Ovanyasha otava dulu ngoo okuninginifwa?

XE OMUDALI umwe Omukriste wokuFilipine wedina Carlos,a okwa ti: “Onda hafa neenghono eshi okamonakadona kange ka ninga omupiya waJehova nondi shii kutya nako oka hafa.” Natango, xe umwe omudali wokuGreka okwa ti: “Ame nomukulukadi wange otwa hafa neenghono eshi ounona vetu vatatu va ninginifwa nova ninga Eendombwedi daJehova fimbo va li mepupi lokamukondapweyu. Otava ningi natango exumokomesho lopamhepo nova hafa eshi tava longele Jehova.”

Ovadali Ovakriste ove na omatomheno mawa okukala va tunhukwa ngeenge ounona vavo va ninginifwa, ndele omafimbo amwe ohava kala yo ve na outile. Omudalakadi umwe okwa popya shi na sha nokaana kaye eshi ka ninginifwa a ti: “Onda li nda hafa neenghono, ashike onda li yo nda tila neenghono.” Mbela omolwashike a li e udite ngaho? Okwa ti: “Onda li nda shiiva kutya paife omonamati wange oku na filufilu oshinakuwanifwa shoku ke lihokolola ye mwene kuJehova.”

Ovanyasha aveshe ove na okulitulila po elalakano lokulongela Jehova ve li Eendombwedi daye da ninginifwa. Ndele nande ongaho, omudali omutilikalunga otashi dulika a kale te lipula ta ti: ‘Ondi shii kutya okaana kange oka ninga exumokomesho lopamhepo, ndele mbela otaka ka dula ngoo okukondjifa omafininiko okuya moluhaelo noka kale ka koshoka koshipala shaJehova?’ Ovadali vamwe otashi dulika va kale tave lipula tava ti: ‘Ngeenge okaana kange oka kwatwa kohole yokuhola omaliko, mbela otaka ka twikila ngoo okulongela Jehova nouladi nonehafo?’ Ndele nande ongaho, mbela omayele Ombibeli elipi taa dulu okukwafela ovadali va mone kutya ounona vavo ova wana okuninginifwa?

Okukala omuhongwa waKristus oku li oshiteelelwa sha fimanenena opo omunhu a dule okuninginifwa

Eendjovo daKalunga oda popya kutya omunhu oku na okukala e na oupamhepo wa tya ngahelipi opo a kale a wana okuninginifwa, ashike inadi tya kutya oku na okukala e na omido ngapi. Jesus okwa li a lombwela ovashikuli vaye a ti: “Ka ningeni ovanhu aveshe ovalongwa vange, noku va [ninginifa, NW].” (Mat. 28:19) Onghee hano, ovanhu ovo ve li nale ovahongwa vaKristus ovo ashike va wana okuninginifwa.

Okukala omuhongwa otashi ti shike? O-Insight on the Scriptures oya yelifa tai ti: “Oshitya omuhongwa paulelalela otashi ulike kwaaveshe ovo va itavela omahongo aKristus nohava dulika kuo filufilu.” Mbela ovanyasha veedula dinini elela otava dulu ngoo okuninga ovahongwa vaKristus vashili? Omumwameme umwe oo a kala ta longo moilonga youtumwa muAmerika lokOlukadi oule womido di dulife po 40 okwa popya shi na sha naye mwene nosho yo ovamwainakadona vavali, a ti: “Otwa li twa kula notwa li tu shii kutya otwa hala okulongela Jehova noku ka kala meduparadisa. Okuliyapulila kwetu Jehova okwa li kwe tu kwafela tu kondjife omayeleko oo haa shakenekwa kovanyasha. Itatu lipe nande oushima eshi twe liyapulila Jehova ofimbo twa li ovanyasha elela.”

Ongahelipi to dulu okudidilika kutya okaana koye oka ninga omuhongwa waKristus? Ombibeli oya ti: “[Okamati] take liholola nokuli pakukala kwako, oilonga yako ngenge ya yela noya yuka.” (Omayel. 20:11) Natu ka taleni koinima imwe oyo tai ulike kutya okaana otaka ningi ‘exumokomesho’ ke li omuhongwa. — 1 Tim. 4:15, NW.

Osho tashi ulike kutya okaana koye oke li omuhongwa waKristus

Mbela okaana koye ohaka dulika ngoo kwoove? (Kol. 3:20) Mbela ohaka wanifa po oinakuwanifwa yako meumbo? Ombibeli otai ti kutya eshi Jesus a li e na omido 12 “okwa li ha dulika [kovadali vaye].” (Luk. 2:51) Ashike kunena kape na okaana oko taka ka dulika filufilu kovadali vako ngaashi Jesus. Ndele nande ongaho, Ovakriste vashili ove na ‘okushikula oshikoti shaye.’ Onghee hano, ovanyasha aveshe ovo va hala okuninginifwa ove na okukala ve shiivike kutya ohava dulika kovadali vavo. — 1 Pet. 2:21.

Natu ka taleni komapulo aa taa shikula apa: Mbela okaana koye ohaka ulike ngoo kutya otaka ‘kongo tete ouhamba’ ngeenge tashi uya pokuya moukalele? (Mat. 6:33) Mbela ohaka lombwele ngoo vamwe shi na sha nonghundana iwa nehalo liwa, ile ou na oku ka taataela alushe momapya noka popye navamwe ngeenge tamu longo eumbo neumbo? Mbela oke shii ngoo oshinakuwanifwa shako ke li omuudifi ina ninginifwa? Mbela ohaka kala ka halelela oku ka ninga omalishuneko kwaavo va ulika ohokwe moshitukulwa sheni? Ohaka lombwele ngoo ovanafikola vakwao nosho yo ovahongifikola kutya oke li Ondombwedi yaJehova?

Mbela oka fimaneka ngoo okukala pokwoongala? (Eps. 122:1) Mbela ohaka hafele okuninga omatyekosha pEkonakono lOshungonangelo nosho yo pEkonakonombibeli lEongalo? Ohaka kufa ngoo ombinga nehafo mOfikola yOukalele woPauteokratika? — Heb. 10:24, 25.

Okaana koye ohaka kendabala ngoo okukala ka koshoka paenghedi mokuhenuka eendafano lii kofikola nakeshe tuu? (Omayel. 13:20) Oke hole eemusika doludi lilipi, eemuvi, eeprograma doko-TV nosho yo omaudano eevidio, nohaka longifa ngahelipi o-Internet? Mbela eenghatu neendjovo dako ohadi ulike ngoo kutya oka hala okudulika komifikamhango dOmbibeli?

Okaana koye oke shii Ombibeli shi fike peni? Mbela otaka dulu okuhokolola noitya yako vene osho ke lihonga pElongelokalunga lOukwaneumbo weni? Mbela otaka dulu ngoo okuyelifila vamwe omahovelohongo eeshili dOmbibeli? (Omayel. 2:6-9) Oke hole ngoo okulesha Ombibeli nokukonakona oishangomwa oyo ya nyanyangidwa kongudu yomupiya omudiinini nomunaendunge? (Mat. 24:45) Ohaka pula ngoo omapulo kombinga yomahongo nomishangwa dOmbibeli?

Omapulo oo otaa dulu oku ku kwafela u mone ngeenge okaana koye oka ninga exumokomesho lopamhepo ile hasho. Konima eshi wa konakona omapulo oo, otashi dulika wa didilika kutya okaana koye oka pumbwa okuxwepopala natango moinima yonhumba ofimbo inaka ninginifwa. Ndele ngeenge onghedi yako yokukalamwenyo otai ulike kutya oka ninga omuhongwa noke liyapulila Kalunga, oto dulu oku ka pitika ka ninginifwe.

Ovanyasha otava dulu okutanga Jehova

Ovapiya vaKalunga vahapu ohava ulike oudiinini wavo pefimbo lokamukondapweyu ile diva fimbo inava fika pefimbo olo. Pashihopaenenwa, diladila shi na sha naJosef, Samuel, Josia nosho yo Jesus. (Gen. 37:2; 39:1-3; 1 Sam. 1:24-28; 2:18-20; 2 Omaf. 34:1-3; Luk. 2:42-49) Osha yela kutya ovanakadona vane vaFilippus ovo va li hava xunganeke navo ova li va deulwa nawa fimbo va li ovanyasha elela. — Oil. 21:8, 9.

Ondombwedi imwe yomuGreka oya ti: “Onda ninginifwa eshi nda li ndi na omido 12. Itandi lipe nande oushima omolwetokolo olo nda ninga. Paife opa pita omido 24 okudja eshi nda ninginifwa, nonda kala moilonga yefimbo li yadi omido 23. Ohole yange yokuhola Jehova oyo ya kala alushe hai kwafele nge ndi ungaunge nomaupyakadi oo haa shakenekwa kovanyasha. Eshi nda li ndi na omido 12, kanda li ndi na eshiivo lOmishangwa li fike pwaalo ndi na paife. Ndele nande ongaho, onda li ndi shii kutya ondi hole Jehova nonda hala oku mu longela fiyo alushe. Ohandi pandula Jehova eshi a kwafela nge ndi twikile moilonga yaye.”

Omunhu oo a ulika kutya omuhongwa washili waJesus oku na okuninginifwa, kutya nee omukulunhu ile omunyasha. Omuyapostoli Paulus okwa ti: “Okwiitavela nomutima otaku yukipalifa, nokuhepaulula nokanya otaku xupifa.” (Rom. 10:10) Ngeenge omunyasha oo a ninga omuhongwa waKristus okwa katuka onghatu ya fimana yokuninginifwa, ye novadali vaye otava ka kala ve udite kutya ova pondola. Onghee hano, inamu efa nande osha shi mu imbe mu mone ehafo la tya ngaho.

[Eshangelo lopedu]

[Oshimhungu pepandja 5]

Kala u na etaleko liwa li na sha neninginifo

Ovadali vamwe ohava tale ko eninginifo lounona vavo li li onghatu oyo tai va etele ouwa ndele ohai kala yo i na oilanduliko, ngaashi ashike ngeno omunhu a mona omukanda wokushinga. Ndele mbela eninginifo nosho yo oilonga iyapuki otai dulu ngoo okuningifa omunhu a kale a tila kutya ita ka pondola monakwiiwa? Ombibeli otai nyamukula kutya ahowe. Pashihopaenenwa, Omayeletumbulo 10:22 okwa ti: “Enangeko noupuna lOmwene, olo tali likolifa, noshilonga shidjuu itashi wedele ko sha.” Paulus okwa li a shangela omunyasha Timoteus a ti: “Etilokalunga olo eliko linene shili, shamha omunhu a wana naai yaye.” — 1 Tim. 6:6.

Oshoshili kutya kashipu okulongela Jehova. Pashihopaenenwa, Jeremia okwa li a shakeneka omaupyakadi mahapu eshi a li ta longo e li omuprofeti waKalunga. Ndele nande ongaho, okwa popya shi na sha nokulongela kwaye Kalunga kashili a ti: “Eendjovo doye oda li kuame enyaku nehafo lomutima wange, osheshi ame onda lukilwa edina loye, Omwene, Kalunga komatanga ovakwaita.” (Jer. 15:16) Jeremia okwa li e shii kutya okulongela Kalunga kwaye oko kwa li haku mu etele ehafo. Ounyuni waSatana ohau etele ashike ovanhu omaupyakadi. Onghee hano, ovadali ova pumbwa okukwafela ovana vavo va mone eyooloko olo. — Jer. 1:19.

[Oshimhungu/Efano pepandja 6]

Mbela okaana kange oke na okuteelela ka kule opo ka ninginifwe?

Luhapu, nonande okaana oka kale ka wana okuninginifwa, ovadali otashi dulika va tokole kutya naka teelele manga. Mbela otashi dulika ve shi ninge omolwomatomheno elipi?

Ohandi kala nda tila kutya ngeenge okaana kange oka ninginifwa, pamwe konima yefimbo otaka ka nyona sha kwata moiti ndele taka kondwa. Ndele mbela oshi li ngoo pandunge okutomhafana kutya omunyasha oo ta ongaonga okuninginifwa ite ke lihokolola kuKalunga omolwelihumbato laye? Salomo okwa lombwela ovanyasha a ti: ‘Kala u shi shii nokutya, Kalunga ote ku tokola [she likolelela keenghatu doye].’ (Omuud. 11:9) Paulus okwa li ta lombwele ovanhu vomapupi aeshe eshi a ti: “Keshe umwe womufye e na okulihokolola ye mwene kuKalunga.” — Rom. 14:12.

Ovalongelikalunga aveshe ove na oku ke lihokolola kuKalunga kutya nee ova ninginifwa ile hasho. Ndelenee inatu dimbwa kutya Jehova oha amene ovapiya vaye molwaashi iha efa va ‘yelekwe nomayeleko e dule eenghono davo.’ (1 Kor. 10:13) Ovapiya vaJehova otava dulu okukala ve na elineekelo kutya ote ke va yambidida, shimha ashike ve “nelidiliko,” ile tu tye ve li oupafi nohava kondjifa omayeleko. (1 Pet. 5:6-9) Omudalakadi Omukriste umwe okwa ti: “Ounona ovo va ninginifwa ohava kala ve na omatomheno a kola okuhenuka oinima ii yomounyuni. Omonamati wange oo a ninginifwa eshi a li e na omido 15, okwa mona kutya eninginifo oli li eameno. Okwa ti: ‘Iho diladila nande okuninga oinima oyo ihe li metwokumwe nomhango yaJehova.’ Eninginifo ohali linyengifa lela omunhu opo a longe osho sha yuka.”

Ngeenge owa deula ounona voye okupitila meendjovo nosho yo moshihopaenenwa shoye shiwa va kale hava dulika kuJehova, oto dulu okukala nelineekelo kutya otava ka twikila okukala ovadiinini nokuli nokonima eshi va ninginifwa. Omayeletumbulo 20:7 okwa ti: “Omuyuki ha ende e he noshipo, ovana vaye tave mu shikula vo ovanelao.”

Onda hala okaana kange ka hange tete omalalakano onhumba. Ovanyasha ove na okulihonga okukala hava longo noudiinini opo va dule oku ke lifila oshisho monakwiiwa. Ndele osha nyika oshiponga ngeenge owe va ladipike va lalakanene ashike ehongo nokukonga eameno lopainiwe ponhele yokuyandja elitulemo kelongelokalunga lashili. Jesus okwa popya shi na sha ‘neembuto’ ile eendjovo dOuhamba odo ihadi kulu, a ti: “Odo da kunwa meeshosholo, oye tuu ou ta udu eendjovo, ndelenee oshisho shounyuni neheka loupuna tali fininike eendjovo, ndele ta kala e he noiimati.” (Mat. 13:22) Okulalakanena oinima younyuni ponhele yoinima yopamhepo otaku dulu okuningifa omunyasha aha kale e na ehalo lokulongela Kalunga.

Omukulunhuongalo umwe oo a pyokoka okwa popya shi na sha novanyasha ovo va wana okuninginifwa ndele ovadali itava tu kumwe nasho, a ti: “Okukelela omunyasha aha ninginifwe otaku dulu oku mu imba a ninge exumokomesho lopamhepo notashi ke mu teya omukumo.” Omupashukili omweendi umwe okwa popya shi na novanyasha ovo va kelelwa okuninginifwa kovadali vavo a ti: “Otava dulu okuhovela okukala ve udite inava amenwa pamhepo ile vehe na ongushu yasha. Otashi dulika yo va lalakanene oinima yomounyuni opo va kale ve udite va pondola.”

[Efano]

Mbela okaana oke na okuya manga kounivesiti opo ka ninginifwe nale ngeenge ka di ko?

[Efano pepandja 3]

Omunyasha womido dinini ota dulu okuulika kutya oku li omuhongwa waJesus

[Omafano pepandja 3]

Kala ho lilongekidile okwoongala nokukufa ombinga muko

[Efano pepandja 4]

Kala ho dulika kovadali voye

[Efano pepandja 4]

Kala ho kufa ombinga moukalele

[Efano pepandja 4]

Kala ho ilikana paumwene