Kalunga oha tale ko ngahelipi oikunwa yoalkoholi?

OMUSHITI wetu, oo e tu halela osho sha denga mbada, ine tu dilika okunwa oikunwa yoalkoholi pandjele.a Ponhele yaasho, okwa pa ovanhu “[omaviinyu], aa taa hafifa omutima womunhu, opo a vemife oshipala shaye komaadi, Ye a pameke omutima womunhu neendya.” (Epsalme 104:15) Pomhito imwe, Jesus Kristus okwa li a ningifa oshivilohombolo shimwe shi kale shihafifa eshi a li a shitukifa omeva “omaviinyu mawa.” — Johannes 2:3-10.

Oshi li pandunge okufika pexulifodiladilo kutya Omushiti wetu oku shii nawa nghee oikunwa yoalkoholi hai nwefa mo onghedi omo omalutu etu nosho yo ouluvi wetu hai longo. Tate yetu womeulu ohe tu ‘hongo osho tashi tu wapalele’ okupitila mOmbibeli, note tu londwele sha kwata moiti shi na sha nokunwa oikunwa yoalkoholi sha pitilila. (Jesaja 48:17) Didilika omalondwelo a kwata moiti aa taa shikula apa:

Ombibeli otai ti: “Inamu kolwa komaviinyu omo hamu di eliefo.” (Ovaefeso 5:18) ‘Eengholwe itadi ka fyuulula ouhamba waKalunga.’ (1 Ovakorinto 6:9-11) Eendjovo daKalunga oda tokola “oukolwe, eenhingo naikwao ya fa ei.” — Ovagalati 5:19-21.

Natu ka taleni komaupyakadi amwe oo haa etifwa kokunwa oikunwa yoalkoholi sha pitilila.

Omaupyakadi oo haa etifwa kokunwa oikunwa yoalkoholi sha pitilila

Nonande oalkoholi oi na ouwa wonhumba, omu na oinima yonhumba i na eenghono oyo hai kumu omadiladilo omunhu nosho yo onghedi omo olutu hali longo. Okulongifa oalkoholi sha pitilila otaku dulu yo okweetifa omaupyakadi taa landula:

Okunwa sha pitilila ohaku nyono po eendunge domunhu dokuyoolola, ndele ta kala ta diladila “oinima inai yuka.” (Omayeletumbulo 23:33) Allen oo kwa li ha nu sha pitilila oo a tumbulwa moshitukulwa sha tetekela, okwa ti: “Okunwa oikunwa yoalkoholi ihaku kumu ashike olutu lomunhu ndele ohaku nwefa mo yo omadiladilo noikala yomunhu. Omunhu iha diladila nghee okunwa kwaye haku yahameke vamwe.”

Okunwa oikunwa yoalkoholi sha pitilila ohaku dulu yo okuningifa omunhu a kale ehe na onhodi. Ombibeli otai londwele tai ti: ‘Omaviinyu nomaongo otaa nyeka omunhu eendunge.’ (Hosea 4:11) Ngahelipi mbela? Omunhu ngeenge a nwa oalkoholi, omadiladilo nomahalo aye oo ha dulu okukondjifa ngeenge ina nwa ohaa hovele okumonika a fa taa wapalele, noha kala a hala okukatuka metwokumwe nao. Etokolotoko lomunhu lokuninga osho sha yuka otali dulu okunghundipala. Oikunwa yoalkoholi otai dulu oku tu imba tu diinine oukoshoki wetu wopaenghedi, naasho ohashi twala moiponga yopamhepo.

Pashihopaenenwa, omulumenhu umwe wedina John okwa li a tanguna nomukulukadi waye ndele ta di mo meumbo a fula onya ndele ta i kombaa imwe. Okwa hangwa ashike opo a nu ouhalasha vonhumba a lotele eshi omukainhu umwe a li e uya kuye mombaa. Konima ashike yokunwa natango ouhalasha vonhumba, John okwa li a ya pamwe nomukainhu oo ndele ta i moluhaelo. Konima yefimbo, John okwe ke lipa oushima neenghono eshi a ningifwa oshinima sha tya ngaho komalodu, osho ngeno ina ninga nandenande ngeno ka nwine.

Okunwa oikunwa yoalkoholi ihapu otaku dulu okuningifa omunhu aha pangele elaka laye nosho yo eenghatu daye. Ombibeli otai ti: “Umwe ota ti: ‘Akutu!’ Nomukwao: ‘Woo ame!’ Umwe e neemhata.” Omunhu oo ta popiwa ngaho ‘oyoo ha tokelwa ta pula a pewe vali okahalasha kamwe.’ (Omayeletumbulo 23:29, 30, yelekanifa no-Contemporary English Version.) Okunwa sha pitilila otaku dulu okuningifa omunhu a kale a fa a “nangala meni lefuta mwi, ile ngaashi ou ta nangala koxulo yombodje yoshikepa.” (Omayeletumbulo 23:34) Omunhu oo a nwa sha pitilila ota dulu okupenduka ‘a dengwa, ndele ite shi dimbuluka.’ — Omayeletumbulo 23:35.

Okunwa sha pitilila otaku dulu okunyona po oukolele womunhu wopalutu. “Pexulilo [omalodu] otaa lumata ngaashi eyoka, ndee taa file mo oudiyo ngaashi ongolonyoka.” (Omayeletumbulo 23:32) Ounongononi wopaunamiti owa koleka oushili weyeletumbulo olo lonale. Okunwa omalodu sha pitilila okwa fa omunhu ta nu oudiyo, oo tau dulu okukwatifa omunhu komaludi eekankela, oudu wexuli, oudu wondabalamba, osuuka ya wa pedu mwaavo ve na oudu wosuuka, okudala ounona vehe na oukolele, ombada ile oudu womutima, okutumbula po ashike imwe. Nokuli nonande omunhu okwa nu ashike lumwe aluke sha pitilila, ota dulu okungabuka ile a fye. Ndele nande ongaho, okunwa sha pitilila ihaku etifa ashike oilanduliko ya kwata moiti i na sha noukolele wopalutu.

Oshilanduliko sha kwata moiti neenghono. Nonande omunhu oku kale ha nu ndele iha kolwa, ngeenge ita nu pandjele ota dulu okutula oupamhepo waye moshiponga. Ombibeli oya popya sha yela ya ti: “Woo, ava hava meneka ongula inene ve lilongekidile ondala, ndee tava xungilile omaviinyu e va pupyaleke.” Omolwashike mbela? Jesaja okwa popya kombinga yoiponga yopamhepo oyo hai etifwa kokunwa nopehe na ondjele, a ti: “Vo ihava tale oilonga yOmwene, eshi ta ningi, ngaashi ihava koneke oilonga yomake aye.” — Jesaja 5:11, 12.

Eendjovo daKalunga otadi tu kumaida tuha kale ‘mokati kaavo hava finyuna omaviinyu.’ (Omayeletumbulo 23:20) Ovakainhu ovanamido ova londwelwa vaha kale ‘ovapika voikunwa ihapu.’ (Titus 2:3) Omolwashike mbela? Omolwaashi ovanhu luhapu ohava hovele okunwa shihapu kanini nakanini, tave shi ningi pandjikilile, nopehe na oku shi didilika. Hauxuuninwa, omunhu oo ha nu oikunwa yoalkoholi sha pitilila otashi dulika a ka hovele okulipula kutya, ‘onaini handi duduluka, opo nee handi ke a konga vali?’ (Omayeletumbulo 23:35) Eengholwe ohadi kala di na opapalashe eshi tadi penduka, nohadi kala vali da hala oikunwa opo di li lembulule.

Ombibeli otai londwele ovo hava kala ‘moukolwe, moivilo youfiku nomoufukenhu woikunwa kutya ove noku ke lihepaulula kuou a fikama nokuli, a tokole ovanamwenyo novafi.’ (1 Petrus 4:3, 5) Jesus okwa londwela shi na sha nomafimbo madjuu oo tu li muo, a ti: ‘Lipashukileni, omitima deni diha lolokifwe koitendele nokokukolwa nokoshisho shoipalwifa, efiku [laJehova] lihe mu vakele ngaashi omwiyo.’ — Lukas 21:34, 35.

Ndele mbela oshike osho ovo hava nu sha pitilila tava dulu okuninga po opo vaha ‘lolokifwe kokukolwa’?

[Eshangelo opedu]

[Omafano pepandja 4, 5]

Okunwa oikunwa yoalkoholi sha pitilila otaku dulu okweetifa omaupyakadi mahapu