Okwoongala oko kwa fimanenena mondjokonona

OMUMWATATE umwe oo e li oshilyo shOlutuwiliki lEendombwedi daJehova wedina Stephen Lett okwa li a lombwela ovapwilikini vahapu ovo va li pokwoongala kwokomudo eendjovo odo tadi va ningifa va kale va halelela okuuda shihapu pokwoongala oko, a ti: “Eshi okwoongala oku taku ka pwa keshe umwe womunye ota ka tya: ‘Oku okwa li shili okwoongala kwopauteokratika kwokomudo kudidilikwedi mondjokonona yEendombwedi daJehova.’” Eendjovo odo okwa li edi popya pokwoongala kwokomudo kwo-Watch Tower Bible and Tract Society of Pennsylvania okuti-126, oko kwa li kwa ningilwa mOlupale lOyoongalele yEendombwedi daJehova olo li li moshilando Jersey, New Jersey, U.S.A, mo 2 Oktoba 2010. Ndele mbela oinima itunhula ilipi ya li ya kundafanwa pokwoongala oko kwa fimanenena mondjokonona?

Omumwatate Lett okwa li a hovela oshipopiwa shaye ta kundafana kombinga yetemba laJehova lomeulu olo la tumbulwa membo lOmbibeli laHesekiel. Etemba olo linene otali faneke ehangano laJehova olo li li filufilu mewiliko laye. Omumwatate Lett okwa ti kutya oshitukulwa shalo shomeulu, osho sha fikama po moishitwa yopamhepo, ohashi endelele neenghono ngaashi oluvadi, hashi endelele ngaashi omadiladilo aJehova. Oshitukulwa shehangano laJehova shokombada yedu nasho otashi pula komesho. Omumwatate Lett okwa popya shi na sha noiningwanima ihapu itunhula oyo ya ningwa moshitukulwa shehangano laKalunga shokombada yedu omido opo da di ko.

Pashihopaenenwa, oitaimbelewa ihapu oya mbwangwa mumwe. Elunduluko la tya ngaho ole shi ninga tashi shiiva opo ovaudifi vahapu ovo va li hava longo moitaimbelewa oyo va yandje elitulemo koilonga yokuudifa. Omumwatate Lett okwa li a ladipika ovapwilikini va twikile okwiilikanena Olutuwiliki olo li lile po ongudu yomupiya omudiinini li twikile okukala lidiinini nolinaendunge. — Mat. 24:45-47.

Omahokololo taa tungu nomapulapulo taa kumu omutima

Omumwatate wedina Tab Honsberger oo e li oshilyo shOkomitiye yOshitaimbelewa shaHaiti, okwa yandja ehokololo tali kumu omutima li na sha naasho sha li sha ningwa po konima yekakamo ledu olo la li la denga Haiti mo 12 Januali 2010, olo taku tengenekwa kutya ola twaalela eemwenyo dovanhu vomoshilongo osho ve li 300 000 lwaapo. Okwa ti kutya ovahongi vomalongelokalunga ova kala tava lombwele ovanhu kutya Kalunga okwa handukila oohandimwe ovo va fya omolwokuhe na eitavelo kwavo nokwa xupifa ovanhu ava vawa. Ashike pefimbo opo tuu opo, ovanadolongo ovakolokoshi omayovi ova li va dja mo modolongo eshi ekuma lodolongo la li la teywa po kekakamo ledu. Onghee hano, ovanamitimadiwa vahapu vomoshilongo osho otava hekelekwa eshi tave lihongo oshili kutya omolwashike omafiku oo tu li muo e yadi omaupyakadi. Omumwatate Honsberger okwa li yo a tofa mo eendjovo odo da popiwa komumwatate umwe omudiinini wokuHaiti oo omukulukadi waye a fila mekakamo ledu, a ti: “Onda nyika oluhodi fiyo okunena. Kandi shii kutya oluhodi lange otali ka xula po naini, ndele nande ongaho, onda hafa omolwohole oyo nda ulikilwa kwaavo ve li mehangano laJehova. Ondi na eteelelo li na sha nonakwiiwa nonda hala yo okulombwela vamwe kombinga yalo.”

Omumwatate wedina Mark Sanderson oo a li nale oshilyo shOkomitiye yOshitaimbelewa shokuFilipine nota longo paife e li oshilyo shoukwaneumbo waBetel moBrooklyn, okwa li a yandja olaporta kombinga yaFilipine. Omumwatate oo okwa li a hokolola nehafo kutya ovamwatate vomoshilongo osho ova li va hanga oshitwa shopombada shovaudifi lwoikando 32 nokwa hokolola yo kutya omuvalu wovakonakonimbibeli ou dule kokule omuvalu wovaudifi vomoshilongo osho. Okwa li a hokolola oshimoniwa shomumwatate umwe wedina Miguel oo e na omutekulu waye a dipawa. Okwa ti kutya Miguel okwa li a ninga eenghendabala opo omudipai womutekulu waye a pangulwe noku tulwe modolongo. Lwanima, Miguel okwa li a shakena nomunhu oo a dipaa omutekulu waye fimbo a li ta yandje oundombwedi modolongo. Nonande Miguel okwa li a tila omulumenhu oo, okwa li a popya naye nonghenda nonombili. Mokweendelako kwefimbo, Miguel okwa li a hovela okukonakona Ombibeli nomulumenhu oo. Omulumenhu oo okwa li a tambula ko oshili nokwa kulika ohole yokuhola Jehova, nopaife okwa ninginifwa. Paife Miguel okwa ninga kaume kopofingo komulumenhu oo nota ningi eenghendabala opo omumwaxe oo a mangululwe mo diva modolongo.a

Opo nee, okwa ka shikula omapulapulo omo vamwe va li tava pulwa shi na sha nonakudiwa yavo, nomapulapulo a tya ngaho, okwa li a kwatelwa komesho komumwatate Mark Noumair oo e li omuhongi mOshikondo shEefikola dOpauteokratika. Omumwatate oo okwa li a pulapula ovalihomboli tava landula: Alex Reinmueller nomukulukadi waye Sarah, David Schafer nomukulukadi waye Krista nosho yo Robert Ciranko nomukulukadi waye Ketra. Alex Reinmueller, oo ha longo mOkomitiye yOkunyanyangida, okwa li a hokolola nghee a ninga oshili yaye mwene fimbo a li ta kokola ondjila muKanada eshi a li e na omido 15, naluhapu okwa li ha longo momapya oye aeke. Eshi omumwatate Reinmueller a li a pulwa kutya olyelye a li e mu nwefa mo unene nawa moBetel, okwa li a tumbula ovamwatate vatatu ovadiinini nokwa hokolola nghee keshe umwe womuvo a li e mu kwafela a ninge exumokomesho lopamhepo. Omukulukadi waye Sarah okwa li a hokolola nghee a li a panga oukaume nomumwameme umwe oo a li a kanyatela oudiinini waye eshi a li meedolongo muChina oule womido omilongo dihapu omolweitavelo laye. Sarah okwa ti kutya okwe lihonga komumwameme oo okukala e lineekela muJehova nokukala he mu ilikana.

Omumwatate wedina David Schafer oo ha longo mOkomitiye yOkuhonga ota pandula ina molweitavelo laye la kola nokwa li yo a hokolola kombinga yovamwatate ovo va li hava tete omiti, ovo ve mu kwafela a kufe oukwafelikokolindjila fimbo a li omunyasha. Omukulukadi waye Krista okwa hokolola nehafo shi na sha nanghee a li a nwefwa mo nawa kovamwatate novamwameme ovanamido vomoukwaneumbo waBetel ovo va ulika ‘oudiinini wayo moinima inini’ ngaashi Jesus e tu ladipika tu ninge. — Luk. 16:10.

Robert Ciranko, oo ha longo mOkomitiye yOkushanga oileshomwa, okwa hokolola nehafo kombinga yaxekulu nainakulu ovo va dala xe naavo va dala ina, ovo va li eenhauki muHungary nova li Ovakriste ovavaekwa. Omumwatate Robert okwa hokolola kutya okwa li a kumwa eshi a li a ya koyoongalele yoshitukulwa mo 1950 nasha fimbo a li omunyasha. Oyoongalele oyo oya li ye mu kwafela a mone kutya ehangano laJehova ola kula neenghono li dule eongalo lavo. Omukulukadi waye Ketra okwa li a hokolola shi na sha nanghee e lihonga okukala omudiinini pefimbo opo a li omukokolindjila meongalo omo mwa li mu na ovashunimonima nosho yo omaupyakadi amwe vali. Okwa li e lididimikila onghalo ya tya ngaho, nokonima yefimbo okwa ka tuminwa keongalo limwe e li omukokolindjila e likalekelwa nokwa li a kuminwa oukumwe oo wa li meongalo olo.

Konima yaasho, omumwatate wedina Manfred Tonak okwa li a hokolola kombinga yaEtiopia. Etiopia oshilongo osho sha kala ko nale okudja pefimbo lOmbibeli, nopaife osha nangekwa noupuna molwaashi omu na ovaudifi vonghundana iwa ve dulife 9 000. Ovaudifi ovo vahapu ohava di moshilandopangelo Addis Ababa ile popepi nasho. Onghee hano, osho otashi ulike kutya opa li pe na omhumbwe yovaudifi va ka udifile koitukulwa yokomikandi. Opo omhumbwe oyo i wanifwe po, Eendombwedi daJehova dokuEtiopia odo hadi kala moilongo imwe oda li da ladipikwa di shune kuEtiopia oule wefimbo lonhumba opo di ka yambidide oilonga yokuudifa koitukulwa imwe yokomikandi. Ovamwatate vahapu ova li ve linyenga nawa keshivo olo nova li va twa ovamwatate vomoitukulwa oyo omukumo nova li yo va mona vahapu ovo va tambula ko onghundana iwa.

Pokwoongala oko opa li pa yandjwa oipopiwa itunhula ya pambafana oyo ya li tai popi kombinga yEendombwedi daJehova domuRussia nosho yo nghee da kala tadi kondjo opo di mone epopilo lopamhangu. Omumwatate wedina Aulis Bergdahl, oo e li oshilyo shOkomitiye yOshitaimbelewa shaRussia, okwa hokolola shi na sha nondjokonona yokuhepekwa kwEendombwedi daJehova muRussia, unene tuu muMoscow. Omumwatate Philip Brumley oo ha longo mOshikondo shOinima yoPamhangu koshitaimbelewa shokOilongo ya Hangana okwa li a hokolola kombinga yexumokomesho lihokwifa olo la ningwa po meemwedi opo da di ko okudja eshi oikoya omuwoi oyo ya li tai tamanekelwa Eendombwedi daJehova ya li ya konakonwa kOmhangu yOufemba wOmunhu yaEuropa (ECHR). Omhangu oyo oya li ya mona filufilu kutya moikoya aishe oyo omuwoi kamwa li nande oshimwe shi li mondjila, naluhapu oya li ya yelifa nawa kutya omolwashike ouyelele oo ya etelwa uhe li mondjila. Nonande omhangu inai shiivifa natango etokolo layo, omumwatate Brumley okwa ti kutya etokolo lomhangu oyo otashi dulika li ka kume yo oikoya ihapu oyo tai tamanekelwa Eendombwedi moilongo imwe vali.

Konima eshi kwa hokololwa onghundana oyo itunhula, omumwatate Lett okwa li a shiivifa kutya Omhangu yOufemba wOmunhu yaEuropa oya dimina okukonakona oshikoya shonalenale shi na sha noifendela osho sha kala pokati kepangelo laFransa nEendombwedi daJehova domoshilongo osho. Osho otashi kumwifa molwaashi Omhangu oyo ya fimanekwa ihai tambula ko lela oikoya oyo hai etelwa. Fiyo opapa, Eendombwedi daJehova oda twala oikoya 39 komhangu oyo, noikoya yado 37 oya popilwa komhangu oyo. Omumwatate Lett okwa li a ladipika oshiwana shaKalunga ashishe shi kwatele momailikano oikoya oyo tai ungaungwa nayo paife komhangu.

Omumwatate Richard Morlan oo ha longo moshikondo shOfikola yOkudeula Ovakulunhuongalo oye a li a yandja ehokololo laxuuninwa. Okwa li a popya nexwamo kombinga yofikola oyo nosho yo nghee ovakulunhuongalo vamwe va li va ulika olupandu lavo omolwedeulo olo va mona.

Oipopiwa imwe vali oyo ya li ya yandjwa koilyo yOlutuwiliki

Omumwatate Guy Pierce oo e li oshilyo shOlutuwiliki okwa li a yandja oshipopiwa tashi kumu omutima omo a li a kundafana shi na sha nomushangwa womudo 2011, oo u na oshipalanyole, “Lineekela edina laJehova.” (Sef. 3:12, NW) Okwa ti kutya nonande efimbo eli tu li mulo olitunhula koshiwana shaJehova meenghedi dihapu, oli li yo efimbo lidjuu okukaliwa mulo. Efiku linene laJehova ola ehena popepi; ndele nande ongaho, ovanhu vamwe onghee ngoo tava twikile okukonga eameno momalongelokalunga oipupulu, komahangano opapolitika, moinima yopamaliko, moufilosofi nosho yo moinima ikwao ya yukila oko. Ndele opo tu kale twa amenwa shili, otwa pumbwa okwiifana edina laJehova, osho sha kwatela mo okulihonga kombinga yaye, oku mu fimaneka nefimaneko lomoule, okukala twe mu lineekela nosho yo okuulika kutya otu mu hole shili mukeshe osho hatu ningi.

Opo nee, omumwatate David Splane oo e li oshilyo shOlutuwiliki okwa li a yandja oshipopiwa osho tashi ningifa omunhu a diladile moule, shi na oshipalanyole, “Owa ya mo ngoo metulumuko laKalunga?” Okwa yelifa kutya okuya metulumuko laKalunga itashi ti kutya okukala inatu lipyakidila vali, molwaashi Jehova nOmona otava “longo fiyo paife” momukokomoko wefiku letulumuko lopafaneko opo elalakano laJehova li na sha noishitwa yaye yokombada yedu li wanifwe po filufilu. (Joh. 5:17) Ndele mbela ongahelipi hatu dulu okuya metulumuko laKalunga? Shimwe osho twa pumbwa okuninga oshosho kutya otu na okweefa po okulonga oulunde nokukala hatu liyukipalifa. Otwa pumbwa okukala tu na eitavelo tali longo nokukaleka elalakano laKalunga olo momadiladilo, hatu ningi keshe osho hatu dulu opo li dule okuwanifwa po. Efimbo limwe ihashi kala shipu okuninga ngaho, ndele nande ongaho, otwa pumbwa okutambula ko omayele oo hatu pewa kehangano laJehova nokudulika kewiliko lalo. Omumwatate Splane okwa li a ladipika ovapwilikini va ninge eenghendabala ngaashi tava dulu opo va ye metulumuko laKalunga.

Oshipopiwa shaxuuninwa osha li sha yandjwa komumwatate Anthony Morris oo e li oshilyo shOlutuwiliki, nosha li shi na oshipalanyole, “Oshike twa teelela shi ka ningwe po?” Omumwatate Morris okwa li a dimbulukifa ovapwilikini kombinga yomaxunganeko onhumba oo Ovakriste aveshe ovadiinini va teelela nodjuulufi a wanifwe, eshi ninga ta popi nondjungu nonohamu. Omaxunganeko oo okwa kwatela mo eingido li na sha ‘nombili [neameno, NW]’ nosho yo ehanauno lomalongelokalunga oipupulu. (1 Tes. 5:2, 3; Eh. 17:15-17) Omumwatate Morris okwa li a londwela ovapwilikini kutya ngeenge ova mono oiningwanima ya yukila oko tai ningwa inava tya “Harmagedon okwe uya,” molwaashi otashi dulika kai li ewanifo lomaxunganeko oo. Okwa li yo e va ladipika va kulike omaukwatya oo a tumbulwa muMika 7:7, ngaashi ehafo, elididimiko nosho yo oikala yokuteelela. Okwa ladipika yo ovapwilikini aveshe va kale ve na ekwatafano lopofingo nOlutuwiliki, ngaashi naanaa ovakwaita hava kala ve na ekwatafano liwa ngeenge tava i molwoodi linene. Okwa ti: “Omitima deni nadi tiluluke, nye amushe ava hamu teelele Omwene!” — Eps. 31:25.

Pexulilo lokwoongala oko opa li pa ningwa omashiivifo mahokwifa. Omumwatate Geoffrey Jackson oo e li oshilyo shOlutuwiliki okwa li a shiivifa kutya opa ningwa omalongekido e na sha nokuninga omalolelo Oshungonangelo yOshiingilisha sha pupalekwa oyo ya nuninwa ovo vehe shii nawa Oshiingilisha. Opo nee, Stephen Lett okwa li a shiivifa kutya Olutuwiliki ola ninga po omalongekido opo ovapashukili voitukulwa vomOilongo yaHangana novakulukadi vavo va kale hava talelwa po omatalelepo oufita. Okwa li a lombwela ovapwilikini kutya paife Ofikola yOkudeula mOukalele otai kala hai ifanwa Ofikola yOmbibeli yOkudeula Ovamwatate Inava Hombola. Okwa ti yo kutya mafiku otapa ka totwa Ofikola yOmbibeli yOkudeula Ovalihomboli Ovakriste. Ofikola oyo otai ka pa ovalihomboli edeulo la wedwa po opo va dule okulongifwa pauyadi kehangano laJehova. Omumwatate Lett okwa li yo a shiivifa kutya moPatterson otamu ka kala hamu ningilwa Ofikola yOkudeula Ovapashukili Ovaendi nOvakulukadi Vavo omudo keshe nosho yo Ofikola yOilyo yEekomitiye dOitaimbelewa nOvakulukadi Vayo, odo tadi ka kala di na ondodo yotete nonhivali, naavo va li nale keefikola odo otava ka mona yo oufembanghenda wokuya ko vali.

Okwoongala oko okwa li kwa xulifwa po monghedi tai kumu omutima eshi omumwatate John E. Barr oo a li e na omido 97 pefimbo opo a li a ilikana nelininipiko notashi di komutima. Omumwatate oo okwa kala ta longo oule wefimbo lile e li oshilyo shOlutuwiliki.b Pexulilo lokwoongala oko, keshe umwe okwa li e udite kutya efiku olo ola li shili lididilikwedi mondjokonona.

[Omashangelo opedu]

[Eendjovo dididilikwedi pepandja 19]

Ovapwilikini aveshe ova li va tyapula omapulapulo oo a li a ningwa pokwoongala oko

[Eendjovo dididilikwedi pepandja 20]

Jehova okwa nangeka noupuna oilonga yokuudifa yomuEtiopia