Ekwafo komaukwaneumbo
1. Ongahelipi Eshabata la li hali etele ouwa omaukwaneumbo Ovaisrael keshe oshivike?
1 Okudiininwa kwEshabata okwa li elongekido laJehova lopahole nola li la etela omaukwaneumbo Ovaisrael ouwa. Eshabata ola li hali pe Ovaisrael omhito opo va tulumukwe po koilonga yavo yakwalukeshe nova dilonge kombinga yomauwa oo Jehova e va ningila nosho yo kombinga yekwatafano lavo naye. Ovadali ova li hava dulu okulongifa omhito oyo opo va findile Omhango momitima dovana vavo. (Deut. 6:6, 7) Eshabata ola li yo hali pe oshiwana shaJehova omhito keshe oshivike opo shi dule okuyandja elitulemo koinima yopamhepo.
2. Eshabata otali tu hongo shike kombinga yaJehova?
2 Oshoshili kutya Jehova ina teelela omaukwaneumbo a kale haa diinine Eshabata kunena, ndele nande ongaho, elongekido olo otali tu hongo sha kombinga yaye. Ohe lipula alushe neenghono shi na sha nonghalonawa yopamhepo yovapiya vaye. (Jes. 48:17, 18) Kunena, Jehova oha ulike okunakonasha kwaye kwopahole kwa tya ngaho okupitila melongekido lEkonakono lOukwaneumbo.
3. Ekonakono lOukwaneumbo ola totwa po nelalakano lashike?
3 Ekonakono lOukwaneumbo ola totwa po nelalakano lashike? Okuhovela muJanuali 2009, opa li pa ningwa elongekido opo Ekonakono lEmbo lEongalo li kale hali ningwa mefiku limwe nOfikola yOukalele woPauteokratika nosho yo Okwoongala kwoPailonga. Etomheno limwe kutya omolwashike pa li pa ningwa elongekido la tya ngaho olo okupa omaukwaneumbo omhito e litulile po efiku lokondadalunde oshivike keshe opo a dule okutungafana pamhepo. Omaukwaneumbo okwa li a ladipikwa kutya ngeenge otashi shiiva naa tule Ekonakono lOukwaneumbo mefiku omo mwa li hamu ningwa Ekonakono lEmbo lEongalo. Okwa li yo a ladipikwa aha ninge eenghundafana dopaMbibeli meulumo nokutala kutya oshike osho oukwaneumbo keshe wa pumbwa okukundafana kombinga yasho.
4. Mbela Ekonakono lOukwaneumbo oli na ashike okuningwa oule wovili imwe? Shi yelifa.
4 Nale, opo omunhu a dule okukala pEkonakono lEmbo lEongalo, okwa li ha pumbwa efimbo lokudjala, lokuya kokwoongala nosho tuu. Vahapu vomufye okwa li hashi tu pula shihapu shihe fi ashike ovili imwe oyo Ekonakono lEmbo lEongalo la li hali ningwa. Ndele eshi pa ningwa omalunduluko shi na sha nokwoongala kwetu, paife onguloshi oyo twa li hatu i kEkonakono lEmbo lEongalo ohatu i longifa po mokulongela Jehova tu li oukwaneumbo. Onghee hano, Ekonakono lOukwaneumbo ka li na ashike okukala hali ningwa moule wovili imwe. Ponhele yaasho, otu na tete okulipula kombinga yeemhumbwe nosho yo omangabeko oilyo youkwaneumbo wetu, opo nee, hatu tula po efimbo lokondadalunde lEkonakono lOukwaneumbo.
5. Mbela eevili odo twe litulila po dEkonakono lOukwaneumbo otu na ashike oku di longifa mokukonakona tu li ongudu? Shi yelifa.
5 Mbela eevili odo twe litulila po dEkonakono lOukwaneumbo otu na ashike oku di longifa mokukonakona tu li ongudu? Ovalihomboli nosho yo omaukwaneumbo omo mu na ounona ohava twaafana omukumo ngeenge tava kundafana pamwe oinima yopamhepo. (Rom. 1:12) Okuninga ngaho, ohaku kwafele yo omaukwaneumbo a kale e na ekwatafano liwa. Onghee hano, okukundafana oinima yopamhepo oku na okukala oshitukulwa sha fimanenena shEkonakono lOukwaneumbo. Ashike oshilyo keshe shoukwaneumbo oshi na yo okukala hashi konakona oinima yasho imwe paumwene. Pashihopaenenwa, ngeenge omwa mane okukonakona mu li ongudu, oshilyo keshe shoukwaneumbo otashi dulu okutwikila okukonakona paumwene, tashi dulika shi lilongekidile oitukulwa oyo tai ka konakonwa pokwoongala ile shi leshe oifo yonhumba. Omaukwaneumbo amwe okwa tokola okukala ihaa tale o-TV onguloshi oyo taa ningi ekonakono lavo loukwaneumbo.
6. Eenghundafana doukwaneumbo otadi dulu okuningwa monghedi ilipi?
6 Nghee Ekonakono lOukwaneumbo tali dulu okuningwa: Inamu pumbwa ashike okukala hamu ningi eenghundafana domapulo nomanyamukulo. Ndele opo Ekonakono lOukwaneumbo li kale la mwenyopala nolihokwifa, omaukwaneumbo mahapu okwa unganeka ekonakono lao monghedi ya faafana naayo hai longifwa pokwoongala oko haku ningwa mokati koshivike. Ohava kundafana oinima i lili noku lili nohave shi ningi meenghedi da yoolokafana. Pashihopaenenwa, otashi dulika va leshe Ombibeli pamwe, tave lilongekida pamwe oitukulwa yonhumba yokwoongala nokuninga omadeulo tave lilongekidile oukalele. Ope na omaetepo onhumba taa hangwa pepandja 6 lokafo aka.
7. Ovadali ove na okukendabala opo Ekonakono lOukwaneumbo li kale hali ningwa monghalo ya tya ngahelipi?
7 Ovadali ove na okukendabala opo Ekonakono lOukwaneumbo li kale hali ningwa monghalo ya tya ngahelipi? Oilyo youkwaneumbo otai ke lihonga nawa ngeenge Ekonakono lOukwaneumbo ola kala hali ningwa pahole noi udite ya manguluka. Fimbo limwe otamu dulu okukonakona mu li pondje ngeenge onghalo yomhepo oiwa fiku olo. Omwa manguluka okuya pokafudo ngeenge mu wete sha pumbiwa. Omaukwaneumbo amwe ohaa hafele oushikepengeyo konima yekonakono. Ndele nonande ovadali ove na okuhenuka vaha ninge Ekonakono lOukwaneumbo li li omhito yokuyandja outekuduliko ile yokutangunina ounona, otashi dulika va pumbwa okulongifa efimbo lonhumba lekonakono lavo opo va kandule po oupyakadi wonhumba oo ve wete wa pumbwa okukandulwa po ile va yukife oshinima shonhumba shokondadalunde. Ndele ngeenge ope na oupyakadi wonhumba va hala okukundafana nokaana kamwe, ove na oku shi ninga pomhito imwe i lili ve li ovo aveke nako opo vehe ka fife ohoni moipafi yavakwao. Ekonakono lOukwaneumbo kali na okukala oshinima shififa oudja ile la kwata moiti neenghono, ndele oli na okuulika kutya Kalunga ou hatu longele oKalunga kelao ile kehafo. — 1 Tim. 1:11.
8, 9. Omitwe domaukwaneumbo oda pumbwa okulilongekida shi fike peni?
8 Omutwe woukwaneumbo otau dulu okukala hau lilongekida ngahelipi? Oukwaneumbo otau ka mona ouwa muhapu ngeenge omutwe woukwaneumbo owa kala hau lilongekida komesho yefimbo nokutokola kutya oshike tashi ka kundafanwa pEkonakono lOukwaneumbo nonokutya otave ke shi kundafana monghedi ya tya ngahelipi. (Omayel. 21:5) Otashi ka kala shiwa ngeenge omushamane ta pula omukulukadi waye kutya ye ota ti ngahelipi kombinga yaasho. (Omayel. 15:22) Omafimbo amwe, omitwe domaukwaneumbo oda pumbwa yo okupula ounona va ninge omaetepo avo. Ngeenge oda ningi ngaho, otadi ka dula okumona kutya oshike ve na unene ohokwe musho naasho tave lipula nasho.
9 Omitwe doukwaneumbo inadi pumbwa okukala tadi lilongekida oule wefimbo lilelile oshivike keshe. Oukwaneumbo otashi dulika u kale tau hafele okukonakona oshinima shonhumba oule woivike yonhumba, nokungaho, omutwe woukwaneumbo itau ka pumbwa okukala tau ningi elandulafano lipe laasho tava ka kundafana oshivike keshe. Otashi dulika omutwe woukwaneumbo u ka mone shiwa okukala hau lilongekida konima eshi va mana okukonakona, molwaashi pefimbo opo ou na natango eemhumbwe dopamhepo doukwaneumbo momadiladilo. Omitwe dimwe domaukwaneumbo ohadi ningi elandulafano laasho oukwaneumbo tau ka konakona, ndele tadi li nateke opo oukwaneumbo tau dulu oku li mona noupu, ngaashi kokila yokutalaleka. Osho otashi ka ningifa oilyo youkwaneumbo i kale ya tunhukwa noi kale ya teelela nodjuulufi Ekonakono lOukwaneumbo, otai ka kala yo i na omhito yokulilongekida komesho yefimbo ngeenge osha pumbiwa.
10. Ongahelipi ovaudifi ovo hava kala ovo aveke tava dulu okuninga ekonakono lavo?
10 Ongahelipi ngeenge oilyo youkwaneumbo weni kai li moshili ile ngeenge oho kala oove auke? Ovakriste ovo hava kala ovo aveke ove na okukala hava ningi ekonakono lavo paumwene. Ndele opo ekonakono lavo li kale tali ti sha, otava dulu okukala hava lesha Ombibeli, have lilongekida oitukulwa yokwoongala nosho yo okulesha Oshungonangelo no-Awake! Kakele kokuninga ngaho, ovaudifi vamwe ohave litulile po elalakano lokukonakona oinima imwe vali. Omafimbo amwe, otava dulu okushiva omuudifi wonhumba ile oukwaneumbo wonhumba u uye u hafele pamwe navo eenghundafana dopamhepo tadi tungu.
11, 12. Omauwa amwe elipi haa di mokuninga Ekonakono lOukwaneumbo pandjikilile?
11 Omauwa elipi hatu ka mona ngeenge otwa kala hatu ningi Ekonakono lOukwaneumbo pandjikilile? Ovo hava kufa ombinga nomutima aushe melongelokalunga lashili ohava ehene popepi elela naJehova. Kakele kaasho, omaukwaneumbo ohaa pameke ekwatafano lao ngeenge ohaa longele Jehova pamwe. Ovalihomboli vamwe ova shanga shi na sha nomanangeko noupuna oo va mona, va ti: “Molwaashi otu li ovalihomboli ovakokolindjila tuhe na ounona, ohatu kala twa teelela nodjuulufi onguloshi oyo hatu ningi Ekonakono lOukwaneumbo wetu. Ole tu kwafela tu kale tu na ekwatafano lopofingo notu ehene popepi elela naTate yetu womeulu. Paife ongula keshe yefiku olo hatu ningi ekonakono letu, ohatu pulafana hatu ti: ‘Ou shii ngoo eshi hatu ka ninga nena konguloshi? Ohatu ka ninga Ekonakono lOukwaneumbo!’”
12 Elongekido lEkonakono lOukwaneumbo ola kwafela yo omaukwaneumbo oo e na omalipyakidilo mahapu. Omudalakadi umwe oo ta tekula ovanamati vavali oye aeke noku li omukokolindjila wondjikilile, okwa shanga a ti: “Monakudiwa katwa li hatu ningi Ekonakono lOukwaneumbo pandjikilile molwaashi okwa li handi kala nda loloka. Kanda li ndi shii kutya nandi ninge po shike opo tu kale hatu li ningi pandjikilile. Onghee hano, onde mu shangela opo ndi mu pandule neenghono omolwelongekido lEkonakono lOukwaneumbo. Paife ohatu ningi Ekonakono lOukwaneumbo pandjikilile nohatu mono ouwa.”
13. Oshike tashi ka ufa kutya oukwaneumbo weni otau ka mona ouwa melongekido lEkonakono lOukwaneumbo?
13 Ngaashi Eshabata, Ekonakono lOukwaneumbo nalo oli li oshali ya dja kuTate yetu womeulu oyo tai dulu okukwafela omaukwaneumbo. (Jak. 1:17) Onghedi omo omaukwaneumbo Ovaisrael a li haa diinine Eshabata oyo ya li hai ufa kutya otali ka xwepopaleka ekwatafano lavo naJehova shi fike peni. Sha faafana, onghedi omo hatu ningi Ekonakono lOukwaneumbo oyo tai ka ufa kutya oukwaneumbo wetu otau ka mona ouwa u fike peni. (2 Kor. 9:6; Gal. 6:7, 8; Kol. 3:23, 24) Ngeenge omwa longifa nawa elongekido olo, oukwaneumbo weni otau ka dula okupopya eendjovo da fa odo da popilwe komupsalme umwe oo a ti: “Okukala popepi naKalunga, osho elao lange; elineekelo lange onde li tula mOmwene Kalunga.” — Eps. 73:28.
[Eendjovo dididilikwedi pepandja 5]
Ekonakono lOukwaneumbo kali na okukala oshinima shififa oudja ile la kwata moiti neenghono, ndele oli na okuulika kutya Kalunga ou hatu longele oKalunga kelao ile kehafo
[Oshimhungu pepandja 6]
KA TUVIKILA
Omaetepo amwe e na sha nEkonakono lOukwaneumbo
Ombibeli:
• Lesheni pamwe omatukulwa onhumba Elesho lOmbibeli lokoshivike. Ngeenge ehokololo olo tamu lesha otali kundafana kombinga yovanhu ve lili noku lili, umwe na leshe eendjovo odo da popiwa komunhu umwe ofimbo vakwao nava leshe odo da popiwa kovanhu vamwe ve lili ovo tava hokololwa mehokololo olo.
• Ningeni omatukulwa amwe elesho lOmbibeli monghedi yoshinyandwa.
• Oshilyo keshe shoukwaneumbo nashi pewe etukulwa lonhumba komesho yefimbo olo tashi ka lesha nokudidilika epulo limwe ile avali oo sha hala okupula shi na sha netukulwa olo. Opo nee, kongeni ouyelele u na sha nepulo lakeshe umwe.
• Kaleni hamu shange Omushangwa pokambapila oshivike keshe ndele tamu kendabala okukala mwe u koneka momutwe noku u yelifa. Oumbapila ovo va ongeleni, ndele tamu kala hamu endulula mo oshivike keshe mu tale kutya omishangwa ngapi tamu dimbuluka.
• Pwilikineni kelesho lOmbibeli olo la kwatwa mokangalo nye tamu shikula mEembibeli deni.
Okwoongala:
• Lilongekideni pamwe oitukulwa yonhumba yokwoongala.
• Liendifeni po pomaimbilo Ouhamba oo taa ka imbwa pokwoongala oshivike tashi landula.
• Ngeenge oshilyo shimwe shoukwaneumbo otashi ka yandja oshipopiwa mOfikola yOukalele woPauteokratika ile tashi ka ninga euliko pOkwoongala kwoPailonga, kundafaneni shi na sha naasho tashi dulu oku ka tya, ile shi liendife po moipafi youkwaneumbo.
Eemhumbwe doukwaneumbo:
• Kundafaneni ouyelele wonhumba okudja membo Young People Ask ile membo Lihonga kOmuhongi Munene.
• Liendifeni po shi na sha nanghee ovanyasha tava dulu okuungaunga neenghalo odo tava dulu okushakeneka kofikola.
• Ounona nava pewe omhito va dane onghandangala oyo hai danwa kovadali, vo ovadali tava dana onghandangala oyo hai danwa kounona. Ounona nava ka konge ouyelele kombinga yoshikundafanwa shonhumba opo nee tave uya va tomhafane novadali vavo.
Oukalele:
• Lilongekideni omatwalemo oo tamu ka longifa moukalele mexuliloshivike.
• Kundafaneni omalalakano okondadalunde oo oukwaneumbo tau dulu okulitulila po opo mu dule okutamununa mo oukalele weni pefimbo lEdimbuluko ile pefimbo lefudo.
• Oshilyo keshe shoukwaneumbo nashi pewe omhito shi ka konge ouyelele u na sha nanghee tashi dulu okunyamukula omapulo onhumba oo taa dulu okupulwa moukalele, opo nee, liendifeni po shi na sha naasho.
Omaetepo a wedwa po:
• Lesheni pamwe oshitukulwa shonhumba moshifo osho opo sha piti.
• Ningeni omalongekido opo oshilyo keshe shoukwaneumbo shi leshe komesho yefimbo oshitukulwa shonhumba osho sha hokwa moshifo opo sha piti, opo nee, oshilyo keshe nashi hokolole osho sha lesha.
• Omafimbo amwe, kaleni hamu shivi pEkonakono lOukwaneumbo weni omuudifi wonhumba ile ovalihomboli vonhumba notamu dulu oku va pulapula.
• Taleni nokukundafana kombinga yokavidio kamwe kehangano.
• Kundafaneni oitukulwa yomo-Awake! oyo i na oshipalanyole: “Young People Ask” ile “For Family Review.”
• Kundafaneni oitukulwa yomOshungonangelo yOshiingilisha oyo i na oshipalanyole: “Teach Your Children” ile “For Young People.”
• Lesheni nokukundafana oitukulwa yonhumba oyo i li mo-Yearbook ile moshishangomwa shimwe osho opo sha piti poshoongalele shoshitukulwa.
• Shimha mwa di koshoongalele, kaleni hamu kundafana oitwa ya fimana oyo ya popiwa ko.
• Konakoneni oshinima shonhumba osho Jehova a shita ndele tamu kundafana kutya otashi mu hongo shike kombinga yaYe.
• Kundafaneni shi na sha noshihopaenenwa shonhumba, okaalita ile oshimhungu.