Oshungonangelo ipe yOshiingilisha sha pupalekwa
OTWA hafa oku mu shiivifila kutya otapa kala tapa nyanyangidwa Oshungonangelo ipe yOshiingilisha sha pupalekwa. Oshifo osho otashi ningwa omalolelo oule womudo umwe nongeenge otashi kwafele shili ovanhu, otashi ka twikila okukala hashi nyanyangidwa. Oshifo osho otashi ka kala hashi tuminwa komaongalo oshita naasho sha kala hashi piti shito. Moshifo osho otamu ka kala oitukulwa yokukonakonwa nongeenge omhito otai shi pitike otamu kala yo hamu kala oitukulwa imwe ya wedwa po. Otwe lineekela kutya oshifo osho otashi ka kwafela neenghono Eendombwedi dihapu di wanife po omhumbwe yado ya fimanenena yopamhepo. Ndele mbela omolwashike Oshungonangelo oyo ya pumbiwa?
Oshiingilisha osho elaka olo hali longifwa kovamwatate moilongo ihapu ngaashi Fiji, Ghana, Kenya, Liberia, Nigeria, Papua New Guinea, Solomon Islands. Ovamwatate vahapu moilongo oyo ohava longifa elaka lOshiingilisha pokwoongala nosho yo moukalele, ndele otashi dulika yo hava popi omalaka avo oshidalelwamo ngeenge ve li komaumbo avo. Ndele Oshiingilisha osho hashi popiwa moilongo oyo otashi dulika sha yooloka ko kwaasho hashi longifwa moileshomwa yetu. Kakele kaasho, ovamwatate vamwe ovo va tembukila koilongo imwe oko ihaku popiwa omalaka avo ove na ashike okulongifa Oshiingilisha nonande kave shi shii nawa. Osho ohashi va fininike yo va ka ongale komaongalo oko haku popiwa Oshiingilisha.
Oitukulwa oyo hai konakonwa pEkonakono lOshungonangelo oshivike keshe oi li oupitilo wa fimanenena oo omupiya omudiinini ha longifa oku tu pa eendja dopamhepo pefimbo la wapala. Onghee hano, oshifo shOshiingilisha sha pupalekwa otashi ka kwafela ovamwatate vahapu mounyuni va dule okumona ouwa mEkonakono lOshungonangelo. Oshipeko shoshifo osho shipe otashi ka kala sha yooloka ko kwaasho sha kala hashi piti shito. Ashike oitukulwa yokukonakonwa otai ka kala i na oupalanyole, outendo, omapulo eendululo nosho yo omafano a faafana naao e li moshifo osho shikulu. Onghee hano, omunhu keshe ota dulu okuhoolola oshifo osho a hala okulongifa pEkonakono lOshungonangelo. Opo u mone eyooloko pokati koifo oyo, tala oshihopaenenwa osho shi li pedu sha kufwa mokatendo okativali koshitukulwa shotete shokukonakonwa.
Otwe lineekela kutya efiloshisho olo otali ka nyamukula omailikano avahapu ovo va li va indila kuJehova tava ti: “Longe nge omayele, ndi lilonge oipango yoye.” (Eps. 119:73) Otwe lineekela yo kutya oshifo osho shipe otashi ka kwafela ovamwatate vahapu, mwa kwatelwa ovanyasha ovo hava popi Oshiingilisha, opo va kale have lilongekidile noupu Ekonakono lOshungonangelo lokoshivike. Jehova oku hole “ovamwatate” mounyuni aushe nohatu pandula eshi ta longifa “omupiya omudiinini nomunaendunge” e tu pe eendja dopamhepo da wana. — 1 Pet. 2:17; Mat. 24:45.
Olutuwiliki lEendombwedi daJehova