Konakona Eendjovo daKalunga

Elalakano laKalunga olashike li na sha nedu?

Moshitukulwa eshi omu na omapulo oo tashi dulika wa kala to lipula nomu na Omishangwa odo tadi nyamukula omapulo oo. Eendombwedi daJehova otadi ka kala da hafa okukundafana naave omanyamukulo omapulo oo.

1. Elalakano laKalunga olashike li na sha nedu?

Edu ola shitwa li kale onhele yokukala ovanhu. Konima eshi Kalunga a shita ovaengeli va kale meulu, okwa li yo a shita omunhu opo a dule okuhafela onghalamwenyo kombada yedu. (Job 38:4, 7) Onghee hano, Kalunga okwa li a tula omunhu wotete moparadisa iwa hai ifanwa Eden nokwa li e mu udanekela kutya ota ka kala nomwenyo fiyo alushe kombada yedu pamwe noludalo laye lomonakwiiwa. — Genesis 2:15-17; lesha Epsalme 115:16.

Oshikunino shaEden osha li ashike sha kwata okatukulwa kanini kedu. Ovalihomboli votete, Adam naEva, ova li ve na okudala ounona. Oukwaneumbo oo owa li u na okuhapupala nokulonga edu ndele tave li ningi oparadisa. (Genesis 1:28) Edu kali na fiku li ka hanaunwe po. — Lesha Epsalme 104:5.

2. Omolwashike edu lihe fi oparadisa kunena?

Adam naEva kava li va dulika kuKalunga nomolwaasho a li e va taataa mo muEden. Okudja opo, oparadisa oya kana nokape na vali omunhu a dula okuninga edu oparadisa. Ombibeli oya ti: “Edu ola yandjwa mepangelonghono lovakolokoshi.” — Job 9:24; lesha Genesis 3:23, 24.

Ashike Jehova ina dimbwa elalakano laye lopehovelo li na sha novanhu nokape na nande osha tashi dulu oku mu imba a wanife po elalakano olo. (Jesaja 45:18) Ota ka alulila ovanhu monghalo oyo a li e va halela pehovelo. — Lesha Epsalme 37:11.

3. Ongahelipi Kalunga ta ka etulula ombili kombada yedu?

Opo ovanhu va dule okuhafela ombili, Kalunga oku na tete okuhanauna po ovakolokoshi. Kalunga ota ka longifa ovaengeli poita yaHarmagedon opo a hanaune po aveshe ovo tava tu ondubo naye. Satana ota ka pandekwa oule womido 1 000, ashike ovanhu ovo ve hole Kalunga otava ka xupa po notava ka hafela onghalelo ipe yoinima kombada yedu. — Lesha Ehololo 16:14, 16; 20:1-3; 21:3, 4.

4. Okumona oixuna otaku ka xula po naini?

Momukokomoko womido 1 000, Jesus ota ka pangela edu okudja meulu noku li ninga vali oparadisa. Kakele kaasho, ota ka dima po omatimba ovanhu ovo ve hole Kalunga. Kungaho, ota ka xulifa po omikifi, oukulupe nosho yo efyo. — Lesha Jesaja 11:9; 25:8; 33:24; 35:1.

Kalunga ota ka xulifa po naini owii kombada yedu? Jesus okwa li a yandja ‘edidiliko’ olo la li tali ka ulika kutya exulilo oli li popepi. Eenghalo domounyuni kunena oda tula okukalamwenyo kwovanhu moshiponga notadi ulike kutya otu li ‘pefimbo lexulilo longhalelo yoinima, NW.’ — Lesha Mateus 24:3, 7-14, 21, 22; 2 Timoteus 3:1-5.

5. Oolyelye tava ka kala mOparadisa monakwiiwa?

Jesus okwa li a lombwela ovashikuli vaye va ka ninge ovanhu ovahongwa noku va honga oiteelelwa yaKalunga yopahole. (Mateus 28:19, 20) Jehova ota longekida ovanhu omamiliyona mounyuni aushe kunena opo va dule oku ka kala nomwenyo monghalelo ipe yoinima kombada yedu. (Sefanja 2:3) Ovanhu kunena ohava hongwa mOmalupale Ouhamba Eendombwedi daJehova shi na sha nanghee tava dulu okukala ovashamane, ovakulukadi novadali vaxwepo. Ounona novadali ohave lihongo kutya omolwashike ve na omatomheno mawa okwiitavela kutya onakwiiwa otai ka kala itunhula. — Lesha Mika 4:1-4.

POlupale lOuhamba ohapa kala ovanhu ovo ve hole Kalunga nova hala okulihonga osho ve na okuninga opo va kale va hokiwa kuye. — Lesha Ovaheberi 10:24, 25.

Opo u mone ouyelele wa wedwa po, tala etukulwa 3 lembo olo la ulikwa opo Ombibeli otai hongo lela shike?, la nyanyangidwa kEendombwedi daJehova.