Mbela ounona ove na okulihonga kombinga yaKalunga?

OMUSHANGIMAMBO UMWE OMWIINGILISHA, JONATHAN SWIFT, OKWA TI: “Otu na omalongelokalunga oo tae tu ningifa ashike tu kale tu tondafane, ndele itae tu ningifa tu kale tu holafane.”

SWIFT okwa popya eendjovo odo mefelemudo eti-18, ndele ovanhu vahapu kunena otava tu kumwe naye. Ashike vamwe ova itavela kutya ovadali kave na oufemba wokuhonga ovana vavo kombinga yaKalunga. Otava ti kutya ounona ovo va tekulwa momaukwaneumbo opalongelokalunga ova kambela sha.

Ove oto ti ngahelipi? Lilipi lomomatumbulo aa taa landula li li pandunge lela?

● Ovadali kave na okuhonga ovana vavo kombinga yaKalunga.

● Ovadali ove na okuteelela fiyo ounona va kula opo va dule okukundafana navo oinima ya pamba elongelokalunga.

● Ovadali ove na okuhonga ounona fimbo vanini osho va itavela kombinga yaKalunga. Ndele ngeenge ounona va kulu, ove na oku va ladipika va kale hava ningi omatokolo kuvo vene.

● Ounona ove na okutambula ko osho ovadali vavo va itavela kombinga yaKalunga kutya nee oshi li mondjila ile kashi li mondjila.

Mbela elongelokalunga ola nyika oshiponga kounona?

Kape na omudali omunahole a hala okweetela okaana kaye oshiponga. Ndele mbela ope na omaumbangi oo taa yambidida omapopyo aavo va hala okukelela ounona vehe lihonge kombinga yaKalunga? Omido omilongo da pita, ovakonakoni voinima ova konakona va mana mo shi na sha nanghee elongelokalunga lovadali hali kumu ounona. Ovakonakoni ovo ova li va fika pexulifodiladilo lilipi?

Ovakonakoni ovo ova didilika kutya elongelokalunga otali dulu okunwefa mo nawa okaana eshi taka kulu ponhele yoku ka etela oshiponga. Mo 2008, moshifo shedina Social Science Researcha omwa li mwa nyanyangidwa olaporta ya ti: “Okwa didilikwa kutya elongelokalunga ohali xwepopaleke ekwatafano lokaana nomudali, kutya nee onaina ile onaxe.” Olaporta oyo oya ti vali: “Elongelokalunga nosho yo oupamhepo oyo oinima ya fimana monghalamwenyo younona vahapu noya fimanenena komaukwaneumbo opo a kale e na ekwatafano liwa.” Didilika nghee osho sha pambafana naasho Jesus Kristus a popya a ti: “Ovanelao eehepele domhepo, osheshi ouhamba weulu [owavo].” — Mateus 5:3.

Ongahelipi shi na sha nediladilo olo kutya ounona ove na okukula manga opo va dule okulihonga kombinga yaKalunga noyelongelokalunga? Ediladilo olo kali li metwokumwe noushili ou kutya: Omadiladilo okaana otaa faafanifwa nokavela kehe na sha ka teelela ka yadekwe. Ovadali ove na okuninga ehoololo kutya otava hongo ovana vavo omifikamhango dopaenghedi nosho yo eitavelo olo ve wete li li mondjila ile otava efa ve lihonge keshe osho tava udu kuvamwe.

Ope na oshiholekwa shilipi?

Ondjokonona otai ulike kutya elongelokalunga otali dulu okunwefa mo ovanhu va kale ve na okatongo noutondwe. Ndele mbela ongahelipi ovadali tava dulu okuhenuka oidjemo oyo ya tumbulwa kuJonathan Swift? Ongahelipi tava dulu okuhonga ovana vavo eitavelo olo tali va kwafele va kale ve hole vamwe?

Otava ka shiiva oshiholekwa ngeenge ova mono omanyamukulo omapulo aa atatu: (1) Ounona ove na okulihonga shike? (2) Olyelye e na oku va honga? (3) Eenghedi dokuhonga dilipi hadi pondola?

[Eshangelo lopedu]