Oparadisa oyo ya popiwa mOmbibeli oi li peni?

Ovaleshi tava pula . . .

Oparadisa oyo ya popiwa mOmbibeli oi li peni?

▪ Jesus okwa li a udanekela omulumenhu umwe oo a li e li pokufya, oo a li a ulika filufilu eitavelo muye, a ti: ‘Oto ka kala pamwe naame mOparadisa.’ (Lukas 23:43) Oparadisa omo tamu ka kala omulumenhu oo oi li peni? Mbela otai ka kala meulu ile okombada yedu ile okonhele vali imwe oko ovanhu hava ka teelela va pangulwe?

Ovakulunhu vetu votete Adam naEva ova li mOparadisa. Ombibeli oya ti: “Omwene Kalunga okwa twika oshikunino muEden, moushilo, omo Ye a yandja komunhu ou e mu ma, onhele. . . . Omwene Kalunga okwa kufa omunhu ndele e mu nangeka moshikunino muEden oku shi longa noku shi kelela.” (Genesis 2:8, 15) Eshi omushangwa oo wa tolokwa mOshigreka, oshitya “oshikunino” osha li sha tolokwa o-pa·raʹdei·sos, oko kwa dja oshitya shOshiingilisha “oparadisa.”

Ngaashi ashike ovalihomboli hava tamununa mo eumbo lavo ngeenge ounona tava ende tava hapupala, ovadali vetu votete navo ova li va teelelwa va tamunune mo eengaba doshikunino shaEden eshi oukwaneumbo wavo tau ende tau hapupala. Kalunga okwa li e va lombwela ta ti: “Yadifeni edu, lo nali kale mepangelo leni.” — Genesis 1:28.

Omushiti wetu okwa li a lalakanena ovanhu va kale mOparadisa kombada yedu nova dale ounona. Ovanhu ova li tava ka kala moparadisa kombada yedu fiyo alushe, nokava li va pumbwa omaendo nokuli. Edu ola li tali ka kala eumbo lovanhu aveshe fiyo alushe. Onghee hano, itashi kumwifa eshi hatu shambukilwa neenghono oushitwe wokombada yedu! Otwa li twa shitwa tu kale kedu liwaliwa.

Mbela elalakano laKalunga olo ola lunduluka? Ahowe, molwaashi Jehova okwe tu shilipaleka a ti: “Osho yo ondjovo yange tai di mokanya kange: itai alukile kuame oshimha, ndelenee otai longo osho sha wapalela nge.” (Jesaja 55:11) Eshi pa pita omido da konda po 3 000 okudja eshi ovanhu va shitwa, Ombibeli oya ka popya kutya “Kalunga, ou a ma edu ndee te li wapaleke,” “ine li shita li kale ombuwa, ndelenee okwe li ma li kalwe.” (Jesaja 45:18) Onghee hano, elalakano laKalunga inali lunduluka, edu otali ka ningwa natango oparadisa.

Shihokwifa, oitukulwa ihapu yOmbibeli oyo tai popi kombinga yOparadisa otai ulike ashike kokukala nomwenyo kombada yedu. Pashihopaenenwa, Jesaja okwa li a xunganeka a ti: “Otava ka dika omaumbo ndee tava kala mo, ndele tava twike oikokola yomiviinyu, ndee tava li oiimati yayo.” (Jesaja 65:21) Mbela openi hapa dikwa omaumbo nohapa twikwa omiti? Openi hapa liwa oiimati? Kombada yedu oko haku ningwa oinima oyo. Omayeletumbulo 2:21 okwa popya sha yela a ti: “Ovanashili tava ka nangala [edu, NW].”

Jesus naye okwa li a popya shi na sha neduparadisa. Oshoshili kutya okwa li a udaneka yo oparadisa yomeulu, ndele omwa li ashike tamu ka kala okangudu kanini kovahoololwa. (Lukas 12:32) Ngeenge umwe womwaavo vokangudu a fya, oha nyumuninwa mOparadisa yomeulu notava ka pangela pamwe naKristus mOparadisa kombada yedu. (Ehololo 5:10; 14:1-3) Ashike ovo tava ka pangela pamwe naJesus meulu otava ka shilipaleka kutya Eduparadisa otali ka filwa oshisho nawa notali ka kala monghalo oyo tai tu kumwe nomifikamhango daKalunga.

Jesus okwa li e shii nawa kutya Kalunga okwa li a hala edu li ninge Oparadisa. Shimwe vali, Jesus okwa li meulu pamwe naXe eshi oshikunino shaEden sha totwa po. Aveshe ovo ve na eitavelo tali longo kunena ove na omhito ya yeuluka yoku ka kala meduparadisa monakwiiwa. (Johannes 3:16) Jesus okwa li a udanekela ovanhu va tya ngaho a ti: ‘Oto ka kala pamwe naame mOparadisa.’ — Lukas 23:43.

[Odjo yefano pepandja 10]