Oshiwedelwako

Etumwalaka kovadali Ovakriste:

U li omudali, owa halelela okukwafela ovana voye ovaholike va kale ve hole Jehova nove mu liyapulile. Oshike u na okuninga po opo u va kwafele va kale va wana okuninginifwa?

Onaini ounona ve na okukatuka onghatu oyo ya fimanenena? Jesus okwa lombwela ovashikuli vaye a ti: “Ka ningeni ovanhu aveshe ovalongwa vange noku va [ninginifa, NW].” (Mat. 28:19) Pamushangwa oo, omunhu opo a dule okuninginifwa oku na tete okuninga omuhongwa, sha hala kutya, e udite ko omahongo aKristus nota dulu oku a tula moilonga pauyadi. Oshinima sha tya ngaho otashi dulu yo okuningwa nokokaana.

Tulila po ovana voye oshihopaenenwa shiwa nosho yo okufindila muvo omahongo aJehova. (Deut. 6:6-9) Osho osha kwatela mo okukonakona navo embo Nghee to dulu okuhafela onghalamwenyo fiyo alushe! opo u va honge omahongo opehovelo oshili yOmbiibeli nova shiive okukala metwokumwe nomafinamhango Ombiibeli. Kwafela ovana voye va kale ve shii okuyelifa eitavelo lavo noitya yavo vene. (1 Pet. 3:15) Eshiivo netwomukumo olo to va pe naalo tava mono mekonakono lopaumwene, elongelokalunga loukwaneumbo, pokwoongala nosho yo meendafano liwa otali ke va kwafela va ninge exumokomesho fiyo va ninginifwa. Va kwafela ve litulile po omalalakano opamhepo.

Omayeletumbulo 20:11 okwa ti: “Nokamati take liholola nokuli pakukala kwako, oilonga yako ngeenge ya yela noya yuka.” Eenghatu dilipi tadi ulike kutya okaana, kashi na nee mbudi kutya okamati ile okakadona, oka ninga omuhongwa waJesus Kristus noka wana okuninginifwa?

Okaana oko taka lalakanene okuninginifwa oke na okukala haka dulika kovadali vako. (Oil. 5:29; Kol. 3:20) Ombiibeli oya popya kombinga yaJesus eshi a li e na omido 12 ya ti: “Okwa li ha dulika [kovadali vaye].” (Luk. 2:51) Oshoshili kutya katu na okuteelela okaana ka kale ka wanenena. Ashike okaana oko ka hala okuninginifwa oke na okulandula oshihopaenenwa shaJesus mokukala haka dulika kovadali vako.

Oke na yo okuulika kutya oka halelela okulihonga oshili yOmbiibeli. (Luk. 2:46) Mbela okaana koye oha ka kala ngoo ka halelela okuya kokwoongala nokukufa ombinga muko? (Eps. 122:1) Mbela oke na ngoo ehalo okulesha Ombiibeli nokuninga ekonakonombiibeli lopaumwene pandjikilile? — Mat. 4:4.

Okaana oko taka ningi exumokomesho opo ka ninginifwe oke na okuninga eenghendabala ka pitife komesho oinima yOuhamba. (Mat. 6:33) Oke na okukala ke shii oshinakuwanifwa shako shokukufa ombinga moilonga yokuudifa. Oke na okukala haka kufa ombinga meembinga di lili noku lili doukalele noka ke na okukala ka tila ovahongifikola vako novanafikola vakwao va shiive kutya oke li Ondombwedi yaJehova. Oke na yo okukala haka wanifa po oinakuwanifwa oyo taka pewa pokwoongala kwOnghalamwenyo yopaKriste noilonga yokuudifa.

Oke na yo okukendabala ka kale ka koshoka paenghedi mokuhenuka eendafano lii. (Omayel. 13:20; 1 Kor. 15:33) Osho otashi ke limonikila meemusika, meemuvi nomeeprograma doko-TV, momaudano eevidio odo ke hole nonghee haka longifa ointaneta.

Ovanyasha vahapu ova tambula ko edeulo olo va pewa kovadali vavo, va ninga oshili yavo vene nova ninginifwa fimbo vanini. Jehova ne mu nangeke noupuna eshi tamu kwafele ovana veni va katuke onghatu oyo ya fimana mekwatafano lavo naJehova.

Etumwalaka kovaudifi ovo inava ninginifwa:

Oshi li oufembanghenda munene okukala to longo pamwe neongalo lopaKriste u li omuudifi ina ninginifwa. Oto pandulwa shi na sha nexumokomesho lopamhepo olo wa ninga. Owa shiiva Kalunga eshi wa konakona Eendjovo daye nou na eitavelo momaudaneko aye. — Joh. 17:3; Heb. 11:6.

Otashi dulika wa li melongelokalunga limwe li lili ile tashi dulika wa li uhe na ohokwe nandenande momalongelokalunga fimbo ino hovela okukonakona Ombiibeli nEendombwedi daJehova. Ile otashi dulika wa li ho ningi oinima yonhumba oyo ihe li metwokumwe nomafinamhango Ombiibeli. Ndele paife owa ulika kutya ou na eitavelo eshi we lidilulula, sha hala kutya, we livela ombedi omolwoinima ii oyo kwa li ho ningi. Owa ulika yo kutya ou na eitavelo eshi we lialuluka, sha hala kutya, wa efa po onghedi yoye yokukalamwenyo yonale oyo ihe li metwokumwe nomifikamhango daKalunga douyuki nowa tokola toko okuninga osho sha yuka koshipala shaKalunga. — Oil. 3:19.

Otashi dulika u shii omishangwa diyapuki okudja “mounona woye.” Naasho otashi dulika she ku amena uha ninge oinima oyo ihe li metwokumwe nomifikamhango dopaKriste nouha nyone sha kwata moiti. (2 Tim. 3:15) Owe lihonga okukondjifa omafininiko oomakula nokuhenuka omaheka oo taa dulu okuningifa omunhu a ninge oinima oyo inai yuka koshipala shaJehova. Owa ulika kutya ou na eitavelo mokukala wa kanyatela kelongelokalunga lashili nosho yo mokulombwela vamwe kombinga yeitavelo loye. Owa deulwa nghee u na okulonga moukalele. Paife owa ninga etokolo loye mwene okulongela Jehova u li omuudifi ina ninginifwa.

Kashi na nee mbudi kutya owa hongwa eendjila daJehova okudja kounona woye ile owe di shiiva ashike eshi wa konakona Ombiibeli, paife otashi dulika to diladila okukatuka eenghatu mbali odo u na okukatuka eshi to ningi exumokomesho lopamhepo, eliyapulo neninginifo. Omunhu ohe liyapulile Jehova okupitila meilikano, omo he mu shiivifile kutya okwa tokola toko oku mu longela oye aeke fiyo alushe. (Mat. 16:24) Okudja opo, oha ninginifwa, shi li edidiliko leliyapulo laye. (Mat. 28:19, 20, NW) Kungaho, oha ningi omukalele waJehova Kalunga a yapulwa. Kau fi tuu oufembanghenda mukumwifi!

Ngaashi we lihonga mekonakonombiibeli loye, oto ka shakeneka omashongo e lili noku lili monghalamwenyo. Dimbuluka kutya, okafimbo kaxupi konima eshi Jesus a ninginifwa, “okwa twalwa kOmhepo mombuwa a ka hongaulwe kuSatana.” (Mat. 4:1) Ngeenge owa ninginifwa, sha hala kutya, wa ninga omuhongwa waKristus, oto ka shakeneka natango omayeleko. (Joh. 15:20) Omashongo otae ke uya meenghedi di lili noku lili. Otashi dulika u kale to patanekwa kovapambele voye. (Mat. 10:36) Otashi dulika u ka shekwe kovanafikola vakweni, kovanailonga vakweni nokookaume koye vonale. Ndele dimbuluka alushe eendjovo daJesus odo di li muMarkus 10:29, 30, tadi ti: “Oshili handi mu lombwele: Kape na ou a fiya po molwange nomolwevaengeli eumbo ile ovamwaxe ile ina ile xe ile ounona ile omapya, ndele ye ita mono ngeno lwefele, paife mounyuni ou mokati komahepeko omaumbo novamwaina ovalumenhu novamwaxe ovakainhu nooina nounona nomapya nomounyuni tau uya omwenyo waalushe.” Onghee hano, twikila okuninga eenghendabala da mana mo opo u ehene popepi naJehova nokukala metwokumwe nomifikamhango daye douyuki.

Ngeenge owa hala okuninginifwa, shi shiivifila omuunganeki wovakulunhuongalo. Omapulo oo taa ka landula etumwalaka eli otaa ka kala ekanghameno leenghundafana deni novakulunhuongalo, eshi tave ke ku pula opo va shilipaleke ngeenge owa wana tuu shili okuninginifwa. Oto dulu okuhovela okukonakona omapulo oo pauhandimwe, to a kwatele melandulafano loye lekonakonombiibeli lopaumwene londjikilile.

Opo u lilongekidile nawa eenghundafana odo, lesha komesho yefimbo nokudilonga kombinga yOmishangwa odo da tofwa mo Oto dulu okuninga omadidilikoshango opaumwene membo eli ile pamwe pe lili. Oto dulu okulongifa embo eli ile oshifo omo wa ninga omadidilikoshango oye, eshi tamu kundafana omapulo novakulunhuongalo. Ngeenge ku udite ko nawa omapulo onhumba eshi to lilongekida, owa manguluka okupula omunhu oo hamu konakona naye Ombiibeli ile omukulunhuongalo keshe.

Ino pumbwa okuyandja omanyamukulo malemale ile omanyamukulo a kitakana eshi to ka pulwa omapulo eninginifo. Oshiwa okuyandja omanyamukulo e li pauxupi nokwa yela nawa, to nyamukula noitya yoye mwene. Oshiwa yo okunyamukula omapulo oo to tofa mo omushangwa umwe ile mbali, opo u ulike kutya omanyamukulo oye okwa kanghamena kOmishangwa.

Ngeenge eshiivo loye li na sha nomahovelohongo Ombiibeli inali wana, ovakulunhuongalo otava ka ninga omalongekido opo u kwafelwe natango u ude ko nawa omahovelohongo Ombiibeli nou dule oku ka nyamukula omapulo eninginifo noitya yoye mwene. Ngeenge owa xumu komesho, oto ka dula okuninginifwa konahiya.

[Ovakulunhuongalo nava didilike: Omalombwelo e na sha nanghee mu na okukundafana naavo va hala okuninginifwa oku li pepandja 208-212.]