Okukala twaJehova oku li efilonghenda inali longelwa
“Ofye ovOmwene.” — ROM. 14:8.
1, 2. (a) Otu na oufembanghenda ulipi? (b) Omapulo elipi hatu ka konakona?
OSHIWANA shaIsrael kasha li tuu sha pewa oufembanghenda munene eshi Jehova eshi lombwela a ti: “Nye mokati koiwana aishe, mu nokukala oshiwana shange mwene”! (Ex. 19:5) Kunena, oilyo yeongalo lopaKriste nayo oi na oufembanghenda wokukala yaJehova. (1 Pet. 2:9; Eh. 7:9, 14, 15) Oufembanghenda oo otau ke tu etela ouwa fiyo alushe.
2 Nonande okukala twaJehova oshi li oufembanghenda, otashi pula yo omunhu a wanife po oiteelelwa yonhumba. Ndele vamwe otashi dulika ve lipule kutya: ‘Mbela ohandi ka dula ngoo okuwanifa po osho Jehova a teelela ndi ninge? Ngeenge onda nyono, mbela Jehova ota ka ekela nge shi? Okukala ndaJehova mbela otaku ka imba nge ndi kale nda manguluka?’ Omalipulo a tya ngaho okwa wana okukonakonwa. Ndele tete natu ka konakoneni epulo limwe noukeka olo tali ti: Okukala twaJehova ohaku eta omauwa elipi?
Okukala twaJehova ohaku eta ehafo
3. Rahab okwa li a mona ngahelipi ouwa eshi a tokola okulongela Jehova?
3 Mbela okukala twaJehova ohaku eta ngoo ouwa? Natu taleni koshihopaenenwa shombwada Rahab, oyo ya li hai kala muJeriko shonale. Nopehe na omalimbililo, Rahab oku na okukala a putukila melongelokalunga inali koshoka lokulongela oikalunga yomuKanaan. Ndele eshi Rahab a li a uda kombinga yomafindano oo Jehova a li a pa Ovaisrael, okwa li a mona kutya Jehova oye Kalunga kashili. Onghee hano, Rahab okwa li a tula omwenyo waye moshiponga opo a amene ovapiya vaKalunga nokwa li e lineekelela onakwiiwa yaye momake avo. Ombibeli oya ti: “[Hamolwaashi] yo nombwada Rahab a yukipalifwa molwoilonga, eshi a yakulile eendadi ndele te di pitifa mondjila ilili moku va lekela?” (Jak. 2:25) Diladila shi na sha nomauwa oo Rahab a ka mona eshi a li a ninga oshitukulwa shoshiwana shaKalunga sha koshoka, osho sha li sha hongwa Omhango yaKalunga i na sha nohole nosho yo ouyuki. Ka li tuu a hafa eshi a li a efa po onghedi yaye yokukalamwenyo yonale! Rahab okwa ka hombolwa kOmuisrael ndele ta dala omonamati Boas, oo a ka ninga omulumenhu omutilikalunga a tongomana. — Jos. 6:25; Rut 2:4-12; Mat. 1:5, 6.
4. Rut okwa li a mona ouwa ulipi eshi a li a tokola okulongela Jehova?
4 Omumoab umwe wedina Rut naye okwa li a tokola okulongela Jehova. Eshi a li okakadona, otashi dulika a li ha longele oshikalunga shedina Kamos nosho yo oikalunga ikwao yOvamoab, ndele lwanima okwa ka shiiva Kalunga kashili, Jehova, nokwa li a hombolwa kOmuisrael oo a li a ka konga ouxupilo moshilongo shavo. (Lesha Rut 1:1-6.) Lwanima, eshi Rut nahautenya mukwao Orpa va li mondjila tava i kuBetlehem nainamweno Naomi, Naomi okwa li e va lombwela va shune komaumbo avo. Kasha li tashi ka kala shipu kuvo okukala muIsrael. Orpa okwa li a “shuna koshiwana shavo nokookalunga vavo,” ashike Rut ye ka li a shuna. Rut okwa li a katuka metwokumwe neitavelo laye nokwa li e shii kutya okwa hala okuninga walyelye. Rut okwa li a lombwela Naomi a ti: “Ino lombwela nge nokutya, ndi ku fiye po ndi ka shune ko ndi ha ye naave. Osheshi keshe apa to i, naame yo handi ka ya ko, ndee keshe apa ho kala, naame yo ohandi ka kala ko. Oshiwana shoye sho oshiwana shange, naKalunga koye Oye Kalunga kange.” (Rut 1:15, 16) Molwaashi Rut okwa li a tokola okulongela Jehova, okwa li a mona ouwa mOmhango yaKalunga, oyo ya li ya ninga po elongekido le likalekelwa li na sha novafiyekadi, eehepele nosho yo ovo vehe na omapya. Rut okwa li a mona ehafo nosho yo eameno koshi yeke laJehova.
5. Oshike wa didilika shi na sha novanhu ovo va kala tava longele Jehova noudiinini?
5 Otashi dulika u shii oohandimwe vamwe ovo va kala tava longele Jehova noudiinini oule womido omilongo okudja eshi ve mu liyapulila. Va pula kutya ouwa ulipi va mona eshi va kala tava longele Jehova. Nonande kape na oo iha hangwa komaupyakadi, ope na oumbangi muhapu oo tau koleke eendjovo domupsalme umwe odo tadi ti: “Oshilongo oshi nelao, ngenge Omwene Oye Kalunga kasho.” — Eps. 144:15.
Jehova okwe tu tulila po oiteelelwa i li pandjele
6. Omolwashike inatu pumbwa okukala twa tila kutya pamwe itatu ka dula okuwanifa po osho Jehova a teelela tu ninge?
6 Otashi dulika ho lipula shi na sha nongeenge oto ka dula ngoo okuwanifa po oiteelelwa yaJehova. Otashi dulika u kale wa tila ngeenge to diladila shi na sha nokuninga omupiya waKalunga, to dulika keemhango daye nokulombwela vamwe kombinga yedina laye. Pashihopaenenwa, Moses okwa li e wete ina wana eshi Kalunga a li e mu tuma a ka popye nOvaisrael nosho yo nohamba yaEgipti. Ashike Kalunga ka li a teelela Moses a longe shihapu shi dulife pwaasho a li ta dulu okulonga. Jehova okwa li ‘e mu honga osho e na okuninga.’ (Lesha Exodus 3:11; 4:1, 10, 13-15.) Molwaashi Moses okwa li a tambula ko ekwafo olo a li a pewa, okwa li a mona ehafo olo hali di mokuwanifa po ehalo laKalunga. Jehova okwe tu tulila po oiteelelwa i li pandjele. Oku shii kutya fye inatu wanenena nokwa hala oku tu kwafela. (Eps. 103:14) Okulongela Kalunga tu li ovashikuli vaJesus ohaku tulumukifa ndele kaku fi omutengi, molwaashi okukala nonghalamwenyo ya tya ngaho ohaku etele vamwe ouwa nohaku hafifa omutima waJehova. Jesus okwa ti: ‘Ileni kuame, Ame ohandi mu pe etulumuko. Litwikeni ondjoko yange nye mu lilonge kuame, osheshi Aame omunambili momutima onde lininipika.’ — Mat. 11:28, 29.
7. Omolwashike to dulu okukala nelineekelo kutya Jehova ote ke ku kwafela u wanife po osho a hala u ninge?
7 Jehova okwe lilongekida alushe oku tu twa omukumo, shimha ashike twe lineekela meenghono daye. Pashihopaenenwa, osha yela kutya Jeremia ka li e na ouladi wokupopya paushitwe. Onghee hano, eshi Jehova a li e mu pa oshinakuwanifwa shokukala omuprofeti waYe, Jeremia okwa ti: “Akutu Omwene Kalunga! Tala, ame kandi shii kupopya, osheshi aame omunyasha.” Okwa ka popya nokuli lwanima a ti: ‘Inandi hala vali okupopya medina laJehova.’ (Jer. 1:6; 20:9) Ndele molwaashi Jehova okwa li a twa Jeremia omukumo, Jeremia okwa li a dula okuudifa etumwalaka oule womido 40, olo ovanhu vahapu va li inava hala okupwilikina kulo. Jehova okwa li a shilipaleka Jeremia lwoikando, a ti: “Ame ondi li puove. Ame ohandi ku mangulula nohandi ku xupifa.” — Jer. 1:8, 19; 15:20.
8. Ongahelipi hatu dulu okuulika kutya otwe lineekela Jehova?
8 Ngaashi ashike Jehova a li a pameka Moses nosho yo Jeremia, nafye ota dulu oku tu kwafela tu wanife po osho a teelela kOvakriste kunena. Ndele osha fimana okukala twe lineekela Kalunga. Ombibeli oya ti: “Nomutima woye aushe lineekela Omwene, ino liameka keendunge doye mwene. Mu shiiva meendjila doye adishe, opo nee Ye ota ka lalakanifa omalila oye.” (Omayel. 3:5, 6) Ohatu ka ulika kutya otwe lineekela Jehova ngeenge otwa tambula ko ekwafo olo he tu pe okupitila mEendjovo daye nosho yo meongalo. Ngeenge otwa efa Jehova a yukife eenghatu detu mokukalamwenyo kwetu, kape na osho tashi ke tu imba tu kale ovadiinini kuye.
Jehova oha file oshisho ovapiya vaye pauhandimwe
9, 10. Epsalme 91 ola udaneka eameno loludi lilipi?
9 Ngeenge ovanhu vamwe tava diladila kombinga yokuninga etokolo lokuliyapulila Jehova, otashi dulika va kale tave lipula kombinga yokunyona, okukala ve udite inava wana nosho yo okweekelwashi kuJehova. Ndele lao linene, Jehova ohe tu pe eameno keshe olo twa pumbwa opo tu amene ekwatafano letu naye li na ondilo. Natu ka taleni nghee osho sha popiwa mEpsalme eti-91.
10 Epsalme olo ola hovela tali ti: “Ou e li omutumba meameno laau wOkombadambada, ndee ta kala momudidimbe wOmunaenghono adishe, ye ota ti kOmwene: Eameno lange, nohotengulu yange, Kalunga kange, ou handi mu lineekele. Osheshi Oye tuu, te ku xupifa melulo lomuteli womwiyo.” (Eps. 91:1-3) Didilika kutya Kalunga okwa udaneka okwaamena ovo ve mu hole nove mu lineekela. (Lesha Epsalme 91:9, 14.) Ndele mbela Jehova okwa popya shi na sha neameno loludi lilipi? Jehova okwa li a amena ovapiya vaye vamwe vonale palutu. Osho omafimbo amwe okwa li e shi ninga opo pa kale ovanhu vepata omo mwa li tamu ka dja Messias omuudanekwa. Ndele nande ongaho, ovapiya vaye vahapu ovadiinini ova li va idililwa meedolongo, va hepekwa nokudipawa monghedi inyanyalifi opo ngeno va efe po oudiinini wavo kuKalunga. (Heb. 11:34-39) Ashike ova li ve na ouladi wokulididimika, molwaashi Jehova okwa li e va amena pamhepo koinima ya nyika oshiponga oyo ya li tai dulu okuteya po oudiinini wavo. Onghee hano, otaku dulu okutiwa kutya Epsalme 91 otali udaneke kombinga yeameno lopamhepo.
11. ‘Okukala omutumba meameno laau wOkombadambada’ otaku faneke shike, na Kalunga oha amenene mo oolyelye?
11 ‘Okukala omutumba meameno laau wOkombadambada’ oko omupsalme a popya otaku ulike konhele yeameno lopamhepo yopafaneko. Ovo ve li omutumba monhele yeameno laKalunga ove li ngaashi ovaenda vaye, va amenwa kukeshe osho tashi tula moshiponga eitavelo lavo nosho yo ohole yavo yokuhola Kalunga. (Eps. 15:1, 2; 121:5) Onhele oyo ihai dulu okumonika kovanhu ovo vehe fi ovaitaveli. Osho otashi ulike kutya Jehova oha amene ovanhu ovo tava ti: ‘Oove Kalunga ketu, ou hatu ku lineekele.’ Ngeenge otwa kala monhele oyo ya amenwa, inatu pumbwa okukala unene hatu lipula kutya pamwe ohatu ka wila melulo “lomuteli womwiyo” Satana, ndele hatu kala inatu hokiwa vali kuKalunga.
12. Oinima ilipi hai tula moshiponga ekwatafano letu naKalunga?
12 Oinima ilipi hai tula moshiponga ekwatafano letu naKalunga li na ondilo? Omupsalme okwa tumbula oinima ihapu ya nyika oshiponga, mwa kwatelwa ‘oudu wolutapo, ou tau hondjaunine momulaulu nehanauno lopouyelele.’ (Eps. 91:5, 6) ‘Omuteli womwiyo’ okwa yula ovanhu vahapu mokuxwaxwameka omhepo yemanguluko. (2 Kor. 11:3) Vamwe ohe va yulu mokuxumifa komesho olwisho, ounhwa nosho yo ohole yokuhola omaliko. Natango vamwe ohe va pukifa okupitila momaufilosofi ngaashi oukwashiwana, ehongo loevolusi nosho yo omalongelokalunga oipupulu. (Kol. 2:8) Vahapu ova kokelwa momwiyo womilele da nyata. Oinima ya nyika oshiponga ya tya ngaho oyo hai nyono po oupamhepo womunhu onga oudu wolutapo, oya ningifa ovanhu omamiliyona va efe po ohole yavo yokuhola Kalunga. — Lesha Epsalme 91:7-10; Mat. 24:12.
Nghee hatu dulu okukaleka po ohole yetu yokuhola Kalunga
13. Jehova ohe tu amene ngahelipi koinima ya nyika oshiponga oyo tai dulu okunyona po oupamhepo wetu?
13 Jehova oha amene ngahelipi oshiwana shaye koiponga yopamhepo? Omupsalme okwa ti: “Ye ote ku lombwelele ovaengeli vaye, ve ku amene meendjila doye adishe.” (Eps. 91:11) Ovaengeli vomeulu ohave tu wilike nohave tu amene opo tu dule okuudifa onghundana iwa. (Eh. 14:6) Kakele kovaengeli, ovakulunhuongalo Ovakriste ohave tu amene tuha pukifwe kokutomhafana kwa puka mokukanghameka filufilu omahongo avo kOmishangwa. Otava dulu okukwafela keshe umwe pauhandimwe oo ta kendabala okufinda oikala younyuni. (Tit. 1:9; 1 Pet. 5:2) Natango, “omupiya omudiinini nomunaendunge” ohe tu pe eendja dopamhepo opo e tu amene tuha pukifwe kehongo loevolusi, tuha kokelwe momilele da nyata, tuha lalakanene omaliko nefimano notu henuke omahalo nomanwefemo makwao a nyika oshiponga. (Mat. 24:45) Oshike she ku kwafela opo u dule okukondjifa imwe yomoinima oyo ya nyika oshiponga?
14. Ongahelipi hatu dulu okumona ouwa meameno olo Kalunga he tu pe?
14 Oshike tu na okuninga opo tu dule okukala “omutumba” meameno laKalunga? Ngaashi ashike tu na okuliamena alushe koinima ya nyika oshiponga oyo tai dulu oku tu yahameka palutu, ngaashi oiponga, ovalongi vominyonena ile tuha kwatwe komikifi, otu na yo okukatuka eenghatu tadi twikile opo tu liamene koiponga yopamhepo. Onghee hano, otu na okulandula alushe ewiliko olo Jehova he tu pe okupitila moileshomwa, pokwoongala kweongalo nosho yo poyoongalele. Otu na yo okukala hatu pula omayele kovakulunhuongalo. Kakele kaasho, mbela ihatu mono ouwa omolwomaukwatya e lili noku lili oo haa ulikwa kovamwatate novamwameme vopamhepo? Okweendafana neongalo ohaku tu kwafele shili tu kale ovanongo. — Omayel. 13:20; lesha 1 Petrus 4:10.
15. Omolwashike to dulu okukala noushili kutya Jehova ota dulu oku ku amena kukeshe osho tashi dulu oku ku ningifa u kale ino hokiwa vali kuye?
15 Katu na nande etomheno lokukala twa limbililwa shi na sha nongeenge Jehova ota dulu ngoo oku tu amena kukeshe osho tashi dulu oku tu ningifa tu kale inatu hokiwa vali kuye. (Rom. 8:38, 39) Jehova oha amene eongalo kovatondi vopalongelokalunga novopapolitika ovanaenghono ovo hava kala alushe va lalakanena oku tu tukula ko kuKalunga ketu omuyapuki, ndele haku tu dipaa. Eudaneko laJehova ola wanifwa olo tali ti: “Oshilwifo keshe tashi hambulwa shi ku lwife, otashi nyengwa.” — Jes. 54:17.
Olyelye ta dulu oku tu pa emanguluko?
16. Omolwashike ounyuni itau dulu oku tu pa emanguluko?
16 Okukala twaJehova mbela otaku tu imbi okukala twa manguluka? Hasho nandenande! Ponhele yaasho, okukala oshitukulwa shounyuni oko taku tu imbi okukala twa manguluka. Ounyuni owa tukuka ko kuJehova notau pangelwa kukalunga omukwanyanya oo a ninga ovanhu ovapika vaye. (Joh. 14:30) Pashihopaenenwa, onghalelo ei yoinima yaSatana oi na omaupyakadi opamaxupilo oo haa imbi ovanhu va kale va manguluka. (Yelekanifa nEhololo 13:16, 17.) Eheka loulunde nalo ohali piki ovanhu. (Joh. 8:34; Heb. 3:13) Onghee hano, nonande ovaheneitavelo otashi dulika va udaneke emanguluko mokuxumifa komesho onghedi yokukalamwenyo oyo ihe li metwokumwe nehongo laJehova, oo ta pwilikine kuvo ota ka ninga diva omupika woulunde nosho yo wonghedi yokukalamwenyo inai koshoka. — Rom. 1:24-32.
17. Jehova okwe tu pa emanguluko lilipi?
17 Nonande ounyuni itau dulu oku tu pa emanguluko, Jehova ote ke tu mangulula kukeshe osho tashi dulu oku tu yahameka ngeenge otwe mu lineekelela onghalamwenyo yetu. Onghalamwenyo yetu oi li ngaashi omunhu e lineekelela omwenyo waye ndokotola wokutanda e na owino, oo ta dulu oku mu mangulula komukifi wonhumba wa nyika oshiponga. Atusheni otu kwetwe komukifi wa nyika oshiponga, sha hala okutya, oulunde oo twa fyuulula. Ohatu ka dula ashike okuhenuka oilanduliko youlunde nohatu ka kala nomwenyo fiyo alushe ngeenge otwe lineekelela Jehova onghalamwenyo yetu, pakanghameno lekuliloyambo laKristus. (Joh. 3:36) Ngaashi ashike omunhu ta dulu okulineekela ndokotola wokutanda ngeenge okwa shiiva shihapu kombinga yondjokonona yaye iwa, nafye ohatu ka kala twe lineekela Jehova neenghono eshi hatu twikile okulihonga kombinga yaYe. Onghee hano, natu twikileni okukonakona Eendjovo daKalunga noukeka molwaashi otadi ke tu kwafela tu kale tu hole Jehova tuhe na nande oumbada wokukala twaYe. — 1 Joh. 4:18.
18. Ovapiya vaJehova otava ka mona ouwa ulipi?
18 Jehova okwa pa ovanhu aveshe emanguluko lokuninga omatokolo. Ombibeli oya ti: ‘Hoololeni hano omwenyo, mu shiive okukala nomwenyo, nye noludalo leni, ngenge mu hole Omwene Kalunga keni.’ (Deut. 30:19, 20) Jehova okwa hala tu ulike ohole yetu yoku mu hola mokuninga etokolo kufye vene loku mu longela. Okukala twaKalunga oo tu hole otaku ke tu kaleka alushe twa hafa, ponhele yoku tu imba tu kale twa manguluka.
19. Omolwashike okukala twaJehova ku li efilonghenda inali longelwa?
19 Inatu wana ngeno okukala twaKalunga oo a wanenena molwaashi fye ovalunde. Ndele nande ongaho, Kalunga okwe shi ninga tashi shiiva omolwefilonghenda laye inali longelwa. (2 Tim. 1:9) Nomolwaasho Paulus okwa ti: “Ngenge hatu kala tu nomwenyo, ohatu kalele Omwene, ile ngenge hatu fi, ohatu file Omwene. Osho hano ngenge tu nomwenyo ile hatu fi, ofye ovOmwene.” (Rom. 14:8) Onghee hano, kape na efiku tu ke lipe oushima ngeenge otwa tokola okukala twaJehova.
Oto nyamukula ngahelipi?
• Ouwa ulipi hatu mono mokukala twaJehova?
• Omolwashike tu na elineekelo kutya ohatu dulu okuwanifa po oiteelelwa yaKalunga?
• Jehova oha amene ngahelipi ovapiya vaye?
[Omafano pepandja 15]
Pula vamwe kutya ouwa ulipi va mona mokukala vaJehova
[Efano pepandja 16]
Jehova ohe tu amene meenghedi dimwe dilipi?