Otwa teelela omafimbo mawa e li komesho

“Ngenge pa pita okafimbo kaningholi, omuhenakalunga ita kala po vali . . . Ndelenee ovananheni vo otava ka fyuulula edu, ndee tava ka hafela ombili inene.” — EPSALME 37:10, 11.

MBELA owa hala oku ka mona nghee exunganeko olo tali ka wanifwa? Kape na omalimbililo kutya owa hala oku ke shi mona. Ope na omatomheno mawa okwiitavela kutya exunganeko olo otali ka wanifwa mafiku.

Otwa kundafana kombinga yomaxunganeko amwe Ombibeli moitukulwa ya tetekela oo taa yandje oumbangi wa yela kutya otu li ‘momafiku axuuninwa.’ (2 Timoteus 3:1-5) Kalunga okwa li a nwefa mo ovashangi vOmbibeli va xunganeke oiningwanima oyo opo tu dule okukala tu na eteelelo. (Ovaroma 15:4) Okuwanifwa kwomaxunganeko oo otaku ulike kutya omaupyakadi oo hatu shakeneke kunena otaa ka xulifwa po mafiku.

Ndele mbela oshike tashi ka ningwa po konima yomafiku axuuninwa? Ouhamba waKalunga otau ka hovela okupangela ovanhu aveshe. (Mateus 6:9) Natu ka taleni osho Ombibeli tai ti shi na sha nomalunduluko oo taa ka ningwa kombada yedu pefimbo opo.

● Ondjala otai ka xulifwa po. “Moshilongo namu kale oshishipo shoilya, yo i mene fiyo keexulo deemhunda.” — Epsalme 72:16.

● Omikifi otadi ka xulifwa po. “Onakukala mo nande umwe ta ti: Aame oshingone.” — Jesaja 33:24.

● Edu otali ka wapekwa. “Ombuwa nomalondo otaa ka hafa, nofuka tai nyakukwa pombada, otai liwapaleke ngaashi onhemo yedo.” — Jesaja 35:1.

Oo oamwe ashike omomaxunganeko Ombibeli oo taa ka wanifwa mafiku. Omolwashike ito pula Eendombwedi daJehova di ku ulikile kutya omolwashike da itavela kutya otaku ke uya omafimbo mawa?