Omaetepo e na sha nokuninga Elongelokalunga lOukwaneumbo nosho yo Ekonakono lopaumwene

OKUDJA pehovelo lo 2009, opa li pa ningwa elunduluko li na sha nokwoongala momaongalo Eendombwedi daJehova mounyuni aushe. Okwoongala kwopavali oko kwa li haku ningwa mokati koshivike okwa li kwa mbwangwa mumwe, novanhu aveshe ova li va ladipikwa va kale hava longifa onguloshi oyo vehe na okwoongala mokuninga Elongelokalunga lOukwaneumbo ile Ekonakono lopaumwene. Ndele mbela oho longifa ngoo nawa elongekido olo lipe? Oho mono mo ngoo ouwa pauyadi?

Ovanhu vamwe ohava kala tave lipula kutya oshike ve na okukala hava konakona pelongelokalunga lavo loukwaneumbo. Olutuwiliki inali hala okutulila po omaukwaneumbo omusholondodo woikundafanwa yokondadalunde. Onghee hano, otashi ka kala shiwa ngeenge omitwe doukwaneumbo ile oohandimwe ova tale kutya ongahelipi tava dulu okulongifa nawa onguloshi oyo oshivike keshe, molwaashi eenghalo dovanhu oda yoolokafana.

Omaukwaneumbo noohandimwe vamwe ohave lilongekidile okwoongala kweongalo pefimbo lelongelokalunga loukwaneumbo, ndele osho hasho ashike sha pumbwa okuningwa pelongekido olo. Vamwe ohava lesha nokukundafana Omishangwa nohava dana yo oinyandwa ya kanghamena kudo, unene tuu ngeenge momaukwaneumbo avo omu na ounona. Otashi dulika itashi ka kala alushe shiwa okuninga elongelokalunga leni monghedi yomapulo nomanyamukulo, ngaashi oyo hai longifwa pokwoongala. Ndele ngeenge Elongelokalunga lOukwaneumbo omwa kala hamu li ningi monghedi omo keshe umwe e udite a manguluka, luhapu ohashi linyengifa keshe umwe a kufe ombinga meenghundafana noku ninge omaetepo. Okuninga elongelokalunga leni monghedi ya tya ngaho ohaku ningifa vamwe va diladile moule, ve li tyapule novaha dimbwe diva osho ve lihonga.

Xe omudali umwe oo e na ounona vatatu okwa ti: “Oinima oyo hatu ningi pelongelokalunga letu luhapu ohai kala ya kanghamena kelesho lOmbibeli. Keshe umwe oha lesha etukulwa lOmbibeli komesho yefimbo, ounona ohava hoolola oinima oyo tava ka ninga omalafululo e na sha nayo nohave uya okuhokolola ouyelele oo va mona. Luhapu Michael [womido 7] oha faneke omafano ile a shange okatendo konhumba. David naKaitlyn [umwe oku na omido 13, mukwao 15] otashi dulika va shange omahokololo Ombibeli tave shi ningi monghedi omo va fa ngeno opo va li eshi oiningwanima oyo ya li tai ningwa. Pashihopaenenwa, eshi twa li hatu lesha kombinga yeendjodi odo Josef a li a fatululila omupindili nomuteleki waFarao, Kaitlyn okwa li a shanga ehokololo olo e li onga umwe womovanadolongo ovo va li tava tale eshi Josef a li ta fatulula eendjodi odo.” — Gen., etukulwa 40.

Luhapu eenghalo dovanhu ohadi kala da yoolokafana. Osho tashi longo koukwaneumbo ile komunhu wonhumba otashi dulika shiha longe kuvamwe. Mokamhungu koshitukulwa eshi omu na omaetepo mahapu oo tamu dulu okulongifa pelongelokalunga loukwaneumbo weni ile pekonakono lopaumwene. Ndele otashi dulika pe na natango eenghedi dimwe dihapu odo tamu dulu okulongifa pelongelokalunga leni.

[Oshimhungu/Efano pepandja 7]

Omaetepo komaukwaneumbo omo mu na ovanyasha vepupi lokamukondapweyu:

• Lesheni nokukundafana omambo Questions Young People Ask — Answers That Work.

• Lideuleni okukala hamu lesha mwa fa mu li meenghalo odo tamu lesha kombinga yado. (Tala Oshungonangelo 1 Juni 1996, epandja 13, okatendo 17-18.)

• Hepaululilafaneni kombinga yomalalakano oo mwa hala okuhanga meni lefimbo lixupi nosho yo monakwiiwa.

• Kaleni hamu tale nokukundafana ouvidio vehangano efimbo nefimbo.

• Kaleni hamu kundafana oitukulwa yOshungonangelo oyo i na oshipalanyole: “For Young People (Oitukulwa yovanyasha).”

Omaetepo kovalihomboli ovo vehe na ounona:

• Kundafaneni etukulwa 1, 3, 11 fiyo 16, lembo Osho tashi dulu okukwafela oukwaneumbo u kale wa hafa shili.

• Kundafaneni oitwa oyo mwa mona eshi mwa ninga omalafululo e na sha nelesho lOmbibeli.

• Lilongekidileni Ekonakonombibeli lEongalo ile Ekonakono lOshungonangelo.

• Kundafaneni kombinga yeenghedi di lili noku lili omo tamu dulu okutamununa mo oukalele weni mu li ovalihomboli.

Omaetepo kovamwatate novamwameme ovo inava hombola ile inava hombolwa ile ovo ve li momaukwaneumbo a tukauka palongelokalunga:

• Konakoneni oishangomwa ipe oyo ya yandjwa poshoongalele shoshitukulwa.

• Lesheni o-Yearbook (embo lokomudo) olo opo la piti naao makulu.

• Ningeni omalafululo kombinga yomapulo oo haa pulwa luhapu kovanhu moshitukulwa sheni.

• Lideuleni omatwalemo oo tamu ka longifa moilonga yomomapya.

Omaetepo komaukwaneumbo omo mu na ounona vanini:

• Daneni oinyandwa ya kanghamena komahokololo Ombibeli.

• Lipuleni omapulo oo taa kwafele omunhu a diladile, ngaashi oo haa kala pepandja 30 no 31 lo-Awake!

• Peemhito dimwe, kaleni hamu ningi oinima oyo tai mu kwafele mu faneke oiningwanima yonhumba momadiladilo. (Taleni oshitukulwa: “Studying the Bible — In the Zoo! (Konakoneni Ombibeli mu li moparka),” shi li mo-Awake! yo 8 Marsa 1996, epandja 16-19.)

• Kundafaneni oitukulwa oyo hai kala mOshungonangelo i na oshipalanyole: “Teach Your Children (Honga ounona voye).”