Natu shikuleni Kristus, Omuwiliki a wanenena
OVANHU ovo hava shikula omapangelo opanhu ohava nyematekwa luhapu. Ndele ovanhu ovo hava dulika kewiliko laKristus ihava nyematekwa nandenande. Jesus okwa ti: “Ileni kuame, nye amushe hamu longo nomwa lolokifwa, Ame ohandi mu pe etulumuko. Litwikeni ondjoko yange nye mu lilonge kuame, osheshi Aame omunambili momutima onde lininipika; ndee tamu limonene eemwenyo deni etulumuko.” (Mat. 11:28, 29) Ewiliko laJesus ohali tulumukifa shili ovanhu. Oku na ko nasha neenghono neehepele nosho yo ovo va lolokifwa, note va shivi ve litwike ondjoko yaye ipu. Ndele mbela okushikula ewiliko laJesus okwa kwatela mo shike?
Omuyapostoli Petrus okwa shanga a ti: ‘Kristus okwe mu hepekelwa nokwe mu fiila oshihopaelelwa mu shikule oshikoti shaye filufilu.’ (1 Pet. 2:21, yelekanifa no-NW.) Omolwashike sha fimana okushikula oshikoti shaJesus? Natu tye nee ngeno omu li ongudu nomu na okweenda mepya lonhumba mu na eeboma, ndele umwe womunye oye aeke e shii nghee tamu dulu okupita mo nopehe na oupyakadi washa. Mbela ito ka shikula oshikoti shaye filufilu, tashi dulika to ka lyata apa a lyata? Sha faafana, nafye onakwiiwa yetu otai ka kala ashike ya amenwa ngeenge otwa shikula oshihopaenenwa shaJesus filufilu monghedi yetu aishe yokukalamwenyo. Okuninga ngaho okwa kwatela mo okupwilikina nokudulika kuye nosho yo okulongela kumwe novakalelipo vaye.
Pwilikina nokudulika keendjovo daJesus
Jesus okwa li a popya pexulilo leudifo laye lokomhunda a ti: “Keshe tuu ou ta udu eendjovo edi dange ndee te di wanifa, oye ta yelekwa nomulumenhu omunaendunge, a tungila ongulu yaye kemanya. Ndele odula ya pauka, efundja le uya, neemhepo da pepa de litwa mongulu ei, ndele ongulu inai teka po, osheshi oyo ya tungilwa kemanya.” — Mat. 7:24, 25.
Jesus okwa ti kutya omulumenhu oo ha pwilikine nokudulika keendjovo daye “omunaendunge.” Mbela ohatu ulike ngoo kutya ohatu dulika nomutima aushe mokukala twa fimaneka notwa lenga oshihopaenenwa shaKristus ile otu na eamo lokuhoolola okudulika ashike kuimwe yomoipango yaye oyo ipu ile oyo tu wete tai tu wapalele? Jesus okwa ti: ‘Ohandi longo ashishe osho sha wapalela [Kalunga].’ (Joh. 8:29) Onghee hano, natu kendabaleni okushikula oshihopaenenwa shaJesus.
Ovayapostoli ovo va li ko mefelemudo lotete ova tula po oshihopaenenwa shiwa shokudulika kewiliko laKristus. Pomhito imwe, Petrus okwa li a lombwela Jesus a ti: “Tala, fye otwa fiya po [aishe], ndele otwe ku shikula.” (Mark. 10:28) Ovayapostoli ova li shili va lenga ewiliko laJesus nomolwaasho va li va fiya po oinima imwe nehalo liwa opo va dule oku mu shikula. — Mat. 4:18-22.
Kala ho longele kumwe novakalelipo vaKristus
Okafimbo kaxupi komesho yefyo laye, Jesus okwa li a popya onghedi imwe vali omo hatu dulu okushikula ewiliko laye. Okwa ti: “Ou ta tambula ou handi mu tumu, ota tambula nge.” (Joh. 13:20) Jesus okwa ti kutya ovakalelipo vaye ovavaekwa ove li ‘ovamwaxe.’ (Mat. 25:40) Konima yokunyumuka nokulonda kwaye meulu, ‘ovamwaxe’ ova li va nangekwa po va longe ‘ponhele yaye’ ve li ovatumwa, tava shivi vamwe va hangane naJehova Kalunga. (2 Kor. 5:18-20) Onghee hano, okutambula ko ewiliko laKristus okwa kwatela mo yo okudulika ‘kovamwaxe.’
Oshiwa okulikonakona kutya ohatu linyenge ngahelipi komayele opamishangwa e li pefimbo oo haa yandjwa moishangomwa yetu ya kanghamena kOmbibeli. Ohatu dimbulukifwa eendjovo daKristus ngeenge hatu konakona Omishangwa nosho yo okukala pokwoongala kweongalo. (2 Pet. 3:1, 2) Ohatu ulike olupandu tali di komutima li na sha neendja dopamhepo moku di lya pandjikilile. Ndele mbela ohatu ke linyenga ngahelipi ngeenge omayele onhumba ohaa endululwa lwoikando? Pashihopaenenwa, Eendjovo daKalunga oda yandja omayele kOvakriste va hombole “ashike mOmwene.” (1 Kor. 7:39, yelekanifa no-NW.) Oshinima sha tya ngaho osha kala tashi kundafanwa lwoikando mOshungonangelo oule womido di dule pefele. Ovamwaxe vaKristus ohava ulike kutya ove na ko nasha nonghalo nawa yetu yopamhepo mokunyanyangida oitukulwa i na sha naasho nosho yo omayele makwao a nwefwa mo. Okuyandja elitulemo komadimbulukifo a tya ngaho oyo onghedi imwe omo hatu ulike kutya ohatu shikula Omuwiliki wetu a wanenena, Jesus Kristus.
Omayeletumbulo 4:18 okwa ti: “Elila lovayuki li li ngaashi eluwa tali tende, lo tali eta ouyelele tau hapupala fiyo omutenya tau tu.” Oshoshili kutya ewiliko laJesus otali twikile alushe. Onghedi imwe vali omo hatu dulu okulongela kumwe ‘novamwaxe’ vaKristus oyo okukala tu na etaleko la yuka ngeenge tashi uya pouyelele wa pepalekwa u na sha neudeko loshili yopamishangwa oo hau nyanyangidwa ‘komupiya omudiinini nomunaendunge.’ — Mat. 24:45.
Ohatu ulike yo kutya ohatu dulika ‘kovamwaxe’ vaKristus mokulongela kumwe novapashukili ovo va nangekwa po meongalo lopaKriste. Omuyapostoli Paulus okwa ti: “Shikuleni ovakwatelikomesho veni, nye mu dulike kuvo, osheshi ovo ohava pashukile eemwenyo deni.” (Heb. 13:17) Pashihopaenenwa, omukulunhuongalo otashi dulika e tu ladipike shi na sha nanghee sha fimana okukala hatu ningi Elongelokalunga lOukwaneumbo ile tashi dulika e tu pe omaetepo e na sha noshinima shonhumba osho sha pamba oukalele wetu. Omupashukili omweendi otashi dulika e tu pe omayele taa kwafa opamishangwa e na sha noshinima shokondadalunde osho sha pamba okukalamwenyo kwOmukriste. Ngeenge otwa tula moilonga omayele oo nehalo liwa, ohatu ka ulika kutya ohatu shikula Jesus, Omuwiliki wetu.
Mounyuni kamu na omunhu ta pondola mokuwilika vamwe. Ndele otashi tulumukifa okushikula ewiliko laKristus lopahole. Onghee hano, natu dulikeni kOmuwiliki wetu nokulongela kumwe naavo ta longifa kunena.
[Omafano pepandja 27]
Owa tambula ko ngoo omayele opamishangwa e na sha nokuhahumbata ondjoko imwe naavo vehe fi ovaitaveli?