Kala we lineekela muJehova eshi exulilo tali ehene popepi

“Lineekeleni Omwene alushe.” — JES. 26:4.

1. Eyooloko lilipi li li pokati kovapiya vaKalunga novanhu vomounyuni?

MOUNYUNI ou omu na ovanhu omamiliyona vehe shii kutya nave lineekele lyelye, tashi dulika molwaashi va yahamekwa ile va nyematekwa kuvamwe lwoikando ihapu. Ashike ovapiya vaJehova hasho ve udite ngaho, molwaashi ohava wilikwa kounongo wopakalunga nove shii kutya kave na okukala ve lineekela ounyuni ou ile “oidale” yomounyuni. (Eps. 146:3) Ponhele yaasho, onghalamwenyo nosho yo onakwiiwa yavo ove i efela momake aJehova, molwaashi ove shii kutya oku va hole nonokutya oha wanifa po alushe Eendjovo daye. — Rom. 3:4; 8:38, 39.

2. Ongahelipi Josua a li a koleka oushili kutya Kalunga oku shii okulineekelwa filufilu?

² Josua oo a li ko pefimbo lOmbibeli okwa li a koleka oushili oo kutya Jehova oku shii okulineekelwa filufilu. Okwa li a lombwela Ovaisrael vakwao lwopexulilo lokukalamwenyo kwaye, a ti: “Nye mu nokushiiva nomutima weni aushe nomwenyo weni aushe nokutya, kape na nande ondjovo imwe yomeendjovo adishe diwa Omwene Kalunga keni [ei] tonga ya kala inai wanifwa. Adishe de mu wanifilwa.” — Jos. 23:14.

3. Edina laKalunga otali holola shike shi na sha naye?

³ Jehova iha wanifa po ashike omaudaneko aye molwaashi e hole ovapiya vaye, ndele ohe shi ningi unene tuu opo aha shekife edina laye. (Ex. 3:14; 1 Sam. 12:22) J. B Rotherham okwa yelifa metwalemo lOmbibeli yedina The Emphasized Bible a ti kutya edina laKalunga otali ti kutya Kalunga ota dulu okuninga keshe shimwe opo a dule okuwanifa po omaudaneko aye. Ngeenge otwa udu edina laye tali tongwa, ohali tu dimbulukifa kutya Kalunga oha wanifa po alushe osho a popya. Ota dulu okuninga keshe osho sha pumbiwa, efimbo keshe noponhele keshe. Iha nyengwa kusha nandenande. Kalunga ota ka kala alushe metwokumwe neityo ledina laye.

4. (a) Jesaja 26:4 ote tu ladipike tu ninge shike? (b) Oshike hatu ka kundafana moshitukulwa eshi?

⁴ Lipula kutya: ‘Mbela Jehova ondi mu shii ngoo nawa opo ndi dule okukala nde mu lineekela filufilu? Mbela ondi na ngoo shili etimaumbwile li na sha nonakwiiwa nonde lineekela filufilu kutya Kalunga oye ta endifa oinima?’ Jesaja 26:4 okwa ti: “Lineekeleni Omwene alushe, osheshi Omwene Kalunga Oye emanya laalushe.” Oshoshili kutya Kalunga iha longele vali ovanhu oikumwifilonga kunena ngaashi a li ha ningi omafimbo amwe pefimbo lOmbibeli. Ndele nande ongaho, ohatu dulu okukala twe mu lineekela “alushe,” molwaashi “Oye emanya laalushe.” Ndele mbela ongahelipi Kalunga ketu omulineekelwa ha kwafele ovapiya vaye ovadiinini kunena? Natu ka kundafaneni eenghedi nhatu omo Jehova he tu kwafele: Ohe tu pameke ngeenge twa pumbwa ekwafo laye opo tu kondjife omayeleko, ohe tu yambidida tu lididimikile outondwe ile ngeenge hatu patanekwa sha yukilila nohe tu yambidida ngeenge twa wililwa po koisho yonghalamwenyo. Eshi hatu ka kundafaneni oinima oyo, natu dilongeni shi na sha nanghee hatu dulu okukala twe lineekela Jehova filufilu.

Kala we lineekela muKalunga ngeenge to yelekwa u nyone

5. Onaini tashi dulu okukala eshongo neenghono ngeenge tashi uya pokukala twe lineekela muKalunga?

⁵ Ohashi kala shipu okukala twe lineekela muJehova ngeenge tashi uya poinima oyo twa teelela nodjuulufi, ngaashi eudaneko laye li na sha nOparadisa ile nenyumuko. Ndele otashi dulika shi kale shidjuu okukala twe mu lineekela ngeenge tashi uya poinima i na sha nelihumbato lopaenghedi, tashi dulika omitima detu diha kale da tomhwa filufilu kutya eendjila daye nosho yo omifikamhango daye oda yuka notadi tu etele ehafo linene. Ohamba Salomo oye tu kumaida tai ti: “Nomutima woye aushe lineekela Omwene, ino liameka keendunge doye mwene. Mu shiiva meendjila doye adishe, opo nee Ye ota ka lalakanifa omalila oye.” (Omayel. 3:5, 6) Didilika kutya outumbulilo ‘eendjila’ nosho yo “omalila” oo wa longifwa momushangwa oo, otau ulike kutya otu na okukala twe lineekela Kalunga monghalamwenyo yetu aishe, ndele katu na ashike okukala twe lineekela omaudaneko oo e tu udanekela. Ndele mbela ongahelipi hatu dulu okuulika kutya otwe lineekela muKalunga ngeenge hatu yelekwa?

6. Oshike tashi dulu oku tu kwafela tu kale twa tokola toko tuha diladile owii?

⁶ Opo tu kale tu tonde owii, omadiladilo etu oo tete e na okukala e tonde owii. (Lesha Ovaroma 8:5; Ovaefeso 2:3.) Ndele mbela oshike tashi dulu okukwafela omunhu a kale a tokola toko aha kale ta diladila owii? Natu ka taleni keenghedi nanho: 1. Kala ho ilikana Kalunga e ku kwafele. (Mat. 6:9, 13) 2. Kala ho dilonga koihopaenenwa yomOmbibeli yaavo va li inava dulika kuJehova nosho yo yaavo va li hava dulika kuye. Ndele to tale kutya osha li she va endela ngahelipi.a (1 Kor. 10:8-11) 3. Diladila shi na sha noupyakadi wopamadiladilo nosho yo wopamaliudo oo to dulu okweetelwa koulunde nosho yo oo tau dulu okuhanga ovaholike voye. 4. Diladila shi na sha nanghee Kalunga ha kala e udite ngeenge omupiya waye umwe a nyona sha kwata moiti. (Lesha Epsalme 78:40, 41.) 5. Diladila yo kombinga yehafo olo Jehova ha kala e udite ngeenge ta tale omupiya waye omudiinini ta henuka okulonga osho shii ndele ta longo osho shiwa, kutya nee omoipafi yavamwe ile ongeenge e li oye aeke. (Eps. 15:1, 2; Omayel. 27:11) Naave oto dulu okuulika kutya owe lineekela muJehova.

Kala we lineekela muKalunga ngeenge to shekwa nokupatanekwa

7. Jeremia okwa li a shakeneka omashongo elipi, nokwa li ha kala e udite ngahelipi omafimbo amwe?

⁷ Ope na ovamwatate vahapu ovo hava longo moitukulwa oyo idjuu neenghono okulonga muyo. Omuprofeti Jeremia naye okwa li ha longo moshitukulwa sha faafana naayo, a li ha longele mouhamba waJuda pefimbo lomafiku ao madjuu axuuninwa. Elineekelo laye muJehova okwa li hali yelekwa efiku keshe, eshi a li ta wanifa po noudiinini oshinakuwanifwa osho a li a pewa kuKalunga shokushiivifa omatumwalaka aYe etokolo. Pomhito imwe, hamushanga waye omudiinini, Baruk, naye okwa li ta nyenyeta kutya okwa loloka. (Jer. 45:2, 3) Mbela oinima oyo oya li ya ningifa Jeremia a teke omukumo? Omafimbo amwe okwa li shili ha kala a polimana. Okwa ti: “Efiku olo nda dalwa nali fingwe.” Okwa weda ko vali a ti: “Omolwashike ame [nda] pita mo medimo lameme ndi mone oudjuu noluhepo, ndi xulife omafiku ange nokufifwa ohoni!” — Jer. 20:14, 15, 18.

8, 9. Metwokumwe naJeremia 17:7, 8 nosho yo Epsalme 1:1-3, oshike osho tu na okuninga opo tu twikile okwiimika oiimati iwa?

⁸ Nonande Jeremia okwa li a kwatwa kepolimano omafimbo amwe, ka li a sholola nandenande. Okwa twikila okukala e lineekela muJehova. Oshidjemo, omuprofeti oo omudiinini okwa li a wanifilwa eendjovo daJehova odo tadi hangwa muJeremia 17:7, 8, tadi ti: “Omulumenhu omunangekwa noupuna oye ou te lineekele Omwene, naau a ninga Omwene eameno laye. Osheshi ota ka kala ngaashi omuti wa twikwa pomeva, nomidi dao otau di twala komatondokelo omeva; ou itau tila, nande nau hangike koluteni, nomafo ao otaa kala a hapa, kau noshisho shomudo woluteni nongaashi ihau kuka.”

⁹ Ngaashi ashike omuti woiimati oo wa “twikwa pomeva” ile hau tekelwa nawa ihau kuka, Jeremia naye ka li ha “kuka” oku shi popya pafaneko. Ka li a efa a nwefwe mo kovasheki ovo va li ve mu dingilila. Ndele ponhele yaasho, Jeremia okwa li omudiinini kOdjo ‘yomeva’ omwenyo nokwa li ha dulika kwaashishe osho Jehova a li e mu lombwela. (Lesha Epsalme 1:1-3; Jer. 20:9) Jeremia ina tulila po tuu ovalongelikalunga aveshe oshihopaenenwa shiwa, unene tuu ovo hava longele moitukulwa omo mu na ovanhu inava hala okupwilikina! Ngeenge naave ou li monghalo ya faafana naayo, twikila okukala we lineekela filufilu muJehova, oo te ke ku kwafela u lididimike eshi to fimanekifa “edina laye” moipafi. — Heb. 13:15.

10. Omafiloshisho elipi Jehova e tu pa, notu na okulipula epulo lilipi?

¹⁰ Jehova okwe tu pa omafiloshisho mahapu opo tu dule okuungaunga nomaupyakadi onghalamwenyo oo hatu shakeneke momafiku aa axuuninwa. Limwe lomomafiloshisho oo Jehova e tu pa olo Eendjovo daYe Ombibeli, oyo ya tolokwa paushili momalaka mahapu neenghono. Kakele kaasho, Jehova ohe tu pe eendja dopamhepo dihapu pefimbo la wapala okupitila mongudu ‘yomupiya omudiinini nomunaendunge.’ Okwe tu pa yo ongudu inene yovaitaveli vakwetu oyo hatu twaafana nayo omukumo pokwoongala nosho yo poyoongalele. Ndele mbela oho longifa ngoo omafiloshisho a tya ngaho pauyadi? Aveshe ovo hava ningi ngaho “otava ka kuwilila ehafo lokomutima,” ndele ovo inava hala okudulika kuKalunga otava “ka kuwaana komahepeko omomutima, ndee [tava] kwena molwomhepo ya teyauka.” — Jes. 65:13, 14.

Kala we lineekela muKalunga ngeenge to ungaunga noisho

11, 12. Ounongo wopakalunga otau ke tu linyengifa tu ninge shike ngeenge hatu tale komaupyakadi oo e li mounyuni?

¹¹ Ope na omaupyakadi mahapu neenghono oo a kundukida ovanhu kunena, ngaashi sha li sha xunganekwa. (Mat. 24:6-8; Eh. 12:12) Ngeenge efundja lo venevene le uya, luhapu ovanhu ohava i komilondo ile va londe kombada yomatungo ile keshe tuu opo omeva efundja itaa dulu oku va hanga. Sha faafana, eshi omaupyakadi omounyuni taa ende taa hapupala, ovanhu omamiliyona ohava ka konga ekwafo komahangano opangeshefa, opapolitika ile opalongelokalunga oo taa monika a fa tae shi endifa nawa nove lineekela yo moinima yopaunongononi nosho yo mouteknologi. Ndele oinima ya tya ngaho ihai amene ovanhu shili. (Jer. 17:5, 6) Mepingafano naasho, ovapiya vaJehova ove na eameno li shii okulineekelwa, sha hala okutya, “emanya laalushe.” (Jes. 26:4) Omupsalme umwe okwa ti: “[Jehova] emanya lange, nehepuluko lange, nohotemanya yange.” (Lesha Epsalme 62:7-10.) Ndele mbela ongahelipi hatu dulu okuninga Jehova eameno letu?

¹² Ngeenge otwa kala hatu dulika kEendjovo daJehova odo luhapu ihadi tu kumwe nounongo wopanhu, ohatu ka ulika kutya otwa kanyatela kuye. (Eps. 73:23, 24) Pashihopaenenwa, ovanhu ovo va nwefwa mo kounongo wopanhu otashi dulika va tye: ‘Omunhu oho fi ashike lumwe aluke; onghee hano, tyapula onghalamwenyo yoye pauyadi.’ ‘Lalakanena eifano liwa.’ ‘Likongela oimaliwa ihapu.’ ‘Lilandela keshe eshi omwenyo woye wa hala.’ ‘Ka talele po keenhele neenhele mounyuni aushe.’ Ashike ounongo wopakalunga hasho tau tu ladipike tu ninge ngaho, ponhele yaasho, otau tu kumwe nomayele aa taa ti: ‘Ovo hava longifa ounyuni ou, nava kale va fa ovo ihave u longifa; osheshi olupe lounyuni ou otali xulu po.’ (1 Kor. 7:31) Jesus naye okwe tu kumaida tu kale alushe hatu pitifa komesho oinima yOuhamba, nokungaho, ohatu ke liongelela “omamona meulu,” omo taa ka kala a amenwa filufilu. — Mat. 6:19, 20.

13. Tu na 1 Johannes 2:15-17 momadiladilo, oshike tu na okulipula?

¹³ Onghedi omo ho tale ko “ounyuni nakeshe eshi shi li mo” ohai ulike ngoo shili kutya owe lineekela Kalunga filufilu? (1 Joh. 2:15-17) Ndele mbela owa lenga ngoo neenghono omamona opamhepo nosho yo oufembanghenda wokukufa ombinga moilonga yokuudifa Ouhamba shi dulife oinima yomounyuni? (Fil. 3:8) Oho ningi ngoo eenghendabala opo u kale u na ‘eisho li li nawa’? (Mat. 6:22) Oshoshili kutya Kalunga ina hala tu kale ovahenakonasha ile ihatu wanifa po oinakuwanifwa yetu, unene tuu ngeenge otu na oukwaneumbo oo tu na okufila oshisho. (1 Tim. 5:8) Kalunga okwa hala ovapiya vaye va kale ve mu lineekela filufilu, ndele hamounyuni waSatana oo u li pokuxula po. — Heb. 13:5.

14-16. Ouwa ulipi vamwe va li va mona omolwokukaleka ‘eisho lavo li li nawa’ nomolwokupitifa komesho oinima yOuhamba?

¹⁴ Natu konakoneni oshihopaenenwa shaRichard nomukulukadi waye Ruth ovo ve na oukadona vavali nokamati kamwe. Richard okwa ti: “Onda li ndi udite omutima wange tau lombwele nge kutya ohandi dulu okulonga shihapu moilonga yaJehova. Onda li ndi na onghalamwenyo youdjeko, ashike onda li ndi wete kutya Kalunga itandi mu longele sha wana. Konima eshi twa ilikana kombinga youpyakadi wange nokutala kutya oshike sha kwatelwa mo, ame nomukulukadi wange otwa li twa tokola kutya nandi ka pule omuhona wange a pe nge epitikilo ndi kale handi longo ashike omafiku ane moshivike nonande moshilongo shetu omwa li mu na oupyakadi wopamaxupilo pefimbo opo. Eindilo lange ola li la tambulwa ko nonda li nda hovela okulonga ngaashi twa udafana meni lomwedi umwe.” Mbela Richard paife oku udite ngahelipi?

¹⁵ Okwa ti: “Ondjabi yange oya shuna pedu neepersenda 20, ndele nande ongaho, paife ohandi kala ndi na omafiku 50 a wedwa po omudo keshe, opo ndi dule okukala noukwaneumbo wange nokutekula ounona vetu. Paife ohandi longo eevili di dule pwaado nda li handi longo nale moukalele lwomapa avali, ovakonakonimbibeli vange ova hapupula lwomapa atatu nohandi kwafele neenghono eongalo. Ruth naye oha mono omhito yokukala ha kufa oukwafelikokolindjila efimbo nefimbo, molwaashi ohandi kala nounona efimbo lihapu shi dulife shito. Onda tokola toko ndi ninge ngaashi handi dulu opo ndiha efe po omalipyakidilo ange.”

¹⁶ Roy naPetina ovo tava tekula okamonakadona kavo fiyo opaife, navo ova dula okuninipika efimbo olo va li hava longifa moilonga yokulikongela omboloto opo va dule okulonga oilonga yefimbo li yadi. Roy okwa ti: “Paife ohandi longo omafiku atatu, ofimbo Petina ha longo avali. Kakele kaasho, otwa tembuka mo meumbo letu ndele hatu kongo eumbo linini olo itali pula oilonga ihapu okupashukila. Otwa li ovakokolindjila fimbo inatu dala okamati nokamonakadona ketu notwa li natango twa hala okushuna moukokolindjila. Eshi ounona vetu va kula, otwa shuna mo natango moilonga yefimbo li yadi. Omanangeko noupuna oo twa mona itaa dulu okuyelekwa nandenande noimaliwa.”

‘Ombili yaKalunga’ nai amene omutima woye

17. Omishangwa ode ku hekeleka ngahelipi ngeenge tashi uya pokukala uhe shii kutya oshike tashi ka ningwa po mefiku lomongula?

¹⁷ Kape na ou e shii kutya efiku lomongula otali ka kala la tya ngahelipi, molwaashi “efimbo nombadilila” ohai hange keshe umwe womufye. (Omuud. 9:11, NW) Mepingafano novanhu ovo vehe na ekwatafano lopofingo naKalunga ovo ihava kala ve udite va amenwa, fye katu na okweefa ombili yetu yopamadiladilo i nyonwe po kunena kokukala tuhe shii kutya efiku lomongula otali ka kala la tya ngahelipi. (Mat. 6:34) Omuyapostoli Paulus okwa ti: “Kaleni mu he na nande oshisho shasha, ndelenee oufyoona weni u shiivifileni Kalunga momailikano nomomaindilo pamwe nomapandulo, nombili yaKalunga ei i dule eendunge adishe, otai ka amena omitima deni nomadiladilo eni.” — Fil. 4:6, 7.

18, 19. Kalunga ohe tu hekeleke meenghedi dilipi? Shi yelifa.

¹⁸ Ovamwatate novamwameme vahapu ovo va pita meenghalo didjuu ova li va kwafelwa kuJehova opo va kale ve na ombili yokomwenyo. Omumwameme umwe okwa ti: “Ndokotola oo ha tande okwa kala ta kondjifa nge lwoikando ndi dimine okutulwa ohonde. Okwa li he uya pwaame alushe ta pula nge ta ti: ‘Ove mwa ti omolwashike tuu ino hala okutulwa ohonde?’ Onda li nda ilikana kuJehova lwoikando melimweneneno nokwa li a pange ombili yokomwenyo. Onda li ndi udite nda kola nda fa emanya. Nonande kanda li ndi na eenghono molwaashi ohonde yange molutu kaya li ya wana, onda li nda dula okuyandja omanyamukulo a yela nawa okudja mOmishangwa opo ndi popile eitavelo lange.”

¹⁹ Fimbo limwe Kalunga otashi dulika e tu pe ekwafo olo twa pumbwa noku tu hekeleka okupitila momwiitaveli mukwetu ile meendja dopamhepo odo hatu pewa pefimbo la wapala. Otashi dulika wa uda nale omumwatate ile omumwameme ta ti: “Oshitukulwa eshi osho naanaa nda kala nda pumbwa, osha fa ashike aame sha shangelwa!” Doshili, Jehova ota ka ulika kutya oku tu hole ngeenge otwe mu lineekela, kashi na nee mbudi kutya otu li meenghalo da tya ngahelipi ile kutya otu na eemhumbwe da tya ngahelipi. Shimwe vali, fye otu li “eedi” daye notwa lukilwa edina laye. — Eps. 100:3; Joh. 10:16; Oil. 15:14, 17.

20. Omolwashike ovapiya vaJehova tava ka kala meameno eshi ounyuni waSatana tau ka xulifwa po?

²⁰ Oinima aishe oyo ounyuni waSatana wa tula elineekelo muyo otai ka hanaunwa po “mefiku loupyuhandu wOmwene” olo li li poduka. Oinima ngaashi oshingoli, oshisilveri nosho yo oinima ikwao yongushu itai ka dula oku tu amena nandenande. (Sef. 1:18; Omayel. 11:4) Pefimbo opo, eameno letu otali ke tu dila ashike kuJehova, “emanya laalushe.” (Jes. 26:4) Onghee hano, natu ulikeni paife kutya otwe lineekela filufilu muJehova mokutwikila okweenda meendjila daye douyuki nopehe na okuyapuka mo, mokuudifa etumwalaka lOuhamba nonande otwa taalela omasheko ile omapataneko, noku mu shiivifila oisho yetu aishe. Ngeenge otwa kala hatu ningi oinima aishe oyo, ohatu ka kala twa amenwa shili nohatu ka kala “nombili netulumuko, [noitatu] tilifwa komupya.” — Omayel. 1:33.

[Eshangelo lopedu]

Oto dulu okuyelifa?

Ongahelipi hatu dulu okuulika kutya otwe lineekela muKalunga

• ngeenge hatu yelekwa tu longe owii?

• ngeenge hatu shekwa ile hatu patanekwa?

• ngeenge hatu ungaunga noisho yokukalamwenyo?

[Efano pepandja 15]

Okudulika komifikamhango daKalunga ohashi eta ehafo

[Efano pepandja 17]

“Omwene Kalunga Oye emanya laalushe”