesho lopamhepo mokukala e na omaukwatya mawa, ndele hakulalakanena eendodo donhumba deenghonopangelo. Omukriste keshe oku na okuninga exumokomesho la tya ngaho.
7. Ovakriste aveshe meongalo ova teelelwa va ninge shike?
7 Ngaashi pefimbo laTimoteus, nokunena ope na eendodo doinakuwanifwa di lili noku lili meongalo. Vamwe ove li ovakulunhuongalo ile ovayakuliongalo, vamwe ove li ovakokolindjila. Natango, vamwe ove li ovatalelipo ovaendi, vamwe ove li moilonga yaBetel ile moilonga youtumwa. Ovakulunhuongalo ohava kufa ombinga meeprograma dokuhonga di lili noku lili, ngaashi poyoongalele inini naai ya kula. Ndele nande ongaho, Ovakriste aveshe, ovalumenhu novakainhu nosho yo ovanyasha, otava dulu okuninga exumokomesho lopamhepo li wetike. (Mat. 5:16) Ngaashi Timoteus, nokuli nOvakriste ovo ve na eendodo doinakuwanifwa de likalekelwa ova teelelwa va ninge exumokomesho opo omaukwatya avo opamhepo a monike kwaaveshe.
Kala ho popi monghedi i shii okuhopaenenwa
8. Okupopya kwetu ohaku kumu ngahelipi onghedi yetu yokulongela Kalunga?
8 Timoteus okwa li e na okutulila po vamwe oshihopaenenwa monghedi yaye yokupopya. Mbela ongahelipi hatu dulu okuulika exumokomesho letu mokupopya? Okupopya kwetu ohaku ulike kutya fye ovanhu va tya ngahelipi. Jesus okwa popya oshili eshi a ti: “Eshi shi yadi momutima, osho tashi popifa okanya.” (Mat. 12:34) Jakob omumwaina waJesus naye okwa li a didilika shi na sha nanghee okupopya kwetu haku dulu okukuma onghedi yetu yokulongela Kalunga. Okwa shanga a ti: “Ngenge ope na umwe mokati keni e lishii oye omulongelikalunga ndele ita pangele elaka laye, ndele ota pukifa omutima waye, okulongelakalunga kwaye okwongaho.” — Jak. 1:26.
9. Omeenghedi dilipi okupopya kwetu ku na okukala ku shii okuhopaenenwa?
9 Okupopya kwetu otaku dulu okuulikila vamwe meongalo kutya otwa ninga exumokomesho lopamhepo shi fike peni. Onghee hano, Ovakriste va pyokoka ohava kendabala okupopya oinima tai tungu, tai tulumukifa, tai hekeleke notai tu vamwe omukumo ponhele yokupopya oinima ififohoni, itai tungu, okukembaula ile okupopya oinima tai yahameke. (Omayel. 12:18; Ef. 4:29; 1 Tim. 6:3-5, 20) Okukala twe lilongekida okupopila omifikamhango dopaenghedi daKalunga da denga mbada nokukala twa hala okukala metwokumwe nado, otaku ka ulika kutya otwe liyandjela Kalunga. (Rom. 1:15, 16) Nopehe na omalimbililo, ovanamitimadiwa otava ka didilika onghedi omo hatu longifa oshali yetu yokupopya noshi na oupu va shikule oshihopaenenwa shetu. — Fil. 4:8, 9.
Natu kale ovahopaenenwa meenghedi nomoukoshoki
10. Omolwashike sha fimanenena okukala tu na eitavelo lihe na oihelele eshi hatu ningi exumokomesho lopamhepo?
10 Opo Omukriste a kale oshihopaenenwa shiwa, oku na okuninga shihapu shihe fi ashike okupopya oinima tai tungu. Okupopya ashike oinima ya yuka ndele ihatu longo osho sha yuka, otaku ulike kutya otu li ovanaihelele. Paulus okwa li e shii nawa oihelele yOvafarisai nosho yo oilanduliko ii yeenghatu davo. Okwa li a londwela Timoteus oikando i dulife pushimwe e livangeke oihelele nosho yo okuliningifa kwOvafarisai. (1 Tim. 1:5; 4:1, 2) Ashike Timoteus ka li omunaihelele. Paulus okwa li a shangela Timoteus monhumwafo yaye onhivali a ti: “[Onda] dimbulukwa eitavelo lomuove li he noihelele.” (2 Tim. 1:5) Timoteus okwa li a pumbwa okuulika kutya oku li Omukriste omunashili. Okwa li yo e na okutula po oshihopaenenwa shi na sha neenghedi.
11. Paulus okwa li a shangela Timoteus shike kombinga youpuna?
11 Meenhumwafo daPaulus mbali odo a li a shangela Timoteus, okwa yandja mo omakumaido mahapu e na sha neenghedi. Pashihopaenenwa, Timoteus okwa li e na okuhenuka okulalakanena omaliko. Paulus okwa ti: “Olwisho loimaliwa olo efina lowii aushe, nomoku li haluka vamwe va puka mo meitavelo, ve lityuulifa [nomaudjuu] mahapu.” (1 Tim. 6:10) Ngeenge omunhu okuhole omaliko ohashi ulike kutya ke na oupamhepo muwa. Mepingafano naasho, Ovakriste ovo va wanenwa kokukala nonghalamwenyo i li paunafangwa, sha hala okutya, okukala ‘ve na oipalwifa noikutu,’ ohava ulike kutya ova ninga exumokomesho lopamhepo. — 1 Tim. 6:6-8; Fil. 4:11-13.
12. Ongahelipi hatu dulu okuulika kutya otwa ninga exumokomesho moinima yetu yopaumwene?
12 Paulus okwa li a lombwela Timoteus shi na sha nanghee sha fimana kovakainhu Ovakriste okukala hava ‘djala oikutu ya wapala, nelixupipiko nosho yo pandunge.’ (1 Tim. 2:9, yelekanifa no-NW.) Ovakainhu ovo hava ningi omahoololo opandunge mokudjala nomokuliwapeka nelixupipiko nosho yo moinima ikwao yonghalamwenyo, ohava tula po oshihopaenenwa sha denga mbada. (1 Tim. 3:11) Efinamhango olo otali longo yo nokovalumenhu Ovakriste. Paulus okwa li a kumaida ovapashukili a ti kutya nava kale ‘ovalidiliki, ovanaendunge nove na eenghedi.’ (1 Tim. 3:2) Ngeenge otwa kala hatu ulike omaukwatya oo momalipyakidilo etu akeshe efiku, exumokomesho letu otali ka monika kwaaveshe.
13. Ongahelipi hatu dulu okutula po oshihopaenenwa shoukoshoki ngaashi Timoteus?
13 Timoteus okwa li yo e na okutula po oshihopaenenwa shi na sha noukoshoki. Paulus okwa longifa oshitya oukoshoki eshi a li ta popi shi na sha neenghedi, nokwa tumbula oshinima shimwe kondadalunde, oukoshoki wopamilele. Timoteus okwa li e na okulihumbata monghedi i shii okufimanekwa, unene tuu ngeenge ta ungaunga novakainhu. Timoteus okwa li e na okuungaunga ‘novakainhu ongaashi ooina, ovanyasha ongaashi ovamwaina, moukoshoki aushe.’ (1 Tim. 4:12; 5:2) Nokuli nomunhu oo ha kufa ombinga moinima inai koshoka paenghedi, tashi dulika te shi ningi meholeko, Kalunga oha kala e mu wete novanhu vakwao ohave ke shi shiiva mokweendela ko kwefimbo. Kakele kaasho, oilonga iwa yOmukriste nayo itai kala inai hololwa. (1 Tim. 5:24, 25) Ovakriste aveshe meongalo ove na omhito yokuulika kutya ova ninga exumokomesho meenghedi nomoukoshoki.
Ohole neitavelo omaukwatya a fimanenena
14. Ongahelipi Omishangwa da divilika omhumbwe yokukala tu holafane?
14 Ohole oi li oshiteelelwa sha fimanenena kOvakriste vashili. Jesus okwa lombwela ovahongwa vaye a ti: “Opo tuu opo aveshe tave mu koneke kutya, nye ovalongwa vange, ngenge mu holafane.” (Joh. 13:35) Ongahelipi hatu dulu okuulika ohole ya tya ngaho? Eendjovo daKalunga otadi tu ladipike tu kale hatu lididimikilafana “mohole,” tu kale tu “noukaume nokufilafana onghenda nokudiminafana po omatimba” nokukala hatu yakula ovaenda. (Ef. 4:2, 32; Heb. 13:1, 2) Omuyapostoli Paulus okwa ti: “Mokuhola ovamwaxo filafaneni olukeno.” — Rom. 12:10.
15. Omolwashike sha fimanenena okukala tu na ohole atusheni, naunene tuu ovapashukili Ovakriste?
15 Ngeno Timoteus okwa li e na onyanya noiha ungaunga nawa nOvakriste vakwao, ngeno osha shundula oilonga iwa oyo a longa e li omuhongi nomupashukili. (Lesha 1 Ovakorinto 13:1-3.) Ndele mepingafano naasho, onghedi omo Timoteus a li a ulikila ovamwaxe ohole yashili, e va yakula noku va longela oilonga iwa, oya ulika kutya okwa ninga lela exumokomesho lopamhepo. Onghee hano, osha yeleka eshi omuyapostoli Paulus a tumbula kondadalunde ohole monhumwafo oyo a li a shangela Timoteus i li umwe womomaukwatya oo Timoteus a li e na okukala omuhopaenenwa.
16. Omolwashike Timoteus a li a pumbwa okukala e na eitavelo la kola?
16 Eitavelo laTimoteus ola li la yelekwa pefimbo opo a li muEfeso. Opa li vamwe ovo va li tava xumifa komesho omahongo ehe li metwokumwe noshili yopaKriste. Vamwe ova li tava tandavelifa “eengano” ile tava kongo omahongo oo itaa tungu eongalo pamhepo. (Lesha 1 Timoteus 1:3, 4.) Paulus okwa ti kutya oohandimwe ovo ohave ‘linenepeke, kave na eendunge, ndelenee otava yenwa komapulaapulo eemhata nokomatomhafano.’ (1 Tim. 6:3, 4) Mbela Timoteus okwa li ta ka yandja elitulemo komahongo a nyika oshiponga oo a li tae livakele meongalo? Hasho nandenande, molwaashi Paulus okwa li a ladipika Timoteus a ti kutya na ‘kondje ekondjo liwa leitavelo’ nokuyepa “omapopyaano a nyata noongaho neemhata doipupulu hadi tiwa eshiivo vati.” (1 Tim. 6:12, 20, 21) Nopehe na omalimbililo, Timoteus okwa li a dulika komayele aPaulus opandunge. — 1 Kor. 10:12.
17. Ongahelipi eitavelo letu tali dulu okuyelekwa kunena?
17 Shihokwifa, Timoteus okwa li a lombwelwa kutya “momafiku axuuninwa vamwe otave [ke] liteeka po eitavelo, ndee tava ka shikula eemhepo dipukifi nomalongo eendemoni.” (1 Tim. 4:1) Aveshe meongalo, mwa kwatelwa ovo ve na eendodo doinakuwanifwa, ova pumbwa okukala ve na eitavelo la kola noiha li tengauka ngaashi Timoteus. Ngeenge otwa kala hatu katuka eenghatu notwa tokola toko okuhenuka oushunimonima, exumokomesho letu otali ka kala li wetike nohatu ka tula po oshihopaenenwa sheitavelo.
Kendabala u ninge exumokomesho li wetike
18, 19. (a) Ongahelipi exumokomesho letu tali dulu okumonika kwaaveshe? (b) Oshike tashi ka kundafanwa moshitukulwa tashi landula?
18 Osha yela kutya exumokomesho lopamhepo lOmukriste washili ihali ulikwa keholokepo laye, komaunghulungu aye opaudalelwamo ile kefimano laye. Natango exumokomesho lOmukriste ihali limonikila momido odo a kala e lipyakidila meongalo. Ndele ponhele yaasho, exumokomesho lashili lopamhepo ohali limonikila mokukala hatu dulika kuJehova mokudiladila kwetu, mokupopya kwetu nomelihumbato letu. (Rom. 16:19) Otu na okudulika koshipango shokukala tu holafane nokukala tu na eitavelo la kola. Onghee hano, natu dilongeni keendjovo odo Paulus a li a lombwela Timoteus noku di diinina opo exumokomesho letu li monike kwaaveshe.
19 Oukwatya vali umwe oo hau limonikila mexumokomesho letu lopamhepo nosho yo moukulunhu wopaKriste oo ehafo, olo li li oshitukulwa shoiimati yomhepo iyapuki yaKalunga. (Gal. 5:22) Oshitukulwa tashi landula otashi ka kundafana shi na sha nanghee hatu dulu okuhapupalifa ehafo letu noku li kaleka po nonande otu li momafimbo madjuu.
Oto nyamukula ngahelipi?
• Oshike osho vamwe tava dulu okudidilika mokupopya kwetu?
• Exumokomesho letu ohali limonikila ngahelipi meenghedi nosho yo moukoshoki wetu?
• Omolwashike Ovakriste ve na okutula po oshihopaenenwa shokukala nohole nosho yo neitavelo?
[Efano pepandja 11]
Timoteus okwa li a ulika kutya okwa pyokoka nonande okwa li omunyasha natango
[Omafano pepandja 13]
Mbela exumokomesho loye oli wetike kuvamwe?